MAATEWOOSI 14

CUUAANCHU YOHAANNISI REYI

(Maq 6:14-29; Luq 9:7-9)

1Hatte yannara Galiilu gobba gashshaanchi Heeroodisi Yesuusi duduwo macciishshi. 2Ledosi gashshaanora, «Kuni Cuuaanchu Yohaannisiiti; isi reyotenni kaino; tini maalale isi widoonni loosantanni noohu kunniraati» yiinsa.

3Heeroodisi rodiisi Filiphoosi galte Heeroodiyaada adhino daafira, isenni kainohunni Yohaannisi usursiisino. 4Yohaannisi Heeroodisira, «Rodiikki galte adhattokki gede Seeru hoolannohe» yiinosi. 5Kunni daafira Heeroodisi Yohaannisi shaara hasi'ri. Ikkollana Ayihude Yohaannisi himanaanchu gede assite la'annosi daafira insa waajji.

6Heeroodisi ilamino barra ayirrinsanna Heeroodiyaada beetto dagge jilu mereero sirbitanni Heeroodisi hagiirsiissusi. 7Kunnira Heeroodisi, «Hasi'rittare baala xa'mi'ri eemmohena!» yee xaarise.

8Iseno amase amaaltinose garinni, «Cuuaanchu Yohaannisi umo saffeho worte xaanni uue» yitu.

9Moote kunni coyira dadilli; ikkollana xaarino xaaronna ledosi jilaho ofollino wosini saalira yee, Yohaannisi umo murre uyinannise gede hajaji. 10Kunnira usuru minira manna soye Yohaannisi goowa mursiisi. 11Murroonni umono saffeho worre abbine beettote uyini. Beettono massite amasera uyitu. 12Yohaannisi rosaano dagge reeshshasi haadhe massite madaartu. Konne coyeno marte Yesuusira kultu.

YESUUSI ONTE KUME MANNA ITISE DUUSHSHI

(Maq 6:30-44; Luq 9:10-17; Yoh 6:1-14)

13Yesuusi Yohaannisi reyo macciishshe, yowolote ofolle mannu nookkiwa hasi're callisi ha'ri. Mannuno konne coye macciishshe katammatenni fule lekkatenni faana gananni ha'ri. 14Yesuusi yowolote aaninni dirri woyite lowo manna lae mararinsa; dhiwamaasinensano hursi.

15Yanna hashshituta rosaano Yesuusiwa shiqqi yite, «Kuni hee'noommo dargi halallaati; yannano hawarritino. Kunni daafira mannu muli qacha ha're itannore hidhona ha'risi» yitu.

16Yesuusi kayinni, «Ha'ra dihasiissannonsana, ittannore ki'ne uuyyensa» yii.

17Insa qolte, «Ninkera noonkehu onte timaatinna lame qulxu'me callaho» yitu.

18Yesuusino, «Hakkonnenni anewa abbe!» yii. 19Hakkunni gedensaanni manna hayissote aana ofollanno gede hajaji. Ontenka timanna lamenka qulxu'me haa're gordo hige lae galatu huuccatto asse, timma hiiqqaqqe rosaanosira uyi; insano mannaho beekku. 20Wo'munku itte duubbu; gatino hambaa rosaanosi tonaa lame soro wonshite kayissu. 21Hattenne sagale itinohu meentonna ooso kiirrikkinni onte kume manna ikkanno.

YESUUSI BAARU AANAANNI HA'RI

(Maq 6:45-52; Yoh 6:15-21)

22Hakkunni gedensaanni Yesuusi rosaanosi, «Ani manna ha'risammo geeshsha yowolote ofoltine balaxxine widira fulle!» yee hajajinsa. 23Manna ha'risihu gedensaanni, huuccatto assi'rara callisi ilaalu iimira fuli. Hawarro yannara Yesuusi hakko callisi no. 24Hatte yannara yowolo baaru mereero heedheenna, albiidinni daggino bubbe gantanna dambalu yowolo ka'anna kawa daassi. 25Soodimaroho Yesuusi baaru aanaanni ha'ranni rosaanosiwa dayi. 26Rosaanosi baaru aana ha'ranna affe lowo geeshsha masse, «Tini ekerate» yite waajjite raartu.

27Yesuusi hakkawoyintenni, «Galfatte! Aneetina waajjitinoonte!» yiinsa.

28Hatte yannara Pheexiroosi, «Mooticha'ya, ateetiro baaru aana ha'ranni atewa dayemmo gede hajajie!» yii.

29Yesuusino, «Amo!» yiisi. Pheexiroosino yowolote aaninni dirre Yesuusiwa iillara baaru aana qaafanni ha'ri. 30Ikkollana bubbete wolqa lae waajji; baaru itasira rahita, «Mooticha'ya gatisie!» yee raari.

31Yesuusi hakkawoyintenni anga diriirse amadesi, «Ati amma'na xe'inohehu, mayira huluullamitto?» yiisi. 32Lamunku yowolote giddora e'uta bubbe uurritu. 33Yowolote giddo noori baalu, «Halaalinta ati Maganu Beettooti!» yite Yesuusira kumbuultusi.

YESUUSI GENSEREEXI DHIWANTINORE HURSI

(Maq 6:53-56)

34Yesuusinna rosaanosi baara fulte Gensereexi yinanni gobba iillitu. 35Hatte gobbara hee'ranno manni Yesuusa ikkinota afe, qamatte baala manna soye dhiwantinore baala isiwa abbisiisi. 36Dhiwantinori uddanosi qacce calla kisate huuccidhusi; kissuri baalu dhibbinsanni hurtu.

Currently Selected:

MAATEWOOSI 14: QulMax

Highlight

Copy