ငဝ်ႈၵမ်ႇၽႃႇ 7

ၼမ်ႉထူမ်ႈလိၼ်မိူင်း

1ဝၢႆးၼၼ်ႉထႃႇဝရႃႉၽြႃးသမ်ႉမီးဢမိင်ႉသင်ႇလၢတ်ႈဝႆႉတီႈၼူဝ်းဢႃႇၼၼ်ႉထႅင်ႈလႄႈဝႃႈၸမ်ႉ၊ ပိူဝ်ႈဢၼ်ၵဝ်ႁူႉႁၼ်လွင်ႈဢၼ်မႂ်းသိုဝ်ႈတေႃႇၵႃႈတီႈၽၢႆႇၼႃႈၵဝ် ၵႃႈၼႂ်းမဵဝ်းၸိူဝ်ႉၶိူဝ်းၶိင်ႇၵႃႇလႃႉမိူဝ်ႈလဵဝ်ၼႆႉလႄႈ၊ ၸႃႉၸဵမ်မႂ်းဢိၵ်ႇတင်းၵူၼ်းႁိူၼ်းၵူၼ်းယေးမႂ်း ဢွၼ်ၵၼ်ၶဝ်ႈၵႃႈၼႂ်းႁိူဝ်းသၢင်းၽေႃးတႃႉ။- 2ၼင်ႇႁိုဝ်ၸိူဝ်ႉၶိူဝ်းတရိၵ်ႈသၢၼ်ႇတၵ်းဢသၢၵ်ႈလိပ်းလႄႈ သိုပ်ႇၵႂႃႇမိူဝ်းၼႃႈယူႇၵႃႈၼိူဝ်ၼႃႈလိၼ်မိူင်းၼႆႉၸိုင်၊ မႂ်းတၵ်းလႆႈဢဝ်ၵႃႈတီႈတူဝ်မဵဝ်းဢၼ်မူတ်းသႂ်ယေႈမဵဝ်း၊ တူဝ်ပေႃႈတူဝ်မႄႈၸဵတ်းၵူႈ၊ ၵႃႈတီႈတူဝ်မဵဝ်းဢၼ်ဢမ်ႇမူတ်းသႂ်ယေႈမဵဝ်းတူဝ်ပေႃႈတူဝ်မႄႈသွင်ၵူႈ၊- 3ၵႃႈတီႈၼူၵ်ႉၵၢင်ႁၢဝ်ယေႈမဵဝ်း တူဝ်ပေႃႈတူဝ်မႄႈယေႈမဵဝ်းၸဵတ်းၵူႈ၊ သိမ်းဝႆႉတီႈမႂ်းဢေႃႈ။- 4လွင်ႈမၼ်းၸမ်ႉ ၸႃႉၸဵမ်မိူဝ်ႈၼႆႉၵႂႃႇမိူဝ်းၼႃႈ တေႃႇထိုင်ႁွတ်ႈၸဵတ်းဝၼ်း၊ ၵဝ်တၵ်းႁႂ်ႈၽူၼ်တူၵ်းၵႃႈၼိူဝ်လိၼ်မိူင်းၼႆႉ သီႇသိပ်းဝၼ်းသီႇသိပ်းၶိုၼ်းတဵမ်တဵမ်ဢေႃႈ။ ၵဝ်တၵ်းယႃႉၽဵဝ်ႈသတ်ႉတဝႃႇဢၼ်ၵဝ်ႁဵတ်းပဵၼ်ၵႃႈမီးတင်းသဵင်ႈတင်းလူင်ပႅတ်ႈသေၵႃႈၼိူဝ်ၼႃႈလိၼ်မိူင်းၼႆႉဢေႃႈ၊ ဝႃႈၼင်ႇၼႆဢေႃႈ။

5ၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉ၊ ၼူဝ်းဢႃႇႁဵတ်းၸွမ်းဢေႃႈ။- 6မိူဝ်ႈဢၼ်မၼ်းၸဝ်ႈႁႂ်ႈၼမ်ႉထူမ်ႈမိူင်းၼၼ်ႉ၊ ၼူဝ်းဢႃႇဢသၢၵ်ႈလႆႈႁူၵ်းပၢၵ်ႇပီႊဢေႃႈ။- 7ၼူဝ်းဢႃႇဢိၵ်ႇတင်းလုၵ်ႈၸၢႆးမၼ်းမေးမၼ်းတင်းလုၵ်ႈပႂ်ႉမၼ်းတင်းလၢႆ ဢွၼ်ၵၼ်ၶဝ်ႈၵႃႈၼႂ်းႁိူဝ်းသၢင်းၽေႃး ၵွပ်ႈပိူဝ်ႈတၢင်းဢၼ် ၼမ်ႉထူမ်ႈမိူင်းၼၼ်ႉလႄႈ၊- 8ၵႃႈၼင်ႇဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉၼၼ်ႉ၊ ၵႃႈၼႂ်းတူဝ်ဢၼ်မူတ်းသႂ်လႂ်၊ ၵႃႈၼႂ်းတူဝ်ဢၼ်ဢမ်ႇမူတ်းသႂ်လႂ်၊ ၵႃႈၼႂ်းၼူၵ်ႉလႂ်၊ ၵႃႈၼႂ်းတရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းၵႃႈၼိူဝ်လိၼ်လႂ်၊ တူဝ်ပေႃႈတူဝ်မႄႈၵူပ်ႉၵူႈၵၼ်လႄႈ၊- 9ဢွၼ်ၵၼ်ၶဝ်ႈၸူးၵႃႈတီႈ ၼူဝ်းဢႃႇ ၵႃႈၼႂ်းႁိူဝ်းသၢင်းၽေႃးၼၼ်ႉဢေႃႈ။

10မိူဝ်ႈဢၼ်ပူၼ်ႉသေၸဵတ်းဝၼ်းယဝ်ႉၼၼ်ႉၸိုင်၊ ၼမ်ႉဢၼ်ထူမ်ႈၼၼ်ႉပေႃႇမႃးၵႃႈၼိူဝ်လိၼ်မိူင်းဢေႃႈ။- 11ၼႂ်းဝၼ်းဢၼ်ပီႊဢၼ်ဢသၢၵ်ႈၼူဝ်းဢႃႇ ထူၼ်ႈထိုင်ႁူၵ်းပၢၵ်ႇပီႊ၊ လိူၼ်တူႉတီႉယႃႉ သိပ်းၸဵတ်းဝၼ်းၼၼ်ႉ ႁူးၼမ်ႉၶုမ်ၼမ်ႉဢၼ်မီးၵႃႈၼႂ်းတီႈဢၼ်လိုၵ်ႉဢၼ်လမ်ႇဢၼ်ယႂ်ႇၵႂၢင်ႈၼႃႇၼၼ်ႉၵႃႈမီးတင်းသဵင်ႈတင်းလူင်လူႉလႅဝ်လႄႈ ႁူးၼမ်ႉၵႃႈၼိူဝ်ၵၢင်ႁၢဝ်တင်းလၢႆၵေႃႈၽုၺ်ႇပိုတ်ႇဝႆႉသေယဝ်ႉ၊- 12ၽူၼ်တူၵ်းၵႃႈၼိူဝ်လိၼ်မိူင်းသီႇသိပ်းဝၼ်း တင်းသီႇသိပ်းၶိုၼ်းတဵမ်တဵမ်ဢေႃႈ။- 13ၼႂ်းဝၼ်းၼၼ်ႉ၊ၸႃႉၸဵမ်ၼူဝ်းဢႃႇတင်းမေးမၼ်းလႄႈသေႇမႃႉ၊ ႁႃႇမႃႉ၊ ယႃႇၽႅတ်ႈဢၼ်ဝႃႈလုၵ်ႈၸၢႆးၼူဝ်းဢႃႇသၢမ်ၵေႃႉ တင်းလုၵ်ႈပႂ်ႉမၼ်းသၢမ်ၵေႃႉ၊- 14ဢိၵ်ႇတင်းမဵဝ်းတူဝ်ႁၢႆႉ၊ မဵဝ်းတူဝ်ယဵၼ်ႇတူဝ်ငႄႈ၊ မဵဝ်းတရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းၵႃႈၼိူဝ်လိၼ်၊ မဵဝ်းၵႆႇ၊ မဵဝ်းၼူၵ်ႉဢၼ်ၸၢင်ႈမိၼ်ၸိူဝ်းၼၼ်ႉ ဢွၼ်ၵၼ်ၶဝ်ႈၵႃႈၼႂ်းႁိူဝ်းသၢင်းၽေႃးဢေႃႈ။- 15ၵႃႈၼႂ်းသတ်ႉတဝႃႇဢၼ်ဢသၢၵ်ႈလိပ်းၵူႈမဵဝ်းၼၼ်ႉ၊ ပဵၼ်ၵူပ်ႉပဵၼ်ၵူႈသေလႄႈဢွၼ်ၵၼ်ၶဝ်ႈၸူးၵႃႈတီႈၼူဝ်းဢႃႇ ၵႃႈၼႂ်းႁိူဝ်းသၢင်းၽေႃးဢေႃႈ။- 16ၵႃႈၼင်ႇဢၼ်ၽြႃးပဵၼ်ၸဝ်ႈသင်ႇလၢတ်ႈဝႆႉတီႈၼူဝ်းဢႃႇၼၼ်ႉ၊ ၵႃႈၼႂ်းသတ်ႉတဝႃႇၵူႈၸိူဝ်ႉၵူႈမဵဝ်းတူဝ်ပေႃႈတူဝ်မႄႈ ဢွၼ်ၵၼ်ၶဝ်ႈဢေႃႈ။ ထႃႇဝရႃႉၽြႃးၵေႃႈ ဢိုတ်းႁပ်းၼူဝ်းဢႃႇဝႆႉၵႃႈၼႂ်းဢေႃႈ။

17တၢင်းဢၼ်ၼမ်ႉထူမ်ႈၼၼ်ႉယႂ်ႇၽႄႈၼမ်ၵိုၼ်းမႃး ၵႃႈၼိူဝ်လိၼ်မိူင်း သီႇသိပ်းဝၼ်းတဵမ်တဵမ်ယူႇသေသေလႄႈ ႁႂ်ႈႁိူဝ်းသၢင်းၽေႃးၽၢတ်ႇယၢၼ်ၵၼ်တင်းလိၼ်သေလႄႈ ယုၵ်ႉၶိုၼ်ႈဢေႃႈ။- 18ၵမ်းၼၼ်ႉ ၼမ်ႉယႂ်ႇၽႄႈၼႃႇလႄႈ ၼမ်ၵိုၼ်းမႃးၵႃႈၼိူဝ်လိၼ်မိူင်းၼႃႇလူင်လၢင်လႄႈ ႁိူဝ်းသၢင်းၽေႃးၼၼ်ႉ ၽူးလွင်ႈၵႃႈၼိူဝ်ၼႃႈၼမ်ႉယူႇဢေႃႈ။- 19လိုၼ်းၼၼ်ႉ ၼမ်ႉယႂ်ႇၽႄႈၼႃႇလူင်လၢင်လႄႈ လွႆလူင်ၵႃႈဢၼ်မီးတႂ်ႈၽႃႉၵၢင်ႁၢဝ်တင်းသဵင်ႈတင်းလူင် ၸူမ်ၵႂႃႇဢေႃႈ။- 20ၼမ်ႉပူၼ်ႉၶိုၼ်ႈၵႃႈၼိူဝ်ၵႃႈမီးတင်းသဵင်ႈတင်းလူင် သိပ်းႁႃႈသွၵ်ႇလႄႈ လွႆတင်းသဵင်ႈတင်းလူင်ၸူမ်ၵႂႃႇဢေႃႈ။

21တရိၵ်ႈသၢၼ်ႇဢၼ်ၸၢင်ႈတူင်ႉၸၢင်ႈၼိုင် ၵႃႈၼိူဝ်လိၼ်ၵူႈၸိူဝ်ႉၵူႈမဵဝ်းဢၼ်ဝႃႈ ၼူၵ်ႉ၊တူဝ်ယဵၼ်ႇတူဝ်ငႄႈ၊တူဝ်ႁၢႆႉ၊တရိၵ်ႈသၢၼ်ႇဢၼ်ၸၢင်ႈၵႂႃႇၸၢင်ႈၵၢၼ်းတင်းသဵင်ႈတင်းလူင် ဢိၵ်ႇတင်းၵူၼ်းတင်းသဵင်ႈတင်းလူင်တၢႆသဵင်ႈဢေႃႈ။- 22ၵႃႈဢၼ်ထူၺ်ႈၸႂ်ဢသၢၵ်ႈယူႇလႄႈ မီးၵႃႈၼိူဝ်လိၼ်တင်းသဵင်ႈတင်းလူင်တၢႆသဵင်ႈဢေႃႈ။- 23မၼ်းၸဝ်ႈယႃႉၽဵဝ်ႈၵႃႈဢၼ်ဢသၢၵ်ႈလိပ်းယူႇလႄႈ မီးၵႃႈၼိူဝ်ၼႃႈလိၼ်တင်းသဵင်ႈတင်းလူင်ဢၼ်ဝႃႈ ၵူၼ်းလႂ်၊ တူဝ်လႂ် ဢၼ်ၸၢင်ႈၵႂႃႇၸၢင်ႈၵၢၼ်းလႂ်၊ ၼူၵ်ႉၵၢင်ႁၢဝ်လႂ်ပႅတ်ႈဢေႃႈ။ ၶဝ်ႁွတ်ႈထိုင်တၢင်းဢၼ်လူႉလႅဝ်ႁၢႆလၢႆၵႃႈၼိူဝ်လိၼ်မိူင်းဢေႃႈ။ ယင်းၵိုတ်းဝႆႉ ၸႃႉၸဵမ်ၼူဝ်းဢႃႇလႄႈ ၶဝ်ၸိူဝ်းဢၼ်မီးယူႇလူၺ်ႈၵၼ်တင်းမၼ်းၵႃႈၼႂ်းႁိူဝ်းသၢင်းၽေႃးၼၼ်ႉၵူၺ်းဢေႃႈ။- 24ၼမ်ႉၵေႃႈတႄႇယူႇၵႃႈၼိူဝ်လိၼ်မိူင်း ယႂ်ႇၼႃႇလူင်လၢင် ပၢၵ်ႇပၢႆႁႃႈသိပ်းဝၼ်းတဵမ်တဵမ်ဢေႃႈ။

Currently Selected:

ငဝ်ႈၵမ်ႇၽႃႇ 7: CBMS

Highlight

Copy