FAARSO 41
41
FAARSAANOTE ROORRICHITA DAAWITI FAARSO
DHIBBU YANNARA HUUCCI'NOONNI HUUCCATTO
1Gadadaammu daafira xissiisi'rannohu ba'raa'rinoho;
Kaaliiqi qarru barra gatisannosi.
2Kaaliiqi agare lubbotenni worannosi;
baattote aanano maassaminoho yinanna hee'ranno;
baarigaarrasirano sayise diaannosi.
3Kaaliiqi dhiwame goxinowa hee'reenna kaa'lannosi;
fayyimmano qolannosi.
4Anino, «Kaaliiqa'ya, ate aana sao assoommona maarie;
dhibba'yano hursie» yoommo.
5Baarigaarra'ya ane aana bunshe coyidhanni,
«Mamoote reya ikka?
Su'misino mamaro hawama ikka?» yitanno.
6Ane la'ara dagganno woyite,
goowi alita dogganno;
busha duduwo corte,
dargunni darga sa'anni su'ma'ya huntanno.
7Gibbannoeri baalu gamba yite hashaashantanno;
anera busha gantanno.
8«Bushu dhibbi amadinosina,
xaate hakkiinni dika"anno» yitanno.
9Lubbote jaali'ya hexxoommohu,
ledo'ya hurbaate itinohu,
anera badhe wodhinoe.
10Kaaliiqa'ya ballo, baarigaarra'ya rabbisi'reemmona,
maarie; fayyimmano uyie.
11Baarigaarra'ya qeeltannoe gede assoottoekki daafira,
baxoottoeta kunninni afoommo.
12Ane danchumma assa'ya daafira yite kaa'lattoe;
hegerera albakkiinni worattoe.
13Israeelete Magani Kaaliiqi hegere hegerera galatamo!
Hamii'ni! Hamii'ni!
Currently Selected:
FAARSO 41: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
