MAARQOOSI 2

YESUUSI LAANSHAAWA MANCHO HURSI

(Mat 9:1-8; Luq 5:17-26)

1Shiimu barri gedensaanni Yesuusi galagale Qifirinahoomi Katama dayi. Mannuno Yesuusi hakkiicho mitto mine noota macciishshi. 2Hakkiicho mannu mine wo'meenna nafaru nafa ruukki. Isino mannaho qaale kuli. 3Hatte yannara, shoolu manchi mitto laanshaawa mancho dukke Yesuusiwa abbitu. 4Mannu bati'rino daafira Yesuusiwa shiqqi yitanno doogo hoogge isi noo taalo la'e mine qalcho murte, mancho rerentenni dirrissu. 5Yesuusi amma'nansa afe laanshaawa mancho, «Beetto'ya, cubbikki aguraminohe» yiisi.

6Hakko ofolte noori mitu mitu muse Seeri rosiisaano wodaninsanni, 7«Kuni manchi Magano xonanni no; Magano agurranna mannu cubbo agura dandaannohu wolu nooni?» yite heddu.

8Hakkawoyintenni Yesuusi giddonsata afe, «Wodani'nenni konne coye mayira heddinanni? 9‹Cubbikki aguraminohe› yaatenna, ‹Ka'e rerekki duqqite hari!› yaate woyite shonte hiitti roortanno? 10Manchi Beettira uullate aana cubbo agurate roorre noosita egentinanni gedeeti» yii. 11Manchono, «Ka'e rerekki duqqite minikkira ha'ri» yiisi.

12Laanshaawu manchi hakkawoyintenni kae reresi duqqe, mannu baalu la"anna fuli. Kunnira mannu baalu dhagge assi're, «Togoo coye anfe diegenninoommo» yaanni Magano galati.

YESUUSI LEEWI YINANNI MANCHO WOSHSHI

(Mat 9:9-13; Luq 5:27-32)

13Yesuusi galagale baaru mulira marita, mannu baalu isiwa shiqqi yeenna rosiisinsa. 14Hakkaanni hige sae ha'ranni hee're, Ilfiyoosi beetto Leewi qaranxanni daasira ofolle nooha afe, «Hoode'ya amo» yiisi.

Isino kae hoodesi ha'ri.

15Hakkunni gedensaanni Yesuusi Leewi minira mare, sagalete ofolli. Lowo mannino hoodesi ha'ranni no. Hakko manni giddonni lowo qaraxaasinenna cubbaataammu Yesuusinna rosaanosi ledo sagalete ofoltu. 16Muse Seeri rosiisaano Farisootu, Yesuusi qaraxaanotenna cubbaataammu ledo sagale itanna la'e, «Isi qaraxaasinetenna cubbaataammu ledo itannohunna agannohu mayiraati?» yite rosaanosi xa'mitu.

17Yesuusi konne coye macciishshe, «Dhiwantinorira ikkinnina fayyaaleeyyete xagisannohu dihasiisannonsa. Ani cubbaataamma ikkinnina, keeraano woshshammora didayommo» yiinsa.

QATUMATE DAAFIRA XA'MINOONNI XA'MO

(Mat 9:14-17; Luq 5:33-39)

18Yohaannisi rosaanonna Farisootu Maganittete qatuma qatuntanno. Shiimu manni Yesuusiwa daye, «Yohaannisi rosaanonna Farisootu Maganittete qatuma qatuntanna, ate rosaano qatuma gibbannohu mayiraati?» yee xa'misi.

19Yesuusino daware, «Seenne adhannohu ledonsa hee'reenna albisootu qatuntannoni? Dee'ni, diqatuntanno. Seenne adhannohu insa ledo hee'reenna qatuma dihasiissannonsa. 20Ikkollana seenne adhannoha insawiinni haa'ne hoollanni yanna dagganno. Hatte yannara qatuntanno.

21«Akkala uddanora haaro qaafficho digannanni. Hatto assiniro, haaru qaaffichi akkala uddano daranno. Dadhamaseno albinni roore ikkitanno. 22Haaro woyinete xajje akkalu ogorira diworranni; worriha ikkiro kayinni, ogoru dhoohanno; woyinete xajjeno du'nantanno; ogoruno kaa'lannori nookkiha ikkanno. Kunnira, haaro woyinete xajje haaru ogorira worranni» yiinsa.

FOOLIISHSHOTE BARRI DAAFIRA SHIQINSHOONNI XA'MO

(Mat 12:1-8; Luq 6:1-5)

23Yesuusi Ayihudete Fooliishsho Barra laalino gidi giddoonni sa"anna, ledosi noo rosaano hadhanni heedhe shoye tattayisse ittu. 24Farisootu kayinni, «Rosaanokki Fooliishshote Barra hoolloonnire mayira assitanno?» yite xa'mitu.

25Yesuusino qole, «Daawiti mannisi ledo hee're hudi'ri yannara, assinore diaffinoonni? 26Abiyataari Maganu mini qeesootira roorricha ikke noo yannara, Daawiti Maganu Minira e"e, qeesoota callaho fajjinoonniha qullaawa tima itino; ledosi noo mannirano uyino» yiinsa.

27Qoleno, «Fooliishshote Barri mannaho kalaqaminota ikkinnina, mannu Fooliishshote Barrira dikalaqamino. 28Kunnira, Manchi Beetti Fooliishshote Barrira nafa Mootichaho» yiinsa.

Currently Selected:

MAARQOOSI 2: QulMax

Highlight

Copy