MAARQOOSI 6

NAAZIRETETE KATAMI MANNI YESUUSA GIWI

(Mat 13:53-58; Luq 4:16-30)

1Yesuusi hakkiinni kae lophino katama ha'ri; rosaanosino hoodesi hadhu. 2Fooliishshote Barra, Xaandanni Mine rosiisanna lowo manni dhaggeeffatanni macciishshi. Insano dhiibbifatte, «Kuni manchi togoo coye maminni afi'ri? Tini uyinoonnisi hayyo hiittoote? Tenne maalale ma garinni loosanno? 3Isi dihaqqa bocannoho? Maariyaami beetto di"ikkino? Qoleno, Yaiqoobi, Yooseefi, Yihudinna Simiooni rodoo di"ikkino? Seennu roduuwisi kawiicho dininke ledo no?» yite coyidhu.

4Hakka woyite Yesuusi, «Himanaancho wole gobbara ayirrinsanni; baadosi, fiixisinna ayiddisi mereero kayinni dinaandannisi» yii.

5Hakkiicho shiima dhiwamaano, anga aanaho wore hursa agurranna, wole maalale diassino. 6Amma'na hoogansarano lowo geeshsha maala'li.

YESUUSI TONAALAME ROSAANO DANCHA DUDUWO DUDUBBANNO GEDE SOYI

(Mat 10:5-15; Luq 9:1-6)

Hakkunni gedensaanni, Yesuusi rosiisanni qacha baala doyi. 7Tonaalamenka rosaanosi woshshe battete ayyaana fushshitanno gede roorre eensa lame lame asse soyinsa. 8Hadhanno woyite siqqo agurranna, sinqe, ogoro, womaashsha qoraho adhite hadhannokki gede hajajinsa. 9Qoleno, «Lekka'nera koatte wodhe ikkinnina, lame uddano adhitine hadhinoonte! 10Martinoonni darginni agurtine hadhina geeshsha e'inoonni mine keeshshe! 11Haa'ranna macciishsha gimbanni'newa baala agurtine fultinanni woyite, malaate ikkannonsa gede lekka'ne buko ganga'ne!» yiinsa.

12Insano fulte, mannu cubbosi aagintaawe higanno gede kultu. 13Batinye durriisa fushshitu; lowo dhiwamaanono zayite buurte hursitu.

CUUAANCHU YOHAANNISI GORRAMA

(Mat 14:1-12; Luq 9:7-9)

14Yesuusi duduwi wo'mankawa duduwamino daafira, Moote Heeroodisi macciishshi. Mitu mitu manni, «Yohaannisi reyotenni kaino; tini baala maalale loosantanni noohu kunniraati» yii.

15Wolu manni, «Eeliyaasiiti» yii. Wolootu qolte, «Albi himanaano giddonni mittichoho» yitu.

16Heeroodisi kayinni konne coye macciishshe, «Ani goowa mursiisummohu Yohaannisi reyotenni kaino» yii. 17Heeroodisi, rodiisi Filiphoosi galte Heeroodiyaada adhino daafira, isi qole isenni kainohunni Yohaannisi usursiisino. 18Hatto assinohu Yohaannisi Heeroodisi, «Rodiikki galte adha gara di"ikkitino» yiinosihuraati.

19Heeroodiyaada kunni coyira Yohaannisi ko'mite, shiishiishshara hasidhino; ikkollana didandiitino. 20Dandaa hoogginohu, Heeroodisi Yohaannisi keeraanchonna qullaawa ikkinota afe waajje, ille aanaho wore agarannosihuraati. Heeroodisi Yohaannisi coyi'rannore macciishsha baxanno; ikkollana coyi'rannore macciishshanno woyite assannori ba"annosi.

21Heeroodisi, ilamino barra ayirrisara gashshootu roorroota, olantote hajajaanonna ayirradda Galiilu gobba manna jila jile woshshi; hatti yanna Heeroodiyaadara injo ikkituse. 22Hakka woyite Heeroodiyaada beetto mannu noowa e'e, sirbitanni Heeroodisinna wosinasi hagiirsiissu. Heeroodisi beetto woshshe, «Hasi'rittare baala xa'mie; eemmohena. 23Gashshooti'ya darate nafa bade eemmohena xa'mie!» yee xaari.

24Iseno amasewa marte, «Ma xa'miro?» yitu.

Ama qolte, «Cuuaanchu Yohaannisi umo aannohe gede xa'mi'ri» yituse.

25Hakkawoyintenni rakke dagge moote, «Cuuaanchu Yohaannisi umo xaanni saffeho worte aattoera hasi'reemma» yitu.

26Moote lowo geeshsha ikke dadilli. Ikkirono xaarino xaaro daafiranna woshsheenna dayino wosini saalira yee, yitinore ho'la dibaxino. 27Hakkawoyintenni moote, agaraasinesi giddonni mitto gaaddicha woshshe, Yohaannisi umo mure abbanno gede hajaji. Gaaddichuno usuru minira mare, Yohaannisi goowa muri. 28Murino umo saffeho wore abbe, beettote uyi. Beettono amate uyitu. 29Yohaannisi rosaano konne coye macciishshite marte, reeshsha haadhe madaartu.

YESUUSI ONTE KUME MANNA ITISE DUUSHSHI

(Mat 14:13-21; Luq 9:10-17; Yoh 6:1-14)

30Yesuusi soqqamaasine soyinowiinni galagalte dagge, assitinorenna rosiissinore baala kultusi. 31Isino, «Ane ledo ka'a shiqqi yitine, shiima geeshsha fooliishshidhe» yiinsa. Hatto yiinohu, lowo manni daanninna ha'ranni qarriseenna sagale ittanno gara hoogginohuraati.

32Kunnira, yowolote ofolte mannu nookkiwa higge hadhu. 33Ikkollana lowo manni insa afe katamu baalunni fule, lekkatenni balaxe sae agari.

34Yesuusi yowolote aaninni dirri woyite, lowo manni allaalaanchu nookki ge'reewi gede ikkinota lae marare, lowo coye rosiisinsa. #Kir 27:17; 1Dud 22:17; Hiz 34:5 lai.

35Yanna hashshituta rosaano Yesuusiwa shiqqi yite, «Xa yanna hawarritino; gobbano halallaati. 36Muli qachanna ollaa ha're, itannore hidhona manna keerunni yite ha'risinsa» yitu.

37Isi kayinni, «Ittannore ki'ne uuyyensa!» yiinsa.

Insa qolte, «Hatto ikkina, lamu xibbi birrinni timma hirre uyinammoraatiyyani?» yitu. 38Yesuusi, «Meu timi noo'ne? Martine la'e!» yiinsa. La'e ka'e, «Onte timaatinna lame qulxu'meeti» yitu.

39Yesuusi manna gaamo gaamo assite shaqqado hayisso aana ofoshshiishshanno gede rosaanosi hajaji. 40Kunnira, mannu xibbe xibbenna ontaa ontaa gaammeenna ofolli. 41Yesuusi onte timanna lame qulxu'me haa're, gordo hige lae Magano galati. Timma hiiqqaqqe, mannaho iillishshanno gede rosaanosira uyi. Lamenta qulxu'meno baalunkura beehi. 42Baalunku itte duubbu. 43Rosaanosi itteenna gatinoha timmatenna qulxu'mete giggilo tonaa lame soro wonshite kayissu. 44Hattenne sagale ittinori labballu onte kume mannaati.

YESUUSI BAARU AANAANNI HA'RI

(Mat 14:22-33; Yoh 6:15-21)

45Hakkawoyintenni Yesuusi manna ha'risa geeshsha, rosaanosi yowolote ofolte balaxxe widira Beetesayida fultanno gede hajajinsa. 46Manna ha'risihu gedensaanni Magano huucci'rara ilaalu iimira fuli.

47Hashshi yannara yowolo baaru mereero no. Yesuusi kayinni callisi moola baatto aana no. 48Rosaanosi albansaanni bubbissanni noo bubbenni kainohunni yowolo laaqi'ra hoogge noota Yesuusi afi. Soodimaroho Yesuusi baaru aanaanni ha'ranni rosaanosiwa dayi. Sae ha'rara hasi're no. 49Insa baaru aana ha'ranna affe, ekera laweennansa raartu. 50Baalunku iso affe, lowo geeshsha jajjartu. Isi hakkawoyintenni, «Galfatte! Aneetina waajjitinoonte» yiinsa. 51Yowolote giddora e"e insa ledo ofollita, bubbe gabbi yitu. Rosaanosi kayinni lowo geeshsha dhaggeeffattu. 52Konne coye dhaggeeffattinohu, timmatenni loosino dhagge wodancha hoogginohuraati. Wodaninsa dillaawe no.

YESUUSI GENSAREEXI YINANNIWA DHIWANTINORE HURSI

(Mat 14:34-36)

53Yesuusinna rosaanosi baara fulte Gensareexi yinanni gobba iillite, yowolono hakkiicho usurtu. 54Yowolote aaninni dirritanni heedheennanni, mannu Yesuusa bade afi. 55Hatte yannara qachu baalunni dodante, dhiwamaano rerete dukke Yesuusi no yiniwa baala massitu. 56Isi ha'riwa baala qachuwate, katammate, gattate, dikkoteno dhiwamaasine massite goxissanni, uddanosi handaarano ikkiro kissara huuccidhinosi. Iso kissuri baalu hurtino.

Currently Selected:

MAARQOOSI 6: QulMax

Highlight

Copy