LUQAASI 17

CUBBO, AMMA'NONNA SOQQANSHO

(Mat 18:6-7; 21:22; Maq 9:42)

1Yesuusi rosaanosira, «Manna sarraaqe cubbu giddo tugannori dayikkinni digatanno. Cubbu sarraaqo abbanno manchira kayinni aanne'e! 2Kuri shiimmaaddu giddonni mitto sarraaqankunni daamma haxote usudhe baaru giddo bairo woyyate. 3Kunni coyinni umo'ne agadhe! Rodiikki ate aana sao assiro seejjisi. Aagintaawe higiro saosi agurisi. 4Barrunni lamala hige ate aana sao asse, barrunni lamala hige atewa daye, ‹Sao'yara gaabboommona agurie› yiihero, saosi aguri» yii.

5Soqqamaasineno Mooticha, «Eeggakkiitina Amma'na ledinke!» yitusi. 6Mootichuno, «Shiimiidi gumi geeshshi amma'na heedhu'nero, tenne odakko, ‹Kawiinni buqqisante baaru giddo kaasami!› yitiniro, hajajantanno'ne» yiinsa.

7Yesuusi lede, «Ki'ne giddonni mittoho gate loosannosihu woy saada allaalannosi soqqamaanchi hee'risiro, soqqamaanchisi loosuwiinni higanno yannara, hakkawoyintenni, ‹Amo ofolte sagale iti!› yaannohu ayeti? 8Hatteentenni, ‹Amo sagale worie; itenna age ka"ammo geeshsha soqqamie; ati hakkunni gedensaanni itatto, agatto› diyaanno? 9Soqqamaanchisi hajajinosire wonshino daafira mootichisi jajannosiha lawanno'ne? 10Ki'neno hajanjoonni'nere hatto assitine wonshitinanni woyite, ‹Ninke tidhinoommokki soqqamaanooti; assa hasiissannonke daafiralla assinoommo› yiiyye» yii.

YESUUSI TONNE ANATAAMMA HURSI

11Yesuusi Yerusaalame ha'ranni, Samaariyunna Galiilu giddoonni hige sai. 12Mitto qacha iillanno yannara, tonnu anataammi isinni xaadde xeertidhe uurritu. 13Qoonqonsa naggi assite, «Yesuusa, Biilonke ballo, eeggatena saonke agurinke!» yitanni raartu. 14Yesuusi insa lae, «Hadhe! Biso'ne qeesootaho leellishidhe!» yiinsa.#Lew 14:1-32 lai.

Insano hadhanni heedhe doogote dhibbinsanni keeraabbu. 15Insa giddonni mittu dhibbisinni hurinota afi yannara, qoonqosi naggi asse Magano galatanni higi. 16Yesuusano galatanni lekkasi hunda kumbuuli. Isi ilama Samaarichaho. 17Yesuusino, «Dhibbunni keeraabburi tonne manna di"ikkino? Honsu hiikkituyya? 18Konne manni gobba mancho agurranna Magano galatate galagale higinohu wolu mittuno dino?» yii. 19Hakkunni gedensaanni Yesuusi hakkonne mancho, «Ka'e ha'ri; amma'nakki gatissinohena» yiisi.

MAGANU GASHSHOOTI DAA

(Mat 24:23-28,37-41)

20Farisootu Yesuusa, «Maganu Gashshooti mamoote daanno» yite xa'mitusi.

Isi daware, «Maganu Gashshooti daannohu mannu jaate agadhanno garinni di"ikkino. 21Qoleno, ‹Kuneeti kawiicho no. Woy hakkiicho no› yinanniha di"ikkino. Maganu Gashshooti kune mereero'ne no» yiinsa.

22Yesuusi rosaanosira, «Manchi Beetti barruwa giddonni mitto barra la"ate halchitinanni yanna dagganno. Ikkollana dila'inanni. 23Mannu, ‹Kuneeti, Kiristoosi kawiicho no! Woy hakkiicho no!› yaanno'ne. Martinoonte; hoodensano hadhinoonte. 24Banqo gordu iima beleqqanno woyite, qaccetenni qaccete geeshsha xawissannonte gede, Manchi Beetti daanno barrano hatto ikkanno. 25Ikkollana, Manchi Beetti balaxe lowo qarra adhanna tenne ilamanni mishama hasiissannosi. 26Nohi yannara ikkinte gede, Manchi Beetti daanno yannarano hatto ikkanno. #Kal 6:5-6 lai. 27Nohi yowolo ei barri geeshsha, mannu itanninna aganni, adhanninna adhamanni no. Hatte yannara baote wayi daye wo'manka gudino. #Kal 7:6-24 lai. 28Looxi yannarano hatto ikkino. Hatte yannarano mannu itanninna aganni, hiranninna hidhanni, kaasi'ranninna mi'nanni no. 29Ikkollana, Looxi Soddooma agure fuli barra, gordunni giiranna ruqanu dirre wo'manka gudino. #Kal 18:15-29 lai. 30Manchi Beetti daanno barrano hatto ikkanno.

31«Hakko barra minu iima noohu mininni uduunne adhara dirroonke. Gate loosi'ranni noohuno minira higoonke.#Mat 24:17-18; Maq 13:15-16 lai. 32Looxi galtere qaagge! #Kal 19:26 lai. 33Lubbosi gatisi'rara hasi'rannohu hu'nanno. Lubbosi sayise aannohu kayinni gatisi'ranno.#Mat 10:39; 16:25; Luq 9:24; Yoh 12:25 lai. 34Kuleemmo'nena, hakko hashsha lamu manni mittu daallasi aana goxanno; insa giddonni mitto haa'neenna mittu gatanno. 35Lamu meenti mitteenni daaqqanno; mitte haa'neenna mitte gattanno. 36Lamu manchi mitto gate loosidhanno; mitto haa'neenna mittu gatanno» yii.

37Rosaanono Yesuusa, «Mooticha, hiikka haa'ne ha'nanninsa?» yite xa'mitusi.

Yesuusi qole, «Reeshshu noowa doowiru gamba yaanno» yiinsa.

Currently Selected:

LUQAASI 17: QulMax

Highlight

Copy