ငဝ်ႈၵမ်ႇၽႃႇ 8

လွင်ႈတၢင်းဢၼ်ၼမ်ႉထူမ်ႈမိူင်းပူၼ်ႉၵႂႃႇ

1ၽြႃးပဵၼ်ၸဝ်ႈၶုၵ်းၸႂ်လႆႈၶႆႈၸႂ်ထူပ်းၸႃႉၸဵမ်ၼူဝ်းဢႃႇလႄႈ သတ်ႉတဝႃႇၵႃႈဢၼ်ဢသၢၵ်ႈလိပ်းယူႇလႂ်၊ တရိၵ်ႈသၢၼ်ႇဢၼ်မီးယူႇလူၺ်ႈၵၼ်တင်းၼူဝ်းဢႃႇၵႃႈၼႂ်းႁိူဝ်းသၢင်းၽေႃးတင်းသဵင်ႈတင်းလူင်လႂ်ၼၼ်ႉလႄႈ ႁႂ်ႈလူမ်းထူဝ်းမႃးၵႃႈၼိူဝ်လိၼ်မိူင်းလႄႈ ၼမ်ႉၼိမ်ၵႂႃႇသေဢေႃႈ။- 2မၼ်းၸဝ်ႈဢိုတ်းႁူးၼမ်ႉၶုမ်ၼမ်ႉဢၼ်မီးၵႃႈၼႂ်းတီႈတၢင်းဢၼ်လိုၵ်ႉဢၼ်လမ်ႇဢိၵ်ႇတင်းႁူးၼမ်ႉဢၼ်မီးၵႃႈၼိူဝ်ၵၢင်ႁၢဝ်တင်းလၢႆၸိူဝ်းၼၼ်ႉသေလႄႈ ႁႂ်ႈၽူၼ်ႁိူတ်ႇဢေႃႈ။- 3ၼမ်ႉၵေႃႈ လႆၶိုၼ်းလူင်းသေၵႃႈၼိူဝ်လိၼ်ၵႂႃႇတႃႇသေႇဢမ်ႇထၢတ်ႇလႄႈ ၸႃႉၸဵမ်တီႈသုတ်းပၢၵ်ႇပၢႆႁႃႈသိပ်းဝၼ်းၼၼ်ႉလႄႈ ယွမ်းၵႂႃႇယူႇဢေႃႈ။

4လိူၼ်သတ်ႉတမႃႉ သိပ်းၸဵတ်းဝၼ်း၊ ႁိူဝ်းသၢင်းၽေႃးၼၼ်ႉ တၢင်ႇၵႃႈၼိူဝ်လွႆဢၼ်လႆႈၸိုဝ်ႈဢႃႇရရတ်ႉဢေႃႈ။- 5ၼမ်ႉၼၼ်ႉယွမ်းၵႂႃႇယူႇတႃႇသေႇဢမ်ႇထၢတ်ႇတေႃႇထိုင်ႁွတ်ႈလိူၼ်တႃႉသမႃႉလႄႈၼႂ်းလိူၼ်ၼၼ်ႉမႂ်ႇၶမ်ႈၼိုင်ႈ၊ ပၢႆလွႆတင်းလၢႆ ပေႃႇဢွၵ်ႇဢေႃႈ။

6ၸႃႉၸဵမ်မိူဝ်ႈၼၼ်ႉလႄႈ လႆႈသီႇသိပ်းဝၼ်းသေယဝ်ႉ၊ ၼူဝ်းဢႃႇၽုၺ်ႇႁူးလၢင်းတဵၼ် ဢၼ်ႁဵတ်းဝႆႉၵႃႈၼႂ်းႁိူဝ်းသၢင်းၽေႃး ၼၼ်ႉလႄႈ၊ ပွႆႇၵႃလမ်တူဝ်ၼိုင်ႈဢေႃႈ။- 7ၵႃလမ်ၼၼ်ႉၵႂႃႇၵႂႃႇမႃးမႃးယူႇ တေႃႇထိုင်ႁွတ်ႈၸူဝ်ႈဢၼ်ၼမ်ႉဢမ်ႇပႆႇႁႅင်ႈသေၵႃႈၼိူဝ်လိၼ်ၼၼ်ႉဢေႃႈ။- 8ၵမ်းၼၼ်ႉ မၼ်းသမ်ႉပွႆႇၼူၵ်ႉတူႈတူဝ်ၼိုင်ႈ ႁႂ်ႈလႆႈႁူႉလွင်ႈဢၼ်ၼမ်ႉသဵင်ႈသေၵႃႈၼိူဝ်ၼႃႈလိၼ်ႁိုဝ် ဢမ်ႇသဵင်ႈႁိုဝ်ၼၼ်ႉဢေႃႈ။- 9ပိူဝ်ႈဢၼ်ၼမ်ႉယင်းမီးယူႇၵႃႈၼိူဝ်ၼႃႈလိၼ်ၵူႈတီႈၵူႈလႅၼ်လႄႈ၊ ၼူၵ်ႉတူႈၼၼ်ႉဢမ်ႇထူပ်းတီႈပုၼ်ႈဢၼ်ၽႃႇတိၼ်မၼ်းတၵ်းယဵပ်ႇလႄႈ သမ်ႉၶိုၼ်းမႃးၸူးၵႃႈတီႈၼူဝ်းဢႃႇ ၵႃႈၼႂ်းႁိူဝ်းသၢင်းၽေႃးဢေႃႈ။ မၼ်းၵေႃႈ ယိုၼ်ႈမိုဝ်းမၼ်းသေလႄႈ ယိပ်းဢဝ်ၼူၵ်ႉတူႈၼၼ်ႉသေယဝ်ႉ၊ သႂၢင်းသႂ်ႇၵႃႈၼႂ်းႁိူဝ်းသၢင်းၽေႃးဢေႃႈ။- 10ၵမ်းၼၼ်ႉ ယူႇၸဵတ်းဝၼ်းထႅင်ႈသေယဝ်ႉ၊ သမ်ႉၶိုၼ်းဢဝ်ၼူၵ်ႉတူႈၼၼ်ႉသေလႄႈပွႆႇဢွၵ်ႇသေ ၵႃႈၼႂ်းႁိူဝ်းသၢင်းၽေႃးဢေႃႈ။- 11ၶိင်ႇႁူဝ်ၶမ်ႈၼူၵ်ႉတူႈၼၼ်ႉၶိုၼ်းမႃးၸူးၵႃႈတီႈၼူဝ်းဢႃႇလႄႈ၊ ပိူဝ်ႈဢၼ်မႂ်တူၼ်ႈသၢၼ်ႇလုၼ်ႇဢၼ်မၼ်းသၵ်းၵၢပ်ႈၼၼ်ႉပႃးမႃး ၵႃႈၼႂ်းသူပ်းမၼ်းလႄႈ၊ ၼူဝ်းဢႃႇႁူႉလွင်ႈဢၼ်ၼမ်ႉသဵင်ႈသေၵႃႈၼိူဝ်လိၼ်မိူင်းၼၼ်ႉဢေႃႈ။- 12ၵမ်းၼၼ်ႉ ယူႇၸဵတ်းဝၼ်းထႅင်ႈသေယဝ်ႉ၊ သမ်ႉၶိုၼ်းပွႆႇၼူၵ်ႉတူႈၼၼ်ႉၵႂႃႇဢေႃႈ။ လိုၼ်းၼၼ်ႉၼူၵ်ႉတူႈၼၼ်ႉဢမ်ႇၶိုၼ်းမႃးၸူးမၼ်းလႄႈ ယူႇသေဢေႃႈ။

13ပီႊမိူင်းႁူၵ်းပၢၵ်ႇပၢႆပီႊၼိုင်ႈ၊ လိူၼ်ပထမႃႉမႂ်ႇၶမ်ႈၼိုင်ႈ၊ ၼမ်ႉၶိုၼ်းယွမ်းလူင်းသေၵႃႈၼိူဝ်လိၼ်မိူင်းယဝ်ႉယဝ်ႉလႄႈ၊ ၼူဝ်းဢႃႇၼၼ်ႉ ယႃႉဢၼ်မုင်းႁိူဝ်းသၢင်းၽေႃးပႅတ်ႈလႄႈ မိူဝ်ႈဢၼ်လူတူၺ်းၸိုင်၊ ႁၼ်လွင်ႈဢၼ်ၼမ်ႉၶိုၼ်းယွမ်းလူင်းသေ ၵႃႈၼိူဝ်ၼႃႈလိၼ်ယဝ်ႉၼၼ်ႉဢေႃႈ။- 14လိူၼ်တူႉတီႉယႃႉ သၢဝ်းၸဵတ်းဝၼ်း၊ လိၼ်မိူင်းယူတ်းႁႅင်ႈဢေႃႈ။

15ၽြႃးပဵၼ်ၸဝ်ႈၵေႃႈ လၢတ်ႈတီႈၼူဝ်းဢႃႇလႄႈဝႃႈ၊- 16ၸႃႉၸဵမ်မႂ်းတင်းမေးမႂ်းလႄႈလုၵ်ႈၸၢႆးမႂ်းလႂ်၊ လုၵ်ႈပႂ်ႉမႂ်းလႂ်ဢွၼ်ၵၼ်ဢွၵ်ႇသေၵႃႈၼႂ်းႁိူဝ်းသၢင်းၽေႃးလႄႈ လူင်းတႃႉ။- 17ဢဝ်တရိၵ်ႈသၢၼ်ႇ ဢၼ်ဢသၢၵ်ႈလိပ်းယူႇ ၵႃႈတီႈမႂ်းၵူႈၸိူဝ်ႉၵူႈပိူင်ဢၼ်ဝႃႈ ၼူၵ်ႉလႂ်၊ တူဝ်လႂ်၊ တရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းၵႃႈၼိူဝ်လိၼ်လႂ်ၵႃႈမီးၸိူဝ်းၼႆႉ ဢွၵ်ႇလူၺ်ႈၵၼ်တင်းမႂ်းတႃႉ။ ႁႂ်ႈၶဝ်ၵိူတ်ႇလဵင်ႉလုၵ်ႈလဵင်ႉလၢင်းလႄႈ ယႂ်ႇၽႄႈၼမ်ၵိုၼ်း ၵႃႈၼိူဝ်လိၼ်တႃႉ၊ ဝႃႈၼင်ႇၼႆဢေႃႈ။- 18မိူဝ်ႈၼၼ်ႉၸႃႉၸဵမ်ၼူဝ်းဢႃႇတင်းမေးမၼ်းလႄႈလုၵ်ႈၸၢႆးမၼ်းလႂ်၊ လုၵ်ႈပႂ်ႉမၼ်းလႂ်၊ ဢွၼ်ၵၼ်ဢွၵ်ႇသေလႄႈလူင်းဢေႃႈ။- 19တူဝ်လႂ်၊ တရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းလႂ်၊ ၼူၵ်ႉလႂ်၊ ၵႃႈဢၼ်ၸၢင်ႈတူင်ႉၸၢင်ႈၼိုင်ၵႃႈၼိူဝ်လိၼ်ၵူႈၸိူဝ်ႉၵူႈပိူင် တင်းသဵင်ႈတင်းလူင်ၵေႃႈ ဢွၼ်ၵၼ်ဢွၵ်ႇသေၵႃႈၼႂ်းႁိူဝ်းသၢင်းၽေႃးလႄႈလူင်းဢေႃႈ။

ၼူဝ်းဢႃႇသၢၵ်ႈလူႇတီႈၽြႃးပဵၼ်ၸဝ်ႈ

20 ၼူဝ်းဢႃႇၵေႃႈတႄႇႁဵတ်းယိတ်ႈပလၢင်ႇ ပုၼ်ႈထႃႇဝရႃႉၽြႃးလႄႈ ဢဝ်ၵႃႈၼႂ်းတူဝ်ဢၼ်မူတ်းသႂ်လႂ် တင်းၼူၵ်ႉဢၼ်မူတ်းသႂ်လႂ် ၵူႈမဵဝ်းပုၵ်ႈၸေႃႇယိတ်ႈဢၼ်တုတ်ႇၽႆး ၵႃႈၼိူဝ်ယိတ်ႈပလၢင်ႇဢေႃႈ။- 21ထႃႇဝရႃႉၽြႃးၵေႃႈ ၶၢမ်ႇဢဝ်ဢၢႆဢၼ်ႁွမ်ဢၼ်ႁူၺ်းသေလႄႈ လၢတ်ႈၼႂ်းၸႂ်လႄႈဝႃႈ၊ ၵမ်းလိုၼ်းၵဝ်တၵ်းဢမ်ႇၵိၼ်ႇဢမ်ႇဝႃႈလိၼ်မိူင်းၵွပ်ႈပိူဝ်ႈၵူၼ်း။ လွင်ႈမၼ်းၸမ်ႉ ၵူၼ်းတင်းလၢႆၸိုင်၊ တၢင်းၵျၢမ်ႇတၢင်းပွင်ႁူဝ်ၸႂ်ႁၢႆႉမိူၵ်ႈ ၸႃႉၸဵမ်မိူဝ်ႈဢၼ်ယင်းလဵၵ်ႉၼၼ်ႉဢေႃႈ။ ၸိူဝ်ႉၼင်ႇဢၼ်ၵဝ်ႁဵတ်းမႃးယဝ်ႉပွၵ်ႈၼိုင်ႈၼၼ်ႉ၊ ၵဝ်တၵ်းဢမ်ႇပၼ်တၢမ်ႇတီႈၶဝ်ၸိူဝ်းဢၼ်ဢသၢၵ်ႈလိပ်းယူႇတင်းသဵင်ႈတင်းလူင်ၼၼ်ႉ။- 22ၸူဝ်ႈဢၼ်လိၼ်မိူင်းယင်းမီးယူႇၼႆႉ၊ ၶိင်ႇဢၼ်တၵ်းလႆႈဝၢၼ်ႇၸိူဝ်ႉဝၢၼ်ႇၽၼ်း၊ ၶိင်ႇဢၼ်တၵ်းလႆႈသိမ်းမၢၵ်ႇသိမ်းႁူင်း၊ ၶိင်ႇၵတ်းၶိင်ႇမႆႈ၊ ၶိင်ႇႁိုဝ်ႉၶိင်ႇႁႅင်ႈ၊ ၵႃဝၼ်းၵႃၶိုၼ်း၊ ဢမ်ႇလႆႈထၢတ်ႇ၊ ဝႃႈၼင်ႇၼႆဢေႃႈ။

Currently Selected:

ငဝ်ႈၵမ်ႇၽႃႇ 8: CBMS

Highlight

Copy