တမၢၼ်ႇၸဝ်ႈ 22
22
1ပီႈၼွင်ႉဢိၵ်ႇတင်းပေႃႈတင်းလၢႆၶဝ်ဢိူၺ်း၊ ထွမ်ႇငိၼ်းၵႂၢမ်းဢၼ်ၵဝ်ၶႃႈလၢတ်ႈၽေႇဢပႅတ်ႈတူဝ်ၸဝ်ႈၵဝ်ႇ ၵႃႈတီႈၽၢႆႇၼႃႈသူၸဝ်ႈတေႃႈလဵဝ်ၼႆႉသေၵမ်းၶႃႈ၊ ဝႃႈၼင်ႇၼႆလႄႈ၊- 2မိူဝ်ႈဢၼ်ၶဝ်ငိၼ်းမၼ်းဢဝ်တင်းၵႂၢမ်းၽႃႇသႃႇႁေႇပြႄးလၢတ်ႈၼၼ်ႉၸိုင်၊ ၶဝ်ယဵင်ႈၶႅၼ်းယူႇတဵတ်ႇတဵတ်ႇယဵၼ်ယဵၼ်ၼႃႇလူင်လၢင်ဢေႃႈ။- 3မၼ်းၵေႃႈမွၵ်ႇလၢတ်ႈလႄႈဝႃႈ၊ ၵဝ်ၶႃႈၼႆႉ ပဵၼ်ၵူၼ်းဢၼ်ၵိူတ်ႇလဵင်ႉမႃး ၵႃႈၼႂ်းဝဵင်းတႃႇသူႉ၊ မိူင်းၵီႉလီႉၵီႉ ပုၼ်ႉၶႃႈဢေႃႈ။ ၵႃႈၼႂ်းဝဵင်းၼႆႉၵေႃႈ ၵဝ်ၶႃႈလႆႈၶၢမ်ႇတၢင်းဢၼ်လဵင်ႉဢၼ်လူလႄႈ ၵႃႈၼင်ႇတၢင်းဢၼ်သေႇၶျႃႇၼႂ်းတြႃး ဢၼ်ပူႇပေႃႈသိုပ်ႇၵၼ်ၵမ်ၵျၢင်ႉမႃးၼၼ်ႉ၊ ၶၢမ်ႇဢဝ်ၼႄးဢူႉပတေႇၵႃႈတီႈတိၼ်သြႃႇၵႃႇမလျေးလႃႉ ၶႃႈယဝ်ႉ။ ၸိူဝ်ႉၼင်ႇဢၼ်သူၸဝ်ႈ ၵႃႈမီးၼႆႉၸႂ်ပႃးၽၢႆႇၽြႃးပဵၼ်ၸဝ်ႈၼႃႇလူင်လၢင် တေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉ ၵဝ်ၶႃႈၵေႃႈၸႂ်ပႃးၼႃႇလူင်လၢင်လႄႈ၊- 4မတ်ႉၽုၵ်ႇဢဝ်ၸဵမ်ယိင်းၸဵမ်ၸၢႆးယူႇ၊ ဢဝ်ၶင်ဝႆႉၵႃႈၼႂ်းထွင်ႇယူႇသေလႄႈ ၼိၵ်ႈၸၢၵ်ႈငႅၼ်းသႄးသဵၼ်ႈတၢင်းၼႆႉတေႃႇထိုင်ႁွတ်ႈထၼ်ႈပေႃးဢဝ်တၢႆၶႃႈယဝ်ႉ။- 5မိူၼ်ၼင်ႇၼၼ်ၸႃႉၸဵမ်ၶုၼ်ယိတ်ႈပရေႃးႁဵၵ်ႈဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ် တင်းသဵင်ႈတင်းလူင် ပဵၼ်ၵေႃႉဢၼ်ၶၢမ်ႇသၢၵ်ႈသေႇၽၢႆႇၵဝ်ၶႃႈဢေႃႈ။ ၵႃႈတီႈၶဝ်ၼၼ်ႉၵေႃႈ ၵဝ်ၶႃႈလႆႈၶၢမ်ႇဢဝ်လိၵ်ႈဢၼ်သင်ႇလၢတ်ႈ ၵႃႈတီႈပီႈၼွင်ႉတင်းလၢႆသေယဝ်ႉ၊ ၸွမ်းတၢင်းၵႂႃႇၸူးၵႃႈတီႈ ဝဵင်း ထမ်ႇမသႅတ်ႉပုၼ်ႉ ႁႂ်ႈလႆႈမတ်ႉၽုၵ်ႇဢဝ်ၶဝ်ၸိူဝ်းဢၼ်ၶဝ်ႈၽႃႇသႃႇၼၼ်ႉ ဢၼ်မီးယူႇၵႃႈၼႂ်းဝဵင်းၼၼ်ႉလႄႈ သူင်ႇၵႃႈတီႈဝဵင်းယေႇရူႉသလႅမ်ႇ၊ ႁႂ်ႈၶဝ်လႆႈၶၢမ်ႇတၢမ်ႇၶႃႈဢေႃႈ။
တမၢၼ်ႇၸဝ်ႈပေႃးလူႉပိၼ်ႇၸႂ်မႂ်ႇမႃး
(တူၺ်း၊ တ 9:1-19။ တ 26:12-18)
6ၼႂ်းမိူဝ်ႈဢၼ်ၵဝ်ၶႃႈယင်းတိုၵ်ႉၸွမ်းတၢင်းၵႂႃႇလႄႈ ႁွတ်ႈထိုင်ၵႃႈတီႈႁိမ်း ဝဵင်း ထမ်ႇမသႅတ်ႉၼၼ်ႉၸိုင်၊ ၶိင်ႇၵၢင်ဝၼ်းတဵင်ႈ၊ ဢၼ်လႅင်းလူင်လုၵ်ႉသေၵႃႈတီႈၵၢင်ႁၢဝ်မႃးလႄႈ ႁိူဝ်ႈလႅင်းႁွပ်ႈႁိမ်းၵဝ်ၶႃႈၵမ်းလဵဝ်ၶႃႈဢေႃႈ။- 7ၵဝ်ၶႃႈလူမ်ႉဢူပ်ႇပူပ်ႇၵႃႈၼိူဝ်လိၼ်သေလႄႈ ငိၼ်းသဵင်ဢၼ်လၢတ်ႈတေႃႇၵဝ်ၶႃႈလႄႈဝႃႈ၊ သေႃးလူႉဢိူၺ်း၊ သေႃးလူႉဢိူၺ်း၊ ႁဵတ်းသင်လႄႈမႂ်းၼိၵ်ႈၸၢၵ်ႈငႅၼ်းသႄးၵဝ်ၼင်ႇႁိုဝ်၊ မိူဝ်ႈဢၼ်ဝႃႈၼင်ႇၼႆၸိုင်၊- 8ၵဝ်ၶႃႈၵေႃႈလဝ်ႊထၢမ်လႄႈဝႃႈ ၸဝ်ႈႁဝ်းပဵၼ်ၽူႈလႂ်ၶႃႈ၊ ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်ၸမ်ႉ၊ ပဵၼ်ယေႇသူႉ၊ ၵူၼ်းဝဵင်းၼႃႇၸရႅတ်ႈ ဢၼ်မႂ်းၼိၵ်ႈၸၢၵ်ႈငႅၼ်းသႄးၼၼ်ႉဢေႃႈ၊ ဝႃႈၼင်ႇၼႆဢေႃႈ။- 9ပိၵ်ႉသမ်ႉၵူၼ်းဢၼ်ပႃးလူၺ်ႈၵၼ်တင်းၵဝ်ၶႃႈၸိူဝ်းၼၼ်ႉ လႆႈႁၼ်ဢၼ်လႅင်းၼၼ်ႉလႄႈၵူဝ်ႁႄၼႃႇသေၵေႃႈ ၶဝ်ဢမ်ႇငိၼ်းသဵင်ႈၵႂၢမ်းၵေႃႉဢၼ်လၢတ်ႈတီႈၵဝ်ၶႃႈၼၼ်ႉ။- 10မိူဝ်ႈၼၼ်ႉၵဝ်ၶႃႈၵေႃႈလဝ်ႊထၢမ်လႄႈဝႃႈ၊ ၸဝ်ႈႁဝ်း။ ၵဝ်ၶႃႈၼႆႉတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈၽြႃးၵေႃႈလၢတ်ႈလႄႈဝႃႈ၊ မႂ်းလုၵ်ႉလႄႈ ၶဝ်ႈၵႃႈၼႂ်းဝဵင်းထမ်ႇမသႅတ်ႉတႃႉ။ တၵ်းလၢတ်ႈပၼ်လွင်ႈတၢင်း ၵႃႈဢၼ်ၶၢၼ်းဝႆႉပုၼ်ႈဢၼ်မႂ်းတၵ်းလႆႈႁဵတ်းၸိူဝ်းၼၼ်ႉတီႈမႂ်း ၵႃႈၼႂ်းဝဵင်းၼၼ်ႉဢေႃႈ၊ ဝႃႈၼင်ႇၼႆဢေႃႈ။
11ပိူဝ်ႈဢၼ်ၵဝ်ၶႃႈတႃမွတ်ႇၵႂႃႇၵွပ်ႈပိူဝ်ႈႁႅင်းသၢႆဢရွင်ႇဢၼ်ႁိူဝ်ႈလႅင်းၼၼ်ႉလႄႈ ၵဝ်ၶႃႈလႆႈၶၢမ်ႇတၢင်းဢၼ်ၶဝ်ၸိူဝ်းဢၼ်ပႃးလူၺ်ႈၵၼ်တင်းၵဝ်ၶႃႈၼၼ်ႉ ၸုင်ဢဝ်မိုဝ်းၵဝ်ၶႃႈလႄႈ ၶဝ်ႈၵႃႈၼႂ်းဝဵင်းထမ်ႇမသႅတ်ႉၶႃႈဢေႃႈ။- 12မိူဝ်ႈၼၼ်ႉဢႃႇၼၼီႉဢၼ်ပဵၼ်ၵေႃႉဢၼ်မူၼ်ႈပျေႃႇၼႂ်းဝၢတ်ႈၽြႃးပဵၼ်ၸဝ်ႈ ၸွမ်းၼင်ႇပိင်းၺၢပ်ႈတြႃးလႄႈ မီးသရေႇၵႃႈတီႈၵူၼ်းယူႉတႃႉ ဢၼ်ယူႇၵႃႈၼႂ်းဝဵင်းၼၼ်ႉ တင်းသဵင်ႈတင်းလူင်ၼၼ်ႉ၊- 13မႃးလႄႈ ၸုၵ်းၵႃႈတီႈႁိမ်းၵဝ်ၶႃႈယူႇသေလႄႈလၢတ်ႈဝႃႈ၊ ၼွင်ႉသေႃးလူႉဢိူၺ်း၊ ၶၢမ်ႇတၢင်းဢၼ်မၢၵ်ႇတႃသမ်ႉၶိုၼ်းႁၼ်တႃႉ၊ ဝႃႈၼင်ႇၼႆဢေႃႈ။ ၵမ်းဢွၼ်ႇၼိုင်ႈၼၼ်ႉ ၵဝ်ၶႃႈတူၺ်းမၼ်းလႄႈလႆႈႁၼ်ဢေႃႈ။- 14မၼ်းၵေႃႈလၢတ်ႈလႄႈဝႃႈ၊ ၽြႃးပဵၼ်ၸဝ်ႈပူႇမွၼ်ႇႁဝ်းၼၼ်ႉ ၶၢၼ်းမႂ်းဝႆႉႁႂ်ႈလႆႈႁူႉဢလူဝ်ႇၽြႃးပဵၼ်ၸဝ်ႈ ဢိၵ်ႇတင်းႁႂ်ႈလႆႈႁၼ်ၸဝ်ႈဢၼ်သိုဝ်ႈတေႃႇလႄႈ ငိၼ်းသဵင်ဢၼ်ဢွၵ်ႇသူပ်းမၼ်းၸဝ်ႈၼၼ်ႉဢေႃႈ။- 15လွင်ႈမၼ်းၸမ်ႉ မႂ်းတၵ်းလႆႈလၢတ်ႈၵႃႈဢၼ်မႂ်းလႆႈႁၼ်၊ ၵႃႈဢၼ်မႂ်းလႆႈငိၼ်းၸိူဝ်းၼႆႉ တီႈၵူၼ်းတင်းသဵင်ႈတင်းလူင်လႄႈ ၶၢမ်ႇသၢၵ်ႈသေႇၽၢႆႇမၼ်းၸဝ်ႈဢေႃႈ။- 16တေႃႈလဵဝ်ၼႆႉၵေႃႈ၊ ႁဵတ်းသင်လႄႈမႂ်းၵိုတ်းသဝ်းယူႇၼင်ႇႁိုဝ်။ လုၵ်ႉတႃႉ။ ႁဵတ်းပထၼႃႇတီႈၽြႃးပဵၼ်ၸဝ်ႈယူႇသေလႄႈ ၶၢမ်ႇပပ်ႉတီႉၸမ်ႇသုၵ်ႈပွတ်ႈဢပႅတ်ႈမႂ်းတႃႉ၊ ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈႁွင်ႉဢဝ်တမၢၼ်ႇၸဝ်ႈပေႃးလူႉႁႂ်ႈၵႂႃႇႁေႃးတြႃးတီႈၵူၼ်းတၢင်ႇၸိူဝ်ႉတၢင်ႇၶိူဝ်း
17လိုၼ်းၼၼ်ႉ မိူဝ်ႈဢၼ်ၵဝ်ၶႃႈၶိုၼ်းမိူဝ်းၵႂႃႇ ၵႃႈတီႈဝဵင်းယေႇရူႉသလႅမ်ႇလႄႈ ယင်းတိုၵ်ႉသူးတွင်းယူႇၵႃႈၼႂ်းပိၵ်ႈမၢၼ်ႇၸဝ်ႈၼၼ်ႉၸိုင်ၵဝ်ၶႃႈပဵၼ်ၸိူဝ်ႉၼင်ႇၼွၼ်းၽၼ်ႁၼ်ၼႂ်းတူဝ်ၸဝ်ႈၵဝ်ႇလႄႈ၊- 18လႆႈႁၼ်မၼ်းၸဝ်ႈလၢတ်ႈတီႈၵဝ်ၶႃႈလႄႈဝႃႈ၊ မႂ်းၵျူဝ်းၸႃးလႄႈ ဢွၵ်ႇသေၵႃႈၼႂ်းဝဵင်းယေႇရူႉသလႅမ်ႇၼႆႉၵႂႃႇၶၼ်ၶၼ်ၽႂ်းၽႂ်းတႃႉ။ ၵူၼ်းၸိူဝ်းၼႆႉတၵ်းဢမ်ႇၶၢမ်ႇဢမ်ႇဢဝ်ၵႂၢမ်းဢၼ်မႂ်းလၢတ်ႈလႄႈ ၶၢမ်ႇသၢၵ်ႈသေႇလွင်ႈၵဝ်ၼၼ်ႉ၊ ဝႃႈၼင်ႇၼႆဢေႃႈ။- 19ၵဝ်ၶႃႈၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၶဝ်ႁူႉလွင်ႈဢၼ်ၵဝ်ၶႃႈဢဝ်ၶဝ်ၸိူဝ်းဢၼ်ယုမ်ႇမၢတ်ႈၸဝ်ႈႁဝ်းၼၼ်ႉ ၶင်ဝႆႉၵႃႈၼႂ်းထွင်ႇလႄႈပေႃႉယႅၼ်ႉ ၵႃႈၼႂ်းၸရွပ်ႈႁေႃးတြႃးတင်းလၢႆၼၼ်ႉယူႇတီႈၶႃႈဢေႃႈ။- 20မိူဝ်ႈဢၼ်ထွၵ်ႇပႅတ်ႈလိူတ်ႈသထေႇၽၢၼ်ႇ ဢၼ်ပဵၼ်ၵေႃႉဢၼ်ၶၢမ်ႇသၢၵ်ႈသေႇၽၢႆႇၸဝ်ႈႁဝ်းၼၼ်ႉၵေႃႈ ၵဝ်ၶႃႈၸုၵ်းၵႃႈတီႈႁိမ်းၼၼ်ႉယူႇသေလႄႈ ႁပ်ႉတုင်းဢဝ်လႄႈ ပႂ်ႉၶူဝ်းလဵင်းၶဝ်ၸိူဝ်းဢၼ်ဢဝ်မၼ်းတၢႆၼၼ်ႉယူႇတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 21မၼ်းၸဝ်ႈၵေႃႈလၢတ်ႈတီႈၵဝ်ၶႃႈလႄႈဝႃႈ၊ ၵႂႃႇတႃႉ။ ၵဝ်တၵ်းပွႆႇၸႂ်ႉမႂ်းၵႂႃႇၵႆၵႆ တီႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆမီးၼၼ်ႉဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။
22ၶဝ်ၼၼ်ႉ ထွမ်ႇၵႂၢမ်းမၼ်းတေႃႇထိုင်ႁွတ်ႈထၢၼ်ႇၼၼ်ႉသေယဝ်ႉ၊ ဢွၼ်ၵၼ်ႁွင်ႉသႅၼ်ႇသဵင်ၶဝ်လႄႈဝႃႈ၊ ၵူၼ်းၸိူဝ်ႉၼင်ႇၼႆၸိုင်၊ ဢဝ်ပႅတ်ႈသေၵႃႈၼိူဝ်လိၼ်မိူင်းၼႆႉတႃႉ။ မၼ်းဢမ်ႇထုၵ်ႇလီဢသၢၵ်ႈလိပ်းယူႇၵူၺ်ႉ၊ ဝႃႈၼင်ႇၼႆဢေႃႈ။- 23ၼႂ်းမိူဝ်ႈဢၼ်ၶဝ်ယင်းတိုၵ်ႉႁဵတ်းတၢင်းဢၼ်ႁွင်ႉသႅၼ်ႇ၊ တၢင်းဢၼ်ယိပ်းၵမ်ဢဝ်ၶူဝ်းလဵင်းတူဝ်ၸဝ်ႈၵဝ်ႇ ထိမ်ႈၶိုၼ်ႈၵႃႈၼိူဝ်ႁူဝ်၊ တၢင်းဢၼ်ဢဝ်မုၼ်ႈလိၼ် ပိုၼ်ၶိုၼ်ႈၵၢင်ႁၢဝ်ၸိူဝ်းၼၼ်ႉယူႇၼၼ်ႉၸိုင်၊- 24ၵႄႇၵူၼ်းသိုၵ်းၶႂ်ႈႁူႉလွင်ႈဢၼ်ၶဝ်ႁွင်ႉသႅၼ်ႇလႄႈ ဝႃႈတီႈပေႃးလူႉၸိူဝ်ႉၼင်ႇၼၼ် ၵွပ်ႈပိူဝ်ႈၵႃႈသင်ၼၼ်ႉလႄႈ ၸီႇယၢင်ႇႁႂ်ႈဢဝ် ပေႃးလူႉသႂၢင်းၶဝ်ႈၵႃႈၼႂ်းတပ်ႉသေလႄႈ ႁႂ်ႈပေႃႉယႅၼ်ႉၸႅတ်ႈတူၺ်းဢေႃႈ။
25မိူဝ်ႈဢၼ်ၶဝ်ဢဝ်တင်းသၢႆၼင်တိုတ်ႉၸၼ်ဢဝ်ပေႃးလူႉတၢင်ႇၼၼ်ႉၸိုင်၊ ပေႃးလူႉလၢတ်ႈတီႈတပ်ႉမူးဢၼ်ၸုၵ်းယူႇၵႃႈတီႈႁိမ်းမၼ်းၼၼ်ႉလႄႈဝႃႈ၊ ၵေႃႉဢၼ်ပဵၼ်ၵူၼ်းရူဝ်းမႃႉလႄႈ ဢမ်ႇပႆႇလႆႈၶၢမ်ႇတၢင်းဢၼ် ၸီႇယၢင်ႇၸွမ်းၼင်ႇဢူႉပတေႇၼၼ်ႉၸိုင်၊ သူလီပေႃႉယႅၼ်ႉႁိုဝ်၊ ဝႃႈၼင်ႇၼႆဢေႃႈ။- 26တပ်ႉမူးၼၼ်ႉ ငိၼ်းသေယဝ်ႉၵႂႃႇၸူးၵႃႈတီႈၵႄႇၵူၼ်းသိုၵ်းလႄႈလဝ်ႊလၢတ်ႈဝႃႈ၊ တၵ်းႁဵတ်းၸိူဝ်ႉၼင်ႇႁိုဝ်ၶႃႈ။ ၵေႃႉၼႆႉပဵၼ်ၵူၼ်းရူဝ်းမႃႉၶႃႈဢေႃႈ၊ ဝႃႈၼင်ႇၼႆဢေႃႈ။- 27ၵႄႇၵူၼ်းသိုၵ်းၼၼ်ႉၵေႃႈ မႃးၸူးၵႃႈတီႈပေႃးလူႉသေလႄႈထၢမ်ဝႃႈ၊ မႂ်းၼႆႉၸႂ်ႈၵူၼ်းရူဝ်းမႃႉႁိုဝ် လၢတ်ႈတီႈၵဝ်တႃႉ။ မိူဝ်ႈဢၼ်ဝႃႈၼင်ႇၼႆၸိုင်၊ ပေႃးလူႉၵေႃႈလဝ်ႊလၢတ်ႈလႄႈဝႃႈ ၸႂ်ႈၶႃႈယဝ်ႉ၊ ဝႃႈၼင်ႇၼႆဢေႃႈ။- 28ၵႄႇၵူၼ်းသိုၵ်းၼၼ်ႉၵေႃႈလၢတ်ႈလႄႈဝႃႈ ၵဝ်ၼႆႉပၼ်ငိုၼ်းၼမ်ၼႃႇလႄႈ လႆႈဢရႃႇၵူၼ်းရူဝ်းမႃႉယဝ်ႉ။ မိူဝ်ႈဢၼ်ဝႃႈၼင်ႇၼႆၸိုင်၊ ပေႃးလူႉလဝ်ႊလၢတ်ႈလႄႈဝႃႈ၊ ၵဝ်ၶႃႈၼႆႉပဵၼ်ၸႃႇတီႉလႄႈ ၵိူတ်ႇလဵင်ႉမႃးၶႃႈယဝ်ႉ၊ ဝႃႈၼင်ႇၼႆဢေႃႈ။
29မိူဝ်ႈၼၼ်ႉၶဝ်ၸိူဝ်းဢၼ် တၵ်းၸႅတ်ႈထၢမ်ၸႅတ်ႈတူၺ်းမၼ်းၼၼ်ႉ ဢွၵ်ႇၵႂႃႇသေၵႃႈတီႈပေႃးလူႉ ၵမ်းလဵဝ်လႄႈ ၵႄႇၵူၼ်းသိုၵ်းႁူႉလွင်ႈဢၼ်မၼ်းပဵၼ်ၵူၼ်းရူဝ်းမႃႉ ဢိၵ်ႇတင်းလွင်ႈဢၼ်လႆႈမတ်ႉၽုၵ်ႇမႅၼ်ႈ ၵူၼ်းရူဝ်းမႃႉၼၼ်ႉသေယဝ်ႉ၊ မီးတၢင်းဢၼ်ၵူဝ်ႁႄၼႃႇလူင်လၢင်ဢေႃႈ။
တမၢၼ်ႇၸဝ်ႈပေႃးလူႉၶႄတူဝ်ၸဝ်ႈၵဝ်ႇၽၢႆႇၼႃႈလုမ်းလူင်
30ဝၼ်းမိူဝ်ႈၽုၵ်ႈ၊ ပိူဝ်ႈဢၼ်ၵႄႇၵူၼ်းသိုၵ်း ၶႂ်ႈႁူႉဢၼ်ၸိုဝ်ႈဢၼ်ၸႂ်ႈ လွင်ႈဢၼ်ၵူၼ်းယူႉတႃႉတင်းလၢႆတၢင်ႇဢပႅတ်ႈၼိူဝ်ပေႃးလူႉၸိူဝ်ႉၼင်ႇႁိုဝ်ၼၼ်ႉလႄႈ မၼ်းထွတ်ႇၸိူၵ်ႈလဵၵ်း ဢၼ်မတ်ႉၽုၵ်ႇပေႃးလူႉၼၼ်ႉသေယဝ်ႉ ၸီႇယၢင်ႇႁႂ်ႈယိတ်ႈပရေႃးႁဵၵ်ႈလူင် ဢိၵ်ႇတင်းဢရႃႇသီႉလုမ်းလူင်တင်းသဵင်ႈတင်းလူင် ၸူႉၵၼ်တုမ်ၵၼ်သေယဝ်ႉ ႁွင်ႉဢဝ်ပေႃးလူႉလႄႈဝႆႉ ၵႃႈတီႈၽၢႆႇၼႃႈၶဝ်ဢေႃႈ။
Currently Selected:
တမၢၼ်ႇၸဝ်ႈ 22: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
