MAARQOOSI 4

WIXA WIXI'RANNO MANCHI LAWISHSHA

(Mat 13:1-9; Luq 8:4-8)

1Yesuusi galagale baaru mule rosiisi. Lowo manni isiwa daye gamba yiita, isino baaru giddo noo yowolora ofolli. Mannu baaluno hakkiicho baaru gama ofolle no. 2Isino masalsanni lowo coye rosiisinsa.

3Rosiisinsa yannarano, «Hanni macciishshe, mittu manchi wixa wixi'rara fuli. 4Wixa wixi'ranni hee'reenna, mitu mitu gumi doogote gama uwi; ceano dagge xinqite ittu. 5Wolu gumi bushshu qawaaxxisinokkiwa carete aana uwi. Lowo bushshi nookki daafira, mulenni mu'ri. 6Arrishsho iibbituta kayinni qoori; rumushsho afi'rinokki daafira mooli. 7Wolu qole utu giddo uwi. Mu'rihu gedensaanni utu fuge amadeenna gumiweele gati. 8Wolu gumi dancha shaqqado baattora uwe mu'ri. Lophe dancha gumano laali; mittu 30, mittu 60, mittu 100 laali» yii.

9Yesuusi xaano lede, «Macca noohu macciishsho!» yiinsa.

YESUUSI LAWISHSHUNNI MAYIRA COYI'RI

(Mat 13:10-17; Luq 8:9-10)

10Yesuusi callisi hee'reenna, rosaanosinna wolu manni coyi'rino masalo tiro maatiro xa'mitusi. 11Yesuusi daware, «Ki'nera go'linoha Maganu gashshooti coye afate hayyo uyinoonni'ne. Gobbaanni noorira kayinni masalsatenni kullanninsa. 12Hatto ikkannohuno,

« ‹Insa Maganunniwa higgeenna,

cubbo agurransara,

la'anni heedhenni dibuuxxannoreeti;

macciishshitanni heedhenni diwodanchitannoreeti›

yinoonni garinniiti»#Isa 6:9-10 lai. yiinsa.

WIXA WIXANNO MANCHI LAWISHSHI TIRO

(Mat 13:18-23; Luq 8:11-15)

13Yesuusi, «Kuni lawishshi dileellino'ne? Konne afa hoogginiro, wole masalubba hiitto assitine affinanniyya? 14Wixannohu Maganu qaale wixanno. 15Mitu mitu manni, doogote gama uwi wixi lawishshaati; qaale macciishshitanni heedheennanni Sheexaanu daye wodaninsa giddonni macciishshitino qaale xinqe adhanno. 16Carete aana uwino wixi masalo, qaale macciishshite hakkawoyintenni hagiidhite adhitannore kulannoho. 17Rumushshu noonsakki daafira shiima yannalla keeshshitanno. Maganu qaali daafira qarrunna xiiwama iillitunsaro mulenni gufidhe ubbanno. 18Utu mereero uwino wixi masalo, Maganu qaale macciishshitu gedensaanni, 19tenne gobba hedo, jirote baxillinna wole yorto wodaninsa giddora e'e, macciishshitino qaale beeshshiteenna gumiweelte gattannore kulanno. 20Shaqqado baattora uwino wixi masalo kayinni, qaale macciishshite wodanchitannore kulanno. Kunni garinni mittu 30, mittu 60, mittu 100 guma laaltanno» yiinsa.

GO'LINORE XAWISANNO CAABBICHO

(Luq 8:16-18)

21Qoleno Yesuusi, «Xawanni noo caabbicho googidete giddo woy daallasaho woroonni worrannini? Worrannihu dixawe leellanno dargaati? 22Hattono maanxoonnihu leellikkinni digatanno. Go'linohu xawo fulikkinni dihee'ranno. 23Xa kayinni macca noohu macciishsho» yiinsa.

24Xaano lede, «Macciishshitinanni coye wodana asse! Woleho safartine uyitinanni safaraanchinni safarranni'ne; hakkiinnino sayinse uyinanni'ne. 25Noohura lendannisi; noosikkihuwiinni kayinni hakkonnenni haa'ne hoollanni» yii.

MU'RE LOPHANNO WIXI LAWISHSHA

26Yesuusi lede, «Maganu Gashshooti mittu manchi baattote aana wixa wixanno manchi lawishshaati. 27Manchu wixa wixi're goxe gale soodo kae la"anno. Wixino wixi hiitto ikkeetiro afikkinni mu're lophanno. 28Baatto umise wixa mu'risseenna, agashsho kalaqi're, agashshote aana guma laalanno. 29Gidu laale iillanni hee'reennanni, manchu haanto haa're midanno» yii.

SHIIMU GUMI LAWISHSHA

(Mat 13:31-32,34; Luq 13:18-19)

30Yesuusi lede coyi'ranni, «Maganu Gashshoote mayinni lawinseemmo? Woy mayinni masalsine kulleemmo? 31Maganu gashshooti shiima guma lawanno. Hakku gumi winxanni yannara baattote aana noo gumi baalunkunni ajinoho. 32Winxihu gedensaanni kayinni lophe, wole haqqe rooranno. Cea minna mini'te heedhanno geeshshita jajjabba sinna fushshanno» yii.

33Yesuusi mannu wodancha dandaanno deerrinni, lowotenni kunni gari masalsanni qaale kulinsa. 34Masalsikkinni mittoreno dirosiisinonsa. Rosaanosi calluwu noo woyite kayinni masalote tiro kulannonsa.

YESUUSI DAMBALA SAMMI ASSI

(Mat 8:23-27; Luq 8:22-25)

35Hatte hawarro Yesuusi rosaanosi, «Amme baara widoonni fullona!» yiinsa. 36Manna hakkiicho agurte ofolle noo yowolora hee'reennanni Yesuusa haadhe hadhu. Wole yowollano ledo no. 37Baaru aana hadhanni heedheenna lowo bubbe ka'e dambala kayisseenna, yowolote wayi wo'mi. 38Hatte yannara Yesuusi yowolote badhiidi kifilera barko barki're goxe nooha rosaanosi baqqi assite, «Rosiisaancho, wayi itannanke sammi yaatto?» yitu.

39Isino kae bubbe ufe, «Uurri! Gabbi yii» yee rufita, bubbe uurriteenna lowo geeshsha ga'labbi yii. 40Yesuusi rosaanosi, «Togo mayira waajjitinanni? Xaa geeshsha amma'na dino'ne?» yiinsa.

41Insano lowo geeshsha waajjite mimmitoho, «Kuni bubbenna dambalu hajajamannosihu isi ayiti?» yitu.

Currently Selected:

MAARQOOSI 4: QulMax

Highlight

Copy