MAATEWOOSI 12

FOOLIISHSHOTE BARRI DAAFIRA SHIQINSHOONNI XA'MO

(Maq 2:23-28; Luq 6:1-5)

1Hatte yannara Yesuusi Fooliishshote Barra,#12:1 Fooliishshote Barra yinihu barru kiirora qidaamete. shoyitino qamade giddoonni hige sa"anni hee'reenna, ledosi noo rosaano shoye tattayisse ittu.#Mar 23:25 lai. 2Farisootu konne coye la'e Yesuusa, «Lai, rosaanokki Fooliishshote Barra hoolloonnire assitanni no» yitu. 3Yesuusi qole, «Daawiti mannisi ledo hee're hudi'ri yannara assinore horonta dinabbabbinoonni?#1Sam 21:1-6 lai. 4Maganu Minira e"e, qeesoota callaho fajjinoonniha qullaawa tima itino; ledosi noo mannirano eenna itino.#Lew 24:9 lai. 5Qoleno qeesootu Qullaawa Mine heedhe Fooliishshote Barra lageessansa sao ikkitannonsakkita Muse Seeri giddo borreessinoonniha dinabbabbinoonni?#Kir 28:9-10 lai. 6Kuleemmo'nena, Qullaawa Mine roorannohu kuneeti konniicho no. 7Ledeno, ‹Ani kakkalo ikkikkinni maaro baxeemmo› yaannoha maxaafu qaale wodanchitinoommero, sao assinokki manni aana yoo diyitinanni.#Hos 6:6 lai. 8Manchi Beetti isinni Fooliishshote Barrira Mootichaho» yii.

YESUUSI ANGA LAANSHAAWINO MANCHO HURSI

(Maq 3:1-6; Luq 6:6-11)

9Yesuusi hakkiichinni kae xaadu minira ei. 10Hakko mittichu anga laanshaawino manchi no. Yesuusi aana coye hasidhe, «Fooliishshote Barra dhiwaminoha hursate fajjinoonnini?» yite xa'mitusi.

11Yesuusi qole, «Fooliishshote Barra, ki'ne giddo afi'rino ge'recho balete ubbeenna fushshannokkihu ayeti? 12Mannu ge'rechotenni hiikke roora hooganno! Kunni daafira Fooliishshote Barra danchare loosa fajjinoonni» yiinsa. 13Hakkunni gedensaanni Yesuusi anga laanshaawino mancho, «Angakki diriirsi!» yiisi. Isino anga diriirsi'rita, angasi hurte te'enne gedee fayyaaleette ikkitu. 14Farisootu kayinni hakkiinni fulte Yesuusa shitanno gara amaalantu.

DOORAMINOHA MAGANU SOQQAMAANCHO

15Yesuusi kayinni ganonsa afe hakkiinni wirri yii; lowo mannino hoodesi ha'ri. Isino dhiwantinore baala hursi. 16Isire ayirano kultannokki gedeno duu're dhaaminsa. 17Kuni ikkinohu himanaanchu Isayaasi widoonni kulloonni himani wo'manno gedeeti:

18«Doodhoommohu soqqamaanchi'ya konneeti.

Isi ani baxeemmohonna hagiidheemmoho.

Ayyaana'yano isi aana woreemmo;

isi gosate ane yoo kulanno.

19Isi dimoromanno woy cance dicoyi'ranno;

dooggate aana huurosi dimacciishshinanni.

20Dabbino shomboqqo nafa dihiiqqanno;

ba"ara rahino caabbichono dixoyissanno.

Halaalu qeela geeshsha cincanno.

21Gosa baala iso hexxitanno»#Isa 42:1-4 lai. yii.

YESUUSINNA BIELIZEBUULI

(Maq 3:20-30; Luq 11:14-23)

22Hakkunni gedensaanni mannu mitto durriisu amadinoha, danqichanna illiweelo mancho Yesuusiwa haa're abbi. Yesuusino hurseennasi manchu coyi'ranna la"a dandii. 23Mannu baalu dhaggeeffate, «Kuni Daawiti Beettooti ikka?» yii. 24Farisootu kayinni tenne macciishshite, «Isi durriisa fushshanni noohu, roorrichinsa Bielizebuuli wolqanniitilla» yitu.

25Yesuusi wodaninsata afe, «Isiniiwa gosooma baxxanno gashshooti uwanno. Mittu katami giddo hee'rannohu woy mittu mini mannino babbaxxannoha ikkiro hee're diafanno. 26Sheexaanu Sheexaane fushshannoha ikkiro, isi isiniiwa babbadami yaate. Kunni garinni gashshootisi hiitto ikke kaajje uurrannoyya? 27Anino durriisa fushsheemmohu durriisu roorrichi wolqanni ikkiro, ki'ne hooderi mayi wolqanni fushshitannoyya? Kunnira, hoode'neri ki'ne aana yoo yitanno. 28Ani durriisa Maganu Ayyaaninni fushsheemmoha ikkiro kayinni, Maganu Gashshooti ki'newa dayino yaate. 29Qoleno, mittu manchi balaxe wolqaataamo usurikkinni wolqaataamu minira e"e jajjasi adha dandaannoni? Usurihu gedensaanni kayinni minesi mulqanno. 30Ane ledoha ikkinokkihu baalu giwannoe. Ane ledo gamba assi'rannokkihu baalu fince hu'nanno. 31Kunni daafira, mannaho loosanno cubbonna xonanno xono baala agurranni. Qullaawa Ayyaana xonino baalira kayinni saosi diagurantannosi yeemmo'ne. 32Manchi Beetti aana xonote qaale coyi'ranno baalira saosi agurrannisi. Qullaawa Ayyaana xonino baalira kayinni tenne alamerano ikko daggannotera saosi diagurrannisi» yiinsa.

DANCHA HAQQICHO GUMISENNI ANFANNI

(Luq 6:43-45)

33Yesuusi lede, «Haqqicho baala gumisenni anfanni daafira, haqqicho dancha assidhe; gumiseno dancha ikkanno'ne. Haqqicho busha ikkituro kayinni, gumiseno busha ikkanno. 34Ki'ne hamashshu ooso, bushuulle ikkitine heedhine dancha coye coyi'ra hiitto dandiitinanni? Mannu wodanisira wo'me gatinoha coyi'ranno. 35Danchu manchi danchu miinjisi giddonni dancha coye fushshanno; bushu manchi bushu miinjisi giddonni busha coye fushshanno. 36Halaale kuleemmo'nena, mannu sammi yee hasi'ri garinni coyi'rannohura mittu mittunku qaalira yoote barra xa'mamanno. 37Coyi'rootto coyinni kainohunni keeraawatto; coyi'rootto coyinni kainohunni xa'mamatto» yii.

MAALALE LEELLISHATE SHIQQINO XA'MO

(Maq 8:11-12; Luq 11:29-32)

38Hatte yannara mitu mitu Seeru rosiisaanonna Farisootu Yesuusa, «Rosiisaancho, ati maalale assitanna la'nammora hasi'neemmo!» yitusi.

39Yesuusi kayinni, «Bushanna foora ilama maalale la"a hasidhanno. Ikkollana himanaanchu Yoonaasi maalale ka'a wole maalale dileellinshanninsa. 40Yoonaasi mittu jawu qulxu'michi godowi giddo sase barranna sase hashsha keeshshinte gede, Manchi Beettino waammate giddo sase barranna sase hashsha keeshshanno.#Yon 1:17 lai. 41Nennewe Katami manni Yoote Barra tenne yanna ilama ledo kae insa aana yoo yaanno. Nennewe manni Yoonaasi kuli yannara, yiinore macciishshe cubbo aagintaawe higino. Xa kayinni kune Yoonaasi rooru konne no. 42Saaba Mootitte Selemooni hayyo macciishshitara gobbate qaccenni ka'e daggino daafira, yoote barra tenne ilama ledo ka'e insa aana yoo yitanno. Xa kayinni kune Selemooni rooru konne no» yiinsa.

BUSHU AYYAANI MANNU GIDDORA GALAGALE DAANNO GARA

(Luq 11:24-26)

43Yesuusi lede, «Bushu Ayyaani mannu giddonni fulanno woyite, Fooliishshi'rannowa hasi'ranni wayi nookkiwa moola gobbara raataawanno. Hasi're hoogiro kayinni, 44‹Agure fuloommo minira galagale higeemmo› yaanno. Galagale higanno woyite, mine noori nookkiha fiine biifinseenna nooha afanno. 45Hakkunni gedensaanni bushu ayyaani ha're, isinni roore bushuulle wole lamala durriisa adhe daanno. Insano manchu giddora e'e ledosi heedhanno. Hakko manchira heeshsho albinni roore bushshannosi. Tenne busha ilamarano togoo coyi iillanno» yii.

YESUUSI AMANNA RODUUWASI

(Maq 3:31-35; Luq 8:19-21)

46Yesuusi mannaho coyi'ranni hee'reenna, Amasinna Roduuwisi hasaawissasira hasidhe dagge gobbaanni uurritu. 47[Hakko noo manni giddonni mittichu Yesuusa, «Kuneeti Amakkinna roduuwikki hasaawissahera hasidhe dagge gobbaanni uurrite no» yiisi.]#12:47 47ki kiiro mite mite angatenni borreessinoonni borro keeshshitinote giddo dino. 48Isi qole, «Ama'ya ayiti? Roduuwi'ya ayeooti?» yiinsa. 49Hakkunni gedensaanni rosaanosi widira malaatisanni, «Ama'yanna roduuwi'ya kuriuuti! 50Gordoho hee'rannohu Anni'ya hedinore wonshannohu baalu anere labbaa rodoo'yaati, meyaa rodoo'yaatinna ama'yaati» yiinsa.

Currently Selected:

MAATEWOOSI 12: QulMax

Highlight

Copy