FAARSO 40
40
FAARSAANOTE ROORRICHITA DAAWITI FAARSO
GALATUNNA HUUCCATTOTE FAARSO
1Kaaliiqa cincatenni agadhoommo;
isino caaqqi yiinoe;
raare'yano macciishshie.
2Fullannikki booninni, rirriwu giddonni fushshinoe;
lekka'yano kinchu aana uurrisinoe;
qaafo'yano suwisinoe.
3Maganinkera ikkitannota haaro faarso afii'yara worino;
konne coye lae lowo manni waajjanno;
Kaaliiqano addaxxanno.
4Kaaliiqa addaxxitannori,
boonaleeyyete ledo hossannokkirinna
kaphu maganna magansidhannokkiri maassantinoreeti.
5Kaaliiqa Magano'ya assootto dhagge lowote;
ate gedeehu horontanni dino;
ati ninkera maala'linanni coye hedoottonke;
hasaawenna coyi're gude diafeemmo!
6Kakkalonna fushshaate dihasi'ratto;
shilqonnitanna cubbu daafira shiqinshanni kakkalo dixa'mi'ratto;
roorenkanni ati yaattota macciishshitanno macca oottoe.
7Hatte yannara, «Kuneeti dayommo;
anere Seeru Maxaafira borreessinoonni;
8Magano'ya hedokki wonshammora baxoommo;
seerikkino wodani'yara no» yoommo.
9Mannikki songinowa keeraanchimmakki duduweemmo;
Kaaliiqa, afoottonte gede afoo'ya gamba diassi'roommo.
10Assite gatisoottoe gara dimaaxoommo;
ammanamakkinna keeraanchimmakki songote mereero duduweemmo;
bagamannokki baxxillekkinna halaalekki kula diagureemmo.
11Kaaliiqa maarokki anewiinni xeertissooti;
bagamannokki baxillikkinna halaalikki wo'manka woyite agaroe.
12Kiiro anfoonnikki bunshe doyissitinoe;
cubbu amadeennae la"a hoogoommo;
kiiro umi'ya danancho rooreenna hexxo ba'inoe.
13Kaaliiqa, eeggatena gatisie;
Kaaliiqa rakke kaa'lie.
14Lubbo'ya huntara hasidhannori irraabbo; qeelanto;
qarrameenna hagiidhitannori saalfatte badhera higgo.
15«Hii"i» yitannoeri,
Kaaliiqi qeeleennansa saalfatte huxuxxi yito.
16Ate hasidhannori baalu hagiidhito;
tashshino yoonsa;
gatisaanchimmakkira galaxxitannori wo'manka woyite,
«Kaaliiqi lowoho!» yito.
17Mooticha'ya ani gadadaamohonna buxichoho;
ati kayinni dihawoottoe;
kaa'laancho'yanna gatisaancho'ya ikkoottohura rakke kaa'lie.
Currently Selected:
FAARSO 40: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
