FAARSO 25
25
DAAWITI FAARSO
BIDDISHSHANNA KAA'LO AFI'RATE KAALIIQIWA SHIQINSHOONNI HUUCCATTO
1Kaaliiqa ballo, wodana'ya atewa qole kayiseemmo.
2Magano'ya, ate addaxxoommona, saalaho tuggootie;
baarigaarra'yano qacifattoonke"e.
3Ate hexxitannori disaalfattanno;
beebbatenni ate aana ka'annori kayinni irraabbanno.
4Kaaliiqa'ya ballo, ha'rumakki leellishie;
doogokki rosiisie.
5Ati gatisattoe Maganooti;
halaalikkinni hee'reemmo gede massagie; rosiisie;
anino barra wo'ma ate hexxeemmo.
6Kaaliiqa eeggate, hundinni kayise noore,
maarokkinna bagamannokkiha baxillekki qaagi.
7Anje'yanni hee're assoommo cubbonna sao kiirtootie;
Kaaliiqa ballo, danchummakkira yite,
bagamannokki baxillikkinni qaagie.
8Kaaliiqi danchahonna suwashshoho;
cubbaataammahono doogosi kulannonsa.
9Umonsa heeshshi assitannore halaalu doogo aana ha'risannonsa;
hedosino rosiisannonsa.
10Gondoorosinna hajajosi agartannorira,
Kaaliiqi loosanno loosinni maarosinna bagamannokkiha baxillesi leellishannonsa.
11Kaaliiqa eeggate, cubbi'ya bati'rinona,
su'mikkira yite saie.
12Waajjannosi manna,
Kaaliiqi doorantino doogo aana ha'risannonsa.
13Dironsa baala jirotenni guddanno;
oosonsano baatto ragidhanno.
14Ayirrissannosirira baalaho Kaaliiqi jaalansaati;
gondoorosino egentanno gede assannonsa.
15Woshshaadotenni gatisannoe daafira,
kaa'lo afi'rate wo'ma woyite Kaaliiqa laeemmo.
16Callimmanna gadadu amadinoena,
alba higie; mararie.
17Wodaniya yaaddo batidhanni noona,
shettote giddonni fushshie.
18Gadado'yanna qarra'ya lai;
cubbo'ya baala agurie.
19Baarigaarra'ya batidhino gara lai;
mageeshshi geeshsha gibbannoerono afi.
20Lubbo'ya agarte gatisie;
ate addaxxoommona saalfachishshootie.
21Ate hexxoommona,
ammanamanna halaalaanchimma agartannoe gede assie.
22Magano eeggate, Israeelete manna,
qarru baalunku giddonni wodinsa.
Currently Selected:
FAARSO 25: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
