MAARQOOSI 5

YESUUSI DURRIISU AMADINO MANCHO HURSI

(Mat 8:28-34; Luq 8:26-39)

1Galiilu Baara tayisse fulte Gergesenooni yinanniwa daggu. 2Yesuusi yowolote giddonni fulita, durriisu amadino manchi mooggate giddonni fule, Yesuusinni xaadi. 3Kuni manchi alba mooggate giddo hee'rannoho. Konne mancho hatte yannara ayino amade cagaagetenni usura didandiino. 4Lowo yanna cagaagetenninna quwetenni usurranna, cagaagenna quwe tattayise tuganno. Kunnira amade heeshshi assa dandiinohu dino. 5Hashshanna barra mooggate giddonna ilaallate aana raaranno. Biso kinnatenni huduuxxanni madiissi'ranno.

6Yesuusa xeertote hee're afe, dodanni mare albasiinni kumbuuli. 7Lowo geeshsha raaranni, «Ati Wo'munkura Aliidi Magani Beetto Yesuusa, atera ane ledo mayi noohe? Shetisattoekki gede Maganu su'minni eegameemmohe» yii. 8Hatto yiinohuno Yesuusi balaxe, «Koo busha ayyaana, kunni manchi giddonni fuli!» yee hajajinosihuraati.

9Yesuusi, «Su'mikki ayiti?» yee xa'misi.

Isino, «Batinye ikkinoommohura, su'mi'ya Legewooniiti»#5:9 Legewooni yaa olanto yaate. Roomunniti mitte olantote gaamo 6000 manna amaddanno. yee dawarisi. 10Yesuusi gobbatenni fushshe hunannonsakki gede duu're huucci'ri.

11Hakkiicho gaaru hunda kiiro haammata manchaame hayisso ittanni no. 12Durriissa, «Marre manchaamete giddora e'neemmo gede fajjinke!» yite huuccidhu. 13Yesuusino, «Maahoyyena martine e'e!» yeennansa durriissa manchu giddonni fulte manchaamete giddora e'u. Lame kume ikkitino manchaame baaru gaminni giddora higge bitintirtu.

14Manchaame allaalte noori xooqqe marte, katamahonna katamu gobbaanni dudubbu. Mannuno tenne ikkito la"ara dayi. 15Macciishshiturino Yesuusiwa dagge, durriisu amadino manchi hure uddanosi uddi're ofolle nooha affe waajjitu. 16Balaxe afino manni durriisu ganino manchirenna manchaame ikkitinore kuli.

17Hatte gobba manni, Yesuusa hakkiichinni agure ha'ranno gede huucci'ri.

18Yesuusi yowolo eanni hee'reenna durriisu fulisi manchi, «Ballo ledokki ha'roni?» yee huucci'ri.

19Yesuusi kayinni maahoyye diyiinosi. Ikkollana, «Hadhe ayiddikkira Mootichu assinoheha jawa coyenna mararinohe gara kulinsa» yiisi.

20Manchu, «Tonne Katammaati» yinanni gobba baalate Yesuusi assinosire duduwanni ha'ri. Konne coye macciishshihu baalu dhagge assi'ri.

IYAIROOSI BEETTONNA YESUUSI UDDANO KISSU MANCHO

(Mat 9:18-26; Luq 8:40-56)

21Yesuusi galagale yowolotenni baara widoonni fuli yannara, lowo manni isiwa shiqqi yii. Isino baaru mule no. 22Xaadu Mini roorrooti giddonni mittu Iyairoosi yinanni manchi hakkiira daye, Yesuusa afe lekkasira uwe, 23«Shiima qaaqqo'ya lowo geeshsha dhiwanteenna, reyote agarre hee'noonni. Ballo gatte lubbotenni heedhannoe gede marte angakki aanaho worise» yee huucci'ri.

24Yesuusino kae ledosi ha'ri. Ha'ranni hee'reenna, ledosi noohu lowo manni doogote aana cifisi.

25Hakko manni mereero tonaa lame diro wo'ma mundee lolakkanna heedhannoti mitte mancho no. 26Hatti mancho xagissannori baalunkuwa hadhanni, lowo geeshsha qarrantino. Woxese baalano guxxitino; ikkollana dhibbu lexxinoseta ikkinnina horonta woyyimma diafidhino. 27Yesuusi duduwo macciishshite, mannu mereeroonni higge dagge, badheenni uddanosi kissu. 28Hatto assitinohu, «Uddanosi kisummaro nafa hureemma» yite heddinohuraati.

29Lolakkanni nooti mundeeno hakkawoyintenni uurritu. Dhibbunni hurtinoti bisise aana leeltuse. 30Yesuusi hakkawoyintenni wolqa giddosinni fultinota afe, mannu widira caaqqi yee lae, «Uddano'ya kisihu ayeti?» yee xa'mi.

31Rosaanosi, «Mannu cifanni nooheta affanni heedhe, ‹Ayi kisie› yaatto?» yitu.

32Isi kayinni kisinosihu ayetiro afara hasi're wirri yee lai. 33Mancho kayinni aanase ikkinore affino daafira, waajjite huxidhanni albasiinni ubbe, ikkinore baala gudisse kultu. 34Yesuusi, «Beetto'ya, amma'nakki gatissinohena keerunni ha'ri! Dhibbikkinni hurte hee'ri!» yiise.

35Yesuusi togo yee coyi'ranni hee'reenna, Iyairoosi mininni dayino manni, «Qaaqqo reyitinona, xa rosiisaancho mayira daafursatto?» yiisi.

36Yesuusi kayinni insa yitinota mishe agure Iyairoosi, «Ammani ikkinnina, waajjitooti!» yiisi. 37Yesuusi Pheexiroosinna Yaiqoobi, Yaiqoobi rodoo Yohaannisi agurranna wolu manni ledosi ha'rannokki gede hooli. 38Iyairoosi minira iillitu yannara, Yesuusi mannu raaranna, didannanna kooce wi'lanna afi. 39Yesuusi minira e"e, «Tini raarenna didatto mayiraati? Qaaqqo goxxinota ikkinnina direyitino» yiinsa.

40Mannu kayinni iso maaeelse oso'lisi. Ikkollana Yesuusi manna baala mininni fushshe, qaaqqote annanna ama ledosi dayino manni ledo haa're qaaqqo noowa ei. 41Qaaqqote anga amade, «Xaliita kuumi» yiise. Hatto yaa, «Tee beetto gotti yii yeemmohe!» yaate.

42Qaaqqo 12 dirrite. Iseno hakkawoyintenni ka'e ha'rantu. Mannuno tenne ikkito lae, lowo geeshsha dhaggeeffati. 43Yesuusi kayinni konne coye mannaho kultannokki gede qorophisiise, «Ittannore uuyyese» yiinsa.

Currently Selected:

MAARQOOSI 5: QulMax

Highlight

Copy