တမၢၼ်ႇၸဝ်ႈ 25
25
တမၢၼ်ႇၸဝ်ႈပေႃးလူႉယွၼ်းၶၢမ်ႇၸႅတ်ႈၽၢႆႇၼႃႈၶုၼ်ႁေႃၶမ်း
1ၶုၼ်ၽိတ်ႉတူႉၼၼ်ႉ ႁွတ်ႈထိုင်ၵႃႈတီႈမိူင်းၼၼ်ႉသေယဝ်ႉ၊ မိူဝ်ႈဢၼ်လႆႈသၢမ်ဝၼ်းၸိုင်၊ လုၵ်ႉသေၵႃႈတီႈဝဵင်းၵေႇသရီႉလႄႈ ၶိုၼ်ႈၵႂႃႇၵႃႈတီႈဝဵင်းယေႇရူႉသလႅမ်ႇဢေႃႈ။- 2မိူဝ်ႈၼၼ်ႉယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းယူႉတႃႉဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉလဝ်ႊလၢတ်ႈလွင်ႈ ပေႃးလူႉလႄႈ၊- 3မီးတင်းၸႂ်ဢၼ်ၵျၢမ်ႇတၵ်းပႂ်ႉလွမ်ၵႃႈတီႈႁိမ်းတၢင်း ႁႂ်ႈလႆႈဢဝ်မၼ်းတၢႆၼၼ်ႉယူႇသေလႄႈ တွင်းပၢၼ်ႇႁႂ်ႈမၼ်းၸဝ်ႈပွႆႇၸႂ်ႉမၼ်းမႃး ၵႃႈတီႈဝဵင်းယေႇရူႉသလႅမ်ႇဢေႃႈ။
4ၶုၼ်ၽိတ်ႉတူႉၵေႃႈ ၶိုၼ်းလၢတ်ႈလႄႈဝႃႈ၊ ပေႃးလူႉလႆႈၶၢမ်ႇတူၵ်းၵိၼ်းယူႇ ၵႃႈၼႂ်းဝဵင်းၵေႇသရီႉပုၼ်ႉလႄႈ ဢမ်ႇပေႃးႁိုင် ၵဝ်တူဝ်ၸဝ်ႈၵဝ်ႇတၵ်းၵႂႃႇၵႃႈတီႈဝဵင်းၼၼ်ႉဢေႃႈ။- 5ၼႂ်းသူၼႆႉႁႂ်ႈၶဝ်ၸိူဝ်းဢၼ်တၢတ်ႈၼိူင်ႇၼၼ်ႉ ၸွမ်းလူၺ်ႈၵၼ်တင်းၵဝ်ၵႂႃႇလႄႈ ပေႃးဢပႅတ်ႈမီးတီႈမၼ်းၸိုင်၊ ႁႂ်ႈၶဝ်တၢင်ႇဢပႅတ်ႈတႃႉ၊ ဝႃႈၼင်ႇၼႆဢေႃႈ။
6လိုၼ်းၼၼ်ႉ မၼ်းၸဝ်ႈယူႇၵႃႈတီႈၶဝ်ၼၼ်ႉသေသိပ်းဝၼ်းၸမ်ၸမ်ယဝ်ႉၸင်ႇလူင်းၵႂႃႇ ၵႃႈတီႈဝဵင်းၵေႇသရီႉလႄႈ၊ ၼႂ်းဝၼ်းမိူဝ်ႈၽုၵ်ႈ ၼင်ႈၵႃႈၼိူဝ်ပလၢင်ႇဢၼ်ၸီႇယၢင်ႇတြႃးသေယဝ်ႉ၊ မီးဢမိင်ႉႁႂ်ႈႁွင်ႉဢဝ်ပေႃးလူႉမႃးဢေႃႈ။- 7မိူဝ်ႈဢၼ်မၼ်းႁွတ်ႈထိုင်ၼၼ်ႉၸိုင်၊ ၵူၼ်းယူႉတႃႉဢၼ်လုၵ်ႉသေၵႃႈတီႈဝဵင်းယေႇရူႉသလႅမ်ႇမႃးၸိူဝ်းၼၼ်ႉ လွမ်ႉႁွပ်ႈမၼ်းယူႇသေလႄႈ တၢင်ႇဢပႅတ်ႈဢၼ်ၼၵ်းၼႃႇလႄႈ ဢမ်ႇၼႄပျႃးသၢၵ်ႈသေႇလႆႈၼၼ်ႉၼမ်ၼႃႇ ၵႃႈၼိူဝ်မၼ်းဢေႃႈ။- 8ပေႃးလူႉၵေႃႈလၢတ်ႈၵႂၢမ်းၽေႇဢပႅတ်ႈလႄႈဝႃႈ၊ တြႃးယူႉတႃႉလႄႈသင်၊ ပိၵ်ႈမၢၼ်ႇၸဝ်ႈလႄႈသင်၊ ၶုၼ်ႁေႃၶမ်း ၵေႇသႃႇလႄႈသင်၊ ၵဝ်ၶႃႈဢမ်ႇၽိတ်းဢမ်ႇပိူင်ႈၶႃႈ၊ ဝႃႈၼင်ႇၼႆဢေႃႈ။
9ၵူၺ်းၵႃႈ ၶုၼ်ၽိတ်ႉတူႉၼၼ်ႉ မီးတၢင်းၸႂ်ဢၼ်ၶႂ်ႈႁဵတ်းၵျေးၸူးတီႈၵူၼ်းယူႉတႃႉတင်းလၢႆလႄႈ ထၢမ်တီႈပေႃးလူႉလႄႈဝႃႈ၊ မႂ်းတၵ်းၵႂႃႇၵႃႈတီႈဝဵင်းယေႇရူႉသလႅမ်ႇပုၼ်ႉလႄႈ ၶၢမ်ႇတၢင်းဢၼ်ၸီႇယၢင်ႇ ၵႃႈတီႈၽၢႆႇၼႃႈၵဝ်ၵႃႈတီႈၼၼ်ႈႁိုဝ်။ ဝႃႈၼင်ႇၼႆဢေႃႈ။- 10ပေႃးလူႉၵေႃႈလဝ်ႊလၢတ်ႈလႄႈဝႃႈ၊ ၵဝ်ၶႃႈၸုၵ်းယူႇၵႃႈတီႈၽၢႆႇၼႃႈပလၢင်ႇဢၼ်ၸီႇယၢင်ႇတြႃး ၶုၼ်ႁေႃၶမ်းၵေႇသႃႇၶႃႈဢေႃႈ။ ထုၵ်ႇလီၸီႇယၢင်ႇဢမူႉၵဝ်ၶႃႈၵႃႈတီႈၽၢႆႇၼႃႈပလၢင်ႇၼၼ်ႉၶႃႈဢေႃႈ။ ၵႃႈၼင်ႇဢၼ်ၸဝ်ႈႁဝ်းႁူႉယူႇလီလီငၢမ်းငၢမ်းၼႆႉ ၵဝ်ၶႃႈဢမ်ႇၽိတ်းဢမ်ႇပိူင်ႈၵူၼ်းယူႉတႃႉတင်းလၢႆသေဢိတ်းၶႃႈ။- 11ပေႃးၵဝ်ၶႃႈၽိတ်းပိူင်ႈလႄႈ ႁဵတ်းဢပႅတ်ႈဢၼ်ထိူၵ်ႈတၢႆၸိုင်၊ ၵဝ်ၶႃႈဢမ်ႇဝႄႈတၢင်းတၢႆၶႃႈ။ ၵူၺ်းၵႃႈပေႃးဢပႅတ်ႈဢၼ်ၶဝ်တၢင်ႇၼၼ်ႉ ဢမ်ႇၸိုဝ်ႈဢမ်ႇၸႂ်ႈသေၸိူဝ်ႉသေပိူင်ၸိုင်၊ ၽူႈလႂ်ဢမ်ႇဢဝ်ၵဝ်ၶႃႈဢၢပ်ႈၵႃႈၼႂ်းမိုဝ်းၶဝ်လႆႈၶႃႈ။ ၵဝ်ၶႃႈတၵ်းၶၢမ်ႇဢယူႇ ၶုၼ်ႁေႃၶမ်းၵေႇသႃႇၶႃႈဢေႃႈ၊ ဝႃႈၼင်ႇၼႆဢေႃႈ။
12မိူဝ်ႈၼၼ်ႉ ၶုၼ်ၽိတ်ႉတူႉတိူင်ႇပၢင်ႇၵၼ်တင်းၵူၼ်းဢၼ်တိူင်ႇပၢင်ႇႁူမ်ႈၵၼ်ၸိူဝ်းၼၼ်ႉသေယဝ်ႉ၊ လၢတ်ႈလႄႈဝႃႈ၊ မႂ်းဝႃႈတၵ်းၶၢမ်ႇဢယူႇ ၶုၼ်ႁေႃၶမ်းၵေႇသႃႇဢေႃႈ၊ ဝႃႈၼင်ႇၼႆယဝ်ႉ၊ မႂ်းတၵ်းလႆႈၵႂႃႇၵႃႈတီႈၶုၼ်ႁေႃၶမ်းၵေႇသႃႇဢေႃႈ၊ ဝႃႈၼင်ႇၼႆဢေႃႈ။
တမၢၼ်ႇၸဝ်ႈပေႃးလူႉၶဝ်ႈၸူးၶုၼ်ဢၵျႅပ်ႉပႃႉ
13လိုၼ်းၼၼ်ႉဢမ်ႇပေႃးႁိုင် ၶုၼ်ႁေႃၶမ်းဢၵျႅပ်ႉပႃႉ တင်းပေႇရၼိတ်ႉၼၼ်ႉ ႁွတ်ႈမႃးၵႃႈတီႈဝဵင်းၵေႇသရီႉၼၼ်ႉ ႁႂ်ႈလႆႈတၵ်ႉလၢတ်ႈၶုၼ်ၽိတ်ႉတူႉဢေႃႈ။- 14ၶဝ်ယူႇႁိုင်တၢၼ်ႇတၢၼ်ႇသေယဝ်ႉ၊ ၶုၼ်ၽိတ်ႉတူႉၼၼ်ႉ ဢဝ်လွင်ႈပေႃးလူႉ လၢတ်ႈတီႈၶုၼ်ႁေႃၶမ်းလႄႈဝႃႈ၊ ၵူၼ်းဢၼ်ၶုၼ်ၽေးလိတ်ႉ ႁႂ်ႈၶၢမ်ႇတူၵ်းၵိၼ်းၵိုတ်းဝႆႉထႃႈယူႇၼၼ်ႉမီးၵေႃႉၼိုင်ႈဢေႃႈ။- 15မိူဝ်ႈဢၼ်ၵဝ်ၶႃႈယင်းမီးယူႇၵႃႈၼႂ်းဝဵင်းယေႇရူႉသလႅမ်ႇပုၼ်ႉၸိုင်၊ ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းယူႉတႃႉ ဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉ လဝ်ႊလၢတ်ႈလွင်ႈမၼ်းလႄႈ တွင်းပၢၼ်ႇႁႂ်ႈလႆႈၸီႇယၢင်ႇဢပႅတ်ႈတီႈမၼ်းဢေႃႈ။- 16ၵဝ်ၶႃႈၵေႃႈလႆႈလၢတ်ႈလႄႈဝႃႈ၊ ၸူဝ်ႈဢၼ်ၵေႃႉဢၼ်လႆႈၶၢမ်ႇတၢင်းဢၼ်တၢင်ႇဢပႅတ်ႈၼၼ်ႉ ဢမ်ႇပႆႇလႆႈတေႃႇၼႃႈၵၼ်တင်းၶဝ်ၸိူဝ်းဢၼ်တၢင်ႇဢပႅတ်ႈၼၼ်ႉလႄႈ မီးဢၶႂၢင်ႉဢၼ်လႆႈ ၽေႇလိတ်ႈဢပႅတ်ႈဢၼ်ၶဝ်တၢင်ႇၵႃႈၼိူဝ်မၼ်းၼၼ်ႉယူႇၼၼ်ႉၸိုင် ဢမ်ႇထုၵ်ႇလီဢဝ်ဢၢပ်ႈပၼ်ၽူႈလႂ်ဝႃႈၼႆ၊ ထုင်းၸၢမ်ႇရူဝ်းမႃႉ မီးၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။
17မိူဝ်ႈဢၼ်ၶဝ်ၼၼ်ႉႁွတ်ႈမႃးၵႃႈတီႈဝဵင်းၼႆႉၼၼ်ႉၸိုင်၊ ၵဝ်ၶႃႈယင်းဢမ်ႇၵိုတ်းဢမ်ႇသဝ်း၊ ဝၼ်းမိူဝ်ႈၽုၵ်ႈၼၼ်ႉၼင်ႈၵႃႈၼိူဝ်ပလၢင်ႇဢၼ်ၸီႇယၢင်ႇတြႃးယူႇသေလႄႈ ႁႂ်ႈႁွင်ႉဢဝ်မၼ်းမႃးၶႃႈဢေႃႈ။- 18ၶဝ်ၸိူဝ်းဢၼ်တၢင်ႇဢပႅတ်ႈၼၼ်ႉ ၸုၵ်းႁွပ်ႈမၼ်းသေယဝ်ႉ၊ ဢမ်ႇတၢင်ႇဢပႅတ်ႈဢၼ်ၵဝ်ၶႃႈထၢင်ႇယူႇမိူဝ်ႈဢွၼ်တၢင်းၼၼ်ႉသေၸိူဝ်ႉသေပိူင်။- 19ၵူၺ်းၵႃႈၶဝ်တၢင်ႇဢပႅတ်ႈလွင်ႈပုၵ်ႈသႃႇတီႈတွင်ႈတီႈထၢမ် ဢၼ်ၸၢပ်ႈသႅင်ႇၵၼ်တင်း ၽႃႇသႃႇၶဝ်ဢိၵ်ႇတင်း လွင်ႈယေႇသူႉၵေႃႉၼိုင်ႈဢၼ်တၢႆယဝ်ႉၼၼ်ႉၶႃႈဢေႃႈ။ ယေႇသူႉၼၼ်ႉ ဢသၢၵ်ႈလိပ်းယူႇဝႃႈၼႆ၊ ပေႃးလူႉၸင်ႇဝႃႈၶႃႈဢေႃႈ။- 20ပိူဝ်ႈဢၼ်ၵဝ်ၶႃႈဢမ်ႇပေႃးႁူႉၸႅင်ႈ လွင်ႈပုၵ်ႈသႃႇတီႈတွင်ႈတီႈထၢမ်ၸိူဝ်းၼၼ်ႉလႄႈ ၵဝ်ၶႃႈထၢမ်တီႈပေႃးလူႉလႄႈဝႃႈ၊ မႂ်းတၵ်းၵႂႃႇၵႃႈတီႈဝဵင်းယေႇရူႉသလႅမ်ႇပုၼ်ႉလႄႈ ၶၢမ်ႇတၢင်းဢၼ်ၸီႇယၢင်ႇဢမူႉၼႆႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 21ပိူဝ်ႈဢၼ်ပေႃးလူႉ တွင်းပၢၼ်ႇႁႂ်ႈလႆႈၶၢမ်ႇတၢင်းဢၼ်ၶင်ဝႆႉလႄႈ ၶၢမ်ႇဢယူႇၶုၼ်ဢၼ်မုၼ်ယႂ်ႇၼႃႇၼၼ်ႉလႄႈ၊ ၸူဝ်ႈဢၼ်ၵဝ်ၶႃႈဢမ်ႇပႆႇပွႆႇၸႂ်ႉမၼ်းၵႂႃႇ ၵႃႈတီႈၶုၼ်ႁေႃၶမ်းၵေႇသႃႇပုၼ်ႉၼၼ်ႉၸိုင်၊ ၵဝ်ၶႃႈၸီႇယၢင်ႇႁႂ်ႈဢဝ်မၼ်းၶင်ဝႆႉၶႃႈဢေႃႈ၊ ဝႃႈၼင်ႇၼႆဢေႃႈ။
22ၶုၼ်ဢၵျႅပ်ႉပႃႉ ၵေႃႈလၢတ်ႈတီႈၶုၼ်ၽိတ်ႉတူႉလႄႈဝႃႈ၊ ၵဝ်တူဝ်ၸဝ်ႈၵဝ်ႇမီးဢလူဝ်ႇၶႂ်ႈထွမ်ႇငိၼ်းၵႂၢမ်းမၼ်းၼၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶုၼ်ၽိတ်ႉတူႉၵေႃႈလၢတ်ႈလႄႈဝႃႈ၊ ဝၼ်းမိူဝ်ႈၽုၵ်ႈထွမ်ႇငိၼ်းၵႂၢမ်းမၼ်းသေၵမ်းၶႃႈ၊ ဝႃႈၼင်ႇၼႆဢေႃႈ။
23ဝၼ်းမိူဝ်ႈၽုၵ်ႈၼၼ်ႉၶုၼ်ဢၵျႅပ်ႉပႃႉ တင်းပေႇရၼိတ်ႉၼၼ်ႉ ႁဵတ်းမုၼ်သရေႇၼမ်ၼႃႇလူင်လၢင်လႄႈ ပႃးတင်းၵႄႇၵူၼ်းသိုၵ်း ဢိၵ်ႇတင်းၵူၼ်းယႂ်ႇၵူၼ်းလူင် ၵႃႈၼႂ်းဝဵင်းၼၼ်ႉတင်းလၢႆ ၶဝ်ႈၵႃႈၼႂ်းၼႃႈႁေႃသေယဝ်ႉ၊ ၶုၼ်ၽိတ်ႉတူႉ ႁႂ်ႈဢဝ်ပေႃးလူႉမႃးဢေႃႈ။- 24ၶုၼ်ၽိတ်ႉတူႉၵေႃႈလၢတ်ႈလႄႈဝႃႈ၊ ၶုၼ်ႁေႃၶမ်းဢၵျႅပ်ႉပႃႉ ဢိၵ်ႇတင်းၵူၼ်းဢၼ်မီးယူႇၵႃႈတီႈၼႆႈတေႃႈလဵဝ်ၼႆႉ တင်းသဵင်ႈတင်းလူင်ၶဝ်ဢိူၺ်း၊ တူၺ်းၵေႃႉၼႆႉသေၵမ်း။ ၵူၼ်းယူႉတႃႉတင်းသဵင်ႈတင်းလူင် လဝ်ႊလၢတ်ႈလွင်ႈၵေႃႉၼႆႉတီႈၵဝ်ၶႃႈ ၵႃႈၼႂ်းဝဵင်းယေႇရူႉသလႅမ်ႇပုၼ်ႉ ဢိၵ်ႇတင်းၵႃႈၼႂ်းဝဵင်းၼႆႉလႄႈ ႁွင်ႉသႅၼ်ႇလႄႈဝႃႈ၊ ၵေႃႉၼႆႉဢမ်ႇထိူၵ်ႈဢသၢၵ်ႈလိပ်းယူႇ သေၵမ်းဢွၼ်ႇၶႃႈ၊ ဝႃႈၼင်ႇၼႆၶႃႈဢေႃႈ။- 25ၵဝ်ၶႃႈႁူႉႁၼ်လွင်ႈဢၼ် မၼ်းဢမ်ႇႁဵတ်းဢပႅတ်ႈဢၼ်ထိူၵ်ႈၶၢမ်ႇတၢႆၼၼ်ႉလႄႈ၊ ပိူဝ်ႈဢၼ်မၼ်းဝႃႈတၵ်းၶၢမ်ႇဢယူႇၶုၼ်ဢၼ် မုၼ်ယႂ်ႇၼႃႇၼၼ်ႉၶႃႈ၊ ဝႃႈၼင်ႇၼႆၼၼ်ႉလႄႈ၊ ၵဝ်ၶႃႈၸီႇယၢင်ႇႁႂ်ႈမၼ်းၵႂႃႇၵႃႈတီႈမၼ်းၸဝ်ႈပုၼ်ႉၶႃႈဢေႃႈ။- 26ၵဝ်ၶႃႈဢမ်ႇမီးလွင်ႈဢၼ်တၵ်းတႅမ်ႈလွင်ႈမၼ်းပၼ်ၵႂႃႇၵႃႈတီႈၶုၼ်ႁေႃၶမ်းၼၼ်ႉသေႇသေႇၶျႃႇၶျႃႇသေၸိူဝ်ႉသေပိူင်။ ပိူဝ်ႈၼႆလႄႈ သူၸဝ်ႈၸႅတ်ႈထၢမ်ၸႅတ်ႈတူၺ်းမၼ်းသေယဝ်ႉ၊ ၼင်ႇႁိုဝ်ၵဝ်ၶႃႈတၵ်းမီး လွင်ႈဢၼ်တၵ်းတႅမ်ႈပၼ်ၵႂႃႇၸိုင်၊ ၵဝ်ၶႃႈဢဝ်မၼ်းဢွၵ်ႇၼႄၵႃႈတီႈၽၢႆႇၼႃႈသူၸဝ်ႈ၊ ၶုၼ်ႁေႃၶမ်းဢၵျႅပ်ႉပႃႉၶႃႈဢိူၺ်း၊ ၵႃႈတီႈၽၢႆႇၼႃႈၸဝ်ႈႁဝ်းတႄႉတႄႉဝႃႈဝႃႈၶႃႈဢေႃႈ။- 27လွင်ႈမၼ်းၸမ်ႉ ၵဝ်ၶႃႈထၢင်ႇလွင်ႈဢၼ်ပွႆႇၸႂ်ႉၵေႃႉဢၼ်ၶၢမ်ႇတူၵ်းၵိၼ်းၵႂႃႇလႄႈ ယင်းဢမ်ႇၼႄပၼ်ဢပႅတ်ႈမၼ်းၼၼ်ႉ ပဵၼ်ဢၼ်ဢမ်ႇထုၵ်ႇဢမ်ႇလီၶႃႈဢေႃႈ၊ ဝႃႈၼင်ႇၼႆဢေႃႈ။
Currently Selected:
တမၢၼ်ႇၸဝ်ႈ 25: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
