MAATEWOOSI 8

YESUUSI TARAAWANNOHU GOGU DHIBBI NOOSI MANCHO HURSI

(Maq 1:40-45; Luq 5:12-16)

1Yesuusi ilaalu aaninni dirrita, lowo manni hoodesi ha'ri. 2Hatte yannara mittu taraawannohu gogu dhibbi noosi manchi Yesuusiwa daye albasiinni guluphe, «Mooticha, baxittoero hursattoera dandaatto» yee huucci'ri. 3Yesuusino anga diriirse manchono amammade, «Baxoommohena huri!» yiisi. Manchuno hakkawoyintenni taraawannohu gogu dhibbinni huri. 4Hakkunni gedensaanni Yesuusi hakkonne mancho, «Konne coye hattono assite mannaho kultooti; huroottota kayinni marte qeesichaho leellishi'ri. Huroottota anfanni gede, Muse hajajinota keeraawate kakkalo Maganoho shiqishi» #Lew 14:1-32 lai. yiisi.

YESUUSI MITTU OLANTOTE ROORRICHI SOQQAMAANCHO HURSI

(Luq 7:1-10; Yoh 4:43-54)

5Yesuusi Qifirinahoomi Katama iilli yannara, mittu Roomunnihu Xibbe Olanto Roorrichi isiwa daye, 6«Mooticha, soqqamaanchi'ya dhibbu laansheesseenna lowo geeshsha shete mine goxe hee'ranno» yii.

7Yesuusino, «Ani mare hurseemmosi» yii.

8Xibbe Olanto Roorrichi kayinni, «Mooticha, ani mini'yara eatto gedeeha di"ikkoommo. Mitto qaale coyi'roottoro kayinni soqqamaanchi'ya huranno. 9Ani umi'ya gashshaanote hajajameemmoho; anerano hajajeemmo olanto nooe. Insa giddonni mittu, ‹Ha'ri!› yuummoro ha'ranno; woleno, ‹Amo!› yuummoro daanno. Soqqamaancho'ya, ‹Konne assi!› yuummoro assanno» yii.

10Yesuusi konne coye macciishshe dhagge assi're, hoodesi ha'ranni noo mannira, «Halaale kuleemmo'nena, togoota jawa amma'na afi'rinoha Israeelete giddo nafa afe diegennoommo. 11Lowo manni soojjaatinna galchiminni daanno; gordu Gashshooti jilira Abirihaami, Yisihaaqinna Yaiqoobi ledo ofollanno. 12Konne Gashshoote ragidhanno yine hendoonnire kayinni gobba tunsichoho tunganni. Hakkiicho wi'litanni suumensa ittanno» yii.#Isa 49:12; 59:19; Far 107:3 lai. 13Hakkunni gedensaanni Yesuusi xibbe olanto roorricha, «Amma'nakki gede ikkohena ha'ri!» yiisi. Soqqamaanchisino hakkawoyintenni huri.

YESUUSI LOWO MANNA HURSI

(Maq 1:29-34; Luq 4:38-41)

14Yesuusi Pheexiroosi minira mari yannara Pheexiroosi ballo iibbabbite goxxe noota afi. 15Angase amadita iibbabbo higgeennase ka'e soqqantusi. 16Hawarrita, durriisu ganinorenna dhiwantinore baala haadhe Yesuusiwa abbiteenna qaalisinni busha ayyaanna fushshi; dhiwantinore baalano hursi. 17Hatto assasinni himanaanchu Isayaasi, «Ninke dhibba isi doyisse adhino; xissonkeno isi duqqino» yiino himani wo'mi.

YESUUSI HOODE HADHANNORIRA IILLANNONSA QARRA

(Luq 9:57-62)

18Yesuusi lowo manni doyisse noosita afe rosaanosi baara widoonni fultanno gede hajajinsa. 19Mittu Seeru rosiisaanchi Yesuusiwa daye, «Rosiisaancho, ha'rattowa baala hoodekki dayemmo» yii.

20Yesuusi qole, «Yeedaallate bale noonsa; buubbanno cearano minu noonsa. Manchi Beettira kayinni umo worannowi nafa dinosi» yee qolisi.

21Rosaanosi giddonni mittichu, «Mooticha, balaxe ha're anna'ya madaadheemmo gede fajjie» yiisi.

22Yesuusi kayinni, «Reyitinori reeshshansa madaadhitona agurte, ati ane hoode amo!» yii.

YESUUSI DAMBALA SAMMI ASSI

(Maq 4:35-41; Luq 8:22-25)

23Yesuusi ha'rara yowolo eita, rosaanosino ledosi hadhu. 24Baaru aana hadhanni heedheenna lowo hombobolatte ka'u. Dambaluno kae yowolo egemmara rahi. Hatte yannara kayinni Yesuusi goxe no. 25Rosaanosi Yesuusiwa shiqqe, «Mooticha, ba'nummona gatisinke!» yite baqqi assitusi. 26Yesuusi, «Ki'ne amma'na xe'ino'neri! Mayira waajjitinanni?» yiinsa. Hakkunni gedensaanni Yesuusi kae hombobolattenna baara rufeenna lowo geeshsha sammi yii. 27Mannuno dhaggeeffate, «Hombobolattenna baaru nafa hajajamannosihu kuni hiittoo manchooti!» yii.

YESUUSI DURRIISU AMADINORE LAME MANNA HURSI

(Maq 5:1-20; Luq 8:26-39)

28Yesuusi Galiilu Baara tayise fule Gergesenooni yinanniwa dayita, durriisu amadinori lamu manni mooggate giddonni fulte Yesuusinni xaaddu. Insa lowo geeshsha qarrissannore ikkitino daafira, mannu hatte doogo hige sa"a didandaanno. 29Insano, «Ati Maganu Beettooti; atera ninke ledo mayi noohe? Yanna daggukkinni qarrisattonkera dayitto?»#Eje 11:12; 2Sam 16:10 lai. yitanni raartu. 30Insawiinni shiimare xeertidhe kiiro haammata manchaame hayisso ittanni no. 31Durriisu, «Fushshite hunattonkeha ikkiro marre manchaamete giddora e'neemmo gede assinke!» yite huuccidhu.

32Yesuusino, «Maahoyyena martine e'e!» yeennansa durriissa lamunku manchi giddonni fulte manchaamete giddora e'u. Manchaame baala boonu gaminni bitintirtanni dirrite baaru giddo e'e reyitu. 33Manchaame allaalte noori xooqqe katamu giddora e'e ikkino coye baala dudubbu. Durriisu amadino manni aana ikkinore baala hasaabbu. 34Hakkunni gedensaanni katamu manni baalu Yesuusa la"ara fuli. Marte Yesuusa affuhu gedensaanni gobbansa agure ha'ranno gede huuccidhu.

Currently Selected:

MAATEWOOSI 8: QulMax

Highlight

Copy