LUQAASI 18
18
BUXICHO GUNNITTEHANNA YOO YAANNOHU LAWISHSHA
1Hakkunni gedensaanni, Yesuusi wo'manka woyite jawaatte huuccidhanno gede rosaanosira lawishsha kulanni, 2«Mittu katamira Magano waajjannokkihu, mannano saalfatannokkihu mittu yoo yaanno manchi no. 3Hakko katamira mitte buxicho gunnitte no. Ise hakkunni yoo yaannohuwa dagganni, ‹Baarigaari'ya ledo nooe coyira yoo yiie› yitannosi. 4Isi coyese laikkinni lowo yanna keeshshi. Gedensaanni kayinni, ‹Magano waajjanna manna saalfata hoogummorono, 5tini gunnitte wo'ma woyite dagganni qarrissannoe daafira, yoo yeemmose. Hatto assa hoogummoro kayinni, wo'manka woyite dagganni qarrissannoe› yiino» yii.
6Mootichu lede, «Hakku kaajjadu, yoo yaanno manchi coyi'rino coye qaagge. 7Maganu hashsha barra Isiwa higge raartannorira roorse halaalu yoo diyaannonsa? Lashshi asse agureenna kaa'lo keeshshitannonsani? 8Kuleemmo'nena, keeshshikkinni yoo yaannonsa. Ikkollana, Manchi Beetti daanno woyite uullate aana amma'na afi'ra ikka?» yii.
BOONALEESSA DUREESSANNA JOOGU QARAXAASINCHI LAWISHSHA
9Qoleno Yesuusi, ninke keeraanote yite umonsa bokkeessite wole manna mishshannorira, 10«Lamu manchi huuccidhara Qullaawu Minira hadhu. Mittu Farisichaho; layinkihu qaraxaasinchoho.
11«Farisichu uurre wodanisinni, ‹Magano'ya, ani wolootu gede mulqi'reemmoha, jaddo looseemmohanna fooreemmoha ikka hooga'yara galaxxeemmohe. Roorenka kunni qaraxaasinchi gedeeha ikka hoogoommohura galaxxeemmohe. 12Ani mitte lamala giddo lame hige ita aga agure huucci'reemmo; afi'reemmori baalu giddonni tonnunni mitte anga eemmo› yaanni huucci'ri.
13«Qaraxaasinchu kayinni fafe uurre, iima gordo hige la"ara nafa diuggino. Ikkollana angasinni gagaso ga'nanni, ‹Magano'ya, ani cubbaataamohona cubbo'ya aguri!› yee huucci'ri. 14Kuleemmo'nena, keeraa'me minisira higinohu hakkonne qaraxaasinchooti ikkinnina Farisicha di"ikkino. Umosi gotti assannohu baalu heeshshi yaanno; umosi heeshshi assannohu kayinni gotti yaanno» yiinsa.#Mat 23:12; Luq 14:11 lai.
YESUUSI QAAQQUULLE MAASSI'RI
(Mat 19:13-15; Maq 10:13-16)
15Yesuusi anga aanaho worannonsa gede mannu qaaqquulle haa're Isiwa abbi; rosaanosi kayinni abbino manna ruffu. 16Yesuusi qaaqquulle woshshe, «Maganu Gashshooti insa gedeerihona, qaaqquullu anewa dayona hooltinoonte! 17Halaale yeemmo'nena, ayino Maganu gashshoote qaaqquullu gede ikke adhannokkihu dieanno» yiinsa.
UULLATE AANI JIRONNA MAGANU GASHSHOOTE
(Mat 19:16-30; Maq 10:17-31)
18Ayihudete roorrooti giddonni mittu Yesuusa, «Dancha Rosiisaancho, hegere heeshsho afi'rammora ma asso?» yee xa'mi.
19Yesuusi qole, «Mayira dancha yaattoe? Mittu Magani ka'a danchu dino. 20Hajajo egennootto: ‹Insano, foortooti, shitooti, moortooti, kaphunni naqqassooti, annakkinna amakki ayirrisi!› yitannote» yiisi.#Ful 20:12-16; Maq 5:16-20 lai.
21Manchu qole, «Rosiisaancho'ya, tenne hajajo anjenni kayise agadhe hee'reemmo» yii. 22Yesuusi tenne macciishshihu gedensaanni manchoho, «Mittu coyi gate noohe; hadhe afi'roottore baala hirte woxe buxanete beehi; gordoho jiro afi'rattona. Hakkunni gedensaanni hoode'ya amo!» yiisi. 23Manchu kayinni lowo geeshsha dureessa ikkino daafira, konne coye macciishshe lowo geeshsha dadilli. 24Yesuusi manchu dadillinota afe, «Dureeyyete Maganu Gashshoote ea mageeshshi qarraati! 25Dureessu Maganu Gashshoote eantenni, gaalu marfete xullo giddoonni lulluqqa shota coyeti» yiinsa. 26Tenne macciishshanni noo manni, «Hatto ikkiro, ayi gatannoyya?» yii.
27Yesuusi kayinni, «Addanko, mannu dandaannokki coye Maganu dandaanno» yii.
28Pheexiroosino, «Kuneeti, ninke noonkere baala agurre ate hoode ha'nanni hee'noommo» yii.
29Yesuusi qole, «Halaale yeemmo'nena, Maganu Gashshootira yee minesi woy galtesi woy roduuwasi woy iltinosire woy oososi agurannohu, 30tenne gobbara erote ero adhanno. Dagganno alamerano hegere heeshsho afi'ranno» yii.
YESUUSI REYOSIRE SAYIKKIMEESHSHO COYI'RI
(Mat 20:17-19; Maq 10:32-34)
31Yesuusi tonaa lamenka rosaanosi isiwa gamba asse, «Kuneeti, xa ninke Yerusaalame ha'nammoraati. Manchi Beettire borreessinoonni himani baalu hakko wo'manno. 32Isono dagate angara sayinse uyinannisi. Insano yoo yitannosi; xontannosi; qacifattannosi. 33Lichetenni gantusihu gedensaanni shitannosi. Ikkollana sayikki barra ka"anno» yii. 34Rosaanosi kayinni coyi'rino coyi baalu giddonni mittoreno dibuuxxino. Coyi'ri coyi go'le noonsa; ma yiinorono diaffino.
YESUUSI IYYAARKOTE MITTO ILLIWEELO HURSI
(Mat 20:29-34; Maq 10:46-52)
35Yesuusi Iyyaarko gamba yii yannara, mittu illiweelu mitore uyinasira doogote gama ofolle huucci'ranni no. 36Mulesiinni hige sa"anni noohunnita lowo manni huuro macciishshe, «Kuni maati?» yee xa'mi.
37Mannuno, «Kuneeti, Naaziretete Yesuusi kawaanni higge sa'anni no» yite kultusi.
38Hatte yannara illiweelu, «Daawiti Beetto Yesuusa, eeggakkiitina maarie!» yiisi.
39Alba hige ha'ranni noo manni, «Sammi yii!» yee rufisi.
Isi kayinni albinni roore qoonqosi naggi asse, «Daawiti Beetto eeggakkiitina maarie!» yii.
40Kunnira Yesuusi uurre, «Anewa abbesi» yee hajaji. Illiweelo mancho haa'ne abbineenna Yesuusi, 41«Ma assammohera hasi'ratto?» yee xa'misi.
Illiweeluno, «Mooticha'ya, la"ammora hasi'reemmo» yii. 42Yesuusino, «Lai! Amma'nakki gatissinohe» yiisi.
43Manchuno hakkawoyintenni ille fa'niteennasi lai. Maganono galatanni Yesuusi hoode ha'ri. Mannu baaluno konne coye lae Magano galati.
Currently Selected:
LUQAASI 18: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
