FAARSO 33
33
GALATU FAARSO
1Keeraano! Kaaliiqinni tashshi yoo'ne;
wodana subbinoonniri baalu galattinasira hasiisanno.
2Kaaliiqa gingilaatunni galattesi;
baganunnino faarsesi.
3Haaro geewono geebbesi;
bagana seekkitine ganne;
ilillissinanni faarsesi.
4Kaaliiqi qaali halaaleho;
loosisi baalu suwashshoho.
5Isi keeraanchimmanna halaalaancho yoo baxanno;
Kaaliiqihu bagamannokki baxilli baatto wo'mino.
6Kaaliiqi gordo hajajosinni,
agana, arrishshonna beeddahe qaalisinni kalaqino.
7Baara mittowa gamba assino;
lowo baarirano ga'rannowa qixxeessino.
8Baattote aana heedhinanniri baalu Kaaliiqa waajje;
kalqete aana heedhinanniri baalu iso ayirrisse.
9Isi coyi'reenna kalqe kalaqantino;
isi hajajeenna baalunkuri xawo fulino.
10Kaaliiqi dagate mala diiganno;
hedonsano wo'mitannokki gede assanno.
11Isi mali kayinni hegerera hee'ranno.
Wodanisi hedono beettu beettira sa'anno.
12Kaaliiqi Maganonsa ikkino manni ba'raa'rinoho;
isire assi're doodhinonsa gosa ba'raadhinote.
13Kaaliiqi iima gordoho hee're la"anno;
mannu baalu assannoreno afanno.
14Ayirradu barcimisira hee're,
baattote aana nooha baala la"anno.
15Wo'munku wodana kalaqinohu,
loosonsa baala egennino.
16Moote olantote batinyinni diinasi diqeelanno;
wolqaataamuno wolqasi batinyinni qeelle diafi'ranno.
17Olu faradinni qeelle afi'nanni yaa haafaho;
faradu wolqa diinu anganni digatissanno.
18Kuneeti Kaaliiqi ille waajjitannosirenna,
bagamannokkiha baxillesi addaxxitannore la'anno.
19Lubbonsa reyotenni gatisanno;
hudete yannarano itisannonsa.
20Kaa'laanchinkenna wonqonke Kaaliiqaatina,
ninke iso hexxineemmo.
21Qullaawu su'misinni addaxxineemmona,
wodaninke isinni hagiidhanno.
22Kaaliiqa ballo, ate addaxxinoommonte gede,
bagamannokkihu baxillikki ledonke hee'ro.
Currently Selected:
FAARSO 33: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
