FAARSO 37
37
DAAWITI FAARSO
BUSHUNNA DANCHU MANNI GAWALO
1Hayissote gede rakke mooltannorenna,
darote gede giggiltannore ikkitinohura,
2busha manna la'e giirantooti;
bunshe assitannore hinaassooti.
3Uullate aana keere hee'ratto gede,
Kaaliiqa addaxxi; dancha coyeno assi.
4Kaaliiqinni tashshi yoohe;
isino wodanikki halcho wonshannohe.
5Doogokki Kaaliiqira eeggo uyi'ri;
iso addaxxi; isino towatannohe.
6Keeraanchimmakki xawaabbu gede,
halaalekkino barri arrishsho gede xawisanno.
7Cincite Kaaliiqi assannore agadhi;
wolootu duroo'mituro,
bunshe assitannorira qiniinsaro giirantooti.
8Ateno bunshete giddora eessannohena, fooggaltooti;
hanqonna giirama aguri.
9Bunshe assitannori murantanno;
Kaaliiqa hexxitannori kayinni baatto ragidhanno.
10Bushuullu shiima yannalla keeshshitanno;
dargaho la'e hoogatto.
11Shaqqaddu kayinni baatto ragidhanno;
atootenna keere afidhe hagiidhitanno.
12Bushu manchi keeraanchoho busha malanno;
mulla kae suume ga'mi'ranno.
13Kaaliiqi kayinni, barru iillinosita afino daafira,
oso'lannosi.
14Buxanenna gadadaamma shitara,
dancha loossannore gorritara,
bisensa fushshitanno; digaanansa gonnitanno.
15Insa uminsa bise shitannonsa;
digaaninsano hiiqqamanno.
16Keeraanchunniti shiima jiro,
bushuullunnita lowo jiro roortanno.
17Bushuullu cigile hiiqqantanno;
keeraano kayinni Kaaliiqi irkisannonsa.
18Kaaliiqi keeraano towatannonsa;
iqqinsano geedonniho.
19Bushu diri dayenna disaalfattanno;
hudete yannarano ikkitanno geeshshi sagale afidhanno.
20Bushuullu kayinni gooffanno;
Kaaliiqi baarigaarra daraarote gede giggiltanno;
wiliilete gede ikkite ba'anno.
21Bushu liqii'rannota ikkinnina diqolanno;
keeraanchu kayinni shooshaqanno; wolehono aanno.
22Kaaliiqi maassi'rinonsari baatto ragidhanno;
ruminonsari kayinni murantanno.
23Kaaliiqi mannu qaafo suwisanno;
ha'rinshonsannino hagiidhanno.
24Kaaliiqi irkisannonsa daafira,
gufidhuro nafa diubbanno.
25Anje'yanni kayise techo geedhimma'ya geeshsha,
keeraanchu tugamanna,
sirchisino hudi're huucci'ranna afe diegennoommo.
26Isi wo'ma woyite callano aanno; liqiissannono;
oososino maassantanno.
27Bunshetewiinni xooqqe, dancha coye assittoro,
sirchikkino baattote aana geedanno.
28Kaaliiqi halaale baxanno daafira,
keeraano dihunanno;
keeraano hegerera heedhanno;
bushuullu sirchi kayinni ba"anno.
29Keeraano baatto ragidhanno;
ise aanano hegerera heedhanno.
30Keeraanchu afii hayyo rosiisanno;
arrawisino taalo coyi'ranno.
31Maganisi seera agadhanno;
doogosi aaninni wirri diyaanno.
32Bushu keeraancho duganno;
shaasira hasi'ranno.
33Kaaliiqi kayinni keeraancho sayise diaannosi;
yoote shiqe digaramanno.
34Kaaliiqa hexxittoro, hajajosino wonshittoro,
baatto ragisiiseennahe ayirratto;
bushuulluno ba'anna illekkinni la"atto.
35Bushunna kaajjadu manchi ayirre,
Libaanoosi daguwi gede bati'rinoha afoommo;
36Higummo woyite kayinni dino;
dargaho lae hoogoommo.
37Danchanna keeraancho mancho seekkite lai;
gibbonna giwansho baxannokki manchi, sircho sa"anno.
38Sao assannohu co'o yee ba"anno;
bushu sirchino muramanno.
39Keeraanote gatonsa Kaaliiqiwiinni dagganno;
qarrinsa yannara isi qiishonsaati.
40Isiwa eeggo e'anno daafira,
Kaaliiqi kaa'le gatisannonsa;
bushuullu angannino fushshannonsa.
Currently Selected:
FAARSO 37: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
