တမၢၼ်ႇၸဝ်ႈ 18
18
တြႃးသိူဝ်းပျေႃႇၶဝ်ႈဝဵင်းၵေႃးရိၼ်ႇထူႉ
1လိုၼ်းၼၼ်ႉ၊ပေႃးလူႉ ဢွၵ်ႇသေၵႃႈၼႂ်းဝဵင်းဢႃႇထိၼ်ႇၼၼ်ႉၵႂႃႇလႄႈ ႁွတ်ႈထိုင်ၵႃႈတီႈဝဵင်းၵေႃးရိၼ်ႇထူႉဢေႃႈ။- 2မိူဝ်ႈၼၼ်ႉမၼ်းထူပ်းႁၼ် ၵူၼ်းယူႉတႃႉဢၼ်လႆႈၸိုဝ်ႈဢႃႇၵူႉလႃႉလႄႈ ပဵၼ်ၵူၼ်းမိူင်းပုၼ်ႇတူႉ၊ ဢၼ်ဢမ်ႇပေႃးႁိုင် လုၵ်ႉသေၵႃႈတီႈမိူင်းဢီႉတလီႉ ႁွတ်ႈမႃး ၵွပ်ႈပိူဝ်ႈဢၼ်ၶုၼ်ႁေႃၶမ်းၵလေႃးတီႉ မီးဢမိင်ႉ ႁႂ်ႈၵူၼ်းယူႉတႃႉ တင်းသဵင်ႈတင်းလူင် ဢွၵ်ႇသေၵႃႈၼႂ်းဝဵင်းရူဝ်းမႃႉၼၼ်ႉ ၵေႃႉၼိုင်ႈဢိၵ်ႇတင်းမေးမၼ်းပျိတ်ႉၵီႉလႃႉၸိူဝ်းၼၼ်ႉလႄႈ ၶဝ်ႈၸူးၵႃႈတီႈၶဝ်ၼၼ်ႉသေယဝ်ႉ၊- 3ၵွပ်ႈပိူဝ်ႈဢၼ်တၢင်းႁဵတ်းမိူၼ်ၵၼ်တင်းၶဝ်ၼၼ်ႉလႄႈ ယူႇလူၺ်ႈၵၼ်တင်းၶဝ် ႁဵတ်းတၢင်းႁဵတ်းယူႇဢေႃႈ။ ၶဝ်ၼၼ်ႉပဵၼ်ၵူၼ်းဢၼ်ၸၢင်ႈယဵပ်ႉမူဝ်းၵႃႇဢေႃႈ။
4 ပေႃးလူႉၼၼ်ႉ တိူင်ႇပၢင်ႇႁေႃးလၢတ်ႈၼႂ်းၸရွပ်ႈႁေႃးတြႃး ဝၼ်းၵမ်သိၼ်ဢမ်ႇထၢတ်ႇသေဝၼ်းလႄႈ ၸူဝ်းဢဝ်ၵူၼ်းယူႉတႃႉ ဢိၵ်ႇတင်းၵူၼ်းႁေႇလသႃႉတင်းလၢႆဢေႃႈ။
5မိူဝ်ႈဢၼ်သီႇလႃႉတင်းတီႉမေႃးသေႇ လုၵ်ႉသေၵႃႈတီႈမိူင်းမႃႇၵေႇတေႃးၼီႉ ႁွတ်ႈမႃးၼၼ်ႉၸိုင်၊ပေႃးလူႉၵျူဝ်းၸႃးႁဵတ်းလွင်ႈတၢင်းဢၼ် ႁေႃးလၢတ်ႈတြႃးၵူၺ်းလႄႈ ၶၢမ်ႇသၢၵ်ႈသေႇလွင်ႈဢၼ်ယေႇသူႉ ပဵၼ်ၸဝ်ႈၶရိၸ်ႈၼၼ်ႉ တီႈၵူၼ်းယူႉတႃႉၸိူဝ်းၼၼ်ႉယူႇဢေႃႈ။- 6ၵူၺ်းၵႃႈမိူဝ်ႈဢၼ် ၶဝ်ႁဵတ်းတၢင်းဢၼ်တွပ်ႇထဵင်သႄႉသွမ်းၼၼ်ႉၸိုင် မၼ်းသၼ်ႇပႅတ်ႈၶူဝ်းၼုင်ႈမၼ်းသေယဝ်ႉ၊ လၢတ်ႈလႄႈဝႃႈ၊ ႁႂ်ႈလိူတ်ႈသူမီးၵႃႈၼိူဝ်ႁူဝ်သူတႃႉ။ ၵဝ်ၸမ်ႉၵၢင်းလွတ်ႈဢေႃႈ။ ၸႃႉၸဵမ်မိူဝ်ႈလဵဝ်ၼႆႉလႄႈ ၵဝ်တၵ်းၵႂႃႇၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ၊ ဝႃႈၼင်ႇၼႆသေယဝ်ႉ၊- 7ဢွၵ်ႇသေၵႃႈၼႂ်းတီႈၼၼ်ႈလႄႈ ၵႂႃႇၵႃႈတီႈႁိူၼ်းၵေႃႉၼိုင်ႈဢၼ်လႆႈၸိုဝ်ႈယုတ်ႉတူႉ ဢၼ်ၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉဢေႃႈ။ ႁိူၼ်းၼၼ်ႉၸပ်းၵၼ်တင်းၸရွပ်ႈႁေႃးတြႃးယူႇဢေႃႈ။- 8ၵရီႉပူႉ ၵႄႇၸရွပ်ႈႁေႃးတြႃးၼၼ်ႉ ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်ယုမ်ႇမၢတ်ႈၸဝ်ႈၽြႃးဢေႃႈ။ ၵူၼ်းဝဵင်းၵေႃးရိၼ်ႇထူႉၼမ်ၼႃႇၵေႃႈထွမ်ႇငိၼ်းသေယဝ်ႉ ယုမ်ႇမၢတ်ႈလႄႈၶၢမ်ႇပပ်ႉတီႉၸမ်ႇဢေႃႈ။
9ၶိင်ႇၵၢင်ၶိုၼ်း ၸဝ်ႈၽြႃးလၢတ်ႈတီႈပေႃးလူႉ ၼႂ်းပျႃႇတိၵ်ႈရူႇပႃႇရူင်ႇလႄႈဝႃႈ၊ မႂ်းယႃႇပေၵူဝ်ပေႁႄ၊ ယႃႇပေယူႇတဵတ်ႇတဵတ်ႇယဵၼ်ယဵၼ်၊ ႁေႃးလၢတ်ႈတႃႉ။- 10လွင်ႈမၼ်းၸမ်ႉ ၵဝ်မီးယူႇလူၺ်ႈၵၼ်တင်းမႂ်းဢေႃႈ။ ၽူႈလႂ်တၵ်းဢမ်ႇႁဵတ်းပႄႉႁဵတ်းၼႅင်ႇ ႁႂ်ႈလႆႈၼိၵ်ႈၸၢၵ်ႈငႅၼ်းသႄးမႂ်း။ ၼႂ်းဝဵင်းၼႆႉၵဝ်မီးၵူၼ်းၼမ်ၼႃႇဢေႃႈ၊ ဝႃႈၼင်ႇၼႆဢေႃႈ။- 11မၼ်းၵေႃႈယူႇၵႃႈတီႈၼၼ်ႈပီႊပၢႆႁူၵ်းလိူၼ်တဵမ်တဵမ်လႄႈ ႁေႃးလၢတ်ႈသင်ႇသွၼ်ပၼ်ၼုၵ်ႈၵပၢတ်ႈတြႃး ၽြႃးပဵၼ်ၸဝ်ႈ တီႈၵူၼ်းဝဵင်းၸိူဝ်းၼၼ်ႉယူႇဢေႃႈ။
12မိူဝ်ႈဢၼ်ၶုၼ်ၵႃႇလဵဝ်ႇ လႆႈဢရႃႇဢၼ်ဢုပ်ႉပိူင်ႇမိူင်းဢၶႃႇယႃႉၼၼ်ႉၸိုင်၊ ၵူၼ်းယူႉတႃႉတင်းလၢႆၽွမ်ႉၵၼ် ႁဵတ်းပႄႉႁဵတ်းၼႅင်ႇတီႈပေႃးလူႉလႄႈ ဢဝ်မၼ်းၵႂႃႇၵႃႈတီႈၽၢႆႇၼႃႈပလၢင်ႇဢၼ်ၸီႇယၢင်ႇတြႃးၼၼ်ႉသေယဝ်ႉ၊- 13လဝ်ႊလၢတ်ႈလႄႈဝႃႈ ၵေႃႉၼႆႉတိုၵ်းယူင်းၸူဝ်းဢဝ်ၵူၼ်းတင်းလၢႆ ႁႂ်ႈလႆႈၶတ်းၵၼ်တင်းတြႃးသေလႄႈ ၵူဝ်းၵႂၢႆႇၽြႃးၶႃႈဢေႃႈ၊ ဝႃႈၼင်ႇၼႆဢေႃႈ။
14မိူဝ်ႈဢၼ်ပေႃးလူႉ ႁႃတၵ်းပိုတ်ႇပၢၵ်ႇလၢတ်ႈၼၼ်ႉၸိုင်၊ ၶုၼ်ၵႃႇလဵဝ်ႇၼၼ်ႉ လၢတ်ႈတီႈၵူၼ်းယူႉတႃႉၸိူဝ်းၼၼ်ႉလႄႈဝႃႈ၊ ၵူၼ်းယူႉတႃႉၶဝ်ဢိူၺ်း၊ ပေႃးပဵၼ်ဢမူႉဢၼ်ဢမ်ႇတြႃး ဢမ်ႇၼၼ်ဢမူႉဢၼ်ႁၢႆႉမိူၵ်ႈၵူဝ်ႈၵိူၵ်ႇၸိုင်၊ ၵဝ်တၵ်းလႆႈယိူၼ်ႉၶၢမ်ႇသူ ၵႃႈၼင်ႇဢၼ်မီးလွင်ႈမၼ်းတၢင်းမၼ်းၼၼ်ႉဢေႃႈ။- 15ၵူၺ်းၵႃႈပေႃးပဵၼ်ဢမူႉလွင်ႈၵႂၢမ်းလွင်ႈတၢင်းဢၼ်ႁွင်ႉႁဵၵ်ႈၸိုဝ်ႈသဵင်လွင်ႈၽႃႇသႃႇတြႃးသူၸိုင်၊ တူဝ်ၸဝ်ႈၵဝ်ႇပႂ်ႉဢမူႉတူဝ်ၸဝ်ႈၵဝ်ႇတႃႉ။ ၵဝ်ဢမ်ႇၶႂ်ႈၸီႇယၢင်ႇဢမူႉၸိူဝ်ႉၼင်ႇၼၼ်ၼၼ်ႉ၊ ဝႃႈၼင်ႇၼႆသေယဝ်ႉ၊- 16ႁေႃႈၵူၼ်းယူႉတႃႉၸိူဝ်းၼၼ်ႉဢွၵ်ႇပႅတ်ႈသေၵႃႈတီႈပလၢင်ႇဢၼ်ၸီႇယၢင်ႇတြႃးၼၼ်ႉဢေႃႈ။
17မိူဝ်ႈၼၼ်ႉ ၶဝ်တင်းသဵင်ႈတင်းလူင်ၼၼ်ႉ ဢဝ်သွတ်ႇသၼီႉ ၵႄႇၸရွပ်ႈႁေႃးတြႃး ပေႃႉယႅၼ်ႉၵႃႈတီႈၽၢႆႇၼႃႈပလၢင်ႇဢၼ်ၸီႇယၢင်ႇတြႃးၼၼ်ႉဢေႃႈ။ လွင်ႈတၢင်းၼၼ်ႉၵေႃႈ ၶုၼ်ၵႃႇလဵဝ်ႇ ယင်းဢမ်ႇဝႆႉဢမူႉလႄႈယူႇဢေႃႈ။
ၶိုၼ်းမိူဝ်းၸူးဝဵင်းဢၼ်ႇတီႉဢူၵ်ႉ
18လိုၼ်းၼၼ်ႉပေႃးလူႉယူႇႁၢမ်ႉႁိုင်ယဝ်ႉၸင်ႇ တၵ်ႉလၢတ်ႈၵၼ်တင်းပီႈၼွင်ႉတင်းလၢႆသေလႄႈ ဢွၵ်ႇၵႃႈၼႂ်းဝဵင်းၼၼ်ႉၵႂႃႇသေဢေႃႈ။ မၼ်းထႃႁူဝ်မၼ်း ၵႃႈၼႂ်းဝဵင်းၵိၼ်ႇၶျေႇဢေႃႈ။ ၵႃႈၼင်ႇဢၼ်လႆႈႁဵတ်းၵတီႉသဵတ်ႈၸႃႇဝႆႉၼၼ်ႉသေယဝ်ႉ၊ ႁွင်ႉဢဝ်ပျိတ်ႉၵီႉလႃႉ တင်းဢႃႇၵူႉလႃႉလႄႈ ၶီႇႁိူဝ်းသၢင်းၽေႃး ၵႂႃႇၵႃႈတီႈမိူင်းသူႉရီႉဢေႃႈ။- 19ၶဝ်ၼၼ်ႉႁွတ်ႈထိုင်ၵႃႈတီႈဝဵင်းဢေးၽႅတ်ႈသေယဝ်ႉ၊ပေႃးလူႉႁႂ်ႈ ဢႃႇၵူႉလႃႉတင်းပျိတ်ႉၵီႉလႃႉၵိုတ်းသဝ်းယူႇ ၵႃႈတီႈၼၼ်ႈသေလႄႈ တူဝ်မၼ်းၶဝ်ႈၵႃႈၼႂ်းၸရွပ်ႈႁေႃးတြႃး တိူင်ႇပၢင်ႇလၢတ်ႈၸႃၵၼ်တင်း ၵူၼ်းယူႉတႃႉတင်းလၢႆဢေႃႈ။- 20မိူဝ်ႈဢၼ်ၶဝ်တွင်းပၢၼ်ႇ ႁႂ်ႈမၼ်းယူႇလူၺ်ႈၵၼ်တင်းၶဝ်ထႅင်ႈလူးၵွၼ်ႇၼၼ်ႉၸိုင်၊ မၼ်းဢမ်ႇႁပ်ႉတုင်းဢဝ်လႄႈ၊- 21တၵ်ႉလၢတ်ႈၶဝ်သေလႄႈဝႃႈ ပေႃးၽြႃးပဵၼ်ၸဝ်ႈမီးဢလူဝ်ႇၸိုင်၊ ၵမ်းလိုၼ်းၵဝ်တၵ်းၶိုၼ်းမႃး ၵႃႈတီႈသူထႅင်ႈလူးၵွၼ်ႇဢေႃႈ၊ ဝႃႈၼင်ႇၼႆယဝ်ႉၸင်ႇ ၶီႇႁိူဝ်းသၢင်းၽေႃးဢွၵ်ႇသေ ၵႃႈတီႈၼႂ်းဝဵင်းဢေးၽႅတ်ႈၼၼ်ႉၵႂႃႇဢေႃႈ။- 22မိူဝ်ႈဢၼ်မၼ်းႁွတ်ႈထိုင်ၵႃႈတီႈဝဵင်းၵေႇသရီႉၼၼ်ႉၸိုင် မၼ်းၶိုၼ်းၵႂႃႇၸူးၵႃႈတီႈဝဵင်းယေႇရူႉသလႅမ်ႇလႄႈ တၵ်ႉလၢတ်ႈၵၼ်တင်းၸိူဝ်းၸဝ်ႈယဝ်ႉၸင်ႇ လူင်းမႃးၵႃႈတီႈဝဵင်းဢၼ်ႇတီႉဢူၵ်ႉဢေႃႈ။- 23မၼ်းယူႇၵႃႈၼႂ်းဝဵင်းၼၼ်ႉႁိုင်တၢၼ်ႇတၢၼ်ႇယဝ်ႉၸင်ႇ သမ်ႉဢွၵ်ႇၸွမ်းတၢင်းၵႂႃႇ ၵႃႈၼႂ်းမိူင်းၵလႃႇတီႉ တင်းမိူင်းၽႃႇရူႉၵီႉ ၵႃႈၼင်ႇဢၼ်ၸႅၼ်ႇယႆၵၼ်မီးဝႆႉၼၼ်ႉလႄႈ ႁႂ်ႈတပႄးၸဝ်ႈတင်းသဵင်ႈတင်းလူင်မၼ်ႈၶိူင်ႇဢေႃႈ။
လွင်ႈတမၢၼ်ႇၸဝ်ႈဢႃႇပေႃးလူႉ
24ၵူၼ်းယူႉတႃႉဢၼ်လႆႈၸိုဝ်ႈဢႃႇပေႃးလူႉလႄႈ ပဵၼ်ၵူၼ်းဝဵင်းဢႃႇလေႇၸၼ်ႇတရေႇ ဢၼ်ၸၢင်ႈလၢတ်ႈၸၢင်ႈဝႃႈလႄႈ ပဵၼ်ၵေႃႉဢၼ်ႁူႉမေႃၼႂ်းၵျၢမ်းလိၵ်ႈၼႃႇလူင်လၢင်ၼၼ်ႉၵေႃႉၼိုင်ႈ ႁွတ်ႈမႃးၵႃႈတီႈဝဵင်း ဢေးၽႅတ်ႈၼၼ်ႉဢေႃႈ။- 25ၵေႃႉၼၼ်ႉယၢမ်ႈသွၼ်ဢဝ်ၼႂ်းၽႃႇသႃႇၸဝ်ႈၽြႃးယဝ်ႉလႄႈ ပိူဝ်ႈဢၼ်ၸႂ်ၸပ်းၸႂ်ၸွႆးယႂ်ႇၼႃႇၼၼ်ႉ၊ ႁေႃးလၢတ်ႈသင်ႇသွၼ်သုင်းမႃႉပၼ် လွင်ႈတၢင်းၸိူဝ်းဢၼ်ၸၢပ်ႈသႅင်ႇၵၼ်တင်း ယေႇသူႉၼၼ်ႉ လီလီငၢမ်းငၢမ်းဢေႃႈ။ ၼႂ်းဝႃႈၼၼ်သေၵေႃႈ မၼ်းႁူႉပပ်ႉတီႉၸမ်ႇယူဝ်းႁၢၼ်ႇၵူၺ်းဢေႃႈ။- 26မၼ်းၼၼ်ႉၸႃႉႁေႃးလၢတ်ႈႁတ်းႁတ်းႁၢၼ်ႁၢၼ် ၼႂ်းၸရွပ်ႈႁေႃးတြႃးလႄႈ မိူဝ်ႈဢၼ်ဢႃႇၵူႉလႃႉ တင်းပျိတ်ႉၵီႉလႃႉ ငိၼ်းၵႂၢမ်းမၼ်းၼၼ်ႉၸိုင်၊ ၶဝ်ဢဝ်မၼ်းသွၼ်ပၼ်ၽႃႇသႃႇတြႃးၽြႃးပဵၼ်ၸဝ်ႈ ယဵင်ႈၶႅၼ်းသေႇၶျႃႇလီငၢမ်းဢေႃႈ။- 27ပိူဝ်ႈဢၼ်မၼ်းၼၼ်ႉ ၶၢႆႉၵႂႃႇၵႃႈတီႈမိူင်းဢၶႃႇယႃႉလႄႈ ၼင်ႇႁိုဝ်တပႄးၸဝ်ႈတင်းလၢႆ တၵ်းႁပ်ႉတုင်းဢဝ်မၼ်းၸိုင်၊ ပီႈၼွင်ႉၸိူဝ်းၼၼ်ႉတႅမ်ႈလိၵ်ႈပၼ်ၵႂႃႇဢေႃႈ။ မိူဝ်ႈဢၼ်မၼ်းႁွတ်ႈထိုင်ၸိုင်၊ မၼ်းၸွႆႈထႅမ်ၶဝ်ၸိူဝ်းဢၼ်ယုမ်ႇမၢတ်ႈ ၵွပ်ႈပိူဝ်ႈၵျေးၸူးၸဝ်ႈၼၼ်ႉတႄႉတႄႉဝႃႈဝႃႈဢေႃႈ။- 28လွင်ႈမၼ်းၸမ်ႉ မၼ်းလၢတ်ႈယႃႉၵႂၢမ်းၵူၼ်းယူႉတႃႉၶဝ် ၵႃႈတီႈၽၢႆႇၼႃႈၵူၼ်းတင်းလၢႆ ႁႅင်းယႂ်ႇၼႃႇလူင်လၢင်လႄႈ ဢဝ်တင်းၵျၢမ်းလိၵ်ႈ ၽုၺ်ႇဢွၵ်ႇၼႄပျႃး လွင်ႈဢၼ်ယေႇသူႉ ပဵၼ်ၸဝ်ႈၶရိၸ်ႈၼၼ်ႉဢေႃႈ။
Currently Selected:
တမၢၼ်ႇၸဝ်ႈ 18: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
