LUQAASI 19

YESUUSINNA ZAKKIWOOSI

1Yesuusi Iyyaarko Katama e"e giddoonni hige sae ha'ri. 2Hakkiicho mittu qaraxaasinete roorrichi Zakkiwoosi yinannihu dureessu manchi no. 3Isi Yesuusi ayetiro la"ara hasi're no. Ikkollana hojja harancho ikkinohuranna mannu bati'rino daafira la"a didandiino. 4Yesuusi hakkaanni hige sa"anni noo daafira, Zakkiwoosi iso la"ara alba hige dode mare mitte odakko giddi. 5Yesuusi hakkiichira iilliti, iima hige lae, Zakkiwoosi, «Zakkiwoosi, techo ate mine hosa hasiissannoena rakke haqqichote aaninni dirri» yiisi. 6Zakkiwoosi rahe dirre, Yesuusa hagiirrunni minisira haa're ha'ri. 7Konne coye lai manni baalu, «Kuni manchi cubbaataammu mine itara eino» yaanni Yesuusira gungumi.

8Zakkiwoosi kayinni kae uurre Mootichaho, «Mooticha'ya, afi'roommo jiro baalatenni taaloote buxanete eemmo. Mannuwiinni hanaaqe adhoommo woxi hee'rirono, shoole anga asse qoleemmo» yii.

9Yesuusino, «Kuni manchino Abirihaami sircho ikkinohura, techo gato kunni minira daggino. 10Manchi Beetti bainoha hasaranna gatisara dayino» yiisi.

TONNE SOQQAMAANO LAWISHSHA

(Mat 25:14-30)

11Mannu konne coye macciishshanni hee'reenna, Yesuusi lede tenne masalo kulinsa. Isi Yerusaalame iilla rahe noo daafira, mannaho Maganu Gashshooti hakkawoyintenni leellannoha lawinonsa.#Mat 25:14-30 lai. 12Kunnira Yesuusi, «Mittu ayirradu manchi gashshootu roorre adhe higara xeerto gobba ha'rino. 13Isi ha'rara albaanni soqqamaanosi giddonni tonne woshshe, mittu mittunkura tonne minaane eensa, ‹Galagale daammo geeshsha kunni woxinni daddalle› yiinsa. 14Gobbasi manni kayinni giwannosi daafira, ‹Kunni manchi ninkera moote ikkara dihasi'neemmo› yite, isi ha'rihu gedensaanni manna sokku.

15«Hakku manchi moote ikke galagale higi yannara, uyinonsa woxinni daddalte mageeshsha leddinoro afara hatte soqqamaano isiwa dagganno gede hajaji. 16Umo asse uyi soqqamaanchi shiqe, ‹Mooticha'ya, ati mitte minaane oottoe; kuneeti tonne minaane lexxitino› yiisi. 17Mootichisi, ‹Ati danchu soqqamaanchi, dancha coye assootto. Shiimurira ammanamootto daafira, ani qole tonnu katami gashshaancho assoommohe› yiisi. 18Layinki soqqamaanchino shiqe, ‹Mooticha'ya, oottoe minaane kuneeti onte leddino› yii. 19Mootichisi, ‹Ateno ontu katamira gashshaancho assoommohe› yiisi.

20«Wolu soqqamaanchino shiqe, ‹Mooticha'ya, oottoe minaane kuneeti, hoccunni xaaxe maaxeenna no. 21Hatto assoommohu, ati wodhoottokkiha adhattoha, wixi'roottokkiha mixxattoha kaajjado mancho ikkootto daafira waajjeeti› yii. 22Mootichisi qole, ‹Ati bushu soqqamaanchi, ati coyi'rootto coyinni yoo yeemmohe. Ani wodhoommokkiha adheemmoha, wixi'roommokkiha mixxeemmoha kaajjado mancho ikkoommota afittona, 23woxe'ya lexxanno darga wora mayira hoogittoyya? Higeemmo woyite lexxinoha adheemmohu baino› yiisi. 24Hakkunni gedensaanni mootichu hakkiicho uurrite noorira, ‹Woxe isiwiinni haadhine tonne minaane noohura uuyye› yii. 25Insano, ‹Mooticha, isira tonne minaane noosi› yitu. 26Mootichuno, ‹Kuleemmo'nena, noosihura lende uyinannisi; noosikkihuwiinni afi'rinonkanni haa'ne hoollanni.#Mat 13:12; Maq 4:25; Luq 8:18 lai. 27Insa gashshaancho ikkeemmota gibbinore hakkore baarigaarra'ya abbitine alba'yaanni shiiyye!› yiino» yiinsa.

YESUUSI LOWO AYIRRINYINNI YERUSAALAME EI

(Mat 21:1-11; Maq 11:1-11; Yoh 12:12-19)

28Yesuusi konne coye coyi're gudihu gedensaanni, alba ikke Yerusaalamete widira hige ha'ri.

29Yesuusi, Ejedhete Ilaali mule nooriwa Beetefaagenna Biitaaniya iilla rahiti, rosaano giddonni lame,

30«Alba'neenni noo qacha marre! Hakka iillitinanni woyite, gulunfe egenninoonnikkita harrichote ilmatticho usurante noota affinannina tirtine abbe"e. 31Ayino, ‹Mayira tirtinanni?› yee xa'mi'nero, ‹Mootichu hasi'ranno daafiraati› yiiyye» yee alba qole soyi.

32Sonkoonniri martanno woyite baalunku coyi Yesuusi yiino gede ikke nooha affu. 33Ilmatticho tirtanna ayiddu afe, «Mayira tirtinanni?» yee xa'minsa. 34Insano, «Mootichaho hasiissanno» yite qoltu. 35Hakkiichinni ilmatticho Yesuusiwa haadhe abbitu. Uddanonsa ilmattichote badhera worte Yesuusi gulufanno gede assitu. 36Isi gulufe ha'ranni hee'reenna mannu uddanna abbe doogote aana kari. 37Yerusaalame iilla rahe, Ejedhete Ilaali eelallitte dirranni hee'reenna, hoodesi ha'ranni noo manni laino maalalenni hagiidhe lowo qoonqonni Magano galati.

38«Mootichu su'minni daanno

moote maassaminoho.

Keeru gordo,

ayirrinyu aliidi gordo iillo!»

yitu. 39Mannu mereero noo Farisooti giddonni gamu Yesuusa, «Rosiisaancho, rosaanokki sammi yitanno gede assi!» yitu. 40Yesuusi qole, «Kuleemmo'nena, insa nafa sammi yituro, kinna raartanno» yiinsa.

YESUUSI YERUSAALAMETE DAAFIRA WI'LI

41Yesuusi Yerusaalame iille laihu gedensaanni katamu daafira wi'li. 42«Techo keerikkira ikkannoha afoottaha ikkoommero woyyannohehu baino! Xa kayinni illekkinni go'lino. 43Diinnakki gaangaawakki huxxite qoqqobbe, raga baala fula ho'litannohe barri daanno. 44Atenna giddokki noota oosokki tugge cancantanno; Maganu towatahera dayi yanna diafoottana, diiggukkinni mitto kinchono diagurtanno» yii.

YESUUSI QULLAAWA MINE DADDA'LITANNORE FUSHSHE SHORRI

(Mat 21:12-17; Maq 11:15-19; Yoh 2:13-22)

45Yesuusi Qullaawu Minira e"e, giddo dadda'litanni noore fushshe shorri. 46Insara qole,

«Maganu, ‹Mini'ya huuccattote mineeti› yine borreessinoonni.

Ki'ne kayinni mulqidhannori goda assitinoonni»

yii.

47Yesuusi barru baala Qullaawa Mine rosiisi. Qeesootu roorrooti, Seeru rosiisaanonna gashshaano shitasira hasidhe no. 48Mannu baalu Isi coyi'rannore macciishshate roorae noo daafira, mittoreno assa didandiitino.

Currently Selected:

LUQAASI 19: QulMax

Highlight

Copy