YOHAANNISI 20

YESUUSI REYOTENNI KAI

(Mat 28:1-10; Maq 16:1-8; Luq 24:1-12)

1Sambatu barra soodo guto duu'mo saaqqukkinni Megidelitte Maariyaami Yesuusi waammawa martu. Hakkiira iillitanno woyite waamma tu'noonni kinchi waammate afiinni ho'le nooha affu. 2Kunnira, Simiooni Pheexiroosiwanna Yesuusi baxannohuwa wolu rosaanchiwa doddanni marte, «Mooticha waammate giddonni fushshite haadhino; mamiicho wortinoro diafoomma» yitu.

3Pheexiroosinna wolu rosaanchino waammanniwa ka'e martu. 4Lamunku mitteenni doddanni heedheenna, ku'u rosaanchi kayinni Pheexiroosi balaxe waammanniwa mare iilli. 5Heeshshi yee waammate giddora qole la"anno woyite, kafanu uddano afi. Isi kayinni giddora dieino. 6Simiooni Pheexiroosi hoodesi mare iille, waammate giddora ei. Isino hakkiicho noota kafanu uddano afi. 7Yesuusi umira xaanxoonni uddano, kafanunnitewiinni baxxite xaaxante ubbe noota afi. 8Waammanniwa balaxe mari rosaanchino waammate giddora ei. Isino lae ammani. 9Hakkuno: «Reyotenni ka"a hasiissannosi» yaannoha Maganu Qaale wodana assitinokkihuraati. 10Hakkunni gedensaanni lamenti rosaano galagalte mininsara higgu.

YESUUSI MEGIDELITTE MAARIYAAMIRA LEELLI

(Maq 16:9-11)

11Megidelitte Maariyaami wi'litanni waammate gobbaanni uurrite no. Wi'litanni heedhe heeshshi yite waammate giddora qolte la'anno woyite, 12Yesuusi reeshsha worroonniwa lamu waajjo uddano uddidhino sokkaasine mittu umaalloonni mittu lekkaalloonni ofolte no. 13Insano Maariyaami, «Tee mancho, mayira wi'latta?» yituse.

Iseno, «Mooticha'ya fushshite hiikka qoltinoro diafoomma» yitu. 14Hatto yite ka'e badhe higge caaqqi yite la'anno woyite, Yesuusi uurre nooha affu; iso ikkinota kayinni dibuuxxino.

15Yesuusi kayinni, «Tee mancho, mayira wi'latta? Aye hasidhanni nootta?» yee xa'mise.

Iseno gate towaxxanni noo mancho laweennase, «Mooticha'ya, ati haa'roottoro, ballo worootto darga kulie; ani haa'reemmana» yitu.

16Yesuusino, «Maariyaami» yee woshshise.

Iseno isi widira caaqqi yite Ibiraawootu afiinni, «Rabuuni» yitusi. Hatto yaa, «Rosiisaancho» yaate.

17Yesuusino, «Xaara Anni'yawa difuloommona amaddootie!» yiise. Qoleno, «Marte ka'e kayinni roduuwi'yara, ‹Ani galagale Anni'yawanna Anni'newa, Magani'yawanna Magani'newa ha'ranni noommo yiino› yite kulinsa!» yiise.

18Kunnira Megidelitte Maariyaami rosaanosiwa marte, Mooticha affinotanna isi yiinosereno kultunsa.

YESUUSI ROSAANOSIRA LEELLI

(Mat 28:16-20; Maq 16:15-16; Luq 24:36-49)

19Sambatu hawarro rosaanosi Ayihude waajjite cufana cufidhe mitto mine gamba yite no. Cufanu cufame hee'reenna Yesuusi rosaanosi gamba yite noowa daye mereeronsa uurre, «Keeru ki'ne ledo hee'ro!» yiinsa. 20Hatto yee kae midaadosinna angasi leellishinsa. Rosaano Mooticha affe lowo geeshsha hagiidhitu. 21Yesuusi xaano lede, «Keeru ki'ne ledo hee'ro. Anni'ya ane soyie gede, anino ki'ne soyemmo'ne» yiinsa. 22Hatto yiihu gedensaanni aanansa foolesi ufuufe, «Qullaawa Ayyaana adhe. 23Cubbonsa agurtinanninsarira, cubbonsa agurranninsa. Ki'ne agura hoogginiro kayinni, diagurranninsa» yiinsa.

YESUUSINNA TOOMAASI

24Yesuusi rosaanosiwa maranno woyite, tonaa lamu giddonni mittu Didimoosi yinannihu Toomaasi ledonsa dino. 25Kunnira wole rosaano Toomaasira, «Mooticha anfummowe» yite kultusi.

Isi kayinni, «Misimaaretenni qansoonnita angasi laummokkinni, qubbicho'ya angasi madara worummokkinninna anga'yano midaadisi madara wore laummokkinni diammaneemmo» yii.

26Mitte lamala gedensaannino rosaanosi mitto mine gamba yite no. Toomaasino ledonsa no. Cufanu cufame hee'reenna Yesuusi daye mereeronsa uurre, «Keeru ki'ne ledo hee'ro!» yiinsa. 27Hakkunni gedensaanni Toomaasi woshshe, «Qubbichokki kawa abbite anga'ya lai; angakki abbite midaadi'ya giddo worte lai. Huluullama agurte ammani!» yiisi.

28Toomaasino, «Mooticha'ya! Magano'ya!» yii.

29Yesuusi Toomaasira, «Ati laoottoe daafira ammanootto; la'uekkinni ammantannori maassantinoreeti» yii.

30Yesuusi tenne borro giddo borreessinoonnikkita wole lowo maalale rosaanosi affanna loosino. 31Ikkirono, Yesuusi Kiristoosi Maganu Beetto ikkinota ammantinanni gedenna ammantine isi su'minni hegere heeshsho afidhinanni gede konne borreessinoonni.

Currently Selected:

YOHAANNISI 20: QulMax

Highlight

Copy