ငဝ်ႈၵမ်ႇၽႃႇ 28

1မိူဝ်ႈၼၼ်ႉဢီႉၸၢၵ်ႈႁွင်ႉဢဝ်ယႃႇၵုပ်ႈလႄႈ ပၼ်တၢင်းလီယူႇသေလႄႈသင်ႇလၢတ်ႈလႄႈဝႃႈ၊ မႂ်းဢမ်ႇလႆႈဢဝ်မေးၵႃႈၼႂ်းလုၵ်ႈယိင်းၸိူဝ်ႉၶိူဝ်းၶႃႇၼၢၼ်ႇၼႆႉ၊- 2လုၵ်ႉလႄႈၵႂႃႇၸူးၵႃႈတီႈပႃႇတၼ်ႇဢႃႇရမ်ႇ တီႈဢၼ်ပူႇမႂ်းပေႇသူၺ်ႇလႃႉယူႇပုၼ်ႉတႃႉ။ ဢဝ်မေးၵႃႈၼႂ်းလုၵ်ႈယိင်းလူင်မႂ်း လႃႇပၢၼ်ႇၼၼ်ႉသေၵေႃႉၵေႃႉတႃႉ။- 3ႁႂ်ႈၽြႃးပဵၼ်ၸဝ်ႈ၊ ၸဝ်ႈဢၼၼ်ႇတႃႉတၼ်းၶူဝ်း ပၼ်တၢင်းလီတီႈမႂ်းလႄႈ ႁႂ်ႈမႂ်းၵိူတ်ႇလဵင်ႉလုၵ်ႈလဵင်ႉလၢင်းလႄႈ ယႂ်ႇၽႄႈၼမ်ၵိုၼ်း ႁႂ်ႈမႂ်းလႆႈပဵၼ်တီႈၸူႉတီႈတုမ် မဵဝ်းၵူၼ်းၼမ်ၼႃႇသေၵမ်းလူၺ်ႈ။- 4လွင်ႈၼင်ႇႁိုဝ်မႂ်းတၵ်းလႆႈၶၢမ်ႇဢမူၺ်ႇမိူင်း တီႈဢၼ်မႂ်းပဵၼ်ၶႅၵ်ႇယူႇတေႃႈလဵဝ်ၼႆႉ ဢၼ်ၽြႃးပဵၼ်ၸဝ်ႈ ပၼ်တီႈဢႃႇပြႃႇႁၢမ်ႇၼၼ်ႉၸိုင်၊ ႁႂ်ႈမၼ်းၸဝ်ႈပၼ်တၢင်းလီမင်ႇၵလႃႇဢႃႇပြႃႇႁၢမ်ႇၼၼ်ႉတီႈမႂ်းဢိၵ်ႇတင်း တီႈၸိူဝ်ႉၶိူဝ်းမႂ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။- 5ၼင်ႇၼၼ်လႄႈ ဢီႉၸၢၵ်ႈပွႆႇယႃႇၵုပ်ႈၵႂႃႇသေဢေႃႈ။ မၼ်းၵေႃႈၵႂႃႇၸူးၵႃႈတီႈပႃႇတၼ်ႇဢႃႇရမ်ႇ၊ တီႈယူႇလႃႇပၢၼ်ႇ၊ လုၵ်ႈၸၢႆးပေႇသူၺ်ႇလႃႉ၊ ၵူၼ်းသူႉရီႉ၊ ပီႈၸၢႆးရေႇပႅၵ်ႉၵႃႉ မႄႈယႃႇၵုပ်ႈတင်းဢေးသေႃးၼၼ်ႉဢေႃႈ။

6 ဢေးသေႃးႁူႉႁၼ်လွင်ႈဢၼ်ဢီႉၸၢၵ်ႈပၼ်တၢင်းလီတီႈယႃႇၵုပ်ႈၸိူဝ်ႉၼင်ႇၼၼ်သေလႄႈ ပွႆႇမၼ်းၵႂႃႇၸူးၵႃႈတီႈပႃႇတၼ်ႇဢႃႇရမ်ႇႁႂ်ႈလႆႈဢဝ်မေးၵႃႈတီႈၼၼ်ႈၼၼ်ႉ ဢိၵ်ႇတင်းလွင်ႈဢၼ်သင်ႇလၢတ်ႈဝႆႉတီႈမၼ်း ၼႂ်းမိူဝ်ႈဢၼ် ပၼ်တၢင်းလီယူႇၼၼ်ႉလႄႈဝႃႈ၊ ဢမ်ႇလႆႈဢဝ်မေးၵႃႈၼႂ်းလုၵ်ႈယိင်းၵူၼ်းၸိူဝ်ႉၶိူဝ်းၶႃႇၼၢၼ်ႇ၊ ဝႃႈၼင်ႇၼႆၼၼ်ႉ၊- 7တင်းလွင်ႈဢၼ်ယႃႇၵုပ်ႈထွမ်ႇဢဝ်ၵႂၢမ်းပေႃႈၵႂၢမ်းမႄႈလႄႈၵႂႃႇၸူးၵႃႈတီႈပႃႇတၼ်ႇဢႃႇရမ်ႇၼၼ်ႉ၊- 8တင်းလွင်ႈဢၼ်လုၵ်ႈယိင်းၸိူဝ်ႉၶိူဝ်းၶႃႇၼၢၼ်ႇ ဢမ်ႇထုၵ်ႇတႃပေႃႈမၼ်း ဢီႉၸၢၵ်ႈၼၼ်ႉသေယဝ်ႉ၊- 9ဢေးသေႃးၼၼ်ႉၵႂႃႇၸူးၵႃႈတီႈဢီႉသမေႇလႃႉလႄႈ ၼွၵ်ႈသေမေးဢၼ်ဢွၼ်တၢင်းၸိူဝ်းၼၼ်ႉ၊ မၼ်းသမ်ႉဢဝ်မႁႃႇလတ်ႉ၊ ၼွင်ႉယိင်းၼပႃႇယုတ်ႉ၊ လုၵ်ႈယိင်းဢီႉသမေႇလႃႉ ဢၼ်ပဵၼ်လုၵ်ႈၸၢႆးဢႃႇပြႃႇႁၢမ်ႇၼၼ်ႉထႅင်ႈဢေႃႈ။

တၢင်းၼွၼ်းၽၼ်ႁၼ်ယႃႇၵုပ်ႈတီႈပေႇသလႃႉ

10 ယႃႇၵုပ်ႈဢွၵ်ႇသေၵႃႈၼႂ်းဝဵင်းပေႇရသေႇၽႃႉလႄႈ ၼႂ်းမိူဝ်ႈဢၼ်ယင်းတိုၵ်ႉၸွမ်းတၢင်းၵႂႃႇၸူးၵႃႈတီႈမိူင်းၶႃႇရၢၼ်ႇယူႇၼၼ်ႉၸိုင်၊- 11ႁွတ်ႈထိုင်တီႈၼိုင်ႈလႄႈ ပိူဝ်ႈဢၼ်ၵၢင်ဝၼ်းၶမ်ႈၵႂႃႇယဝ်ႉၼၼ်ႉ၊ မီးတၢင်းၵျၢမ်ႇတၢင်းပွင် ဢၼ်ၶႂ်ႈႁႂ်ႈပူၼ်ႉၶိုၼ်းၼၼ်ႉလႄႈ ဢဝ်မၢၵ်ႇႁိၼ် ၵႃႈတီႈၼၼ်ႈဝႆႉပုၼ်ႈဢၼ်တၵ်းမွၼ်ႁူဝ်သေယဝ်ႉ၊ ၼွၼ်းဢေႃႈ။- 12တၢင်းဢၼ်မၼ်းၼွၼ်းၽၼ်ႁၼ်ၸမ်ႉ၊ ၶူဝ်လႆပူၵ်းတင်ႈယူႇၵႃႈၼိူဝ်လိၼ်မိူင်းၼႆႉလႄႈ ပၢႆမၼ်းၶိုတ်းထိုင်ၵႃႈတီႈၼိူဝ်ၽႃႉၵၢင်ႁၢဝ်ဢေႃႈ။ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆၵေႃႈ ၶိုၼ်ႈၶိုၼ်ႈလူင်းလူင်းယူႇၵႃႈၼိူဝ်ၶူဝ်လႆၼၼ်ႉဢေႃႈ။- 13ထႃႇဝရႃႉၽြႃးၸုၵ်းယူႇၵႃႈၼိူဝ်ၶူဝ်လႆၼၼ်ႉသေလႄႈဝႃႈ၊ ၵဝ်ပဵၼ်ထႃႇဝရႃႉၽြႃးဢၼ်ဝႃႈ၊ ၽြႃးဢႃႇပြႃႇႁၢမ်ႇ၊ ၽြႃးဢီႉၸၢၵ်ႈၼၼ်ႉဢေႃႈ။ ၵဝ်တၵ်းပၼ်လိၼ်ဢၼ်မႂ်းၼွၼ်းယူႇၼႆႉတီႈမႂ်း ဢိၵ်ႇတင်းၸိူဝ်ႉၶိူဝ်းမႂ်းဢေႃႈ။- 14ၸိူဝ်ႉၶိူဝ်းမႂ်းတၵ်းယႂ်ႇၽႄႈၼမ်ၵိုၼ်းမႃးမိူၼ်ၸိူဝ်ႉၼင်ႇမုၼ်ႈလိၼ်ဢေႃႈ။ တၵ်းၸွတ်ႇတူဝ်ႈၵႂႃႇၽၢႆႇတၢင်းတူၵ်း၊ ၽၢႆႇတၢင်းဢွၵ်ႇ၊ ၽၢႆႇတၢင်းႁွင်ႇ၊ ၽၢႆႇတၢင်းၸၢၼ်း၊ သီႇၼႃႈသီႇၽၢႆႇဢေႃႈ။ ၵႃႈၼႂ်းမႂ်းဢိၵ်ႇတင်းၸိူဝ်ႉၶိူဝ်းမႂ်းၼၼ်ႉ၊ ၵူၼ်းမဵဝ်းတင်းသဵင်ႈတင်းလူင်တၵ်းလႆႈၶၢမ်ႇတၢင်းလီမင်ႇၵလႃႇဢေႃႈ။- 15ၵဝ်မီးယူႇလူၺ်ႈၵၼ်တင်းမႂ်းဢေႃႈ။ ၵဝ်တၵ်းၸွမ်းပႂ်ႉမႂ်းယူႇၼႂ်းတၢင်းဢၼ်မႂ်းၵႂႃႇၵူႈတီႈၵူႈလႅၼ်ၼၼ်ႉလႄႈ၊ သမ်ႉဢဝ်မႂ်းၶိုၼ်းမႃးၸူးၵႃႈတီႈမိူင်းၼႆႉလူးၵွၼ်ႇဢေႃႈ။ ၸူဝ်ႈဢၼ်ၵဝ်ဢမ်ႇပႆႇႁဵတ်းၸွမ်းၵႃႈၼင်ႇဢၼ်ၵဝ်လၢတ်ႈတီႈမႂ်းဝႆႉၼၼ်ႉၸိုင်၊ ၵဝ်တၵ်းဢမ်ႇပႅတ်ႈမႂ်းဝႆႉၵူၺ်ႉ၊ ဝႃႈၼင်ႇၼႆဢေႃႈ။- 16ယႃႇၵုပ်ႈၼၼ်ႉတိုၼ်ႇမႃးၵႃႈၼႂ်းတၢင်းဢၼ်မၼ်းၼွၼ်းလပ်းၼၼ်ႉသေယဝ်ႉ၊ လၢတ်ႈလႄႈဝႃႈ၊ ထႃႇဝရႃႉၽြႃးမီးယူႇၵႃႈတီႈၼႆႈဢမၢၼ်ႇၶၼ်ပဵၼ်ဢေႃႈ။ ၵဝ်ဢမ်ႇႁူႉလွင်ႈဢၼ်မၼ်းၸဝ်ႈမီးၼၼ်ႉ၊ ဝႃႈၼင်ႇၼႆလႄႈ၊- 17ႁွတ်ႈထိုင်တၢင်းဢၼ် တူၵ်းၸႂ်ၵူဝ်ႁႄၼႃႇလူင်လၢင်သေလႄႈဝႃႈ၊ ၵႃႈတီႈၼႆႈၸမ်ႉ၊ ပဵၼ်တီႈဢၼ်လီၵူဝ်လီႁႄၼႃႇလူင်လၢင်တႄႉတႄႉလူင်ပႄႇ။ ၵႃႈတီႈၼႆႈၸမ်ႉ၊ ပဵၼ်ၸိူဝ်ႉၼင်ႇတၢင်ႇတီႈတၢင်ႇလႅၼ်ဢမ်ႇၸႂ်ႈ၊ ပဵၼ်ပိၵ်ႈမၢၼ်ႇၽြႃးပဵၼ်ၸဝ်ႈ၊ ပဵၼ်ၽၵ်းတူၵၢင်ႁၢဝ်လူင်ပႄႇ၊ ဝႃႈၼင်ႇၼႆဢေႃႈ။

18ၶိင်ႇၵၢင်ၼႂ်ၸဝ်ႉၸဝ်ႉယႃႇၵုပ်ႈလုၵ်ႉလႄႈ ဢဝ်မၢၵ်ႇႁိၼ်ဢၼ်မၼ်းမွၼ်ႁူဝ်ၼၼ်ႉ ပူၵ်းတင်ႈဝႆႉ ႁႂ်ႈပဵၼ်သဝ်တီႈမၢတ်ႈတီႈတွင်းသေယဝ်ႉ၊ ဢဝ်ၼမ်ႉမၼ်းထွၵ်ႇသႂ်ႇၵႃႈၼိူဝ်ပၢႆမၼ်းဢေႃႈ။- 19တီႈၼၼ်ႈၸိုင်၊ မၼ်းႁွင်ႉႁဵၵ်ႈၸိုဝ်ႈပေႇသလႃႉဢေႃႈ။ ၸိုဝ်ႈၵဝ်ႇသဵင်ၵဝ်ႇဝဵင်းၼၼ်ႉၸမ်ႉ၊ ႁွင်ႉႁဵၵ်ႈၸိုဝ်ႈလူႉၸႃႉဢေႃႈ။- 20မိူဝ်ႈၼၼ်ႉယႃႇၵုပ်ႈႁဵတ်းသဵတ်ႈၸႃႇၵတီႉလႄႈဝႃႈ၊ ပေႃးၽြႃးပဵၼ်ၸဝ်ႈတၵ်းမီးယူႇလူၺ်ႈၵၼ်တင်းၵဝ်၊ ပေႃးမၼ်းၸဝ်ႈတၵ်း ၸွမ်းပႂ်ႉၵဝ်ၼႂ်းတၢင်းဢၼ်ၵဝ်ၵႂႃႇၵူႈတီႈၵူႈလႅၼ်ၼၼ်ႉလႄႈ ပၼ်တၢင်းၵိၼ်တၢင်းၶူပ်းပုၼ်ႈဢၼ် တၵ်းၵိၼ်တၵ်းၶူပ်း ဢိၵ်ႇတင်း ၶူဝ်းၼုင်ႈတၢင်းမႆ ပုၼ်ႈဢၼ်တၵ်းၼုင်ႈတၵ်းမႆ၊- 21ပေႃးၵဝ်သမ်ႉလႆႈၶိုၼ်းႁွတ်ႈထိုင် ၵႃႈတီႈႁိူၼ်းပေႃႈၵဝ်ၼိမ်ၼိမ်လီလီထႅင်ႈၸိုင်၊ ၵမ်းၼၼ်ႉထႃႇဝရႃႉၽြႃးတၵ်းလႆႈ ပဵၼ်ၽြႃးၵဝ်လႄႈ၊- 22မၢၵ်ႇႁိၼ်ဢၼ်ၵဝ်ပူၵ်းတင်ႈဝႆႉ ႁႂ်ႈပဵၼ်သဝ်တီႈမၢတ်ႈတီႈတွင်းၼႆႉၵေႃႈ တၵ်းလႆႈပဵၼ်ပိၵ်ႈမၢၼ်ႇၽြႃးပဵၼ်ၸဝ်ႈဢေႃႈ။ တၵ်းဢဝ်ၼႂ်းၵႃႈဢၼ်ၸဝ်ႈႁဝ်း ဢဵတ်းလူပၼ်ၼၼ်ႉ သိပ်းပုၼ်ႈပုၼ်ႈၼိုင်ႈပုၵ်ႈၸေႃႇတီႈၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။

Currently Selected:

ငဝ်ႈၵမ်ႇၽႃႇ 28: CBMS

Highlight

Copy