YOHAANNISI 19

OLANTO YESUUSA QACIFATTUSI

(Mat 27:27-32; Maq 15:15-21)

1Hakkunni gedensaanni Philaaxoosi Yesuusa lichetenni gansiisi. 2Olantono utu worraaqqa seekkite Yesuusira umoho wortu. Duume uddanono uddisiissusi. 3Isiwa marte, «Ayihudete moote, keere nootto?» yite qacifattanni baqqaalla qawaaddusi.

4Philaaxoosi layinkimeeshsho gobbara fule, «Assinoti mitte bunshe nafa leeltinoekkita affinanni gede, agarre iso gobbara fushsheemmo'nena» yiinsa. 5Yesuusira utu worraaqqa umoho worte duume uddano uddisiisseenna gobbara fulita Philaaxoosi, «Manchu kuneeti» yiinsa.

6Qeesootu roorrootinna Qullaawu Mini agaraasine Yesuusa affe, «Suti! Suti!» yitanni cancitu.

Philaaxoosi kayinni, «Ane woyite assino bunshe diafoommona, ki'ne massitine sutte» yiinsa.

7Ayihudootuno, «Ninkera seeru noonke; kuni manchi, ‹Ani Maganu Beettooti› yaanni coyi'ranno daafira reya hasiissannosi» yitu.

8Philaaxoosi konne coye macciishshi woyite, lowo geeshsha waajji. 9Galagale hoowe giddoonni e"e, «Ati maminni dayotto?» yee xa'misi.

Yesuusi kayinni mittoreno diqolinosi. 10Kunnira Philaaxoosi, «Dikulattoe? Tiratenna sutate wolqa afi'roommota diafootto?» yiisi.

11Yesuusi kayinni, «Roorre gordunni aamama hooggoommehero ane aana wolqa diafi'ratto. Kunnira ane atera sayise uyihura rooru cubbi noosi» yiisi.

12Philaaxoosino Yesuusi coyi'rinore macciishshe tire agurara hasi'ri. Ayihudootu kayinni, «Konne mancho tirittoro qaru Roomu mootera jaala di"ikkootto. Umosi moote assannohu baalu qaru mootera diinaho!» yitanni cancitu.

13Philaaxoosi konne coye macciishshi yannara Yesuusa gobbara fushshe, «Baattote aana Karroonni Kincho» yinanni darga yoote barcimira ofolli. Hakko darga Ibiraawootu afiinni, «Gabata» yinanni. 14Yanna, Agure Sa"ate Ayyaani qixxaawo lamalara barru taalooteeti. Hatte yannara Philaaxoosi Ayihudoota, «Moote'ne kuneeti» yiinsa.

15Insano, «Hoolinke! Hoolinke! Sutte aguri!» yitanni cancitu.

Philaaxoosino, «Moote'ne sutoni?» yiinsa.

Qeesootu roorrootino, «Qeesaari agurranna wolu moote dinonke» yite qoltu.

16Hatte yannara, Yesuusi sutamanno gede Philaaxoosi sayise uyinsa.

YESUUSA SUNTI

(Mat 27:32-44; Maq 15:21-32; Luq 23:26-43)

Insano Yesuusa amadde haadhe hadhu. 17Hakkunni gedensaanni Yesuusi masiqalasi duqqe, «Umu Qooncho» yinanni darga mari. Hakkonne darga Ibiraawootu afiinni, «Golgoota» yinanni. 18Insano hakkiicho suttusi. Yesuusa mereeroho worte, ledo wole lame manna guraanna qiniiteenni suttu.

19Philaaxoosi, «Naaziretete Yesuusa, Ayihudete Moote» yee borreesse Yesuusi masiqalira umoonni wori. 20Yesuusi sutaminohu katamaho mule ikkinohura, lowo Ayihude borreessine worroonnire la'u. Borreessinoonnihu Ibiraawootu, Laatiinetenna Giriikete afiinniiti. 21Ayihudete qeese roorrooti Philaaxoosi, «Ati, ‹Ayihudete mooteeti› yite borreessitooti. ‹Kuni manchi, «Ani Ayihudete mooteeti» yiino› yite borreessi» yitusi. 22Philaaxoosi kayinni, «Ani borreessoommore borreessoommo» yee qolinsa.

23Olanto Yesuusa sutte ka'e uddannasi shoolewa babbadde annu annunni beeqqitu. Giddoyidi uddanosino adhitu. Giddoyidi uddano kayinni alinni eeli geeshsha mittu garinni gannoonnite.

24Kunnira olanto, «Iillituhura iillitona, daddara agurre hixa tuqqino» yitu. Hatto ikkinohu,

«Uddano'ya beeqqitu;

giddoyidi uddano'yarano hixa tuqqitu»#Far 22:18 lai.

yinoonnihu Qullaawu Qaali wo'manno gedeeti. Olantono heddino gede assitu.

25Yesuusi masiqali mule amasi, la'lamasi, Qeleyopha galte Maariyaaminna Megidelitte Maariyaami uurre no. 26Yesuusi amasinna baxanno rosaanchi hakko uurrite noore afe amasi, «Ama, beettikki kuneeti» yiise.

27Hakkunni gedensaanni rosaanchohono, «Amakki kuneeti» yiisi. Hatte yannara rosaanchu ise haa're minisira ha'ri.

YESUUSI REYO

(Mat 27:45-56; Maq 15:33-41; Luq 23:44-49)

28Hakkunni gedensaanni Yesuusi duuchunku coyi wo'minota afe, Qullaawu Qaali wo'manno gede, «Goo'rummo!» yii.#Far 69:21; 22:25 lai.

29Hakkiicho shiishino ago wonshinoonni uduunnichi no. Haanxicho giddo cuu'e, garambichu haqqira rarraasse, Yesuusira shiqqi assitu. 30Yesuusino shiisha suumetenni kisihu gedensaanni, «Xaate ikkino» yii. Umosi heeshshi asse lubbosi sayise uyi.

YESUUSI MIDAADO QASAMI

31Hakkunni gedensaanni, Ayihudootu suttino manna mogolensa cancante dirrissara hasidhe Philaaxoosi xa'mitu. Hatto assa hasidhinohu, aane noohu Fooliishshote Barri baxxinoha ikkino daafira, Ayihudootu hakko barra reeshshu masiqalu aana hosannota gibbeeti. 32Kunnira, olanto marte Yesuusi ledo sutantinori mogole cancantu. 33Yesuusiwa shiqqi yitanno woyite balaxe reyino daafira isi mogole dicancantino. 34Ikkollana olantote giddonni mittu Yesuusi midaado urdetenni qasi; midaadosi urdetenni qasita, mundeenna wayi fuli. 35Ki'neno ammantinanni gede, konne coye laihu farci'rino; farci'rino coyino halaaleho. Farci'rino coyi halaale ikkinota isino egennino. 36Kuni coyi ikkinohuno,

«Miqichisi mittu nafa dihiiqqamanno»#Ful 12:16; Kir 9:12; Far 34:20 lai.

yaannohu Qullaawu Qaali wo'manno gedeeti. 37Wolu Qullaawu Qaalino, «Hakkonne qassuha la'anno»#Zak 12:10 lai.

yaanno.

YESUUSA MADAARRI

(Mat 27:57-61; Maq 15:42-47; Luq 23:50-56)

38Yesuusi rosaancho ikkinohu Armaatiyu katamihu Yooseefi, Yesuusi reeshsha fajjannosi gede Philaaxoosi xa'mi'ri. Ayihude waajjino daafira maaxame mare xa'mi'rino. Philaaxoosino fajjeennasi mare Yesuusi reeshsha adhe ha'ri. 39Mitto waro hashsha Yesuusiwa marihu Niqoodimoosi kaarbenna argiisa karsiise 30 kiilo geeshsha asse haa're abbi. 40Lamunku Yesuusi reeshsha haadhe Ayihudete budi garinni biddi assite, shitto buurte, shaalado uddanonni kafantu. 41Yesuusi sutamiwa kaansoonni haqqe no. Hatte haqqe giddo manna madaarroonnikkiti mitte haaro waamma no. 42Fooliishshote Barrira qixxaabbanni noohuranna waammano mule noo daafira, Yesuusa hakkiicho madaartu.

Currently Selected:

YOHAANNISI 19: QulMax

Highlight

Copy