တမၢၼ်ႇၸဝ်ႈ 21

1ႁဝ်းၸင်ႇၽၢတ်ႇၵၼ်တင်းၶဝ်ၼၼ်ႉသေယဝ်ႉ၊ ၶီႇႁိူဝ်းသၢင်းၽေႃးၵႂႃႇၸူးၵႃႈတီႈၵုၼ် ၵေႃႉသႃႉ သိုဝ်ႈသိုဝ်ႈလႄႈ ဝၼ်းမိူဝ်ႈၽုၵ်ႈႁွတ်ႈထိုင်ၵႃႈတီႈၵုၼ်ရေႃးတႃႉယဝ်ႉၸင်ႇ လုၵ်ႉသေၵႃႈတီႈၵုၼ်ၼၼ်ႉႁွတ်ႈထိုင်ၵႃႈတီႈဝဵင်းပႃႇတရႃႉဢေႃႈ။- 2ႁဝ်းထူပ်းႁိူဝ်းသၢင်းၽေႃးဢၼ် တၵ်းၶၢမ်ႈၵႂႃႇၵႃႈတီႈမိူင်းၽီႉၼိတ်ႉသေယဝ်ႉ ၶိုၼ်ႈၶီႇႁိူဝ်းသၢင်းၽေႃးၼၼ်ႉလႄႈ သမ်ႉၵႂႃႇထႅင်ႈဢေႃႈ။- 3မိူဝ်ႈဢၼ်ႁဝ်းႁၼ်ၵုၼ်ၵူႉပရူႉၼၼ်ႉၸိုင်ႁဝ်းလဵပ်ႈၵႂႃႇတၢင်းၽၢႆႇၶႂႃမၼ်းလႄႈ ၶၢမ်ႈၵႂႃႇၸူးၵႃႈတီႈမိူင်းသူႉရီႉသေယဝ်ႉ၊ သိူၵ်ႈၵႃႈတီႈဝဵင်းတူႉရူႉဢေႃႈ။ လွင်ႈမၼ်းၸမ်ႉ ၶဝ်တၵ်းလႆႈၶျႃးၶူဝ်းဢၼ်ပႃးမႃးၵႃႈၼႂ်းႁိူဝ်းသၢင်းၽေႃး ၵႃႈတီႈဝဵင်းၼၼ်ႉဢေႃႈ။- 4ႁဝ်းထူပ်းႁၼ်တပႄးၸဝ်ႈတင်းလၢႆလႄႈယူႇၵႃႈတီႈၼၼ်ႈၸဵတ်းဝၼ်းဢေႃႈ။ လွင်ႈၼင်ႇႁိုဝ်ပေႃးလူႉ တၵ်းဢမ်ႇလႆႈၶိုၼ်ႈၵႂႃႇၵႃႈတီႈဝဵင်းယေႇရူႉသလႅမ်ႇ ပုၼ်ႉၸိုင် ၶဝ်ၼၼ်ႉပႃးတင်းဝီႉၺိၺ်ႇၸဝ်ႈသေလႄႈ လၢတ်ႈတီႈမၼ်းဢေႃႈ။

5မိူဝ်ႈဢၼ်ၸေးဝၼ်းယဝ်ႉၼၼ်ႉၸိုင်၊ တပႄးၸဝ်ႈတင်းသဵင်ႈတင်းလူင် ဢိၵ်ႇတင်းလုၵ်ႈၶဝ်မေးၶဝ်ၸွမ်းသူင်ႇႁဝ်း တေႃႇထိုင်ႁွတ်ႈၵႃႈၼွၵ်ႈဝဵင်းသေယဝ်ႉ၊ ဢွၼ်ၵၼ်ၶုပ်ႉၶဝ်ႇၵႃႈၼိူဝ်ၽင်ႇပၢင်ႇလၢႆႇသေလႄႈ သူးတွင်းဢေႃႈ။- 6ၼင်ႇၵၼ်ၵၼ်တၵ်ႉလၢတ်ႈၵၼ်သေယဝ်ႉ၊ ႁဝ်းၶိုၼ်ႈၵႃႈၼိူဝ်ႁိူဝ်းသၢင်းၽေႃးလႄႈ ၶဝ်ၼၼ်ႉၵေႃႈၶိုၼ်းမိူဝ်းၵႂႃႇၵႃႈတီႈႁိူၼ်းၶဝ်သေဢေႃႈ။- 7မိူဝ်ႈဢၼ်ႁဝ်းလုၵ်ႉသေၵႃႈတီႈဝဵင်းတူႉရူႉလႄႈ ႁွတ်ႈထိုင်ၵႃႈတီႈဝဵင်းပႃႇတေႃႇလိၼ်ႇၼၼ်ႉၸိုင် ႁဝ်းလွတ်ႈတင်းတၢင်းဢၼ်ၶၢမ်ႈပၢင်ႇလၢႆႇဢေႃႈ။ ႁဝ်းတၵ်ႉလၢတ်ႈၵၼ်တင်းပီႈၼွင်ႉၸိူဝ်းဢၼ် မီးၵႃႈၼႂ်းဝဵင်းပႃႇတေႃႇလိၼ်ႇၼၼ်ႉလႄႈ ယူႇဝၼ်းၼိုင်ႈယဝ်ႉ၊- 8ဝၼ်းမိူဝ်ႈၽုၵ်ႈသမ်ႉဢွၵ်ႇၵႂႃႇလႄႈ ႁွတ်ႈထိုင်ၵႃႈတီႈဝဵင်းၵေႇသရီႉသေယဝ်ႉ၊ ၶဝ်ႈၵႃႈၼႂ်းႁိူၼ်းၽီႉလိပ်ႉပူႉ သြႃႇပွင်သႃႇသၼႃႇဢၼ်ပႃးၼႂ်းသြႃႇၸဵတ်းပႃးၼၼ်ႉလႄႈ ယူႇလူၺ်ႈၵၼ်တင်းမၼ်းဢေႃႈ။- 9တီႈမၼ်းၼၼ်ႉ မီးလုၵ်ႈယိင်းသၢဝ်သီႇၵေႃႉဢၼ်ႁဵတ်းပရေႃးၽႅတ်ႈဢေႃႈ။

10ၼႂ်းမိူဝ်ႈဢၼ်ႁဝ်းယူႇၼႂ်းႁိူၼ်းၼၼ်ႉ ယူႇႁၢမ်ႉႁိုင်ၼၼ်ႉၸိုင်၊ ပရေႃးၽႅတ်ႈဢၼ်လႆႈၸိုဝ်ႈဢႃႇၵပူႉ ၵေႃႉၼိုင်ႈ၊ လုၵ်ႉသေၵႃႈတီႈမိူင်းယူႉတႃႉမႃးလႄႈ၊- 11ၶဝ်ႈၸူးၵႃႈတီႈဢၼ်ႁဝ်းမီးၼၼ်ႉသေယဝ်ႉ ဢဝ်သၢႆဢႅဝ်ပေႃးလူႉမတ်ႉတိၼ်တင်းမိုဝ်းတူဝ်ၸဝ်ႈၵဝ်ႇသေလႄႈလၢတ်ႈဝႃႈ၊ ဝီႉၺိၺ်ႇဢၼ်မူတ်းၸၢင်ႇၸဝ်ႈဝႃႈၸမ်ႉ၊ ၸဝ်ႈသၢႆဢႅဝ်ၼႆႉၸိုင် ၵူၼ်းယူႉတႃႉတင်းလၢႆ တၵ်းမတ်ႉၽုၵ်ႇၸိူဝ်ႉၼင်ႇၼႆ ၵႃႈၼႂ်းဝဵင်း ယေႇရူႉသလႅမ်ႇ ပုၼ်ႉလႄႈ ဢၢပ်ႈပၼ်ၵႃႈတီႈမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ၊ ဝႃႈၼင်ႇၼႆဢေႃႈ။- 12ႁဝ်းလႆႈငိၼ်းၵႂၢမ်းၼၼ်ႉသေယဝ်ႉ၊ ႁဝ်းဢိၵ်ႇတင်းၶဝ်ၸိူဝ်းဢၼ်မီးယူႇၵႃႈၼႂ်းတီႈၼၼ်ႈၼၼ်ႉ၊ ၼင်ႇႁိုဝ်ပေႃးလူႉ၊ တၵ်းဢမ်ႇၶိုၼ်ႈၵႂႃႇၵႃႈတီႈဝဵင်းယေႇရူႉသလႅမ်ႇၸိုင် ဢွၼ်ၵၼ်တွင်းပၢၼ်ႇဢေႃႈ။- 13ပေႃးလူႉၵေႃႈလၢတ်ႈလႄႈဝႃႈ ႁဵတ်းသင်လႄႈ သူႁႆႈႁွင်ႉယူႇသေလႄႈ ႁဵတ်းႁႂ်ႈႁူဝ်ၸႂ်ၵဝ်တႅၵ်ႇၵႂႃႇလႅဝ်ၵႂႃႇၼင်ႇႁိုဝ်။ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၸဝ်ႈယေႇသူႉလႄႈ ပုၼ်ႈဢၼ်တၵ်းၶၢမ်ႇတၢင်းဢၼ်မတ်ႉၽုၵ်ႇ ၵႃႈၼႂ်းဝဵင်းယေႇရူႉသလႅမ်ႇဢမ်ႇၵႃး၊ ပုၼ်ႈဢၼ်တၵ်းၶၢမ်ႇတၢင်းတၢႆၸိုင်ၵဝ်မႄးႁႅၼ်းဝႆႉယဝ်ႉ၊ ဝႃႈၼင်ႇၼႆဢေႃႈ။- 14မိူဝ်ႈဢၼ်မၼ်းဢမ်ႇၸွမ်းတၢင်းဢၼ်ႁဝ်းၸူဝ်းၵႂႃႇၸူဝ်းပႆၼၼ်ႉၸိုင်၊ ႁဝ်းယူႇတဵတ်ႇတဵတ်ႇသေလႄႈဝႃႈ၊ ႁႂ်ႈဢလူဝ်ႇၸဝ်ႈၽြႃးပဵၼ်သေၵမ်းလူၺ်ႈ၊ ဝႃႈၼင်ႇၼႆဢေႃႈ။

15လိုၼ်းၼၼ်ႉ ႁဝ်းႁႅၼ်းၶူဝ်းလႄႈၶိုၼ်ႈၵႂႃႇၵႃႈတီႈဝဵင်းယေႇရူႉသလႅမ်ႇဢေႃႈ။- 16တပႄးၸဝ်ႈဢၼ်ပဵၼ်ၵူၼ်းဝဵင်းၵေႇသရီႉ ၵမ်ႈၽွင်ႈၸွမ်းလူၺ်ႈၵၼ်တင်းႁဝ်းလႄႈ ဢဝ်ႁဝ်းၵႂႃႇသူင်ႇၵႃႈတီႈ မၼႃႇသုၼ်ႇ ဢၼ်ပဵၼ်ၵူၼ်းၵုၼ် ၵူႉပရူႉ၊ တပႄးၸဝ်ႈဢၼ်ဢသၢၵ်ႈယႂ်ႇ ၵေႃႉဢၼ်တၵ်းၶၢမ်ႇၶႅၵ်ႇႁဝ်းၼၼ်ႉဢေႃႈ။

17မိူဝ်ႈဢၼ်ႁဝ်းႁွတ်ႈထိုင် ၵႃႈတီႈဝဵင်းယေႇရူႉသလႅမ်ႇၼၼ်ႉၸိုင်၊ ပီႈၼွင်ႉတင်းလၢႆၼၼ်ႉ မီးတင်းၸႂ်ဢၼ်ၸူမ်းသိူဝ်းလႄႈ ႁပ်ႉတုင်းဢဝ်ႁဝ်းဢေႃႈ။- 18ဝၼ်းမိူဝ်ႈၽုၵ်ႈပေႃးလူႉ ဢိၵ်ႇတင်းႁဝ်းၶဝ်ႈၸူးၵႃႈတီႈယႃႇၵုပ်ႈလႄႈၵူၼ်းဢုပ်ႉၸိူဝ်းၸဝ်ႈတင်းသဵင်ႈတင်းလူင် ၸူႉၵၼ်တုမ်ၵၼ်ဢေႃႈ။- 19မၼ်းတၵ်ႉလၢတ်ႈၶဝ်ၼၼ်ႉသေယဝ်ႉ၊ ၽုၺ်ႇဢွၵ်ႇၼႄပျႃးလွင်ႈတၢင်း ၵႃႈဢၼ်ၽြႃးပဵၼ်ၸဝ်ႈႁဵတ်းတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ ၵွပ်ႈပိူဝ်ႈတၢင်းဢၼ်မၼ်းႁဵတ်းပွင်ဢမူႉထမ်ႇမႃႉသြႃႇၼၼ်ႉဢေႃႈ။- 20ၶဝ်ၼၼ်ႉငိၼ်းသေယဝ်ႉ ဢွၼ်ၵၼ်ယွင်ႈယေႃးမုၼ်ၽုင်းၽြႃးပဵၼ်ၸဝ်ႈလႄႈ လၢတ်ႈတီႈမၼ်းလႄႈဝႃႈ၊ ပီႈၼွင်ႉဢိူၺ်း၊ မႂ်းႁူႉႁၼ်လွင်ႈဢၼ်ၵူၼ်းယူႉတႃႉ ဢၼ်ယုမ်ႇမၢတ်ႈၸိူဝ်းၼႆႉ မီးလၢႆမိုၼ်ႇလၢႆႁဵင်ၼၼ်ႉယူႇဢေႃႈ။ ၶဝ်တင်းသဵင်ႈတင်းလူင် ပဵၼ်ၵေႃႉဢၼ်ႁႅင်းယႂ်ႇ ၵႃႈတီႈၽၢႆႇပိင်းၺၢပ်ႈတြႃးၼႃႇလူင်လၢင်ဢေႃႈ။- 21ၶဝ်လႆႈငိၼ်းလွင်ႈဢၼ်မႂ်းၸၢင်ႈသင်ႇသွၼ်ပၼ်ၵူၼ်းယူႉတႃႉတင်းသဵင်ႈတင်းလူင် ဢၼ်ယူႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းၼၼ်ႉ၊ ႁႂ်ႈၶဝ်လႆႈၸုၼ်ႉပႅတ်ႈတြႃးမူဝ်းသေႇလႄႈ လၢတ်ႈတီႈၶဝ်လႄႈဝႃႈ၊ ဢမ်ႇလႆႈပၼ်တၢင်းဢၼ်ထိူဝ်ႁိမ်းတီႈလုၵ်ႈလၢင်းၶဝ်၊ ဢမ်ႇလႆႈၵမ်ၵျၢင်ႉၸွမ်းၼင်ႇထုင်းၸၢမ်ႇမိူဝ်ႈၵွၼ်ႇ၊ ဝႃႈၼင်ႇၼႆၼၼ်ႉယဝ်ႉ။- 22ပိူဝ်ႈၼႆလႄႈ တၵ်းလႆႈႁဵတ်းၸိူဝ်ႉၼင်ႇႁိုဝ်။ ပိူဝ်ႈဢၼ်ၶဝ်တၵ်းငိၼ်းလွင်ႈဢၼ်မႂ်းႁွတ်ႈမႃးလႄႈ ၵူၼ်းၼမ်ၼႃႇယင်းဢမ်ႇၸူႉၵၼ်တုမ်ၵၼ်လႄႈ ဢမ်ႇယူႇလႆႈ။- 23ၵွပ်ႈႁွႆးၼႆႉ၊ ႁဵတ်းၸွမ်းၵႃႈၼင်ႇဢၼ်ႁဝ်းၶႃႈဝႃႈၼႆသေၵမ်း။ ၵူၼ်းဢၼ်ႁဵတ်းၵတီႉသဵတ်ႈၸႃႇၼၼ်ႉမီးတီႈႁဝ်းၶႃႈသီႇၵေႃႉဢေႃႈ။- 24ဢဝ်ၶဝ်ၼၼ်ႉသေလႄႈ ႁဵတ်းတၢင်းဢၼ်မူတ်းသႂ်ႁူမ်ႈလူၺ်ႈၵၼ်တင်းၶဝ်သေယဝ်ႉ၊ ပၼ်ၸရိပ်ႈပုၼ်ႈၶဝ် ႁႂ်ႈၶဝ်ထႃႁူဝ်သေၵမ်း။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၵူၼ်းတင်းသဵင်တင်းလူင် တၵ်းႁူႉလွင်ႈဢၼ်ၵႂၢမ်းသတၢင်းသဵင်ၶၢဝ်ႇ ဢၼ်ၶဝ်လႆႈငိၼ်းလွင်ႈမႂ်းၼၼ်ႉ ဢမ်ႇမၢၼ်ႇဢမ်ႇမႅၼ်ႈ ဢိၵ်ႇတင်းလွင်ႈဢၼ်မႂ်းတူဝ်ၸဝ်ႈၵဝ်ႇပႂ်ႉၸွမ်းပိင်းၺၢပ်ႈတြႃးလႄႈ ၵမ်ၵျၢင်ႉယူႇၼၼ်ႉဢေႃႈ။- 25ၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ယုမ်ႇမၢတ်ႈၸိူဝ်းၼၼ်ႉၸမ်ႉ၊ ႁဝ်းလႆႈၸီႇယၢင်ႇလႄႈ ပၼ်ငိၼ်းၵႂႃႇလွင်ႈဢၼ် ယင်းဢမ်ႇႁႂ်ႈလႆႈၵမ်ၵျၢင်ႉတြႃးၸိူဝ်ႉၼင်ႇၼၼ်လႄႈ တၵ်းလႆႈဝႄႈပႅတ်ႈယိတ်ႈဢၼ်ပုၵ်ႈၸေႃႇၵႃႈတီႈၽၢႆႇၼႃႈရုၵ်ႈထူႉ ဢိၵ်ႇတင်းလိူတ်ႈ တင်းၶိူင်ႈပိူင်ဢၼ်ငႅၼ်းၶေႃးဢဝ်တၢႆ၊ တင်းမေႇထုင်ႇဢၼ်ဢမ်ႇတြႃးၸိူဝ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။

26မိူဝ်ႈၼၼ်ႉပေႃးလူႉၸင်ႇ ႁွင်ႉဢဝ်ၶဝ်ၼၼ်ႉလႄႈ ဝၼ်းမိူဝ်ႈၽုၵ်ႈဢိၵ်ႇလူၺ်ႈၵၼ်တင်းၶဝ်ၼၼ်ႉ ႁဵတ်းတၢင်းဢၼ်မူတ်းသႂ်သေယဝ်ႉ၊ ၶဝ်ႈၵႃႈၼႂ်းပိၵ်ႈမၢၼ်ႇၸဝ်ႈလႄႈမွၵ်ႇလၢတ်ႈၶိင်ႇဝၼ်းဢၼ်တၵ်းလႆႈႁဵတ်းတၢင်းဢၼ်မူတ်းသႂ် ႁႂ်ႈထၼ်ႈပေႃးၸေး ဢၼ်ဝႃႈ ၶိင်ႇဢၼ်တၵ်းလႆႈႁဵတ်းတၢင်းဢၼ် ပုၵ်ႈၸေႃႇပုၼ်ႈၶဝ် ႁင်းၽႂ်ႁင်းမၼ်းၼၼ်ႉဢေႃႈ။

27မိူဝ်ႈဢၼ်ၸမ်တၵ်းၸေးၸဵတ်းဝၼ်းၼၼ်ႉၸိုင်၊ ၵူၼ်းယူႉတႃႉဢၼ်လုၵ်ႉသေၵႃႈတီႈမိူင်းဢႃႇသီႉမႃးၸိူဝ်းၼၼ်ႉ ထူပ်းႁၼ်ပေႃးလူႉ ၵႃႈၼႂ်းပိၵ်ႈမၢၼ်ႇၸဝ်ႈယဝ်ႉၸင်ႇ တိုၵ်းယူင်းၵူၼ်းဢၼ်ၸူႉဢၼ်တုမ်တင်းသဵင်ႈတင်းလူင်လႄႈတီႉဢဝ်ပေႃးလူႉသေယဝ်ႉ၊- 28ႁွင်ႉသႅၼ်ႇလႄႈဝႃႈ၊ ၵူၼ်းဢီႉသရေႇလႃႉၶဝ်ဢိူၺ်း၊ ၸွႆႈထႅမ်ႁဝ်းသေၵမ်း။ ၵေႃႉၼႆႉၸမ်ႉ၊ ပဵၼ်ၵေႃႉဢၼ်သင်ႇသွၼ်ပၼ်ၵူၼ်းတင်းလၢႆ ၵူႈတီႈၵူႈလႅၼ်လႄႈ ႁဵတ်းၶတ်းၵၼ်တင်းၸိူဝ်ႉၶိူဝ်းၵူၼ်းႁဝ်း ဢိၵ်ႇတင်းပိင်းၺၢပ်ႈတြႃး တင်းတီႈထႃႇၼႃႉၼႆႉဢေႃႈ။ လိူဝ်သေၼၼ်ႉဢမ်ႇၵႃး မၼ်းဢဝ်ၶဝ်ၸိူဝ်းဢၼ်ပဵၼ်ၵူၼ်းႁေႇလသႃႉသူင်ႇႁွတ်ႈၵႃႈၼႂ်းပိၵ်ႈမၢၼ်ႇၸဝ်ႈလႄႈ ႁႂ်ႈတီႈထႃႇၼႃႉဢၼ်မူတ်းၸၢင်ႇၼႆႉၵူဝ်ႈၵိူၵ်ႇယဝ်ႉလူင်ပႄႇ၊ ဝႃႈၼင်ႇၼႆဢေႃႈ။- 29လွင်ႈမၼ်းၸမ်ႉ မိူဝ်ႈဢွၼ်တၢင်းၼၼ်ႉ ပိူဝ်ႈဢၼ်ၶဝ်လႆႈႁၼ်တရေႃးၽိမ်း၊ ၵူၼ်းဝဵင်းဢေးၽႅတ်ႈၵေႃႉၼိုင်ႈမီးယူႇလူၺ်ႈၵၼ်တင်းပေႃးလူႉ ၵႃႈၼႂ်းဝဵင်းၼၼ်ႉလႄႈ ၶဝ်ထၢင်ႇပေႃးလူႉ ဢဝ်ၵေႃႉၼၼ်ႉသူင်ႇႁွတ်ႈၵႃႈၼႂ်းပိၵ်ႈမၢၼ်ႇၸဝ်ႈဢေႃႈ။- 30ယုင်ႈယၢင်ႈဢူၼ်ဢဵၼ်ၵၼ်တင်းဝဵင်းလႄႈ ၵူၼ်းတင်းလၢႆဢွၼ်ၵၼ်လႅၼ်ႈမႃးၸူႉၵၼ်တုမ်ၵၼ်လႄႈ ယိပ်းၵမ်ဢဝ်ပေႃးလူႉ ဢီးဢွၵ်ႇၵႃႈၼွၵ်ႈပိၵ်ႈမၢၼ်ႇၸဝ်ႈသေယဝ်ႉ၊ ဢိုတ်းၽၵ်းတူဝႆႉသေၵမ်းလဵဝ်ဢေႃႈ။

31မိူဝ်ႈဢၼ် ၶဝ်ႁႃဢဝ်ပေႃးလူႉတၢႆၼၼ်ႉၸိုင်၊ ၵႄႇသိုၵ်းဢၼ်ဢုပ်ႉၵႃႈၼိူဝ်ၵူၼ်းႁဵင်ၼိုင်ႈၼၼ်ႉ ငိၼ်းသတၢင်းလွင်ႈဢၼ် ဝဵင်းယေႇရူႉသလႅမ်ႇ ဢူၼ်ဢဵၼ်ၵၼ်ၵႂႃႇတင်းဝဵင်းၼၼ်ႉလႄႈ၊- 32ႁွင်ႉဢဝ်ၵူၼ်းသိုၵ်းဢိၵ်ႇတင်းတပ်ႉမူးတင်းလၢႆၵမ်းလဵဝ်သေယဝ်ႉ၊ လႅၼ်ႈလူင်းၵႂႃႇၸူးၵႃႈတီႈဢၼ်ၶဝ်မီးၼၼ်ႉဢေႃႈ။ ၶဝ်ၼၼ်ႉ ႁၼ်ၵႄႇၵူၼ်းသိုၵ်းဢိၵ်ႇတင်းၵူၼ်းသိုၵ်းတင်းလၢႆၼၼ်ႉသေယဝ်ႉ ယင်းဢမ်ႇပေႃႉယႅၼ်ႉပေႃးလူႉလႄႈၵိုတ်းယူႇဢေႃႈ။- 33မိူဝ်ႈၼၼ်ႉၵႄႇၵူၼ်းသိုၵ်းၼၼ်ႉ မႃးၸမ်ၸမ်သေလႄႈ ယိပ်းၵမ်ဢဝ်ပေႃးလူႉယဝ်ႉၸင်ႇ၊ ၸီႇယၢင်ႇဢဝ်တင်းၸိူၵ်ႈလဵၵ်းသွင်သဵၼ်ႈမတ်ႉၽုၵ်ႇလႄႈထၢမ်ဝႃႈ၊ ၵေႃႉၼႆႉပဵၼ်ၽူႈလႂ်၊ မႂ်းလႆႈႁဵတ်းဢမူႉဢၼ်လႂ်ယဝ်ႉ၊ ဝႃႈၼင်ႇၼႆဢေႃႈ။- 34ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉၵမ်ႈၽွင်ႈ ႁွင်ႉသႅၼ်ႇယေႈၸိူဝ်း၊ ၵမ်ႈၽွင်ႈႁွင်ႉသႅၼ်ႇယေႈမဵဝ်းလႄႈ မိူဝ်ႈဢၼ်ၵႄႇၵူၼ်းသိုၵ်းဢမ်ႇႁူႉ ဢၼ်မၢၼ်ႇဢၼ်မႅၼ်ႈလႆႈ ၵွပ်ႈပိူဝ်ႈတၢင်းဢၼ်ဢူၼ်ဢဵၼ်ၼၼ်ႉၸိုင်၊ မၼ်းသမ်ႉၸီႇယၢင်ႇ ႁႂ်ႈဢဝ်ပေႃးလူႉၵႂႃႇၵႃႈၼႂ်းတပ်ႉသေဢေႃႈ။- 35မိူဝ်ႈဢၼ်ပေႃးလူႉ ႁွတ်ႈထိုင်ၵႃႈၼိူဝ်ၶူဝ်လႆၼၼ်ႉၸိုင်၊ ပိူဝ်ႈဢၼ်ၵူၼ်းဢၼ်ၸူႉဢၼ်တုမ်ႁႅင်းယႂ်ႇၼႃႇလႄႈ ၵူၼ်းသိုၵ်းၸိူဝ်းၼၼ်ႉ ႁွပ်ႇဢဝ်ပေႃးလူႉၵႂႃႇဢေႃႈ။- 36လွင်ႈမၼ်းၸမ်ႉ ၵူၼ်းတင်းလၢႆၼၼ်ႉဢွၼ်ၵၼ် ႁွင်ႉသႅၼ်ႇလႄႈဝႃႈ၊ ဢဝ်ပႅတ်ႈသေ၊ ဝႃႈၼင်ႇၼႆယူႇသေလႄႈ ၸွမ်းၵႂႃႇဢေႃႈ။

37 ပေႃးလူႉၼၼ်ႉမိူဝ်ႈဢၼ်ၸမ်တၵ်းၶဝ်ႈၵႃႈၼႂ်းတပ်ႉၼၼ်ႉၸိုင်၊ ထၢမ်ၵႄႇၵူၼ်းသိုၵ်းလႄႈဝႃႈ၊ ၵဝ်ၶႃႈၼႆႉၸွင်ႇလၢတ်ႈၵႂၢမ်းတီႈၸဝ်ႈႁဝ်းလႆႈၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၵႄႇၵူၼ်းသိုၵ်းၼၼ်ႉၵေႃႈထၢမ်လႄႈဝႃႈ၊ မႂ်းၼႆႉမေႃလၢတ်ႈၵႂၢမ်းႁေႇလသႃႉႁိုဝ်။- 38မႂ်းၼႆႉပဵၼ် ၵူၼ်းဢေႇၵိပ်ႉတူႉ ဢၼ်ပုင်ႇၵၢၼ်ႇမိူဝ်ႈၼၼ်ႉလႄႈ ႁွင်ႉဢဝ်ၵူၼ်းသီႇႁဵင် ၵႃႈၼႂ်းမုၵ်ႉၸိူဝ်းၸူၼ် ၵႂႃႇၵႃႈၼႂ်းထိူၼ်ႇၼၼ်ႉဢမ်ႇၸႂ်ႈႁိုဝ်၊ ဝႃႈၼင်ႇၼႆဢေႃႈ။- 39ပေႃးလူႉၵေႃႈလၢတ်ႈလႄႈဝႃႈ၊ ၵဝ်ၶႃႈၼႆႉ ပဵၼ်ၵူၼ်းယူႉတႃႉ ဢၼ်ၵိူတ်ႇလဵင်ႉမႃးၵႃႈၼႂ်းဝဵင်းတႃႇသူႉ မိူင်းၵီႉလီႉၵီႉၶႃႈဢေႃႈ။ ဝဵင်းဢၼ်ၵဝ်ၶႃႈယူႇၼၼ်ႉၸမ်ႉ၊ ပဵၼ်ဝဵင်းပၢၼ်ၵၢင်ၵူၺ်းဢမ်ႇၸႂ်ႈ။ ပၼ်ဢၶႂၢင်ႉဢၼ်ၵဝ်ၶႃႈတၵ်းလႆႈလၢတ်ႈတေႃႇၵူၼ်းၸိူဝ်းၼႆႉသေၵမ်းၶႃႈ။ ၵဝ်ၶႃႈလဝ်ႊယွၼ်းၵႃႈတီႈၸဝ်ႈႁဝ်းၶႃႈဢေႃႈ၊ ဝႃႈၼင်ႇၼႆဢေႃႈ။

40ၵႄႇၵူၼ်းသိုၵ်းပၼ်ဢၶႂၢင်ႉသေယဝ်ႉ၊ ပေႃးလူႉၸုၵ်းယူႇၵႃႈၼိူဝ်ၶူဝ်လႆသေလႄႈ ၼႄမိုဝ်းမၼ်းတီႈၵူၼ်းတင်းလၢႆဢေႃႈ၊ မိူဝ်ႈဢၼ်ၶဝ်ၼၼ်ႉတဵတ်ႇယဵၼ်ၼႃႇလူင်လၢင်သေလႄႈယူႇၼၼ်ႉၸိုင်၊ ပေႃးလူႉဢဝ်တင်းၽႃႇသႃႇ ၵႂၢမ်းႁေႇပြႄး မွၵ်ႇလၢတ်ႈလႄႈဝႃႈ၊

Popular Bible Verses from
တမၢၼ်ႇၸဝ်ႈ 21

Videos for တမၢၼ်ႇၸဝ်ႈ 21

Acts 13-28

Acts 21-28

Acts Ch. 21-28

Acts 21-23

Bible:

Shan

Version: သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး - CBMS