LUQAASI 21

GUNNITTE MANCHO UYITINO FUSHSHAATE

(Maq 12:41-44)

1Yesuusi caaqqi yaanno woyite, gamba assinanni ogori giddo dureeyye fushshaate wortanna afi. 2Mitticho buxicho gunnitteno dagge lame saante wortanna lai. 3Kunnira, «Halaale kuleemmo'nena, tini buxicho gunnitte wo'munkunni roore uyitino. 4Dureeyye wo'me gatinonsahu aaninni uyitino. Ise kayinni buxicho ikkite heedhenni, mittoreno gatisidhukkinni afidhinore baala gudisse uyitino» yii.

YESUUSI QULLAAWU MINI DIIGAMARE COYI'RI

(Mat 24:1-2; Maq 13:1-2)

5Mitu mitu, «Kuni Qullaawu Mini hiitto biifino? Dilqa kinnanninna Maganoho shiqinshoonni afanshinni biifinsoonniho» yitanni hasaabbu. 6Yesuusi qole, «Kuni la'inannihu, kinchu kinchu aana duunamino gedeenni hee'rannokki yanna dagganno. Tini kinna baala mitto barra diigantanno» yiinsa.

MOOTICHU DAARA ALBAANNI DAANNO QARRA

(Mat 24:3-14; Maq 13:3-13)

7Insano, «Rosiisaancho! Kuni ikkannohu mamarooti? Kuni ikkara albaanni leellanno malaati maati» yite xa'mitusi.

8Yesuusi daware, «Sodhinannikki gede qorophe! Lowo manni, ‹Ani Kiristoosaati! Kuneeti yanna iillitino› yee ane su'ma gananni daanno. Hakko manni hoode hadhinoonte. 9Olu duduwonna luulo macciishshitinanni yannara massinoonte. Kuni gatannokki coyeti; ikkollana goofimarchu albillittete» yiinsa.

10Yesuusi lede, «Gosa gosate aana, gashshootu gashshootu aana ola kayisanno. 11Addi addi darga baatto huxidhanno; wo'mankawa hudenna dhibbu daanno. Gordu iima, anfe egenninoonnikkirinna waajjishshannoti jajjabba malaatta leeltanno. 12Kuni baalu ikkara albaanni kayinni amaddanno'ne; gadadissanno'ne; xaadu miniranna usuru minira sayisse uyitanno'ne. Ane daafira yitineenna gashshaanotenna mootoollate albira massitanno'ne. 13Kuni coyi, anere farci'rate injo ikkanno'ne. 14Kunnira, bushiinshanni'ne woyite qoltinanni dawarora qarrantinannikkita balaxxine wodana asse.#Luq 12:11 lai. 15Ani, baarigaarra'ne garta'nera dandiitannokki hayyonna egenno eemmo'nena. 16Iltino'neri, roduuwi'ne, fiixi'nenna jaalla'ne ki'ne giddonni gama shitanno. 17Ane daafira yitineenna, mannu baalu giwanno'ne. 18Ikkollana umi'ne dananchi aaninni nafa mittu diba"anno. 19Cincitiniro, lubbo'ne gatisidhinanni» yiinsa.

YESUUSI YERUSAALAME BA'ANNOTA BALAXE COYI'RI

(Mat 24:15-21; Maq 13:14-19)

20Yesuusi lede, «Yerusaalame diinu gaaddo doyissite amadde noota affinanni woyite, ba"ate mule noota huwatte. 21Hatte yannara, Yihudaho noori ilaallate widira higge xooqqo; katamu giddo noori agurte fulto. Katamu gobbaanni noori galagalte e'oonke. 22Borreessine worroonni himani wo'manno gede, hatti qorichu yannaati.#Hos 9:7 lai. 23Hatte yannara, godowinni nooriranna qansi'ranni noorira aanne'e! Baattote aana lowo qarri uwanno; Maganu hanqino hakko manni aana dirranno. 24Insa giddonni lowo manna bagadu shaanno; woloota qafande addi addi gobba haa'ne ha'nanni. Dagate yanna sa'a geeshsha Yerusaalame daga kadde gashshitanno» yii.

MANCHI BEETTITA LAYINKIMEESHSHI DAA

(Mat 24:29-31; Maq 13:24-27)

25Yesuusi lede, «Arrishshote, aganunna beeddahete aana maala'linanni malaati leellanno; baattote aana noo manni baalu, baarunna dambalu luulinni kainohunni waajje gara hawanno. 26Gordu kalaqami shafamanno daafira, ‹Baattote aana mayi daaraati ikka› yee noo manni waajje daaqanno. 27Hakkunni gedensaanni Manchi Beetti, lowo wolqanninna ayirrinyunni gomichu giddo daanna mannu la"annosi.#Dan 7:13; Aju 1:7 lai. 28Kuni coyi baalu ikka hanafanno woyite, gato'ne barri iillinona iima higgine la'e» yiinsa.

BALASETE HAQQICHO YANNATE GOOFIMARCHIRA MALAATE IKKITINO GARA

(Mat 24:32-35; Maq 13:28-31)

29Yesuusi lede, «Balasete haqqichonna wole haqqe ikkitino gara wodanchitine la'e. 30Darose ciirtanni noota la'inanni woyite, badheessu rahinota affinanni. 31Hakko garinni, kuni coyi baalu ikkanna la'inanni yannara, Maganu gashshooti rahe noota affe. 32Halaale kuleemmo'nena, kuni baalu ikka geeshsha, tini ilama disa'anno. 33Gordunna baatto sa'anno; qaali'ya kayinni disa"anno» yee lawishsha kulinsa.

QIXXAAWE AGADHA HASIISSANNO

34Yesuusi lede, «Itunna agu batinyinni, dimbatenninna tenne gobba heeshshora yaaddinanna wodanu daafuranno'nekki gede qorophe! Hakkuyi ka'a kayinni, hakku barri hedeweelcho woshshaadote gede ikke amadanno'ne. 35Hakku barri, baattote aana noo manna baala hedeweelcho woshshaade amadanno. 36Kunnira, daannohu bushu coyi baaluwiinni gatate wolqa afidhinanni gedenna Manchi Beetti albaanni uurra dandiitinanni gede wo'manka woyite jaattine huuccidhe» yii.

37Yesuusi barru baala Qullaawa Mine rosiisanni no. Hashshanno woyite kayinni, fule Ejedhete Ilaali aana galanno. 38Mannu baalu soodo gute fule, Yesuusi rosiisannore macciishshate Isiwa Qullaawu Minira ha'ranno.

Currently Selected:

LUQAASI 21: QulMax

Highlight

Copy