MAATEWOOSI 10

YESUUSI TONAA LAME ROSAANO DOORI

(Maq 3:13-19; Luq 6:12-16)

1Yesuusi tonaa lamenka rosaanosi isiwa woshshe, busha ayyaana fushshatenna addi addi dhibbanna dhiddo baala hursate roorre uyinsa. 2Tonaa lamunku dooranturi: Pheexiroosi yee su'ma fushshihu Simiooniiti, rodiisi Indiriyaasiiti, Zebidewoosi ooso Yaiqoobinna Yohaannisiiti, 3Filiphoosiiti, Bertelemewoosiiti, Toomaasiiti, Qaraxaanchu Maatewoosiiti, Ilfiyoosi beetti Yaiqoobiiti, Taadewoosiiti, 4Laalaataanchu Simiooniiti, Yesuusa sayise hirihu Asiqorootichu Yihudaati.

YESUUSI TONAA LAME ROSAANO DANCHA DUDUWO DUDUBBANNO GEDE SOYI

(Maq 6:7-13; Luq 9:1-6)

5Yesuusi kore tonaa lamenka rosaano, «Daganniwa hadhinoonte; Samaarootu katamano e'inoonte. 6Ge'reewu gede billaalle bainohuwa Israeelete manniwa hadhe. 7Hadhine, ‹Gordu Gashshooti gamba yiino› yitine kulle. 8Dhiwantinore hurse; reyitinore kayisse; taraawannoha gogu dhibba afidhinore keereense; durriisano fushshe. Calla adhitinoonnire calla uuyye. 9Qoraho culka, birra, woy saante wodhitinoonte. 10Doogo hajantinanni woyite ogoro woy lame uddano woy lame koatte woy siqqicho anga adhitinoonte; loosannohura hasiisannosire uyinannina.

11«Martinanni katamiranna qachira wosinchimma haa'ra'nera hagiidhanno mancho seekkitine buuxxe. Hakkiinni fultine hadhina geeshsha, isi mine keeshshe. 12Manni minira e'inanni woyite, ‹Keeru ledo'ne hee'ro› yiiyye. 13Mini manni keere'ne adhiro keeri'ne iillonsa; keere'ne gibbannoha ikkiro kayinni keeri'ne ki'neranni higo. 14Haa'ranno'nekkihu woy yitinoonnita macciishshannokkihu hee'riro, hakkonne mine woy katama agurtine fultinanni woyite lekka'ne buko ganga'ne. 15Halaale kuleemmo'nena, yoote barra hakko katamira iillanno qarri, Soddoomunna Gomooru mannira iillino qarrinni rooranno» yee hajaje soyi.

MOOTICHU DAARA ALBAANNI QARRUNNA DARTU DAANNO

(Maq 13:9-13; Luq 21:12-17)

16Yesuusi, «Kuneeti ani ge'reewu gede hiyyeeyyete giddora soyemmo'ne. Kunni daafira hamashshu gede busuloota, lembooli gede joogaadda ikke. 17Mannu yoote sayise aanno'ne. Xaadu minnansa giddo lichetenni gantanno'ne. Kunnira manna qorophe. 18Ane daafira yitineenna gashshaanonniwanna mootoollanniwa yoote massitanno'ne daafira, insanna dagate albaanni farcidhinannie. 19Yoote shiqishshanno'ne yannara, coyidhinannire hakka woyite kullanni'nena, ‹Ma coyi'neemmo woy ma garinni coyi'neemmo?› yitine yaaddinoonte. 20Hatte yannara coyidhinanniri ki'ne ikkitinikkinni, giddo'ne hee're coyi'rannohu gordu Anni'nehu Qullaawa Ayyaanaati.

21«Roduu rodoosi, annu beettosi reyote sayise aanno. Ooso iltinonsarira diina ikkitanno. Reyoteno sayisse uyitanno. 22Ane daafira yitineenna mannu baalu giwanno'ne; goofimarchu geeshsha kaajje uurrannohu kayinni gatanno. 23Mittu katamira qarrissu'nero, wole katama xooqqe. Halaale kuleemmo'nena, Manchi Beetti galagale higa geeshsha Israeelete katamma baala dituqqinanni.

24«Rosaanchu rosiisaancho dirooranno. Soqqamaanchu biilosi dirooranno. 25Kunni daafira, rosaanchu rosiisaanchisi gedeeha, soqqamaanchuno biilisi gedeeha ikkiro ikkannosi. Minu anna, ‹Be"eeli Zebuuli› yituro, ayiddesi hiitto hakkiinni roore yaa hoogganno!» yii.

WAAJJA HASIISSANNOHU AYETI

(Luq 12:2-7)

26Yesuusi qole, «Kunni ka'a insa waajjitinoonte. Maanxoonnihu leellikkinni digatanno. Go'linohuno xawo fulikkinni dihee'ranno. 27Kunnira, ani tunsote kuleemmo'nere, ki'ne barra xawoho coyidhe. Maccate hashaanshoonni'nere minu iima uurritine lallabbe. 28Maala agurranna lubbo shaa dandiitannokkire waajjitinoonte. Hatteentenni, lubbonna maala gaannaamete giira giddo huna dandaanno Magano waajje. 29Lame gurrae onte saantenni dihirranni? Gordu Anni'ne afikkinni kayinni mitticho gurraicho nafa uulla diubbanno. 30Umi'ne dananchi baalu nafa kiirreenna no. 31Batinye gurrae ki'ne roortinannina waajjitinoonte» yiinsa.

KIRISTOOSIRE FARCI'RA HASIISSANNO

(Luq 12:8-9)

32Yesuusi lede, «Mannu albaanni farci'rannoe baalira anino gordoho hee'rannohu Anni'ya albaanni farci'reemmosi. 33Mannu albaanni, ‹Diegennoommohe› yaannoeha baala anino gordoho hee'rannohu Anni'ya albaanni, ‹Diegennoommohe› yeemmosi» yii.

OLA IKKINNINA KEERE DIABBINO

(Luq 12:51-53; 14:26-27)

34Yesuusi lede, «Ani baattote aanira keere abbammora dayommoha lawoonke'ne. Ani ola ikkinnina keere abbammora didayommo. 35Ani labbaa beetto annu aana, meyaa beetto amate aana, beettu beetto ballote aana kayisammora dayommo. 36Kunnira, mannaho umisi mini manni diina ikkanno. 37Anenni roorse annasinna amasi baxannohu aneha ikka didandaanno. Anenni roorse labbaa beettosi woy meyaa beettosi baxannohu aneha ikka didandaanno. 38Umisi masiqala duqqe hoode'ya daannokkihu aneha ikka didandaanno. 39Lubbosi gatisi'ra hasi'rannohu baalu hu'nanno; ane daafira yee lubbosi hunannohu baalu kayinni gatisi'ranno.

DAAFURU GUMA

(Maq 9:37)

40«Ki'ne haa'rannohu ane haa'ranno. Ane haa'rannohuno, ane calla ikkummokkinni ane soyinoehano haa'ranno. 41Himanaancho, himanaanchu su'minni haa'rannohu himanaanchu ba'raa'ra adhanno. Keeraancho keeraanchu su'minni haa'rannohu keeraanchu ba'raa'ra adhanno. 42Halaale kuleemmo'nena, ane rosaancho ikkino daafira kuri shiimmaaddu giddonni mittoho qiidado waa finiinchoho wore aannohura daafurisi diba"anno» yii.

Currently Selected:

MAATEWOOSI 10: QulMax

Highlight

Copy