MAATEWOOSI 9

YESUUSI LAANSHAAWA MANCHO HURSI

(Maq 2:1-12; Luq 5:17-26)

1Hakkunni gedensaanni Yesuusi yowolotenni baara fule katamasi dayi. 2Mannu mitto laanshaawa mancho rerete aana goxe nooha duhe Yesuusiwa abbi. Yesuusi amma'nansa afe laanshaawa mancho, «Beetto'ya bashshi yitooti; cubbikki aguraminohe» yiisi. 3Hatte yannara mitu mitu Seeru rosiisaano wodaninsanni, «Kuni manchi Magano xonanni no!» yitu.

4Yesuusi giddonsata afe, «Konne busha coye wodani'nenni mayira heddinanni? 5‹Cubbikki aguraminohe› yaatenna, ‹Ka'e hari!› yaate woyite shonte hiitti roortino? 6Manchi Beettira kayinni uullate aana cubbo agursiisate roorre noosita egentinanni gedeeti» yee, laanshaawa mancho, «Ka'e rerekki duqqite minikkira ha'ri» yiisi.

7Manchuno kae minisira ha'ri. 8Mannu tenne ikkito lae dhaggeeffate, mannaho togoo roorre uyino daafira Magano galati.

YESUUSI MAATEWOOSI WOSHSHI

(Maq 2:13-17; Luq 5:27-32)

9Yesuusi hakkiinni kae ha'ranni hee're, Maatewoosi yinanni qaraxaanchi qaranxanni daasira ofolle nooha afe, «Hoode'ya amo» yiisi. Isino kae hoodesi ha'ri.

10Hakkunni gedensaanni Yesuusi Maatewoosi minira mare, sagalete ofolle hee'reenna qaraxaasinenna cubbaataammu hakkiira dagge isinna rosaanosi ledo sagalete ofoltu. 11Farisootu konne coye affe rosaanosira, «Rosiisaanchi'ne qaraxaanotenna cubbaataammu ledo mayira itanno?» yitu.

12Yesuusi konne coye macciishshe, «Dhiwantinorira ikkinnina fayyaaleeyyete xagisaanchu dihasiisannonsa. 13Hadhine, ‹Ani kakkalotenni roore maaro hasi'reemmo› yine borreessinoonnihu mayaatero seekkitine buuxxe! Ani cubbaataamma ikkinnina, keeraano woshshammora didayommo» yiinsa.

QATUMATE DAAFIRA XA'MINOONNI XA'MO

(Maq 2:18-22; Luq 5:33-39)

14Hatte yannara Yohaannisi rosaano Yesuusiwa dagge, «Ninkenna Farisootu wo'manka woyite Maganittete qatuma qatummeemmo; ate rosaano qatuma gibbannohu kayinni mayiraati?» yite xa'mitusi.

15Yesuusi daware, «Seenne adhannohu ledonsa hee'reenna albisootu qatuntannoni? Adhannoha insawiinni haa'ne hoollanni yanna dagganno; hakka waro kayinni qatuntanno.

16«Akkala uddanora haaro qaafficho digannanni. Hatto assiniro, haaru qaaffichi akkala uddano daranno. Dadhamaseno albinni roore ikkitanno. 17Haaro woyinete xajjeno akkalu ogorira diworranni; worriha ikkiro kayinni, ogoru dhoohanno; woyinete xajjeno du'nantanno; ogoruno kaa'lannori nookkiha ikkanno. Kunnira, haaro woyinete xajje haaru ogorira worranni. Kunni garinni lamunku dancha gede ikkite heedhanno» yiinsa.

IYAIROOSI BEETTONNA YESUUSI UDDANO KISSU MANCHO

(Maq 5:21-43; Luq 8:40-56)

18Yesuusi konne coye kulanni hee'reenna mittu Iyairoosi yinanni roorrichi Yesuusiwa daye lekkasira uwe, «Kuneeti qaaqqo'ya reyitino; ati dagge angakki aanaho worittosero kayinni ka'e lubbotenni heedhanno» yii.

19Yesuusi kae manchu faana ha'ri; rosaanosino ledonsa hadhu. 20Hadhanni heedheenna tonaa lame diro wo'ma mundee lolakkanna heedhannoti mitte mancho, Yesuusira badheenni higge dagge uddanosi qacce kissu.#Kir 15:38; Mar 22:12 lai. 21Hatto assitinohu, «Uddanosi nafa kisummaro hureemma» yite heddinohuraati.

22Yesuusi caaqqi yee lae, «Beetto'ya waajjitooti; amma'nakki gatissinohe» yiise. Manchono hakkawoyintenni hurtu.

23Hakkunni gedensaanni Yesuusi Iyairoosi minira iille, xurumba ufuuffannorenna raataabbanni wi'litannore lai. 24Isino, «Baalunku kawiichinni fulle, qaaqqo goxxinota ikkinnina direyitino» yiinsa. Insa kayinni iso maaeelsite oso'litu. 25Mannu mininni fulihu gedensaanni Yesuusi qaaqqo noowa e"e angase amadita iseno ka'u. 26Kuni duduwi hatte gobba baalate duduwami.

YESUUSI LAME ILLIWEELOOTA HURSI

27Yesuusi hakkiinni kae ha'ranni hee'reenna lamu illiweelooti hoodesi hadhu. Insano, «Daawiti Beetto ballo mararinke!» yitanni raarte huuccidhu.

28Yesuusi minira eita, illiweelootu isiwa shiqqi yitu. Isino, «Ani konne coye assa dandeemmota ammantinannini?» yiinsa.

Insano, «Ee, Mooticha» yitu.

29Hakkunni gedensaanni Yesuusi illensa angasinni amammade, «Ammana'ne gede ikko'ne!» yiinsa. 30Illensano fa'nitu. Yesuusino, «Konne coye ayerano kultinoonte!» yee duu're dhaaminsa. 31Insa kayinni hadhe, hatte gobba baalate Yesuusire dudubbu.

YESUUSI MITTO DANQICHA MANCHO HURSI

32Illensa fa'nitunsa manni fulte hadhanni heedheenna, wolu manni durriisu ganinoha danqicha mancho haa're Yesuusiwa abbi. 33Durriisu giddosinni fulanni hee'reennanni danqichu manchi coyi'ri. Mannuno, «Togoo coye Israeelete gobbara anfe diegenninoonni» yaanni dhaggeeffati. 34Farisootu kayinni, «Isi durriisa fushshannohu durriisu roorrichi wolqanniiti» yitu.

YESUUSI MANNA MARARI

35Yesuusi xaadu minna giddo rosiisanni, gordu Gashshootiha Dancha Duduwo kulinsa. Addi addi dani dhibbinni amadamino mannano hursanni, katammatenna qachuwa baalate ha'rami. 36Allaalaanchu nookki ge'reewi gede ikke qarramenna gara hawe noo manna afe marari.#Kir 27:17; 1Mot 22:17; 2Dud 18:16; Hiz 34:5; Zak 10:2; Maq 6:34 lai. 37Kunnira Yesuusi rosaanosira, «Gidu lowoho; gide gamba assanno manni kayinni shiimaho. 38Gide gamba assate, lowo loosaasine soyanno gede loosu Mooticha huuccidhe!» yiinsa.

Currently Selected:

MAATEWOOSI 9: QulMax

Highlight

Copy