FAARSO 31
31
FAARSAANOTE ROORRICHITA DAAWITI FAARSO
MAGANO ADDAXXATE HUUCCATTO
1Kaaliiqa eeggate, ate addaxxoommona, saalfachishshootie;
keeraanchimmakkinni gatisie.
2Huuccatto'ya macciishshite, rakke gatisie;
kinchu golonna jawaata qiisho gede ikkite gatisie.
3Goli'yanna qiisho'ya ateetina,
su'mikki daafira yite suwashsho doogo qolte ha'risie.
4Ati eeggo e'nanniwaatina,
baarigaarra'ya wortinoe woshshaado giddonni fushshie.
5Halaalu Magano Kaaliiqa gatisoottoehu ateetina,
lubbo'ya angakki wodheemmo.
6Haafu maganna hoode hadhannore giwatto;
ani kayinni ate addaxxeemmo.
7Qarra'ya afootto; shetto'yano laoottona,
bagamannokkihu baxillikkinni tashshi yaannoe.
8Baarigaarra'ya angara sayisse dioottoe;
qarru nookkiwa faffote darga massite woroottoe.
9Kaaliiqa eeggate, qarramoommona mararie;
wi'late batinyinni kainohunni ille'ya jaaroortu;
lubbo'yanna maali'ya daafuri.
10Heeshsho'ya dadillunni, diri'ya wi'latenni goofi;
bunshe'yanni kainohunni wolqa'ya daafurtu;
miqqa'yano daaqqu.
11Baarigaarra'ya baala,
roorenkanni ollii'ya giddo noori qacifattannoe;
egentinoeri la"a saalfattannoe;
doogote xaaddannoeri xooqqannoe.
12Reyino manni gede ikke hawamummo;
hiiqqamino uduunnichi gede ikke tugamummo.
13Lowo manni anera gano gane, shaaera ma'lanno;
hashaashamansa macciishshummota,
waajjillu doyisse amadinoe;
14Kaaliiqa, ani kayinni ate addaxxeemmo;
«Ate Magano'yaati» yeemmo.
15Heeshsho'ya wo'manti angakki no;
baarigaarra'ya anganninna shorritannoeriwiinni gatisie.
16Ane soqqamaanchokki shaqqillunni laie;
bagamannokkihu baxillikkinni gatisie.
17Kaaliiqa ballo, ate woshshi'reemmona, saalfachishshootie;
bushuullu kayinni saalfatto;
jeennaate e'e sammi yito.
18Wolqatenninna boo'natenni,
keeraano mishshanni coyidhanno kaphaano afii beewo.
19Ate ammantinoriranna ayirrissannoherira,
mannu albaanni qixxeessoottoti ellekki hiitto batidhinote!
20Ledonsa heedhe gano gantannoriwiinni golattonsa;
baarigaarransa arrawinni minekki maaxxe gatisattonsa.
21Baarigaarra'ya gaangeessiteennae noommowa,
bagamannokkiha baxillesi leellishinoehu Kaaliiqi galatamo.
22Ani masillunni kainohunni, albikkinni xeerti'roommoha lawinoe;
atewa hige raarummota kayinni, huuccatto'ya macciishshittoe.
23Keeraano baala, Kaaliiqa baxxesi;
Kaaliiqi halaalaasine agarannonsa;
boonaleeyye lowo geeshsha qorichishannonsa.
24Kaaliiqa addaxxitinanniri baalunku, jawaatte;
wodani'neno masoonke.
Currently Selected:
FAARSO 31: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
