ငဝ်ႈၵမ်ႇၽႃႇ 9

ၵတီႉသဵတ်ႈၸႃႇဢၼ်ၽြႃးပဵၼ်ၸဝ်ႈဝႆႉတီႈၼူဝ်းဢႃႇ

1ၽြႃးပဵၼ်ၸဝ်ႈၵေႃႈပၼ်တၢင်းလီတီႈၼူဝ်းဢႃႇ တင်းလုၵ်ႈလၢင်းမၼ်းတင်းလၢႆလႄႈဝႃႈ၊ သူၵိူတ်ႇလဵင်ႉလုၵ်ႈလဵင်ႉလၢင်းလႄႈ ယႂ်ႇၽႄႈၼမ်ၵိုၼ်းတႃႉ။ ႁႂ်ႈတဵမ်လိၼ်မိူင်းတႃႉ။- 2တရိၵ်ႈသၢၼ်ႇဢၼ်မီးၵႃႈၼိူဝ်လိၼ်ၵူႈၸိူဝ်ႉၵူႈမဵဝ်း ဢိၵ်ႇတင်းၼူၵ်ႉၵၢင်ႁၢဝ်ၵူႈၸိူဝ်ႉၵူႈမဵဝ်းတင်းသဵင်ႈတင်းလူင် တၵ်းလႆႈမီးသၽေႃးဢၼ်ၵူဝ်ဢၼ်ႁႄ ၵႃႈတီႈၽၢႆႇၼႃႈသူဢေႃႈ။ ၵဝ်ဢဝ်ၸႃႉၸဵမ်ၶဝ်လႄႈ ၵႃႈဢၼ်ၸၢင်ႈတူင်ႉၸၢင်ႈၼိုင်ၵႃႈၼိူဝ်လိၼ် ဢိၵ်ႇတင်းပႃပၢင်ႇလၢႆႇတင်းသဵင်ႈတင်းလူင်ဢၢပ်ႈပၼ်ၵႃႈၼႂ်းမိုဝ်းသူဢေႃႈ။- 3ၵႃႈဢၼ်ဢသၢၵ်ႈလိပ်းယူႇလႄႈ ၸၢင်ႈတူင်ႉၸၢင်ႈၼိုင်ၼၼ်ႉတၵ်းလႆႈပဵၼ်ပုၼ်ႈဢၼ်သူတၵ်းၵိၼ်ဢေႃႈ။ ၵဝ်ဢဝ်လွင်ႈတၢင်းၵႃႈမီးတင်းသဵင်ႈတင်းလူင် ဢၢပ်ႈပၼ်တီႈသူမိူၼ်ၸိူဝ်ႉၼင်ႇမၢၵ်ႇၼင်ႇမႂ်ၼၼ်ႉဢေႃႈ။- 4ၵူၺ်းၵႃႈဢမ်ႇလႆႈၵိၼ်ၼိူဝ်ႉလူၺ်ႈၵၼ်တင်းလိူတ်ႈမၼ်း ဢၼ်ဝႃႈ ဢသၢၵ်ႈမၼ်းၼၼ်ႉ။- 5ၵဝ်တၵ်းယွၼ်းဢဝ်လိူတ်ႈသူ ဢၼ်ဝႃႈဢသၢၵ်ႈသူဢေႃႈ။ ၵဝ်တၵ်းယွၼ်းဢဝ်တီႈၵူၼ်းတင်းတရိၵ်ႈသၢၼ်ႇတင်းသဵင်ႈတင်းလူင်ဢေႃႈ။ ဢသၢၵ်ႈၵူၼ်းၸိုင်၊ ၵဝ်တၵ်းယွၼ်းဢဝ်တီႈပီႈၵူၼ်းၼွင်ႉၵူၼ်း တင်းသဵင်ႈတင်းလူင်ဢေႃႈ။- 6ၽူႈလႂ်သေဢမ်ႇဝႃႈ၊ ၵေႃႉဢၼ်ထွၵ်ႇလိူတ်ႈၵူၼ်းပႅတ်ႈၼၼ်ႉၸိုင်၊ ၵူၼ်းတၵ်းလႆႈဢဝ်တင်းမိုဝ်း ထွၵ်ႇလိူတ်ႈၵေႃႉၼၼ်ႉပႅတ်ႈဢေႃႈ။ လွင်ႈမၼ်းၸမ်ႉ ၽြႃးပဵၼ်ၸဝ်ႈႁဵတ်းပဵၼ်ၵူၼ်း မိူၼ်ၸိူဝ်ႉၼင်ႇပုင်ႇႁၢင်ႈၽၢင်မၼ်းၸဝ်ႈဢေႃႈ။- 7သူၵိူတ်ႇလဵင်ႉလုၵ်ႈလဵင်ႉလၢင်းလႄႈ ယႂ်ႇၽႄႈၼမ်ၵိုၼ်းမႃးတႃႉ။ ၵိူတ်ႇလဵင်ႉယႂ်ႇယႂ်ႇၼမ်ၼမ် ၵႃႈၼိူဝ်လိၼ်မိူင်းလႄႈ ယႂ်ႇၽႄႈၼမ်ၵိုၼ်းမႃးတႃႉ၊ ဝႃႈၼင်ႇၼႆဢေႃႈ။

8ၵမ်းၼၼ်ႉ ၽြႃးပဵၼ်ၸဝ်ႈသမ်ႉလၢတ်ႈတီႈၼူဝ်းဢႃႇဢိၵ်ႇတင်းလုၵ်ႈလၢင်းမၼ်းတင်းလၢႆလႄႈဝႃႈၸမ်ႉ၊- 9ၵဝ်တူဝ်ၸဝ်ႈၵဝ်ႇႁဵတ်းပတီႉၺိၺ်ႇလူၺ်ႈၵၼ်တင်းသူ ဢိၵ်ႇတင်းၸိူဝ်ႉၶိူဝ်းသူဢၼ်တၵ်းပဵၼ်မႃးမိူဝ်းၼႃႈ၊- 10တင်းတရိၵ်ႈသၢၼ်ႇဢၼ်ဢသၢၵ်ႈလိပ်းယူႇၵႃႈတီႈသူဢၼ်ဝႃႈ ၼူၵ်ႉ၊ တူဝ်ယဵၼ်ႇတူဝ်ငႄႈ၊ တူဝ်ထိူၼ်ႇ ၵႃႈၼိူဝ်လိၼ်ၵႃႈမီးတင်းသဵင်ႈတင်းလူင် ၸႃႉၸဵမ်ၵႃႈဢၼ်ဢွၵ်ႇသေၵႃႈၼႂ်းႁိူဝ်းသၢင်းၽေႃးလူင်လႄႈ တရိၵ်ႈသၢၼ်ႇၵႃႈၼိူဝ်လိၼ်ၵႃႈမီးတင်းသဵင်ႈတင်းလူင်ဢေႃႈ။- 11ပတီႉၺိၺ်ႇဢၼ်ၵဝ်ႁဵတ်းလူၺ်ႈၵၼ်တင်းသူၸမ်ႉ၊ ၵမ်းလိုၼ်းသတ်ႉတဝႃႇၵႃႈမီးတင်းသဵင်ႈတင်းလူင် တၵ်းဢမ်ႇလႆႈသုမ်းလူၺ်ႈတၢင်းဢၼ်ၼမ်ႉထူမ်ႈမိူင်း။ ၵမ်းလိုၼ်းတၢင်းဢၼ်ၼမ်ႉထူမ်ႈမိူင်းတၵ်းဢမ်ႇလႆႈမီးပုၼ်ႈဢၼ်တၵ်းယႃႉၽဵဝ်ႈလိၼ်မိူင်းပႅတ်ႈ၊ ဝႃႈၼင်ႇၼႆဢေႃႈ။

12လိူဝ်သေၼၼ်ႉၽြႃးပဵၼ်ၸဝ်ႈဝႃႈ၊ လၢၵ်ႈၶၼႃႇသၢၵ်ႈသေႇပတီႉၺိၺ်ႇဢၼ်ၵဝ်ႁဵတ်းဝူင်ႈၵၢင်ၵဝ်တင်း ၸႃႉၸဵမ်သူတင်းတရိၵ်ႈသၢၼ်ႇၵႃႈဢၼ်ဢသၢၵ်ႈလိပ်းယူႇၵႃႈတီႈသူ ၸူဝ်ႈလုၵ်ႈပၢၼ်လၢၼ်သိုပ်ႇသိုပ်ႇတၢမ်းတၢမ်းဢမ်ႇထၢတ်ႇၸမ်ႉ၊- 13ၵဝ်ဢဝ်ႁူင်းႁႆးၵဝ်ဝႆႉ ၵႃႈတီႈမွၵ်ႇၵုမ်ႈဢေႃႈ။ ဢၼ်ၼၼ်ႉတၵ်းပဵၼ်လၢၵ်ႈၶၼႃႇသၢၵ်ႈသေႇ ပတီႉၺိၺ်ႇ ဢၼ်ၵဝ်ႁဵတ်းလူၺ်ႈၵၼ်တင်းလိၼ်မိူင်းဢေႃႈ။- 14မိူဝ်ႈဢၼ်ၵဝ်ႁႂ်ႈၽူၼ်ၵုမ်ႈမႃးၼၼ်ႉၸိုင်၊ ႁူင်းႁႆးၼၼ်ႉတၵ်းထၢင်ႇသႃးၵႃႈတီႈမွၵ်ႇၵုမ်ႈဢေႃႈ။- 15မိူဝ်ႈၼၼ်ႉ ၵဝ်တၵ်းၶုၵ်းၸႂ်လႆႈၶႆႈၸႂ်ထူပ်းပတီႉၺိၺ်ႇၵဝ်ဢၼ်မီး ဝူင်ႈၵၢင်ၵဝ်တင်းၸႃႉၸဵမ်သူလႄႈသတ်ႉတဝႃႇ၊တရိၵ်ႈသၢၼ်ႇၵႃႈဢၼ်ဢသၢၵ်ႈလိပ်းယူႇ တင်းသဵင်ႈတင်းလူင်ၼၼ်ႉလႄႈ ၵမ်းလိုၼ်းတၢင်းဢၼ်ၼမ်ႉထူမ်ႈမိူင်း တၵ်းဢမ်ႇလႆႈမီးႁႂ်ႈလႆႈယႃႉၽဵဝ်ႈသတ်ႉတဝႃႇတင်းသဵင်ႈတင်းလူင်ပႅတ်ႈ။- 16ၵဝ်တၵ်းလူတူၺ်းလွင်ႈဢၼ်ႁူင်းႁႆးမီး ၵႃႈတီႈမွၵ်ႇၵုမ်ႈၼၼ်ႉသေလႄႈၶုၵ်းၸႂ်လႆႈၶႆႈၸႂ်ထူပ်းပတီႉၺိၺ်ႇထႃႇဝရႃႉဢၼ်မီးဝူင်ႈၵၢင်ၽြႃးပဵၼ်ၸဝ်ႈတင်းသတ်ႉတဝႃႇ၊တရိၵ်ႈသၢၼ်ႇဢၼ်ဢသၢၵ်ႈလိပ်းယူႇၵႃႈၼိူဝ်လိၼ်မိူင်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

17လိူဝ်သေၼၼ်ႉၽြႃးပဵၼ်ၸဝ်ႈဝႃႈ၊ ဢၼ်ၼႆႉၸမ်ႉ၊ ပဵၼ်လၢၵ်ႈၶၼႃႇသၢၵ်ႈသေႇပတီႉၺိၺ်ႇဢၼ်ၵဝ်ႁဵတ်းဝႆႉဝူင်ႈၵၢင်ၵဝ်တင်းသတ်ႉတဝႃႇဢၼ်မီးၵႃႈၼိူဝ်လိၼ်မိူင်းတင်းသဵင်ႈတင်းလူင်ဢေႃႈ၊ ဝႃႈၼင်ႇၼႆဢေႃႈ။

ၼူဝ်းဢႃႇလႄႈလုၵ်ႈၸၢႆးမၼ်းတင်းလၢႆ

18လုၵ်ႈၸၢႆးၼူဝ်းဢႃႇဢၼ်ဢွၵ်ႇသေၵႃႈၼႂ်းႁိူဝ်းသၢင်းၽေႃးလႄႈလူင်းၼၼ်ႉၸမ်ႉ၊ ပဵၼ်သေႇမႃႉ၊ ႁႃႇမႃႉ၊ တင်းယႃႇၽႅတ်ႈဢေႃႈ။ ႁႃႇမႃႉၼၼ်ႉပဵၼ်ပေႃႈၶႃႇၼၢၼ်ႇဢေႃႈ။- 19ၶဝ်သၢမ်ၵေႃႉၼၼ်ႉ ပဵၼ်လုၵ်ႈၸၢႆးၼူဝ်းဢႃႇလႄႈ သိုပ်ႇၵႃႈတီႈၶဝ်ၼၼ်ႉလူင်းမႃး ၸွတ်ႇတူဝ်ႈၵႃႈၼိူဝ်လိၼ်မိူင်း တင်းသဵင်ႈတင်းလူင်ဢေႃႈ။- 20ၼူဝ်းဢႃႇၸႃႉပွင်ၸႃႉႁဵတ်းတၢင်းဢၼ်လုမ်းလႃးႁႆႊၼႃးလႄႈ ၽုၵ်ႇသွမ်ႈသူၼ်ဢူးယဵၼ်ႇၸပိတ်ႈဢေႃႈ။- 21မၼ်းၵိၼ်ၼမ်ႉၸပိတ်ႈမဝ်းသေယဝ်ႉ၊ ယင်းဢမ်ႇႁူမ်ႇဢမ်ႇမႆၶူဝ်းၼုင်ႈလႄႈ ယူႇၵႃႈတီႈမူဝ်းၵႃႇမၼ်းဢေႃႈ။- 22ႁႃႇမႃႉဢၼ်ပဵၼ်ပေႃႈၶႃႇၼၢၼ်ႇၼၼ်ႉ ႁၼ်လွင်ႈဢၼ်ပေႃႈမၼ်းယူႇတူဝ်ပူၺ်ယူႇၼၼ်ႉလႄႈ မွၵ်ႇလၢတ်ႈတီႈပီႈဢၢႆႈမၼ်းသွင်ၵေႃႉဢၼ်မီးၵႃႈတီႈၽၢႆႇၼွၵ်ႈဢေႃႈ။- 23သေႇမႃႉတင်းယႃႇၽႅတ်ႈၼၼ်ႉ ဢဝ်ၶူဝ်းၼုင်ႈတၢင်းမႆလႄႈ တၢင်ႇၵႃႈၼိူဝ်ႁူဝ်မႃႇသွင်ၶႃသေယဝ်ႉ၊ ဢဝ်တၢင်းလင်သုတ်ႉၸူးလႄႈႁူမ်ႇပၼ်တူဝ်ပူၺ်ပေႃႈသွင်ၶႃၼၼ်ႉဢေႃႈ။ သွင်ၶႃၼၼ်ႉဝၢႆႇၼႃႈဢွၵ်ႇၽၢႆႇတၢင်းၼွၵ်ႈယူႇလႄႈ ဢမ်ႇႁၼ်တူဝ်ပူၺ်ပေႃႈသွင်ၶႃၼၼ်ႉ။- 24ၼူဝ်းဢႃႇၼၼ်ႉႁူႉတူဝ်မႃးၼႂ်းတၢင်းဢၼ်မဝ်းလဝ်ႈၼၼ်ႉလႄႈ ႁူႉလွင်ႈဢၼ်လုၵ်ႈၸၢႆးၵေႃႉလဵၵ်ႉႁဵတ်းၼၼ်ႉသေယဝ်ႉ၊ လၢတ်ႈလႄႈဝႃႈ၊- 25ႁႂ်ႈၶႃႇၼၢၼ်ႇၶၢမ်ႇတၢင်းၵိၼ်ႇတၢင်းဝႃႈသေၵမ်းလူၺ်ႈ။ ႁႂ်ႈမၼ်းပဵၼ်ၶႃႈတႂ်ႈၶႃႈပီႈဢၢႆႈမၼ်းတင်းလၢႆၼၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။- 26ၵမ်းၼၼ်ႉ မၼ်းသမ်ႉလၢတ်ႈလႄႈဝႃႈ၊ ႁႂ်ႈထႃႇဝရႃႉၽြႃးၽြႃးပဵၼ်ၸဝ်ႈသေႇမႃႉ မီးမင်ႇၵလႃႇသေၵမ်းလူၺ်ႈ။- 27ၽြႃးပဵၼ်ၸဝ်ႈ ႁႂ်ႈယႃႇၽႅတ်ႈယႂ်ႇၵႂၢင်ႈမႃးသေယဝ်ႉ၊ မၼ်းၵေႃႈႁႂ်ႈယူႇၵႃႈၼႂ်းမူဝ်းၵႃႇသေႇမႃႉသေၵမ်းလူၺ်ႈ။ ၶႃႇၼၢၼ်ႇၸမ်ႉ၊ ႁႂ်ႈၶႃႇၼၢၼ်ႇပဵၼ်ၶႃႈမၼ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။

28ဝၢႆးသေၼမ်ႉထူမ်ႈမိူင်းယဝ်ႉၼၼ်ႉ၊ ၼူဝ်းဢႃႇဢသၢၵ်ႈလိပ်းယူႇ သၢမ်ပၢၵ်ႇပၢႆႁႃႈသိပ်းပီႊလႄႈ၊- 29မိူဝ်ႈဢၼ်ဢသၢၵ်ႈမၼ်းထူၼ်ႈတဵမ် ၵဝ်ႈပၢၵ်ႇပၢႆႁႃႈသိပ်းပီႊၼၼ်ႉၸိုင်၊ တၢႆသေဢေႃႈ။

Currently Selected:

ငဝ်ႈၵမ်ႇၽႃႇ 9: CBMS

Highlight

Copy