MAATEWOOSI 6

QARRANTINORE KAA'LA

1Yesuusi lede coyi'ranni, «‹Mannu laonke› yitine dancha looso mannu albaanni assa qorophe! Hatto assitiniro Gordu Anni'newiinni mittoreno diafidhinanni.

2«Kunnira qarrantinorira uyitinanni woyite mannu la"ansara yite xaadu minenna dooggate uyitanno lawisiisaano gede leellamate yitine assitinoonte. Halaale kuleemmo'nena, hatto assitannori loosinsa guma adhite ka'ino. 3Ati kayinni qarrantinorira aatto woyite, qiniiticho anganni uyitanna guracho angakki affoonke. 4Kunni daafira aattore maaxxe uyi; maanxe assinoonniha la"annohu Annikki loosikki guma aannohe» yii.

HUUCCATTOTE DAAFIRA ROSIINSOONNI ROSO

(Luq 11:2-4)

5Yesuusi lede, «Huuccidhinanni woyite, leellamate yite huuccidhannori gede ikkitinoonte. Insa mannu la"ansara yite xaadu minenna dooggate maddera uurrite huucci'ra baxxanno. Halaale kuleemmo'nena, insa balaxxe loosinsa guma adhite ka'ino. 6Ati kayinni huucci'ratto woyite minikkira e'e, cufanakki cufidhe go'le nooha Annakki huucci'ri. Maanxe loonsoonniha la"annohu Annikki loosikki guma aannohe.

7«Ki'ne huuccidhinanni woyite dagate gede yitinoonnita yitinanni huuccatto seedissinoonte. Insara huuccatto seedisatenni macciishshinanniha lawannonsa.#1Mot 18:25-29 lai. 8Ki'nera kayinni Anni'ne hasiisanno'nere huuccidhinikkinni balaxe afino daafira insa gede ikkitinoonte. 9Kunnira ki'ne,

‹Annanke Gordoho hee'rattohu,

su'mikki qullaawa ikko.

10Gashshootikki dayo,

hedoottori gordoho ikkinonte gede,

baattote aanano ikko.

11Techo barrita sagalenke uyinke.

12Wolootu sao agurreemmonte gede,

ninke saono agurinke.

13Bushu coyiwiinni gatisinke ikkinnina,

jifammeemmo gede assitootinke.

[Gashshootu, wolqanna ayirrinyu hegerera atehona.

Hamii'ni!›] yitine huuccidhe.#6:13Qoqqowu giddo noohu mite mite angatenni borreessinoonnitera keeshshitino borro giddo dino.

14Mannu sao agurtiniro, gordu Anni'ne ki'ne saono aguranno'ne. 15Mannu sao agura hoogginiro kayinni, Anni'ne ki'ne saono diaguranno'ne» yii.

QATUMME HUUCCI'RA

16Yesuusi, «Qatuntine huuccidhinanni woyite, qatunte huucci'ransa mannu afansara yite bullitanno lawisiisaano gede alba bullitinoonte. Halaale kuleemmo'nena, insa loosinsa guma adhite ka'ino. 17Ati kayinni qatunte huucci'ratto woyite, alba hayishshi'ri; umo buudhi. 18Kunni garinni, qatumakki go'le noohu Annikki afanno ikkinnina mannu diafanno. Go'line loonsoonnire afannohu Annikki loosikki guma aannohe» yii.

JIRO GORDOHO DUU'NE

(Luq 12:33-34)

19Yesuusi, «Daanillu qasannotera, bile ittannoteranna mooraanchu ume adhannotera tenne baattora jiro duu'nitinoonte. 20Jiro'ne daanillunna bile kissannokkiwa, mooraanono unte e'e moora dandiitannokkiwa gordoho duu'ne. 21Jiro'ne noowa wodani'neno hakkiicho hee'ranno» yii.

MANNIMMATE CAABBICHO

(Luq 11:34-36)

22Yesuusi qole, «Mannimmate caabbichi illete; kunnira ille'ne keere ikkituro, mannimma'ne baala xawaabba ikkitanno. 23Ille'ne fayya hoogguro kayinni, mannimma'ne baala tunsitanno. Kunnira, giddokki noo caabbichi tunsiro, hiikke albinni roore tunsa hooganno» yii.

HEESHSHOTE QARRAMA DIHASIISSANNO

(Luq 16:13; 12:22-34)

24«Mittu manchi lamu Mootichira soqqama didandaanno. Woy mitto giwe mitto baxanno; woy mitto ayirrise mitto mishanno. Hattonni mittu manchi Maganohonna woxeho borojjicho ikka didandaanno.

25«Kunnira, ‹Ma inteemmo? Ma angeemmo? Ma uddi'neemmo?› yitine heeshsho'nera yaaddinoonte yeemmo'ne. Sagale lubbo, uddano mannimma diroortanno? 26Hanni iima buubbanno cea la'e; insa diwixidhanno; dimixxitanno; gootaraho diwodhitanno. Ikkollana gordu Anni'ne itisannonsa. Ki'ne cea lowo geeshsha diroortinanni? 27Ki'ne giddo yaade hojjasi aana#6:27 hojjasi aana yaannoha, «Dirisi aana» yaa dandiinanni. mitte cigile lexxa dandaannohu nooni?#Far 39:5-7 lai.

28«Uddanoteno mayira yaaddinanni? Dubbu daraaro ikkite lophitanno gara la'e. Insa loossanni didaafurtanno; disuqqitanno. 29Ani yeemmo'neti kayinni, Selemooni nafa kunni baalu ayirrinyisinni daraarote giddonni mittu daraarchi gede diuddi'rino.#1Mot 10:4-7; 2Dud 9:3-6 lai. 30Ki'ne amma'na xe'ino'neri, Maganu techo leelte ga'a giirate tugantanno hayissora togo asse uddisiisannoha ikkiro, ki'ne hiitto roorse diuddisiisanno'ne? 31Kunnira, ‹Ma inteemmo? Ma angeemmo? Ma uddi'neemmo?› yitine yaaddinoonte. 32Konne afi'rate qarrantannori dagate. Ki'nera kuni baalu hasiisannota gordu Anni'ne egennino. 33Ki'ne kayinni balaxxine Maganu Gashshootenna keeraanchimmasi hasidhe; hakkuyi ka'ire baala lendanni'nena. 34Ga'a umisira yaadannona, ga'ara yaaddinoonte. Mittu mittunku barrira umisi qarri ikkannosi» yii.

Currently Selected:

MAATEWOOSI 6: QulMax

Highlight

Copy