MAARQOOSI 3

YESUUSI ANGA LAANSHAAWINO MANCHO HURSI

(Mat 12:9-14; Luq 6:6-11)

1Wole yannara Yesuusi Ayihudootu xaadi minira galagale ei. Hakkiicho mittu anga laanshaawino manchi no. 2Yesuusi aana yorto afidhinori, «Fooliishshote Barra hursannoro hanni anfeemmona» yite agartu. 3Yesuusi anga laanshaawa mancho, «Ka'e mannu albaanni uurri!» yiisi. 4Hakkiinnino aanche, «Seeru garinni Fooliishshote Barra danchanso busha loosate fajjinoonni? Lubbo gatisatenso hunate fajjinoonni?» yee xa'minsa.

Insa kayinni tenne te'enne diyitino. 5Yesuusi wodaninsa dillaawara dadille, hakko noo manna hanqu illenni lae mancho, «Angakki diriirsi!» yiisi.

Yiino gede assita, manchoho anga hurtusi. 6Hakkawoyintenni Farisootu Yesuusa huntanno gara Heeroodisi manni ledo amaalantu.

LOWO MANNI YESUUSI HOODE DAYE BAARU MULE GAMBA YII

7Yesuusi rosaanosi ledo Galiilu Baariwa ha'ranna, Galiilunninna Yihudunni dayinohu lowo manni hoodesi dayi. 8Loosino dhagge macciishshite, Yihudunni, Yerusaalametenni, Edoomi gobbanninna Yordaanoosi Wayira soojjaatoonni noo gobbanni, Xiroosinninna Sidoonunni kiiro batinyu manni isiwa dayi. 9Mannu bati'rino daafira cifame tuttugannosikki gede rosaanosi, «Yowolo shiqqi asse"e!» yiinsa. 10Lowo manni dhibba hurino daafira dhibbu qarrisino manni baalu iso kisara yee mimmito tuttugi. 11Busha ayyaanna iso affanno woyite albasiinni ubbanni, «Ati Maganu Beettooti» yitanni lowo geeshsha raartu.

12Isi kayinni ewelummasi mannaho hasaabbannokki gede duu're kulinsa.

YESUUSI TONAA LAME ROSAANO DOORI

(Mat 10:1-4; Luq 6:12-16)

13Yesuusi ilaala fuli yannara, hasi'rinonsare isiwa woshshinsa. Insano isiwa daggu. 14Isi ledo heedharanna qaalesi kultara hasi're tonaa lamenka doori. Su'mano, «Soqqamaasine» yee fushshinsa. 15Durriisa fushshitanno roorreno uyinsa.

16Tonaa lamunku dooranturi: Pheexiroosi yee su'ma fushshihu Simiooniiti, 17Boanargeesi woy banqote oosooti yee su'ma fushshiri Zebidewoosi ooso Yaiqoobiitinna Yohaannisiiti, 18Indiriyaasiiti, Filiphoosiiti, Bertelemewoosiiti, Maatewoosiiti, Toomaasiiti, Ilfiyoosi beetti Yaiqoobiiti, Taadewoosiiti, gobbasira laalaataanchu Simiooniiti, 19Yesuusa sayise hirihu Asiqorootichu Yihudaati.

YESUUSINNA BIELIZEBUULI

(Mat 12:22-32; Luq 11:14-23; 12:10)

20Yesuusi rosaanosi ledo minira eita, xaano lowo manni hoodensa noo daafira sagale ita nafa didandiitino. 21Yesuusa, «Wodana difayyino» yinanni duduwo macciishshe, fiixisi iso amade haa're ha'rara dayi.

22Yerusaalametenni dagginori Muse Seeri rosiisaano, «Giddosi Bielizebuuli#3:22 Bielizebuuli yaannohu Giriikete afiinni durriisu roorricha yitanno tiro afi'rino. no. Durriisa fushshannohu durriisu roorrichi wolqanniiti» yite hasaabbu.

23Yesuusi isiwa woshshe masalsanni, «Sheexaanu Sheexaane hiitto asse fushshanno? 24Isi isiniiwa giwamanno gashshooti kaajje hee're diafanno. 25Mittu mini mannino mimmitu ledo giwamannoha ikkiro, billaallannota ikkinnina kaajje dihee'ranno. 26Sheexaanuno isi isiniiwa giwamiro ba"annota ikkinnina hee're diafanno.

27«Hakkiinnino sairo, mittu wolqaataamu manchi mine e'ne, balanxe minu anna usurrikkinni jajjasi adha didandiinanni. Usurrihu gedensaanni kayinni dandiinanni.

28«Halaale yeemmo'nena, mannaho loosanno cubbonna xonanno xono agurranni. 29Qullaawa Ayyaana xoninohura baalaho kayinni hegere asale ikkannosi ikkinnina horontanni saosi diagurantannosi» yiinsa. 30Yesuusi hatto yee coyi'rinohu, «Giddosira bushu ayyaani eino» yitino daafiraati.

YESUUSI AMANNA RODUUWASI

(Mat 12:46-50; Luq 8:19-21)

31Yesuusi amanna roduuwisi isiwa marte gobbaanni heedhe, «Ninkewa amo!» yite manna sokke woshshiishshu. 32Mulesi ofolle noo manni, «Kuneeti amakkinna roduuwikki ate hasidhe gobbaanni uurrite no» yite kultusi.

33Isi qole, «Ama'ya ayiti? Roduuwi'ya ayeooti?» yiinsa. 34Mulesi ofolte noori widira hige la"anni, «Ama'yanna roduuwi'ya kuriuuti. 35Maganu hedinore wonshannohu baalu anera labbaa rodoo'yaati, meyaa rodoo'yaatinna ama'yaati» yiinsa.

Currently Selected:

MAARQOOSI 3: QulMax

Highlight

Copy