တမၢၼ်ႇၸဝ်ႈ 19
19
လွင်ႈတမၢၼ်ႇၸဝ်ႈပေႃးလူႉၼႂ်းဝဵင်းဢေးၽႅတ်ႈ
1ၼႂ်းမိူဝ်ႈဢၼ်ဢႃႇပေႃးလူႉ ယင်းမီးယူႇၵႃႈၼႂ်းဝဵင်းၵေႃးရိၼ်ႇထူႉယူႇၼၼ်ႉၸိုင်၊ပေႃးလူႉ လႄႇလဵပ်ႈၵႃႈၼႂ်းမိူင်းတၢင်းၼိူဝ်ယဝ်ႉၸင်ႇ ႁွတ်ႈထိုင်ဝဵင်းဢေးၽႅတ်ႈလႄႈ ထူပ်းႁၼ်တပႄးၸဝ်ႈၵမ်ႈၽွင်ႈသေယဝ်ႉ၊- 2ထၢမ်လႄႈဝႃႈ၊ ဝၢႆးသေသူယုမ်ႇမၢတ်ႈယဝ်ႉၼၼ်ႉ သူလႆႈၶၢမ်ႇဢဝ်ဝီႉၺိၺ်ႇဢၼ်မူတ်းၸၢင်ႇၸဝ်ႈယဝ်ႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင် ၶဝ်ၵေႃႈလၢတ်ႈလႄႈဝႃႈ ႁဝ်းၶႃႈဢမ်ႇတွၼ်ႉငိၼ်းလွင်ႈဢၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈမီးၼၼ်ႉၶႃႈ၊ ဝႃႈၼင်ႇၼႆဢေႃႈ။- 3မၼ်းၵေႃႈသမ်ႉထၢမ်လႄႈဝႃႈ ပေႃးပဵၼ်ၸိူဝ်ႉၼင်ႇၼႆၸိုင် သူလႆႈၶၢမ်ႇပပ်ႉတီႉၸမ်ႇဢၼ်လႂ်၊ ဝႃႈၼင်ႇၼႆသေယဝ်ႉ ၶဝ်ၵေႃႈလၢတ်ႈလႄႈဝႃႈ လႆႈၶၢမ်ႇပပ်ႉတီႉၸမ်ႇယူဝ်းႁၢၼ်ႇၶႃႈဢေႃႈ၊ ဝႃႈၼင်ႇၼႆဢေႃႈ။- 4ပေႃးလူႉၵေႃႈလၢတ်ႈလႄႈဝႃႈ၊ယူဝ်းႁၢၼ်ႇလႆႈပၼ်ပပ်ႉတီႉၸမ်ႇပုၼ်ႈလွင်ႈၼင်ႇႁိုဝ် တၵ်းၶုၵ်းၸႂ်လႆႈမႆႈၸႂ်ၼၼ်ႉလႄႈ လၢတ်ႈတီႈၵူၼ်းတင်းလၢႆလႄႈဝႃႈ၊ တၵ်းလႆႈယုမ်ႇမၢတ်ႈၵေႃႉဢၼ်တၵ်းပေႃႇမႃးလိုၼ်းမၼ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။ ၼႂ်းလွင်ႈတၢင်းဢၼ်မၼ်းဝႃႈၸိူဝ်ႉၼင်ႇၼၼ်ၼၼ်ႉၸမ်ႉ၊ မၼ်းၶႂ်ႈဝႃႈယေႇသူႉဢေႃႈ၊ ဝႃႈၼင်ႇၼႆဢေႃႈ။- 5မိူဝ်ႈဢၼ်ငိၼ်းၵႂၢမ်းၼၼ်ႉၸိုင် ၶဝ်ၼၼ်ႉၶၢမ်ႇပပ်ႉတီႉၸမ်ႇၼႂ်းၼႃႇမႃႉၸိုဝ်ႈသဵင်ၸဝ်ႈယေႇသူႉဢေႃႈ။- 6ပေႃးလူႉၵေႃႈ ဢဝ်မိုဝ်းတၢင်ႇၵႃႈၼိူဝ်ၶဝ်ၼၼ်ႉလႄႈ ဝီႉၺိၺ်ႇဢၼ်မူတ်းၸၢင်ႇၸဝ်ႈလူင်းမႃးသေယဝ်ႉ ၶဝ်ၼၼ်ႉလၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်လႄႈ ႁဵတ်းပရေႃးၽႅတ်ႈဢေႃႈ။- 7ၶဝ်တင်းသဵင်ႈတင်းလူင်ၼၼ်ႉမီးသေသိပ်းသွင်ၵေႃႉၸမ်ၸမ်ဢေႃႈ။
8လိုၼ်းၼၼ်ႉ၊ပေႃးလူႉၶဝ်ႈၵႃႈၼႂ်းၸရွပ်ႈႁေႃးတြႃးလႄႈ ႁေႃးလၢတ်ႈႁတ်းႁတ်းႁၢၼ်ႁၢၼ် သၢမ်လိူၼ်တဵမ်တဵမ်လႄႈ တိူင်ႇပၢင်ႇလၢတ်ႈၸႃၵၼ် လူၺ်ႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈၸိူဝ်းၼၼ်ႉဢေႃႈ။- 9ၵူၺ်းၵႃႈမိူဝ်ႈဢၼ်ၵူၼ်းၵမ်ႈၽွင်ႈမီးၸႂ်ဢၼ်ၵႅၼ်ႇၶႅင်သေယဝ်ႉ ယင်းဢမ်ႇယုမ်ႇမၢတ်ႈလႄႈသႄႉသွမ်းသဵၼ်ႈတၢင်းၼၼ်ႉ ၵႃႈတီႈၽၢႆႇၼႃႈၵူၼ်းတင်းလၢႆၼၼ်ႉၸိုင်၊ပေႃးလူႉဢွၵ်ႇသေ ၵႃႈၼႂ်းၶဝ်ၼၼ်ႉၵႂႃႇလႄႈ ၽႄဢဝ်တပႄးၸဝ်ႈတင်းလၢႆ ဝႆႉၶေႃၶေႃသေယဝ်ႉ တိူင်ႇပၢင်ႇႁေႃးလၢတ်ႈၵႃႈၼႂ်းၸရွပ်ႈသွၼ်လိၵ်ႈတူႉရၼ်ႇၼူႉၵူႈဝၼ်းဢေႃႈ။- 10ႁဵတ်းၸိူဝ်ႉၼင်ႇၼၼ်ယူႇသွင်ပီႊတဵမ်တဵမ်လႄႈ ၵူၼ်းဢၼ်မီးၵႃႈၼႂ်းမိူင်းဢႃႇသီႉတင်းသဵင်ႈတင်းလူင် ပဵၼ်ၵူၼ်းယူႉတႃႉ သေဢမ်ႇဝႃႈ၊ ပဵၼ်ၵူၼ်းႁေႇလသႃႉသေဢမ်ႇဝႃႈ၊ လႆႈငိၼ်းၼုၵ်ႈၵပၢတ်ႈတြႃးၸဝ်ႈၽြႃးဢေႃႈ။
လုၵ်ႈၸၢႆးသၵေးဝႃႉၸဵတ်းၵေႃႉ
11ၽြႃးပဵၼ်ၸဝ်ႈ ဢဝ်မိုဝ်းပေႃးလူႉ ၼႄပျႃးတၼ်းၶူဝ်းဢၼ်လၢၵ်ႇလၢႆးၼႃႇလူင်လၢင်ၼမ်ၼႃႇဢေႃႈ။- 12ပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈ လႆႈဢဝ်ၽႃႈၸဵတ်ႉဢိၵ်ႇတင်းသၢႆဢႅဝ် ၵႃႈတီႈတူဝ်မၼ်းၼၼ်ႉၼမ်ၼႃႇ ပၼ်ၵႂႃႇတီႈၵူၼ်းၶႆႈၵူၼ်းပဵၼ်တင်းလၢႆလႄႈ ၶဝ်ၼၼ်ႉၵၢင်းလွတ်ႈတင်းတၢင်းၶႆႈတၢင်းပဵၼ်ဢေႃႈ။ ၽီႁၢႆႉတင်းလၢႆၵေႃႈဢွၼ်ၵၼ်ဢွၵ်ႇၵႂႃႇသေဢေႃႈ။
13မိူဝ်ႈၼၼ်ႉၵူၼ်းယူႉတႃႉၵမ်ႈၽွင်ႈဢၼ်လႄႇၵႂႃႇၵူႈတီႈၵူႈလႅၼ်လႄႈ ၸၢင်ႈပၼ်တိၵ်ႈထၢၼ်ႇသဵတ်ႈၸႃႇၼၼ်ႉ ႁွင်ႉၸၢမ်းတူၺ်းၼႃႇမႃႉၸိုဝ်ႈသဵင်ၸဝ်ႈယေႇသူႉ ၵႃႈၼိူဝ်ၶဝ်ၸိူဝ်းဢၼ်ၽီႁၢႆႉၶဝ်ႈၼၼ်ႉလႄႈဝႃႈ၊ ၵဝ်တိူင်ႇယေႇသူႉဢၼ်ပေႃးလူႉႁေႃးလၢတ်ႈၼၼ်ႉလႄႈ ပၼ်တိၵ်ႈထၢၼ်ႇသဵတ်ႈၸႃႇၵႃႈတီႈသူဢေႃႈ၊ ဝႃႈၼင်ႇၼႆဢေႃႈ။- 14လုၵ်ႈၸၢႆးယိတ်ႈပရေႃးႁဵၵ်ႈလူင်ၵူၼ်းယူႉတႃႉ ဢၼ်လႆႈၸိုဝ်ႈသၵေးဝႃႉၼၼ်ႉ ႁဵတ်းၸိူဝ်ႉၼင်ႇၼၼ်တင်းၸဵတ်းၵေႃႉဢေႃႈ။- 15ၽီႁၢႆႉၵေႃႈလၢတ်ႈလႄႈဝႃႈ၊ ယေႇသူႉၸိုင်ၵဝ်ႁူႉဢေႃႈ။ပေႃးလူႉၵေႃႈၵဝ်ႁူႉလီလီငၢမ်းငၢမ်းဢေႃႈ။ သူၸမ်ႉပဵၼ်ၽူႈလႂ်၊ ဝႃႈၼင်ႇၼႆသေလႄႈ၊- 16ၵေႃႉဢၼ်ၽီႁၢႆႉၶဝ်ႈၼၼ်ႉဝႅၼ်ၶိုၼ်ႈၵႃႈၼိူဝ်ၶဝ်လႄႈ တဵၵ်းၶီႇတဵၵ်းတဵင်ၶဝ်သေယဝ်ႉ၊ ႁဵတ်းပႄႉႁဵတ်းၼႅင်ႇတီႈသွင်ၵေႃႉလႄႈ ႁႂ်ႈၶဝ်ဢွၵ်ႇပၢႆႈသေၵႃႈၼႂ်းႁိူၼ်းၼၼ်ႉ ထၼ်ႈပေႃးဢမ်ႇပႃးၶူဝ်းၼုင်ႈတၢင်းမႆလႄႈ လႆႈတၢင်းၸဵပ်းတၢင်းသႅပ်ႇၵႂႃႇဢေႃႈ။- 17လွင်ႈတၢင်းၼၼ်ႉၸိုင် ၵူၼ်းယူႉတႃႉ ဢိၵ်ႇတင်းၵူၼ်းႁေႇလသႃႉ ဢၼ်မီးယူႇၵႃႈၼႂ်းဝဵင်းဢေးၽႅတ်ႈ တင်းသဵင်ႈတင်းလူင်ၼၼ်ႉ ႁူႉငိၼ်းသေယဝ်ႉၵူဝ်ႁႄၼႃႇလူင်လၢင်လႄႈ ယွင်ႈယေႃးၼႃႇမႃႉၸိုဝ်ႈသဵင်ၸဝ်ႈယေႇသူႉဢေႃႈ။- 18ၵူၼ်းဢၼ်ယုမ်ႇမၢတ်ႈၼမ်ၼႃႇၵေႃႈ မႃးၽုၺ်ႇဢွၵ်ႇၼႄပျႃး တၢင်းၵမ်တၢင်းၵျၢင်ႉတူဝ်ၸဝ်ႈၵဝ်ႇတင်းလၢႆ သေလႄႈတွင်းပၢၼ်ႇဢေႃႈ။- 19ၵူၼ်းဢၼ်ယိပ်းၵႅမ်းဢတၢတ်ႈၽီမေႃၼမ်ၼႃႇၵေႃႈ ဢဝ်ၽိုၼ်လိၵ်ႈၶဝ်မႃးလႄႈတုတ်ႇၽႆးပႅတ်ႈ ၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။ ၶဝ်ၼပ်ႉဢၢၼ်ႇတူၺ်းၵႃႈမၼ်းၶၼ်မၼ်းလႄႈ ထူပ်းႁၼ်လွင်ႈဢၼ်ထိူၵ်ႈငိုၼ်းႁႃႈမိုၼ်ႇဢေႃႈ။- 20ၼင်ႇၼၼ်လႄႈသႃႇသၼႃႇၽြႃးပဵၼ်ၸဝ်ႈၼၼ်ႉ ပႃးတင်းတၼ်းၶူဝ်းယႂ်ႇၵႂၢင်ႈမႃးလႄႈပႄႉၼႅင်ႇၵႂႃႇဢေႃႈ။
တၢင်းဢၼ်ဢူၼ်မေႃးၼႂ်းဝဵင်းဢေးၽႅတ်ႈ
21မိူဝ်ႈဢၼ်ပဵၼ်မႃးၸိူဝ်ႉၼင်ႇၼၼ်ၼၼ်ႉၸိုင်၊ပေႃးလူႉမီးတၢင်းၵျၢမ်ႇတၢင်းပွင်ၼႂ်းၸႂ်လႄႈဝႃႈ တၵ်းၸွမ်းတၢင်းလတ်းၶဝ်ႈၵႃႈၼႂ်းမိူင်းမႃႇၵေႇတေႃးၼီႉ တင်းမိူင်းဢၶႃႇယႃႉ သေယဝ်ႉ၊ ၵႂႃႇၵႃႈတီႈဝဵင်းယေႇရူႉသလႅမ်ႇပုၼ်ႉလႄႈ၊ လိုၼ်းသေၵဝ်ႁွတ်ႈထိုင်ၵႃႈတီႈဝဵင်းၼၼ်ႉယဝ်ႉၼၼ်ႉ၊ ၵဝ်တၵ်းလႆႈႁၼ်ဝဵင်းရူဝ်းမႃႉဢေႃႈ၊ ဝႃႈၼင်ႇၼႆလႄႈ၊- 22ပွႆႇၸႂ်ႉတီႉမေႃးသေႇ တင်းဢေႇရတ်ႉတူႉၵူၼ်းသွင်ၵေႃႉဢၼ်ပဵၼ်ၵူၼ်းဢၼ်ႁဵတ်းလဵင်ႉႁဵတ်းလူမၼ်းၼၼ်ႉ ၵႂႃႇၵႃႈတီႈမိူင်းမႃႇၵေႇတေႃးၼီႉသေယဝ်ႉ၊ တူဝ်မၼ်းၵိုတ်းသဝ်းယူႇၵႃႈၼႂ်းမိူင်းဢႃႇသီႉ၊ ၵမ်းဢွၼ်ႇၼိုင်ႈဢေႃႈ။
23မိူဝ်ႈၼၼ်ႉ လွင်ႈဢၼ်ယုင်ႈယၢင်ႈဢူၼ်ဢဵၼ်ၼႃႇလူင်လၢင် ၵွပ်ႈပိူဝ်ႈသဵၼ်ႈတၢင်းတြႃးၼၼ်ႉၸမ်ႉ၊- 24ၸၢင်ႈၶမ်းဢၼ်လႆႈၸိုဝ်ႈတေႇမေႇတရီႉ ဢၼ်ၸၢင်ႈႁဵတ်းပိၵ်ႈမၢၼ်ႇငိုၼ်းဢွၼ်ႇၼၢင်းၽီဢႃႇတေႇမီႉၼမ်ၼႃႇၼၼ်ႉၵေႃႉၼိုင်ႈ ႁဵတ်းႁႂ်ႈၸၢင်ႈၶမ်းတင်းလၢႆပဵၼ်တိုၼ်းပဵၼ်ႁွၼ်းၼမ်ၼႃႇဢေႃႈ။- 25မၼ်းၼၼ်ႉ ႁႂ်ႈၶဝ်ဢိၵ်ႇတင်း ၶဝ်ၸိူဝ်းဢၼ်မေႃၸၢင်ႈၸိူဝ်ႉၼင်ႇၼၼ်ၼၼ်ႉ ၸူႉၵၼ်တုမ်ၵၼ်သေယဝ်ႉ၊ လၢတ်ႈလႄႈဝႃႈ၊ ၵူၼ်းတင်းလၢႆၶဝ်ဢိူၺ်း၊ သူႁူႉလွင်ႈဢၼ်ႁဝ်းၼႆႉမၢၵ်ႈမီးလီပဵၼ်ၵွပ်ႈပိူဝ်ႈတၢင်းႁဵတ်းၼႆႉၼၼ်ႉယူႇဢေႃႈ။- 26လွင်ႈဢၼ်ပေႃးလူႉၼႆႉ တိုၵ်းယူင်းၸူဝ်းဢဝ်ၵူၼ်းၼမ်ၼႃႇၵႃႈတီႈဝဵင်းဢေးၽႅတ်ႈၼႆႉၵူၺ်းဢမ်ႇၵႃး၊ မိူင်းဢႃႇသီႉၼႆႉ ႁၢမ်ႉတၵ်းသဵင်ႈတင်းမိူင်းလႄႈ ႁႂ်ႈဝႄႈပႅတ်ႈသဵၼ်ႈတၢင်းၼႆႉလႄႈဝႃႈ၊ ၵႃႈဢၼ်မိုဝ်းၵူၼ်းႁဵတ်းၼၼ်ႉ ပဵၼ်ၽြႃးဢမ်ႇၸႂ်ႈ၊ ဝႃႈၼင်ႇၼႆၼၼ်ႉၸိုင် သူႁူႉယူႇႁၼ်ယူႇဢေႃႈ။- 27လွင်ႈဢၼ်သရေႇမဵဝ်းတၢင်းႁဵတ်းႁဝ်းၼႆႉ တၵ်းလူႉၵႂႃႇဢမ်ႇၵႃး၊ ၵူၼ်းတင်းလၢႆတၵ်းႁဵတ်းဢမ်ႇပေႃးၼင်ႇႁိုဝ် ၵႃႈတီႈပိၵ်ႈမၢၼ်ႇၼၢင်းၽီဢႃႇတေႇမီႉ ဢၼ်ယႂ်ႇမျၢတ်ႈၼႃႇၼႆႉလႄႈ မုၼ်ၵုင်ႇသရေႇမၼ်းၸဝ်ႈ ဢၼ်မိူင်းဢႃႇသီႉတင်းမိူင်း ဢိၵ်ႇတင်း ၵူၼ်းမိူင်းလေႃးၵီႇတင်းသဵင်ႈတင်းလူင်ၵူဝ်းၵႂၢႆႇၼၼ်ႉ တၵ်းႁွတ်ႈထိုင်တၢင်းလူႉတၢင်းလႅဝ်ၵႂႃႇၸိုင် တီႈတၵ်းမႆႈၸႂ်မီးတီႈႁဝ်းဢေႃႈ၊ ဝႃႈၼင်ႇၼႆဢေႃႈ။
28ၶဝ်ငိၼ်းၵႂၢမ်းၼၼ်ႉသေယဝ်ႉ၊ တဵမ်ဝႆႉတင်းတၢင်းတေႃးသႃႉ တၢင်းၸႂ်မႆႈၶႆႈၸႃႉလႄႈ ႁွင်ႉသႅၼ်ႇလႄႈဝႃႈ၊ဢႃႇတေႇမီႉ ၵူၼ်းဢေးၽႅတ်ႈတင်းလၢႆၼႆႉယႂ်ႇမျၢတ်ႈၼႃႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 29ဝဵင်းၼၼ်ႉတဵမ်ဝႆႉတင်းတၢင်းဢၼ်ယုင်ႈယၢင်ႈဢူၼ်ဢဵၼ်မေႃးမႄးလႄႈ ၶဝ်ၸၼ်ဢဝ်ၵႃႇယူႉတင်းဢႃႇရိတ်ႉတႃႇၶူႉ ၵူၼ်းမိူင်းမႃႇၵေႇတေႃးၼီႉ ဢၼ်တေႇသႃႉၸႃႇရီႇ လႄႇလဵပ်ႈလူၺ်ႈၵၼ်တင်းပေႃးလူႉၼၼ်ႉ ၵႂႃႇသေယဝ်ႉ၊ ၽွမ်ႉၵၼ်လႅၼ်ႈၶဝ်ႈၵႃႈၼႂ်းၸရွပ်ႈၶၢမ်ႇပွႆးဢေႃႈ။- 30မိူဝ်ႈဢၼ်ပေႃးလူႉ ၶႂ်ႈၶဝ်ႈၸူးၵႃႈတီႈၵူၼ်းဢၼ်ၸူႉၵၼ်တုမ်ၵၼ်ၼၼ်ႉၸိုင်၊ တပႄးၸဝ်ႈတင်းလၢႆႁႄႉၶႅၼ်မၼ်းဝႆႉဢေႃႈ။- 31ၶုၼ်ဢၼ်ဢုပ်ႉပိူင်ပွႆးမိူင်းဢႃႇသီႉဢၼ်ပဵၼ်ၵေႃႉသေႈၵၼ်တင်းပေႃးလူႉ ၵမ်ႈၽွင်ႈၼၼ်ႉပွႆႇၸႂ်ႉၵႂႃႇၵႃႈတီႈမၼ်းလႄႈ တွင်းပၢၼ်ႇဝႃႈ၊ ယႃႇပေဢၢပ်ႈပၼ်တူဝ်ၸဝ်ႈၵဝ်ႇ ၵႃႈၼႂ်းၸရွပ်ႈၶၢမ်ႇပွႆးသေၵမ်း၊ ဝႃႈၼင်ႇၼႆဢေႃႈ။
32ပိူဝ်ႈဢၼ်ၵူၼ်းဢၼ်ၸူႉၵၼ်တုမ်ၵၼ် ယုင်ႈယၢင်ႈဢူၼ်ဢဵၼ်မေႃးမႄးလႄႈ ၵူၼ်းႁၢမ်ႉၼမ်ၼႃႇဢမ်ႇႁူႉလွင်ႈတၢင်းဢၼ်ၶဝ်လႆႈၸူႉၵၼ်တုမ်ၵၼ်ၼၼ်ႉလႄႈ ၵမ်ႈၽွင်ႈႁွင်ႉသႅၼ်ႇယေႈၸိူဝ်း၊ ၵမ်ႈၽွင်ႈႁွင်ႉသႅၼ်ႇယေႈမဵဝ်းႁင်းၽႂ်ႁင်းမၼ်းဢေႃႈ။- 33ၵူၼ်းယူႉတႃႉတင်းလၢႆ ၼုၵ်ႈဢဝ်ဢႃႇလေႇၸၼ်ႇတရူႉ ၵႃႈၼႂ်းမုၵ်ႉၵူၼ်းၸိူဝ်းၵူၼ်းၼၼ်ႉသေလႄႈ ဢီးမႃးဝႆႉၵႃႈတီႈၽၢႆႇၼႃႈၶဝ်ၼၼ်ႉလႄႈ မၼ်းၼၼ်ႉၸင်ႇၼႄမိုဝ်း ၶႂ်ႈလၢတ်ႈၵႂၢမ်းဢၼ်ၽေႇဢပႅတ်ႈ တီႈၵူၼ်းတင်းသဵင်ႈတင်းလူင်ဢေႃႈ။- 34မိူဝ်ႈဢၼ်ၶဝ်ႁူႉလွင်ႈဢၼ်မၼ်းပဵၼ်ၵူၼ်းယူႉတႃႉၼၼ်ႉၸိုင်၊ ၶဝ်တင်းသဵင်ႈတင်းလူင်ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇသွင်ၼႃႇရီႇၸမ်ၸမ်လႄႈဝႃႈ၊ဢႃႇတေႇမီႉ ၵူၼ်းဢေးၽႅတ်ႈတင်းလၢႆၼႆႉ ယႂ်ႇမျၢတ်ႈၼႃႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။
35ၸရေးဝဵင်းၼၼ်ႉ ႁႂ်ႈၵူၼ်းတင်းသဵင်ႈတင်းလူင် ယူႇတဵတ်ႇတဵတ်ႇယဵၼ်ယဵၼ်ယဝ်ႉၸင်ႇလၢတ်ႈလႄႈဝႃႈ၊ ၵူၼ်းဝဵင်းဢေးၽႅတ်ႈၶဝ်ဢိူၺ်း၊ လွင်ႈဢၼ်ဝဵင်းဢေးၽႅတ်ႈၼႆႉ၊ ပဵၼ်ၶႃႈဢၼ်ႁဵတ်းလဵင်ႉႁဵတ်းလူဢႃႇတေႇမီႉ ဢၼ်ယႂ်ႇမျၢတ်ႈၼႃႇတင်းရုၵ်ႈထူႉဢၼ်တူၵ်းသေၵႃႈတီႈၽြႃးၸူႉသႃႉမႃးၼၼ်ႉၸိုင်၊ ၵေႃႉဢၼ်ဢမ်ႇႁူႉၼၼ်ႉမီးသေၵေႃႉသေၵူၼ်းႁိုဝ်။- 36ၵွပ်ႈပိူဝ်ႈဢၼ်ဢမ်ႇမီးတီႈဢၼ်လီတွပ်ႇလီထဵင် လူၺ်ႈလွင်ႈတၢင်းၸိူဝ်းၼႆႉလႄႈ သူထုၵ်ႇလီယူႇတဵတ်ႇတဵတ်ႇယဵၼ်ယဵၼ်ဢေႃႈ။ ယင်းဢမ်ႇပႃးသတီႉလႄႈ ဢမ်ႇထုၵ်ႇလီႁဵတ်းၵႃႈသင်သေၸိူဝ်ႉသေပိူင်။- 37သူဢဝ်ၵူၼ်းဢၼ်ဢမ်ႇႁိမ်ဢဝ်ပိၵ်ႈမၢၼ်ႇၸဝ်ႈလႄႈ ဢမ်ႇသႄႉသွမ်းၽြႃးသူၸိူဝ်းၼႆႉမႃးယဝ်ႉလူင်ပႄႇ။- 38ပေႃးတေႇမေႇတရီႉ တင်းၸၢင်ႈၶမ်းဢၼ်မီးယူႇလူၺ်ႈၵၼ်တင်းမၼ်းၸိူဝ်းၼၼ်ႉ မီးဢမူႉတီႈသေၵေႃႉသေၵူၼ်းၸိုင်၊ လုမ်းလူင်မီးဢေႃႈ။ ၶုၼ်ၵေႃႈမီးဢေႃႈ။ ႁႂ်ႈၸဝ်ႈဢမူႉၼင်ႇၵၼ်ထူပ်းတြႃးတီႈၵၼ်တႃႉ။- 39ဢမ်ႇၼၼ်ၵေႃႈ ပေႃးသူၶႂ်ႈၶၢမ်ႇတၢင်းဢၼ်ၸီႇယၢင်ႇဢမူႉတၢင်ႇၸိူဝ်ႉတၢင်ႇဢၼ်ၸိုင်၊ တၵ်းလႆႈၸီႇယၢင်ႇ ၼႂ်းတီႈၸူႉတီႈတုမ်ဢၼ်မႅၼ်ႈတြႃးၼၼ်ႉဢေႃႈ။- 40ၵွပ်ႈပိူဝ်ႈတၢင်းဢၼ်ယုင်ႈယၢင်ႈဢူၼ်ဢဵၼ်မေႃးမႄးဝၼ်းမိူဝ်ႈၼႆႉလႄႈ လီၵူဝ်လွင်ႈဢၼ်ဢမူႉတၵ်းႁွတ်ႈထိုင်မႃးၵႃႈၼိူဝ်ႁဝ်းဢေႃႈ။ လွင်ႈမၼ်းၸမ်ႉတီႈဢၼ်ႁဝ်းတၵ်းလၢတ်ႈလွင်ႈတၢင်းဢၼ်ၸူႉဢၼ်တုမ် ဢၼ်ဢမ်ႇမႅၼ်ႈတြႃးၼႆႉ ဢမ်ႇမီးသေၸိူဝ်ႉသေပိူင်ၵူၺ်ႉ၊- 41ဝႃႈၼင်ႇၼႆသေယဝ်ႉ၊ ပွႆႇၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉသေဢေႃႈ။
Currently Selected:
တမၢၼ်ႇၸဝ်ႈ 19: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
