တမၢၼ်ႇၸဝ်ႈ 24
24
ၵူၼ်းမဵဝ်းယူႉတႃႉတၢင်ႇဢမူႉသႂ်ႇတမၢၼ်ႇၸဝ်ႈပေႃးလူႉ
1လိုၼ်းၼၼ်ႉ မိူဝ်ႈဢၼ်ပူၼ်ႉႁႃႈဝၼ်းယဝ်ႉၼၼ်ႉၸိုင်၊ ၶုၼ်ယိတ်ႈပရေႃးႁဵၵ်ႈ ဢႃႇၼၼီႉ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ တင်းၵေႃႉဢၼ်မေႃလၢတ်ႈၵႂၢမ်း ဢၼ်လႆႈၸိုဝ်ႈတေးရတူႉလူႉၼၼ်ႉ လူင်းမႃးၵႃႈတီႈဝဵင်းၵေႇသရီႉလႄႈ လဝ်ႊလၢတ်ႈလွင်ႈပေႃးလူႉ တီႈၶုၼ်ဢေႃႈ။- 2ႁွင်ႉဢဝ်ပေႃးလူႉမႃးသေယဝ်ႉ၊ တေးရတူႉလူႉၼၼ်ႉ လဝ်ႊလၢတ်ႈၵႂၢမ်းဢၼ်တၢင်ႇဢပႅတ်ႈတီႈမၼ်းလႄႈဝႃႈၸမ်ႉ၊ ၶုၼ်ၽေးလိတ်ႉဢၼ်မျၢတ်ႈၼႃႇၶႃႈဢိူၺ်း၊ ပိူဝ်ႈဢၼ်ႁဝ်းၶႃႈဢိင်ပိုင်ႈၸဝ်ႈႁဝ်းလႄႈ ႁဝ်းၶႃႈၸင်ႇလႆႈယူႇၼိမ်ၼိမ်လီလီလႄႈသင်၊ ပိူဝ်ႈဢၼ်ၵူၼ်းမဵဝ်းၼႆႉ လႆႈၶၢမ်ႇၵျေးၸူးဢၼ်ယႂ်ႇမျၢတ်ႈၼႃႇ ဢၼ်ၸဝ်ႈႁဝ်းႁဵတ်းပွင်လူတူၺ်းၼၼ်ႉလႄႈသင်၊- 3ၼႂ်းၵူႈၸိူဝ်ႉၵူႈပိူင်ၵူႈတီႈၵူႈလႅၼ် ႁဝ်းၶႃႈမီးတင်းၸႂ်ဢၼ်ၸၢင်ႈႁူႉၸၢင်ႈႁၼ်ၼႃႇလူင်လၢင်သေလႄႈ လႆႈၶၢမ်ႇၵျေးၸူးၸဝ်ႈႁဝ်းၶႃႈဢေႃႈ။
4ၼင်ႇႁိုဝ်ၵဝ်ၶႃႈတၵ်းလႆႈၵၢင်းလွတ်ႈတင်း တၢင်းဢၼ်ယႃႉယူၵ်ႉၸဝ်ႈႁဝ်းႁိုင်ၼႃႇလူင်လၢင်ၸိုင်ၵဝ်ၶႃႈတွင်းပၢၼ်ႇ ႁႂ်ႈၸဝ်ႈႁဝ်းဢဝ်တင်းၸႂ်ဢၼ်ၼိမ်လီလႄႈထွမ်ႇဢဝ်ၵႂၢမ်းဢၼ်ၵဝ်ၶႃႈ လဝ်ႊလၢတ်ႈပွတ်းဢွၼ်ႇၼိုင်ႈၼႆႉၶႃႈဢေႃႈ။- 5ႁဝ်းၶႃႈထူပ်းႁၼ်လွင်ႈဢၼ်ၵေႃႉၼႆႉ ပဵၼ်ၵူၼ်းဢၼ်ႁုၵ်းဢၼ်ႁၢႆႉလႄႈ ၸၢင်ႈတိုၵ်းယူင်း ႁႂ်ႈၵူၼ်းယူႉတႃႉတင်းသဵင်ႈတင်းလူင် ၵူႈတီႈၵူႈလႅၼ်လႆႈဢူၼ်ဢဵၼ်မေႃးမႄးၵၼ်လႄႈ ပဵၼ်ၵေႃႉဢၼ်ႁဵတ်း ၵူၼ်းယႂ်ႇၵူၼ်းလူင်ၵႃႈၼႂ်းၶဝ်ၸိူဝ်းဢၼ်ၶဝ်ႈၽႃႇသႃႇ ၼႃႇၸရႅတ်ႈၼၼ်ႉၶႃႈယဝ်ႉ။- 6မၼ်းၼႆႉ ႁဵတ်းႁႂ်ႈပိၵ်ႈမၢၼ်ႇၸဝ်ႈၵူဝ်ႈၵိူၵ်ႇၶႃႈဢေႃႈ။ ႁဝ်းၶႃႈတီႉဢဝ်မၼ်းသေလႄႈ ၼႂ်းမိူဝ်ႈဢၼ်မီးဢလူဝ်ႇၶႂ်ႈၸီႇယၢင်ႇမၼ်းၸွမ်းၼင်ႇတြႃးႁဝ်းၶႃႈၼၼ်ႉၸိုင်၊- 7ၵႄႇၵူၼ်းသိုၵ်းလူႉသီႉၼၼ်ႉမႃးလႄႈ ႁိမ်ၼုၵ်ႈဢဝ်မၼ်းၵႃႈၼႂ်းမိုဝ်းႁဝ်းၶႃႈၵႂႃႇသေယဝ်ႉ၊- 8ၸီႇယၢင်ႇႁႂ်ႈၶဝ်ၸိူဝ်းဢၼ်ႁဵတ်းဢမူႉတီႈမၼ်းၼၼ်ႉ မႃးၵႃႈတီႈၸဝ်ႈႁဝ်းၶႃႈၼႆႉၶႃႈယဝ်ႉ၊ ဝႃႈၼင်ႇၼႆဢေႃႈ။ ပေႃးတူဝ်ၸဝ်ႈႁဝ်းၸႅတ်ႈထၢမ်မၼ်းၸိုင်၊ ၸဝ်ႈႁဝ်းတၵ်းလႆႈႁူႉ လွင်ႈတၢင်းဢၼ်ႁဝ်းၶႃႈ တၢင်ႇဢပႅတ်ႈတီႈမၼ်းတင်းသဵင်ႈတင်းလူင်ၸိူဝ်းၼႆႉသေႇၶျႃႇလီငၢမ်းၶႃႈဢေႃႈ၊ ဝႃႈၼင်ႇၼႆဢေႃႈ။
9ၵူၼ်းယူႉတႃႉၸိူဝ်းၼၼ်ႉၵေႃႈ ႁပ်ႉတုင်းဢဝ်လႄႈဝႃႈ၊ ၵႂၢမ်းၼႆႉမႅၼ်ႈၶႃႈယဝ်ႉ၊ ဝႃႈၼင်ႇၼႆဢေႃႈ။
တမၢၼ်ႇၸဝ်ႈပေႃးလူႉလႆႈလၢတ်ႈၵႂၢမ်းၶႄတူဝ်ၸဝ်ႈၵဝ်ႇ
10ၶုၼ်ၼၼ်ႉဢဝ်မိုဝ်းၼႄလႄႈ ပၼ်ဢၶႂၢင်ႉဢၼ်လႆႈလဝ်ႊလၢတ်ႈၼၼ်ႉသေယဝ်ႉ၊ ပေႃးလူႉၵေႃႈလဝ်ႊလၢတ်ႈလႄႈဝႃႈ၊ ပိူဝ်ႈဢၼ်ၵဝ်ၶႃႈ ႁူႉလွင်ႈဢၼ်ၸဝ်ႈႁဝ်းပဵၼ်ၵေႃႉဢၼ်လႆႈၸီႇယၢင်ႇၵူၼ်းမဵဝ်းၼႆႉ ပီႊၼမ်ၼႃႇလႄႈ ၵဝ်ၶႃႈယဵင်ႈၶႅၼ်းမီးတၢင်းၸႂ်ဢၼ်ၸိုၼ်ႈဢၼ်ၸၢင်ႇ ႁတ်းလဝ်ႊလၢတ်ႈ ၵႂၢမ်းဢၼ်ၽေႇဢပႅတ်ႈတူဝ်ၸဝ်ႈၵဝ်ႇၶႃႈဢေႃႈ။- 11ၸဝ်ႈႁဝ်းႁူႉလွင်ႈဢၼ်ၸႃႉၸဵမ်မိူဝ်ႈဢၼ်ၵဝ်ၶႃႈၶိုၼ်ႈၵႂႃႇၵႃႈတီႈဝဵင်းယေႇရူႉသလႅမ်ႇ ႁႂ်ႈလႆႈၵူဝ်းၵႂၢႆႇၼၼ်ႉလႄႈ ႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉ မီးသိပ်းသွင်ဝၼ်းၵူၺ်းၼၼ်ႉလႆႈယူႇၶႃႈဢေႃႈ။- 12ၶဝ်ဢမ်ႇထူပ်းဢမ်ႇႁၼ်ၵဝ်ၶႃႈတိူင်ႇပၢင်ႇထဵင်ၵၼ်တင်းသေၵေႃႉသေၵူၼ်း ၵႃႈၼႂ်းပိၵ်ႈမၢၼ်ႇၸဝ်ႈၼၼ်ႉၶႃႈ။ ၶဝ်ဢမ်ႇထူပ်းဢမ်ႇႁၼ်ၵဝ်ၶႃႈတိုၵ်းယူင်း ႁႂ်ႈၵူၼ်းၼမ်ၼႃႇဢူၼ်ဢဵၼ်မေႃးမႄးၵၼ် ၵႃႈၼႂ်းၸရွပ်ႈႁေႃးတြႃးဢိၵ်ႇတင်းၵႃႈၼႂ်းဝဵင်းၼၼ်ႉၶႃႈ။- 13ၵႃႈတီႈဢမူႉဢၼ်ၶဝ်တၢင်ႇဢပႅတ်ႈ ၵႃႈၼိူဝ်ၵဝ်ၶႃႈယူႇတေႃႈလဵဝ်ၼႆႉၸိုင်၊ ၶဝ်ဢမ်ႇၼႄပျႃးသၢၵ်ႈသေႇလႆႈၶႃႈ။
14ၼႂ်းဝႃႈၼၼ်သေၵေႃႈ ၵဝ်ၶႃႈႁပ်ႉတုင်းဢဝ်လွင်ႈဢၼ်ၵဝ်ၶႃႈ ၸွမ်းၼင်ႇသဵၼ်ႈတၢင်းဢၼ်ၶဝ်ၸၢင်ႈႁွင်ႉဝႃႈ ဢယူႇတိၵ်ႉထီႉၼၼ်ႉသေလႄႈ ၵူဝ်းၵႂၢႆႇၽြႃးပဵၼ်ၸဝ်ႈ ဢၼ်ပူႇပေႃႈႁဝ်းတင်းလၢႆၵူဝ်းၵႂၢႆႇၼၼ်ႉ ၵႃႈတီႈၽၢႆႇၼႃႈၸဝ်ႈႁဝ်းၶႃႈဢေႃႈ။ ၵဝ်ၶႃႈယုမ်ႇၵႃႈဢၼ်ၸီႇယၢင်ႇတႅမ်ႈဝႆႉ ၼႂ်းၵျၢမ်းပိင်းၺၢပ်ႈတီႉတင်းၵျၢမ်းဢၼႃႇၵၢတ်ႈတီႉၸိူဝ်းၼၼ်ႉၶႃႈဢေႃႈ။- 15ၵဝ်ၶႃႈဢိင်ပိုင်ႈၽြႃးပဵၼ်ၸဝ်ႈသေလႄႈ မုင်ႈထႃႈမွင်းထႃႈမိူၼ်ၸိူဝ်ႉၼင်ႇဢၼ် ၶဝ်မုင်ႈထႃႈမွင်းထႃႈ လွင်ႈဢၼ်ၵူၼ်းဢၼ်သိုဝ်ႈတေႃႇ၊ ၵူၼ်းဢၼ်ဢမ်ႇသိုဝ်ႈတေႃႇ၊ ၵႃႈမီးတၵ်းလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉယူႇၶႃႈဢေႃႈ။- 16ပိူဝ်ႈၼႆလႄႈၵဝ်ၶႃႈၵျူဝ်းၸႃး ႁႂ်ႈႁူဝ်ၸႂ်တူဝ်ၸဝ်ႈၵဝ်ႇလႆႈၵၢင်းလွတ်ႈတင်းဢၶႂၢင်ႉ တၢင်းဢၼ်တၢင်ႇဢပႅတ်ႈတီႈတူဝ်ၸဝ်ႈၵဝ်ႇလႄႈဝႃႈ ၽိတ်းၽြႃးပဵၼ်ၸဝ်ႈယဝ်ႉ၊ ၽိတ်းၵူၼ်းယဝ်ႉ၊ ဝႃႈၼင်ႇၼႆၼၼ်ႉယူႇတႃႇသေႇၶႃႈဢေႃႈ။
17မိူဝ်ႈဢၼ်ပူၼ်ႉမႃးပီႊၼမ်ၼႃႇယဝ်ႉၼၼ်ႉ ၵဝ်ၶႃႈပႃးဢဝ်တၢင်းဢၼ်ဝူၺ်ႇဝၵ်ႉ ၽႄၸွၼ်းတီႈၸိူဝ်ႉၶိူဝ်းၵူၼ်းမဵဝ်းၵဝ်ၶႃႈ ဢိၵ်ႇတင်းတၢင်းဢၼ်ပုၵ်ႈၸေႃႇတီႈၽြႃးပဵၼ်ၸဝ်ႈ တင်းလၢႆႁွတ်ႈမႃးလႄႈ၊- 18ၶဝ်ထူပ်းႁၼ်ၵဝ်ၶႃႈ ယင်းဢမ်ႇမီးလူၺ်ႈၵၼ်တင်းၵူၼ်းဢၼ်ၸူႉဢၼ်တုမ်၊ ယင်းဢမ်ႇႁဵတ်းတၢင်းဢၼ်ယုင်ႈယၢင်ႈဢူၼ်ဢဵၼ်မေႃးမႄးလႄႈ၊ ႁဵတ်းတၢင်းဢၼ်မူတ်းသႂ်ၵူၺ်း ၵႃႈတီႈၼႂ်းပိၵ်ႈမၢၼ်ႇၸဝ်ႈၶႃႈဢေႃႈ။ ၵူၺ်းၵႃႈ ၵူၼ်းယူႉတႃႉဢၼ်လုၵ်ႉသေၵႃႈတီႈမိူင်းဢႃႇသီႉ မႃးၵမ်ႈၽွင်ႈၼၼ်ႉ ႁဵတ်းတၢင်းဢၼ်ယုင်ႈယၢင်ႈဢူၼ်ဢဵၼ်မေႃးမႄးၶႃႈဢေႃႈ။- 19ပေႃးၶဝ်ၼၼ်ႉ မီးတီႈတၵ်းတၢင်ႇဢပႅတ်ႈၸိုင်၊ တူဝ်ၶဝ်လီမႃးၵႃႈတီႈၸဝ်ႈႁဝ်းလႄႈတၢင်ႇဢပႅတ်ႈၶႃႈဢေႃႈ။- 20ဢမ်ႇၼၼ်ၵေႃႈ ပေႃးပႄႇဝႆႉသေၵႂၢမ်းၵမ်းၼိုင်ႈဢၼ်ၵဝ်ၶႃႈ ၸုၵ်းယူႇၵႃႈတီႈၽၢႆႇၼႃႈၶဝ် 21ၼႂ်းမိူဝ်ႈဢၼ်ၵဝ်ၶႃႈလႆႈ မီးယူႇၵႃႈတီႈၽၢႆႇၼႃႈဢရႃႇသီႉလုမ်းလူင်ၼၼ်ႉသေလႄႈ ႁွင်ႉသႅၼ်ႇလႄႈဝႃႈ၊ ၵဝ်ၶႃႈၶၢမ်ႇတၢင်းဢၼ်ၸီႇယၢင်ႇၸႅတ်ႈထၢမ်လွင်ႈဢၼ်ၵူၼ်းတၢႆတင်းလၢႆ တၵ်းလုၵ်ႉၶိုၼ်းလိပ်းၼၼ်ႉ ၵႃႈတီႈၽၢႆႇၼႃႈသူၸဝ်ႈဝၼ်းမိူဝ်ႈၼႆႉၶႃႈဢေႃႈ၊ ဝႃႈၼင်ႇၼႆၼၼ်ႉၸိုင်၊ ႁႂ်ႈၶဝ်ၸိူဝ်းဢၼ် မီးယူႇတေႃႈလဵဝ်ၼႆႉ လၢတ်ႈပၼ်လွင်ႈဢၼ်ၶဝ်ထူပ်းဢပႅတ်ႈဢၼ်လႂ်ၼႂ်းၵဝ်ၶႃႈၼႆႉၼၼ်ႉသေၵမ်းၶႃႈ၊ ဝႃႈၼင်ႇၼႆဢေႃႈ။
22ၶုၼ်ၽေးလိတ်ႉၼၼ်ႉ ပဵၼ်ၵေႃႉဢၼ်ယဵင်ႈၶႅၼ်း ႁူႉသဵၼ်ႈတၢင်းၼၼ်ႉလႄႈ ယင်းဢမ်ႇၸီႇယၢင်ႇ ၶၢႆႉမိုဝ်ႉၶၢႆႉဝၼ်းတီႈၶဝ်သေလႄႈလၢတ်ႈဝႃႈ၊ မိူဝ်ႈဢၼ်ၵႄႇၵူၼ်းသိုၵ်းလူႉသီႉ လူင်းမႃးၼၼ်ႉၸိုင်ၵဝ်တၵ်းၸႅတ်ႈထၢမ်ၸႅတ်ႈတူၺ်း ဢမူႉသူၼႆႉထႅင်ႈလူးၵွၼ်ႇ၊ ဝႃႈၼင်ႇၼႆဢေႃႈ။- 23မၼ်းၸဝ်ႈသင်ႇလၢတ်ႈဝႆႉ လွင်ႈဢၼ်ယင်း ဢမ်ႇလႆႈဢဝ်မၼ်းဝႆႉတီႈၵိတ်ႇတီႈၵိၼ်းလႄႈ တၵ်းလႆႈပႂ်ႉယူႇလီလီ ဢိၵ်ႇတင်း လွင်ႈဢၼ်ဢမ်ႇလႆႈႁႄႉၶႅၼ် ပီႈၼွင်ႉမၼ်းမႃးႁဵတ်းလဵင်ႉႁဵတ်းလူမၼ်းၼၼ်ႉတီႈတပ်ႉမူးဢေႃႈ။
တမၢၼ်ႇၸဝ်ႈပေႃးလူႉၶဝ်ႈၸူးၶုၼ်ၽေးလိတ်ႉတင်းၼၢင်းမၼ်း
24လိုၼ်းၼၼ်ႉ ဢမ်ႇပေႃးႁိုင် ၶုၼ်ၽေးလိတ်ႉ ဢိၵ်ႇတင်း မေးမၼ်း တြႃႉသီႉလႃႉ ဢၼ်ပဵၼ်ၵူၼ်းယူႉတႃႉၼၼ်ႉမႃးသေယဝ်ႉ၊ ႁွင်ႉဢဝ်ပေႃးလူႉလႄႈ ထွမ်ၵႂၢမ်းဢၼ်ၸၢပ်ႈသႅင်ႇၵၼ်တင်း တၢင်းဢၼ်ယုမ်ႇမၢတ်ႈၸဝ်ႈၶရိၸ်ႈၼၼ်ႉဢေႃႈ။- 25မိူဝ်ႈဢၼ်ပေႃးလူႉ ႁေႃးလၢတ်ႈလွင်ႈတြႃးတၢင်းဢၼ်သိုဝ်ႈတေႃႇ၊ တြႃးတၢင်းဢၼ်ၶျုၵ်ႈၵႃႇမၵုင်ႇ၊ တြႃးတၢင်းဢၼ်ၸီႇယၢင်ႇၸႅတ်ႈထၢမ် ဢၼ်တၵ်းမႃးၵမ်းလိုၼ်းၸိူဝ်းၼၼ်ႉၸိုင်၊ ၶုၼ်ၽေးလိတ်ႉၼၼ်ႉ မီးတၢင်းဢၼ်ၵူဝ်ဢၼ်ႁႄၼႃႇလူင်လၢင်လႄႈ လၢတ်ႈဝႃႈ၊ တေႃႈလဵဝ်ၼႆႉၵႂႃႇလူးၵွၼ်ႇတႃႉ။ ၵမ်းလိုၼ်းမိူဝ်ႈဢၼ်ၵဝ်တၼ်းၸိုင်၊ ၵဝ်တၵ်းႁွင်ႉထႅင်ႈလူးၵွၼ်ႇ၊ ဝႃႈၼင်ႇၼႆလႄႈ၊- 26မုင်ႈမွင်းလွင်ႈဢၼ်ပေႃးလူႉ တၵ်းပၼ်ငိုၼ်း ႁႂ်ႈတူဝ်ၸဝ်ႈၵဝ်ႇလႆႈလွတ်ႈၼၼ်ႉဢေႃႈ။ ပိူဝ်ႈၼႆလႄႈ ဢမ်ႇႁိုင်ဢမ်ႇႁိုင်၊ ႁွင်ႉဢဝ် ပေႃးလူႉလႄႈ လၢတ်ႈၵႂၢမ်းလူၺ်ႈၵၼ်တင်းမၼ်းဢေႃႈ။- 27မိူဝ်ႈဢၼ်တဵမ်သွင်ပီႊယဝ်ႉ၊ ပေႃးၵီႉၽိတ်ႉတူႉ လႆႈဢရႃႇၶုၼ်ၽေးလိတ်ႉၼၼ်ႉလႄႈ ၶုၼ်ၽေးလိတ်ႉၼၼ်ႉ မီးတၢင်းၸႂ်ဢၼ်ၶႂ်ႈႁဵတ်းၵျေးၸူးၵႃႈတီႈၵူၼ်းယူႉတႃႉတင်းလၢႆလႄႈ ႁႂ်ႈပေႃးလူႉၶၢမ်ႇတူၵ်းၵိၼ်းၵိုတ်းဝႆႉထႃႈယူႇဢေႃႈ။
Currently Selected:
တမၢၼ်ႇၸဝ်ႈ 24: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
