MAATEWOOSI 13

WIXA WIXI'RANNO MANCHI MASALO

(Maq 4:1-9; Luq 8:4-8)

1Yesuusi hakko barranni mininni fule ha're baaru gama ofolli. 2Lowo manni isiwa daye gamba yiita, isino baaru giddo noo yowolo aana ofolli. Mannu baalunku hakkiicho baaru gama uurre no. 3Hakkunni gedensaanni masalsanni lowo coye kulanninsa, «Mittu manchi wixa wixi'rara fuli. 4Wixa wixi'ranni hee'reenna, mitu mitu gumi doogote gama uwi; ceano dagge xinqite ittu. 5Wolu gumi bushshu qawaaxxisinokkiwa carete aana uwi. Lowo bushshi nookkita giddo tula ikkitino daafira mulenni mu'ri. 6Arrishsho fultuta kayinni qoori; rumushsho afi'rinokki daafira mooli. 7Wolu qole utu giddo uwi. Utu lophe fuge amadisi. 8Wolu gumi dancha shaqqado baattora uwe mu'ri. Lophe dancha guma laali; mittu 100, mittu 60, mittu 30 laali. 9Macca noohu macciishsho!» yiinsa.

YESUUSI LAWISHSHUNNI MAYIRA COYI'RI

(Maq 4:10-12; Luq 8:9-10)

10Hakkunni gedensaanni rosaanosi Yesuusiwa shiqqe, «Mannaho masalsitanni coyi'rattohu mayiraati?» yite xa'mitusi.

11Isi qole, «Ki'nera gordu gashshooti maana afate hayyo uyinoonni'ne. Insara kayinni diuyinoonninsa. 12Noosihura lende uyinannisi; noosikkihura kayinni hakkonnenni haa'ne hoollanni» yii. 13Ani masalsanni kuleemmonsahu, la'anni heedhe buuxxannokkire, macciishshitanni heedhe affannokkire, woy wodana assitannokkire ikkitinohuraati. 14Kunnira himanaanchu Isayaasi,

«Macciishshate woyite macciishshitinanni;

kayinnilla wodana diassitinanni.

La"ano la'inanni; ikkollana dibuuxxinanni.

15Kunni manni wodani dillaawino;

maccansano beebbino;

illensano tunsitino.

Hatto ikka hoogoommero, illensanni la'e,

maccansanni macciishshite,

wodaninsanni wodanchite,

anewa higgeenna hurseemmonsahu baino»

yee borreessino himani aanansa wo'manno.#Isa 6:9-10 lai. 16Ille'ne la'annohuranna macca'ne affanno daafira ki'ne ba'raadhinoonnireeti. 17Halaale kuleemmo'nena, lowo himanaanonna keeraano ki'ne la'inoonnire la'ara halchite hooggino; macciishshitinoonnireno macciishshate halchite hooggino.

WIXA WIXANNO MANCHI LAWISHSHI TIRO

(Maq 4:13-20; Luq 8:11-15)

18Yesuusi, «Xa ki'ne wixa wixi manchi masalo maatiro macciishshe. 19Doogote gama uwi wixi masalo: Maganu gashshooti qaale macciishshe wodana assannokki manchooti. Hakkawoyintenni Sheexaanu daye wodanisi giddo winxoonni qaale xinqe adhanno. 20Carete aana uwino wixi masalo: qaale macciishshe hakkawoyintenni hagiidhe adhanno manchooti. 21Ikkollana, yannate geeshshaati ikkinnina rumushsho diassi'rino. Maganu qaali daafira qarrunna xiiwama iillitannosi woyite hakkawoyintenni gufi're uwanno. 22Utu mereero uwino wixi masalo: Maganu qaale yannate geeshshira calla macciishshanno manchooti. Tenne gobba hedonna jirote baxilli wodanisi giddora e"e, macciishshino qaale beeshshe amadanno daafira gumiweele gatanno. 23Shaqqado baattora uwino wixi masalo kayinni, qaale macciishshite wodanchitannore kulanno. Kunni garinni mittu 100, mittu 60, mittu 30 guma laalanno» yii.

SANTAATU LAWISHSHA

24Yesuusi lede wole lawishsha kulanninsa, «Gordu Gashshooti gatesi dancha wixa wixi'rino mancho lawanno. 25Ikkollana mannu baalu goxihu gedensaanni baarigaaru daye qamadete wixi giddo santaata wixe ha'ri. 26Qamade lophite guma dartu yannara santaatuno leelli. 27Gatu anni loosaasine isiwa marte, ‹Mooticha, loosikki giddo didancha wixa wixi'ritto? Santaatu maminni dayiyya› yitu.

28«Isi qole, ‹Konne assinohu baarigaaraho› yiinsa. Loosaasine, ‹Marre santaata giddonni xinqine hoollammora hasi'rattoni?› yite xa'mitusi.

29«Isi kayinni, ‹Dee'ni, santaata xinqitinanni qamadeno ledo buqqissinannina agurre. 30Gide murranni yanna dagga geeshsha qamadeno santaatuno mitteenni lophona; murranni yannara murtannori balaxxe santaata giirranni gede xinqite qawo qawo assite usurtanno; qamade kayinni gamba assite qaldi'yara wortanno gede kuleemmo› yiino» yee qolinsa.

SHIIMU GUMINNA GAMAANCHU LAWISHSHA

(Maq 4:30-32; Luq 13:18-19)

31Yesuusi wole lawishshano, «Gordu Gashshooti mittu manchi gatesi masse wixi'rinoha shiima guma lawanno. 32Hakku wixi baalunkunni ajinoho. Lophihu gedensaanni kayinni, wole mu'ro baalanta roore haqqa ikkanno. Cea dagge sinnasi aana mine mi'nite heedhanno» yii.

33Yesuusi xaano masalsanni, «Gordu Gashshooti mitte mancho lowo waasira karsiissinoha shiima gamaancho lawanno. Gamaanchuno waasa baala hoqisi» yiinsa.

YESUUSI LAWISHSHUNNI MAYIRA ROSIISI

(Maq 4:33-34)

34Yesuusi konne baala coye mannaho masalsanni coyi'rino; lawishshiweello mittoreno dicoyi'rinonsa. 35Hatto assinohu himanaanchu,

«Coye'ya masalsanni xawiseemmo;

alame kalaqantunkunni kayise go'linore coyi'reemmo»

yee borreessinori wo'manno gedeeti.#Far 78:2 lai.

YESUUSI SANTAATU LAWISHSHA XAWISI

36Hakkunni gedensaanni Yesuusi manna ha'rise kae minira ei. Rosaanosino isiwa shiqqe, «Loosu giddo santaati masalo maatiro xawisinke» yitu.

37Yesuusi qole, «Dancha wixa wixi'rinohu Manchi Beettooti. 38Gatu tenne alameeti; danchu wixi Maganu Gashshooti oosooti; santaatu Sheexaanu oosooti. 39Santaata wixinohu baarigaaru Sheexaaneho. Gide murrannihu alamete goofimarchiraati; murtannori Maganu sokkaasineeti. 40Santaata gamba assine giirranninte gede, alamete goofimarchirano hatto assinanni. 41Hatte yannara Manchi Beetti sokkaasinesi soyanno; insano manna cubbu giddora eanno gede assitannorenna bunshe loossannore baala Maganu Gashshooti giddonni xinqite fushshitanno. 42Goolu giira giddo tungeenna hakkiicho wi'litanni suumensa ittanno. 43Keeraano kayinni Anninsa Gashshootira arrishshote gede xabbanno. Macca noohu macciishsho!» yiinsa.

MAANXOONNI JIRO LAWISHSHA

44Yesuusi, «Gordu Gashshooti, loosu giddo maanxoonni jiro lawanno. Mittu manchi tenne jiro afi're kae wirri asse maaxi. Lowo geeshsha hagiidhino daafira ha're noosire baala hire mare hakkonne bayicho hidhi» yii.

AYIRRADU UDUUNNICHI LAWISHSHA

45Yesuusi xaano qole, «Gordu Gashshooti dancha ayirrado uduunnicho hidha hasi'rino daddalaancho lawanno. 46Daddalaanchu lowo geeshsha ayirrado uduunnicho afi're, ha're noosire baala hire hakkonne ayirrado uduunnicho hidhi» yii.

WOSHSHAADOTE LAWISHSHA

47Yesuusi lede, «Gordu Gashshooti baaru giddo tungoonni woshshaado lawanno. Woshshaado addi addi dani qulxu'me baala gamba assite amaddanno. 48Woshshaadote wo'mihu gedensaanni woshshaaddannori qacce fushshite dancha dancha doorte uduunnichu aana wortanno. Busha busha kayinni hunte agurtanno. 49Alamete goofimarchino hattooha ikkanno. Sokkaasine dagge cubbaataamma keeraanotewiinni baddanno. 50Cubbaataamma goolu giira giddo tuggeenna hakkiicho wi'litanni suumensa ittanno» yii.

HAARONNA KEESHSHINO MIINJA

51Yesuusi, «Konne baalanka coye wodanchitini?» yiinsa.

Insano, «Ee» yitu.

52«Xa Gordu Gashshootire rosiinsoonnihu seeru rosiisaanchi baalu, miinju mininni haaronna akkala jajja haa're fushshanno mancho lawanno» yee qolinsa.

NAAZIRETETE KATAMI MANNI YESUUSA GIWI

(Maq 6:1-6; Luq 4:16-30)

53Yesuusi tenne masalo baala kule kaihu gedensaanni hakkiichinni kae ha'ri. 54Gobbasi Naaziretete Katama daye xaadu minna giddo manna rosiisi. Macciishshituri baalu dhaggeeffattanni, «Kuni manchi tenne hayyonna tenne maalale maminni abbi? 55Isi haqqa bocannohu beetto di"ikkino? Amasi Maariyaami di"ikkitino? Qoleno Yaiqoobi, Yooseefi, Simiooninna Yihudi rodoo di"ikkino? 56Seennu roduuwisi baalu kawiicho dininke ledo no? Isi konne coye baala maminni abbiyya?» yitu. 57Kunninni kainohunni iso adha gibbu. Yesuusi kayinni, «Himanaanchu gobbasiranna ayiddisi giddolla diayirranno» yiinsa. 58Ammana gibbino daafira hakkiicho lowo maalale dileellishino.

Currently Selected:

MAATEWOOSI 13: QulMax

Highlight

Copy