MAARQOOSI 7

ALBI MANNI SEERA

(Mat 15:1-9)

1Farisootunna Yerusaalametenni dagginori Muse Seeri rosiisaano Yesuusiwa shiqqe, 2rosaanosi giddonni mitu mitu lagaabbino anganni sagale ittanna affu. Hatto yaano hayishshidhukkinni ittino yaate.

3Farisootunna Ayihudootu albi manni woga agadhite, anga hayishshidhukkinni sagale di"ittanno. 4Dikkotenni higganno woyiteno hayishshidhukkinni di"ittanno. Qolteno finiincho, maaqqe, gambayichonna daallasa hayishshi'rate woga noonsa.

5Kunnira, Farisootunna Seeru rosiisaano Yesuusa, «Rosaanokki albi manni woga diigge, sagale lagaabbino anganni mayira ittanno?» yite xa'mitu. 6Isi qole, «Ki'ne lawisiisaano! Isayaasi,

‹Tini gosa afiinsanni ayirrissannoe;

wodaninsa kayinni anewiinni xeerti'rinoho.

7Mannu woga ane Seeri gede assite rosiissanni,

kaphunni magansidhannoe›

yine borreessinoonni garinni, ki'nere himanasi garaho. 8Kunnira, ki'ne Maganu hajajo agurtine, mannu woga agadhitinanni» yii.

9Ledeno, «Ki'ne woga'ne agadhitinara yitine Maganu hajajo diigate kaajjuulleho. 10Muse, ‹Annakkinna amakki ayirrisi!› Qoleno ‹Annanna ama xonannohu horonta reyo!› yee hajajino. 11Ki'ne kayinni, mittu manchi annasinna amasi kaa'la agure, ‹Anewiinni afidhinanniri baalu Qurbaanete› (Maganoho uyinanni kakkalooti yaate) yiiro, 12hakku manchi annisiranna amasira mittoreno assara difajjitinanni. 13Kunni garinni umi'ne seera kultinanni, Maganu qaale mullare assitinanni; konne lawannoha batinye coye assitinanni» yiinsa.

MANNA LAGEESSANNO COYE

(Mat 15:10-20)

14Yesuusi xaano manna woshshe gamba asse, «Baalunku ani yeemmore macciishshitine wodanche! 15Manna lageessannohu mannuwiinni fulanno coyeti ikkinnina, gobbayidinni giddora eannore di"ikkino. 16Macca noosihu macciishsho!»#7:16 tini kiiro mite mite angatenni borreessinoonni borro giddo dino.

17Yesuusi mannuwiinni baxxe minira eita, rosaanosi coyi'rino lawishshi tiro kulannonsa gede xa'mitu. 18Isi qole, «Ki'neno xiinxallitine diaffinanni? Gobbayidinni giddora eannohu manna lageessannokkita diegentinoonni? 19Godowu giddora e"e gobbara fulannota ikkinnina, wodanunniwa dimaranno» yee, sagale baala intannita ikkitinota xawise kulinsa.

20Xaano Yesuusi, «Manna lageessannohu, mannu wodani giddonni fulanno coyeti. 21Hakkuno: Busha hedooti, baashaawate, mooraho, manna shaate, 22foorrete, yortote, bunshete, xagarrote, amanyootiweellete, dhiibbete, hemete, boo'nate, yamalaimmate. 23Kuni bushu coyi baalu mannu wodani giddonni fule, manna lageessanno» yii.

MITTE MANCHO AMMA'NA

(Mat 15:21-28)

24Yesuusi hakkiinni kae, Xiroosinna Sidoona gobba ha'ri. Marino mine mannu afannosikki gede hasi'rino; ikkollana maaxama didandiino. 25Beettose bushu ayyaani amadino mancho hakkawoyintenni macciishshite dagge, Yesuusi lekkara ubbu. 26Tini mancho ilama dagate widite; dagginohuno, Giriiketenni Sirofiniqu gobbanniiti. Beettose giddonni busha ayyaana fushshannose gede Yesuusa huuccidhu. 27Yesuusi kayinni, «Oosote sagale haa'ne woshshu buttu'lira tuga gara di"ikkitino; balaxxe ooso duubbona!» yiise.

28Ise qolte, «Mooticha'ya, hattenne woyite halaaleho; ikkirono, ooso ittanna uwino giggilo buttu'lu xinqi're itannowe» yitu.

29Yesuusino, «Togo yee coyi'rakkinni bushu ayyaani beettokkiwiinni fulinona minikkira ha'ri!» yiise.

30Ise minisera martanno woyite, beettose giddonni bushu ayyaani fuleenna hurte daallasaho goxxe noota affu.

YESUUSI MACCIWEELONNA DANQICHA MANCHO HURSI

31Yesuusi Xiroosi gobbanni agure ha'ri. Sidoonu widoonni hige, «Tonne Katamma» yinanniwa Galiilu Baari mulira dayi. 32Hakko hee'reenna mitto macciweelonna danqicha mancho isiwa haadhe abbite, anga aanaho woranno gede huuccidhusi. 33Yesuusi hakkonne macciweelonna danqicha mancho mannuwiinni bade qacce fushshe, lamente maccasira qubbesi wore, anjicho tufe arrawosino amammadi. 34Gordo hige lae, lowo geeshsha foolihu gedensaanni mancho, «Efata!» yiisi. Hatto yaano, «Fa'nami!» yaate.

35Hakkawoyintenni maccasi fa'nitu; arrawisino tidhameenna xawise coyi'ri. 36Yesuusi, «Konne coye ayerano kultinoonte!» yee hajajinsa. Insa kayinni hajajinonsata agurte, roorsite dudubbu. 37Macciishshituri lowo geeshsha maala'lite, «Isi baala coye seekkino. Macciweelu maccatenni afanno gede, danqichuno coyi'ranno gede assanno» yitu.

Currently Selected:

MAARQOOSI 7: QulMax

Highlight

Copy