MAARQOOSI 1

YOHAANNISI YESUUSIRA DOOGO QIXXEESSI

(Mat 3:1-12; Luq 3:1-18; Yoh 1:19-28)

1Maganu Beetti#1:1 Maganu Beetti yaannohu mite mite angatenni borreessinoonni borro giddo dino. Yesuusi Kiristoosihu Danchu Duduwi hanafo kunninni aante noote.

2Himanaanchu Isayaasi,

«Kuneeti atera alba asse,

doogokki qixxeessannoha,

sokkaancho'ya soyemmo. #Mil 3:1 lai.

3Mittu manchi halalla qoonqosi naggi asse,

‹Mootichu doogo qixxeesse;

ha'nanni doogono taashshe!›

yaanni lallawanno» #Isa 40:3 lai. yee borreessino.

4Kunni garinni Cuuaanchu Yohaannisi,#1:4 Cuuaanchu Yohaannisi yaannoha mite mite angatenni borreessinoonni borro Yohaannisi cuuanni yitanno. «Cubbi'ne aguramanno'ne gede aagintaabbine higgine cuuamme!» yee lallawanni halalla leelli. 5Yihudu gobbahunna Yerusaalamete Katami manni baalu Yohaannisiwa daye cubbonsa ifaaxxanna Yohaannisi Yordaanoosi Wayira cuuinsa.

6Yohaannisi uddi'rino uddano gaalu ordanni gannoonnite; hallo sunchunni qodhino. Sagalesi kanchafarehonna godu malawooti. 7Isi mannaho, «Koattesi suncho heeshshi yee tira dandeemmokkihu ane gedensaanni daanno. Isi ane rooreho. 8Ani ki'ne wayinni cuueemmo'ne; isi kayinni Qullaawu Ayyaaninni cuuanno'ne» yee kulinsa.

YESUUSI CUUAMANNA JIFAMA

(Mat 3:13-17; Luq 3:21-22)

9Hatte yannara Yesuusi Galiilu gobbanni Naaziretete Kataminni kae dayenna Yohaannisi Yordaanoosi Wayira cuuisi. 10Yesuusi wayi giddonni fulanni hee'reenna, gordu fa'nameenna iiminni Maganu Ayyaani lembooli daninni daye aanasi dirranna afi. 11Hakko mereero, «Hagiirsiisattoehu baxeemmo Beetti'ya ateeti» yitanno huuro gordunni daggu.

12Hakkawoyintenni Qullaawu Ayyaani Yesuusi halalli gobba fule ha'ranno gede assisi. 13Hakko halalli gobbara, Sheexaanu jifannasi shoyilloo baara keeshshi. Moyichu ledo hee'ranna sokkaasine dagge soqqantusi.

YESUUSI SOQQANSHOSI GALIILAHO HANAFI

(Mat 4:12-22; Luq 4:14-15; 5:1-11)

14Yohaannisi amadame usuru minira eihu gedensaanni, Yesuusi Maganunniha Dancha Duduwo kulanni Galiilu gobba daye, 15«Yanna iillitino; Maganu Gashshooti gambisino; cubbo'ne aagintaabbine higgine Dancha Duduwo ammanne!» yii.

YESUUSI SHOOLE ROSAANO DOORI

(Mat 4:18-20; Luq 5:1-11)

16Mitto barra Yesuusi Galiilu Baari muleenni sa"anni hee're, qulxu'me woshshaaxxitannore Simiooninna rodoosi Indiriyaasi afi. Insano qulxu'me amadate woshshaadonsa baaru giddo tugganni no. 17Yesuusi, «Ane hoode amme! Ani manna woshshaaddinannire asseemmo'nena» yiinsa. 18Insano hakkawoyintenni woshshaadonsa agurte hoodesi hadhu.

19Hakkiinni shiimare sae lame roduuwa afi. Insa Zebidewoosi ooso Yaiqoobiitinna Yohaannisiiti. Insano yowolote aana heedhe woshshaadonsa biddi assidhanni no. 20Yesuusi hakkawoyintenni woshsheennansa, annansa Zebidewoosi wolu kiranyootu ledo yowolote giddo agurte Yesuusi hoode hadhu.

YESUUSI DURRIISU GANINO MANCHO HURSI

(Luq 4:31-37)

21Hakkiinnino ka'e Qifirinahoomi yinanni katama iillitu. Fooliishshote Barri eanni hee'reennanni, Yesuusi Ayihude xaaddanno minira e"e rosiisa hanafi. 22Yesuusi rosiisinsa woyite, Muse Seeri rosiisaano gede ikkikkinni gashshaanchu gede ikke rosiisinonsa daafira, macciishshituri rosiisino gara dhaggeeffattu.

23Bushu ayyaani amadino manchi, 24«Naaziretete Yesuusa, ninke ledo atera mayi noohe? Hunattonkera dayitto? Ati ayetiro afoommohe. Ati Maganu Qullaawaati» yee raari.

25Yesuusi busha ayyaana, «Sammi yite manchuwiinni fuli!» yee rufi.

26Bushu ayyaani mancho fittifachiishe lowo geeshsha raaranni isiwiinni fuli. 27Hakko noo manni baalu dhagge assi're, «Kuni magaraati? Kuni haaru rosi maati? Busha ayyaana roorretenni hajajanno; insano hajajantannosi» yitanni insa insanaawa hasaabbu.

28Hakkawoyintenni Yesuusi duduwi Galiilu gobba baala iilli.

YESUUSI LOWO DHIWAMAANO HURSI

(Mat 8:14-17; Luq 4:38-41)

29Yesuusi Yaiqoobinna Yohaannisi ledo xaadu mininni fulanni hee'renni, Simiooninna Indiriyaasi minira ha'ri. 30Hakko mine Simiooni ballo iibbabbite goxxe no. Dhiwante noota hakkawoyintenni Yesuusira kultusi. 31Yesuusi isewa shiqqi yee anga amade gotti assise. Iseno hurte, sagale wortunsa.

32Arrishsho e'eenna hashshita, dhiwantinorenna durriisu ganinore baala haadhe Yesuusiwa abbitu. 33Katamu manni baalu nafara gamba yii. 34Yesuusi hakkiicho addi addi dhibba afi'rinoha lowo manna hursi. Batinye durriisano fushshi. Durriisuno isi ewelumma egennino; kunnira, Yesuusi durriisa coyi'rannokki gede hooli.

YESUUSI GALIILAHO ROSIISA HANAFI

(Luq 4:42-44)

35Soodara rahe hee'reenna Yesuusi gute kae, kashshi yaannori nookkiwa mare huuccatto assi'ri. 36Simiooninna ledosi noori iso hassara fultu. 37Iso affuhu gedensaanni, «Mannu baalu hasi'ranni noohe» yitu.

38Yesuusi kayinni, «Ani Dancha Duduwo lallawate dayommo daafira, lallaweemmo gede konne noo qachuwa ha'no» yiinsa.

39Hakkunni gedensaanni, kae xaandanni minnara mare rosiisanninna durriissa fushshanni Galiilu gobba baala tuqi.

YESUUSI TARAAWANNOHU GOGU DHIBBI AMADINO MANCHO HURSI

(Mat 8:1-4; Luq 5:12-16)

40Taraawannohu gogu dhibbi noosihu mittu manchi Yesuusiwa daye albasiinni guluphe, «Baxittoero hursattoera dandaatto» yaanni huucci'risi.

41Yesuusino marare angasinni amammade, «Baxoommohena huri!» yiisi. 42Manchuno hakkawoyintenni taraawannohu gogu dhibbinni huri. 43-44Yesuusi mancho, «Konne coye hattono ikkite mannaho kultooti; qorophi! Huroottota kayinni marte qeesichaho leellishi. Huroottota anfanni gede, Muse hajajinota keeraa'mate kakkalo Maganoho shiqishi» yee hakkawoyintenni ha'ranno gede assisi.

45Manchu kayinni hakkiinni kae ha'ranni hee'renni, manna baalaho duduwi. Kunnira, Yesuusi mannu afanna katama ea dandiinokki daafira, katamaho gobbaanni halalla keeshshino. Mannu kayinni addi addi gobbanni isiwa daa diagurino.

Currently Selected:

MAARQOOSI 1: QulMax

Highlight

Copy