LUQAASI 20

YESUUSI ROORRE

(Mat 21:23-27; Maq 11:27-33)

1Mitto barra Yesuusi Qullaawa Mine rosiisannanna Maganu qaale kulanna Qeesootu roorrootinna Seeru rosiisaano cimeeyyete ledo mitteenni Isiwa ka'e dagge, 2«Hanni kulinke, konne baala assate roorre maminni afi'ritto? Tenne roorre ayi uyihe?» yite xa'mitusi.

3Yesuusi qole, «Anino mitte xa'mo xa'meemmo'nena qolle"e: 4Yohaannisi cuua Maganuwiinniitinso mannuwiinniiti?» yee xa'minsa.

5Insa insanaawa, «‹Maganuwiinniiti› yinummoro, ‹Ammana mayira gibbiniyya?› yaannonke. 6‹Mannuwiinniiti› yinummoro, mannu baalu Yohaannisi himana ammananno daafira, kinnatenni awwaalannonke» yitu. 7Kunnira, «Hiikkiinniitiro dianfoommo» yitu. 8Yesuusi qole, «Anino mayi roorrenni loosanni noommoro dikuleemmo'ne» yiinsa.

WOYINETE HAQQE KAASANNOHU LAWISHSHA

(Mat 21:33-46; Maq 12:1-12)

9Hakkunni gedensaanni Yesuusi mannaho, «Mittu manchi woyinete haqqe kaasi'ri; loossannorira kiraho ee lowo yanna keeshshara fule wole gobba ha'ri. 10Gamba assinanni yanna dagguta, iillannosi beehacho abbannosi gede soqqamaanchosi fushshe soqqi; loossannori kayinni soqqamaanchosi gante mulla anganni qoltu. 11Xaano wole soqqamaancho fushshe soqqi. Loossannori hakkonneno gante shollishshe mulla anganni qoltu. 12Xaano lede sayikki soqqamaancho fushshe soqqi. Hakkonneno gante madiissite fushshite tuggu. 13Woyinete anni, ‹Hanni ma asso? Xa baxeemmoha mitto beetto'ya soyemmo; iso ayirrisa dihoogganno› yii. 14Loossannori kayinni beetto affuti mimmitoho, ‹Ragi'rannohu konneeti; ragge ninkera ikkitanno gede amme shine hunnona!› yitu. 15Kunnira woyinete gobbaanni fushshite shite huntu. Woyinete anni konne manna hiissannonsaha lawanno'ne? 16Woyinete anninni kae daanno; kore loossannore shee gudanno; woyinesino wolootaho aanno» yii.

Mannu konne coye macciishshe, «Togoo coyi horonta ikkoonke!» yii. 17Yesuusi insa widira hige lae,

« ‹Mine mintannori mishshe agurtino kinchi,

mineho dhaawa ikkino›

yine borreessinoonnihu mayira lawanno'ne? 18Hakko kinchi aana uwannohu baalu hiiqqaqqamanno. Kinchu aanasi uwannohu kayinni daahamanno» yiinsa. 19Hatte yannara, Seeru rosiisaanonna qeesootu roorrooti, maammaashshu insa kisannoha ikkinota affe, hakkawoyintenni Yesuusa amaddara hasidhu. Ikkollana manna waajjitino.

GIWIRE BAATATE DAAFIRA SHIQQINO XA'MO

(Mat 22:15-22; Maq 12:13-17)

20Kunnira, injiitanno yanna galaalchitanni no. Mite sao coyi'reenna amadde gashshinohu roorreranna wolqara sayisse uyitara, elo labbe giddota haadhannore fushshite Isiwa sokku. 21Hakkuri marte Yesuusa, «Rosiisaancho, kulattonkerinna rosiisattonkeri halaale ikkinota anfoommo. Mallaadittokkinni taashshite Maganu doogo mannaho rosiisatto. 22Maahoyyena, Qeesaarira giwire baatanke garahonso garimalete?» yitusi.

23Yesuusi xagarronsa afe, 24«Hanni saante leellishshe"e! Aanase noo misilenna su'mu ayeho?» yee xa'minsa.

Insano, «Qeesaariho» yite qoltu.

25Yesuusino, «Qeesaariha Qeesaarira uuyye; Maganunniha Maganoho uuyye!» yiinsa.

26Xa'mitino xa'monni mannu albaanni woshshaaddasira didandiitino. Qolino qolonni dhaggeeffatte sammi yite agurtu.

REYOTENNI KA"ATE DAAFIRA SHIQQINO XA'MO

(Mat 22:23-33; Maq 12:18-27)

27«Reyotenni ka"a dino» yitanno Saduqooti giddonni gamu Yesuusiwa shiqqi yite, 28«Rosiisaancho, Muse borreessino Seeri, ‹Mittu manchi galte adhe kae ooso ilikkinni reyiro, hattenne mancho rodiisi gashshe rodiisira sircho sayisona› yiino. 29Lamalu roduuwi ilante heedhanna, bayiru galte adhe kae ooso ilikkinni reyino. 30Galtesi layinkihu gashshino. 31Sayikkihuno gashshino. Kunni garinni lamalunku ooso iltukkinni reyitino. 32Goofimarchoho manchono reyitino. 33Lamalunku adhitinota ikkituna, reyotenni ka'nanni waro tini mancho hiikkunnita ikkitanno?» yite xa'mitusi.

34Yesuusi qole, «Tenne gobba manni adhannonna adhamanno. 35Dagganno alamera hee'ranna reyotenni ka"a maltinonsari diadhitanno; diadhantanno. 36Sokkaasinete gedeere ikkitanno daafira direyitanno; reyotenni ka'ino daafirano Maganu oosooti. 37Reyotenni ka"ate daafira kayinni, Muse citu mule hee're hasaawi yannara Mooticha, ‹Abirihaami Magano, Yisihaaqi Magano, Yaiqoobi Magano› yee woshshino.#Ful 3:6 lai. 38Kunnira, Maganu heedhannori Maganooti ikkinnina reyitinoriha di"ikkino. Wo'munku Isira heedhannoreeti» yii.

39Seeru rosiisaano giddonni mitu mitu, «Rosiisaancho, dancha coye coyi'rootto» yitu. 40Hakkunni gedensaanni seyate Yesuusira xa'mo shiqishinohu mittuno dino.

KIRISTOOSI AYE BEETTOOTI

(Mat 22:41-46; Luq 12:35-37)

41Hakkunni gedensaanni Yesuusi, «Kiristoosa hiitto ‹Daawiti beettooti› yitanno? 42-43Daawiti umisi Faarsote Maxaafi giddo:

Mootichu Mootichi'yara,

‹Diinakki lekkakkira woroonni qolammo geeshsha,

qiniite'yaanni ofolli› yiino» yee borreessino.

44Daawiti umisi, «‹Mooticha› yee woshshisina, hiitto ikke beettosi ikkannoyya?» yee xa'minsa.

YESUUSI SEERU ROSIISAANO AGADHINANNI GEDE QOROPHISIISI

(Mat 23:1-36; Maq 12:38-40; Luq 11:37-54)

45Mannu baalu macciishshanni hee'reenna Yesuusi rosaanosi, 46«Seeda uddano uddidhe ka'anna kawa ha'rama, dikkote keere haa'nansara, xaadu mineno woyyaawino barcimira ofollanna jilu mineno ayirrado darga ofolla baxxannore Seeru rosiisaano agadhe. 47Leellantara yite seeda huuccatto assitanni, gunnootu mine mulqitanno. Kunnira, insa rooru qorichi agarannonsa» yii.

Currently Selected:

LUQAASI 20: QulMax

Highlight

Copy