MAATEWOOSI 5

YESUUSI ILAALU IIMA HEE'RE ROSIISINO COYE

(Mat 5:1-7,29)

1Yesuusi hoodesi daanni nooha lowo manna afe, ilaalu iimira fule ofolli. Rosaanosino isiwa martu. 2Isino,

HALAALAANCHO HAGIIRRE

(Luq 6:20-23)

3«Ayyaanunni buxxinori ba'raadhinoreeti;

gordu gashshooti insahona.

4Yaaddannori ba'raadhinoreeti;

jawaante afidhannona.

5Jooguullu ba'raadhinoreeti;

baattono ragidhannona.

6Keeraanchimmate daafira hudidhannorinna goodhannori ba'raadhinoreeti;

kassino yitannona.

7Wolu sao agurtannori ba'raadhinoreeti;

insa saono agurranninsana.

8Xalalu wodaniri ba'raadhinoreeti;

Magano la'annona.

9Araarsitannori ba'raadhinoreeti;

Maganu oosooti yinanninsana.

10Keeraanchimmate daafira xiiwantannori ba'raadhinoreeti;

gordu gashshooti insahona.

11Ane daafira mannu xoni'ne'ro, xiiwi'neronna kaphunni su'ma huni'nero tashshi yoo'ne. 12Gordu gashshootira lowo waaga afidhinanni daafira tashshi yoo'ne; hagiidhe. Ki'nera albiidi himanaanono hatto xiiwamanna qarra iillishshinonsa»#2Dud 36:16 lai. yaanni rosiisa hanafi.

MAXINETENNA CAABBICHU LAWISHSHA

(Maq 9:50; Luq 14:34-35)

13Yesuusi qole, «Ki'ne tenne gobbara mannaho maxinete; maxine badduro galagalte hiitto ikkite coomma dandiitanno? Gobba fushshine tungeenna mannu kakkadannota agurranna mitturirano di"ikkitanno.

14«Ki'ne alamete caabbichooti; ilaalu iima noo katami go'la didandaanno. 15Caabbicho xawinse ka'ne mine wo'mankawa xawanno gede tuuqu aana usurranni ikkinnina aanaho gawate gombisannohu dino. 16Mannu dancha looso'ne lae gordu Anna'ne galatanno gede, caabbichi'ne mannu albaanni xawo» yii.

MUSE SEERA

17Yesuusi lede, «Muse Seeranna himanaanote roso hunammora dayommoha lawoonke'ne. Ani wonshammora ikkinnina diigammora didayommo. 18Halaale kuleemmo'ne; gordunna baatto sa'a geeshsha seeru baalu wo'manno ikkinnina, Seeru giddonni shiima fidale woy bicamme diba'anno. 19Tenne hajajo giddonni mitte hooffayidita diigannohunna woleno hunanno gede rosiisannohu baalu, gordu Gashshootira hooffayidiha ikkanno. Hajajo baalanta wonshannohunna wolu mannino wonshanno gede rosiisannohu kayinni, gordu Gashshootira roore ikkanno. 20Kunnira, keeraanchimma'ne Seeru rosiisaanonna Farisootu keeraanchimmawiinni roora hoogguro, gordu Gashshoote horonta e'inannikkita kuleemmo'ne.

MANNA SHITINOONTE

21«Albi mannira, ‹Shitinoonte; manna shaannohura yoo yinanni›#Mar 20:13; 5:17; 16:18. yinoonnita macciishshitinoonni. 22Ani yeemmo'neti kayinni: rodiisira hanqanno baalira yoo yinanni. Qoleno rodoosi, ‹Tidhoottori nookkihu› yee xonannohu baalu songote albira shiqeenna aanasi yoo yinanni. ‹Mullu gowwi› yee xonannohano gaannaamete giira agartannosi. 23Fushshaatekki Maganoho shiqishi'ratto yannara giwamoottoha rodookki qaagittoro, 24fushshaatekki hakko worte agurte hadhe balaxxe giwamootto rodiikki ledo araarami. Hatto assittohu gedensaanni dagge fushshaatekki Maganoho shiqishi'ri.

25«Giwamootto manchi yekkeereennahe isi ledo yoote minira ha'ratto woyite, doogote aana heedhe rakke araarami. Araarama hoogittoro kayinni, yekkeerinohehu yoo yaannohuwa masseennahe, yoo yaannohu qole usurannohura sayise eennahe usuru mine tugamatto. 26Halaale kuleemmohena, yinoonnihere mitte saante nafa gattukkinni baaxxite gudittokkinni hakkiichinni difulatto» yii.

FOORTINOONTE

27Yesuusi qole, «‹Foortinoonte› yinoonnita macciishshitinoonni. 28Ani kayinni, ‹Meyata lae yorinoha baala wodanisinni ise ledo foorinohu gede assine kiirranni› yeemmo'ne. 29Kunnira qiniiticho illekki cubboho massitannoheha ikkiro fushshite huni. Mannimmakki baala gaannaamete giirara tugantantenni mannimmakki giddonni mitte ille ba'uro woyyate. 30Qiniiticho angakki cubboho eessitannoheha ikkiro murte huni. Mannimmakki baala gaannaamete giirara tugantantenni mannimmakki giddonni mitte anga hoogittoro woyyate» yiinsa.

GALTE AGURTINOONTE

(Mat 19:9; Maq 10:11-12; Luq 16:18)

31Yesuusi qole, «‹Galtesi mininni fushshe ha'risannohu ha'risate woraqata oose› yinoonni. 32Ani kayinni, ‹Foorretenni kainohunni ikkiro ikkinnina, hakkuyi ka'a galtesi fushshe ha'risannohu baalu ise foortanno gede assanno. Galtese agurte hadhinota adhannohu baaluno foorinoho› yeemmo'ne» yii.

XAARTINOONTE

33Yesuusi lede, «Albi mannira, ‹Kaphu xano xa'nitinoonte; ikkollana Mootichaho xa'nitinoonni xano tidhe›#Lew 19:12; Kir 30:2 lai. yinoonnita macciishshitinoonni. 34Ani kayinni, ‹Horontanni xaartinoonte;#Yai 5:12; Isa 66:1; Mat 23:22 lai. Gordu Maganoho ayirrinyu barcima ikkino daafira, gordunnino xaartinoonte. 35Baattono Maganu lekkasinni kaxxinotena baattotennino xaartinoonte. Yerusaalame jawu Moote katamaatina Yerusaalametennino xaartinoonte. 36Umikki danancho mitto nafa waajjo woy kolishsho assa didandaattona umikkinni xaartooti. 37Kunnira, coyidhinanniri addahoro «Ee», kaphohoro «Dee'ni» yiiyye. Hakkuyi ka'i coyi bushuwiinni daannoho› yeemmo'ne» yiinsa.

BADO QO'LITINOONTE

(Luq 6:29-30)

38Yesuusi qole, «‹Ille huninohura illesi hunnona; hinko hiiqqinohura hinkosi hiiqqinona›#Ful 21:24; Lew 24:20; Mar 19:21 lai. yinoonnita macciishshitinoonni. 39Ani kayinni, ‹Bunshe assanno'ne manchira bado qo'litinoonte. Qiniiticho baqqaalla qawaadannohehura guracho baqqaalla qolisi. 40Mittu manchi shamisekki adhara yee yoote minira massihero, kootekkino adhona agurisi. 41Qoleno mittu manchi, «Kai ane ledo mito geeshsha ha'nona» yee qarrisihero, ati kayinni ero ledde ledosi ha'ri. 42Huucci'rannohehura uyi; liqoo xa'mi'rannohehura liqiissi› yeemmo'ne» yii.#Maq 15:8; Law 24:29 lai.

BAARIGAARAKKI BAXI

(Luq 6:27-36)

43Yesuusi lede, «‹Jaalakki baxi; baarigaarakki giwi›#Lew 19:18. yinoonnita macciishshitinoonni. 44Ani kayinni, ‹Baarigaara'ne baxxe; xiibbanno'nerira Magano huuccensa. 45Hatto assitiniro gordoho hee'ranno Anni'nera oososi ikkitinanni. Isi bushuullehonna danchuulleho arrishsho fushshanno; keeraanotenna cubbaataammaho xeena gananno. 46Baxxanno'nere calla baxxine ma afidhinanni? Qaraxaasine nafa hatto diassitanno? 47Roduuwa'ne calla keere haadhinanniha ikkiro ma roorsitiniyya? Daga nafa hatto diassitanno? 48Kunnira, gordu Anni'ne guuta ikkinohura, ki'neno guuta manna ikke!› yeemmo'ne» yii.

Currently Selected:

MAATEWOOSI 5: QulMax

Highlight

Copy