MAATEWOOSI 11

CUUAANCHU YOHAANNISIWIINNI SONKOONNI SOKKAASINE

(Luq 7:18-35)

1Yesuusi tonaa lamenka rosaanosi hajajihu gedensaanni, hakkiichinni kae mule noo katammara rosiisaranna kulara ha'ri. 2Cuuaanchu Yohaannisi usuru mine hee're Kiristoosi loosanni noore macciishshe, rosaanosi giddonni lame Isiwa soye, 3«Daanno yinihu ateetinso wole agadhino?» yite xa'mitanno gede assi.

4Yesuusino, «Hadhine Yohaannisira la'inoonnirenna macciishshitinoonnire kullesi. 5Illiweelootu la'anno; naafootu uurrite hadhanno; dhiigaammu keeraabbanno; macciweelootu affanno; reyitinori ka'anno; buxanete Dancha Duduwo kullanni.#Isa 35:5-6; 61:1 lai. 6Anere huluullamannokkihu ba'raa'rinoho» yee qolinsa.

7Yohaannisi sokkaasine hadhuhu gedensaanni Yesuusi Yohaannisire coyi'ranni, «Halalla ma la'inara fultini? Bubbe milli assitanno leemma la'inaraati? 8Xa maricho la'inara daggini? Biifado uddano uddi'rinoha la'inaraati? Biiffino uddano uddidhannore mootete mine anfanni. 9Mayiralla dagginoonni? Himanaancho la'inaraati? Ee kuleemmo'nena, himanaancho roorinoha la'inaraati.

10«Isi,

‹Kuneeti doogo'ya biddi assanno gede,

soqqamaancho'ya balaxe soyemmo› yine borreessinoonnisiho.#Mil 3:1 lai.

11Halaale kuleemmo'nena, baattote aana ilamino manni giddo Cuuaancho Yohaannisi roorannohu dino. Gordu Gashshootira kayinni woriidiha ikkinohu roorannosi. 12Cuuaanchu Yohaannisi yannanni kayise xaa geeshsha gordu Gashshooti fiddote aana no; jawaatte sharrantannori adhitanno. 13Himanaanote rosi baalunna Musera uyinoonni Seeri Cuuaanchu Yohaannisi geeshsha himana kultino. 14Xa insa coyidhinore adha hasidhiniro, hakku daanno yini Eeliyaasi konne Yohaannisiiti. 15Macca noohu macciishsho!

16«Xa tenne yanna manna mayinni masalseemmo? Gudumaaleho ofolte mimmito woshshitanni, 17‹Suusulle ufuunfummo'ne; ki'ne kayinni disirbitinoonni; hamaraancho kiirrummo'ne; ki'ne kayinni diwi'litinoonni› yitanno ooso labbanno. 18Cuuaanchu Yohaannisi itikkinninna woyinete xajje agikkinni dayita, ‹Kunnira giddo durriisu no!› yitino. 19Manchi Beetti itanninna aganni dayita kayinni, ‹Kuni itonna ago baxannoho; qaraxaasinetenna cubbaataammu jaalaati› yitino. Egennote halaalaanchimma gumisenni leeltanno» yiinsa.

AMMANA HOOGANSANNI RUMMOONNI KATAMMA

(Luq 10:13-15)

20Yesuusi wole katammanni roore maalale assino katamma aagintaabbinokki daafira, 21«Koraaziinira aanne'e; Beetesayidaho aanne'e; ki'ne giddo assinoonni maalale Xiroosinna Sidooni katammara assinoommero, hakkiicho hee'ranno manni xiddu uddano uddi're, buluulo aanaho giggishshi're, bi're albanni aagintaawe higinohu baino.#Isa 23:1-18; Iyu 3:4-8; Amo 1:9-10; Zak 9:2-4 lai. 22Kunnira, kuleemmo'nena yoote barra qorichu ki'nenni roore Xiroosinna Sidooni mannira shotannonsa. 23Ati gordu geeshsha gotti yootta Qifirinahoomi! Jeennaate dirratta. Ate giddo assinoonni maalale Soddoomaho assinoommero, hakko katami baikkinni techo geeshsha hee'rannohu baino.#Isa 14:13-15; Kal 19:24 lai. 24Kunnira halaale kuleemmo'nena, yoote barra qorichu ki'nenni roore Soddoomaho shotannosi» yii.

KIRISTOOSINNI AFI'NANNI FOOLIISHSHO

(Luq 10:21-22)

25Hatte yannara Yesuusi, «Gordunna baattote Mooticha Anna'ya, konne coye hayyooletenna egennaammaho golte qaaqquulleho leellishootto daafira galaxxeemmohe. 26Ee Anna'ya, konne coye assate hagiidhootto. 27Anni'ya baalanka coye uyinoe. Annu ka'a Beetto egenninohu ayino dino. Beettu ka'a Anna afinohu ayino dino. Beettu leellishinonsare agurranna Anna afinohu dino.

28«Ki'ne daafurtinoonniri, duhu ayirrino'neri baalu anewa amme! Ani fooliishshiisheemmo'ne. 29Qambara'ya qoti'nera dukke; anewiinni rosse. Ani joogahonna shaqqadoho; lubbo'nerano fooliishsho afidhinanni. 30Qambari'ya diayirranno; duhi'yano shotaho» yii.

Currently Selected:

MAATEWOOSI 11: QulMax

Highlight

Copy