YOHAANNISI 18

YESUUSI AMADAMA

(Mat 26:47-56; Maq 14:43-50; Luq 22:47-53)

1Yesuusi huuccatto gudihu gedensaanni, rosaanosi ledo Qedirooni Lagichira widoonni fuli. Hakkiicho, rosaanosi ledo kaansoonni haqqe caali giddora ei. 2Yesuusinna rosaanosi wo'ma woyite hakko xaaddanno daafira, Yesuusa sayise uyihu Yihudino hakkonne darga egennino. 3Kunnira Yihudi gamisa gaaddonna qeesootu roorrootinna Farisootu sokkino olanto hoodete adhe hakkiichira dayi. Insa caabbiyye, faanoosenna bagado anga adhite no.

4Yesuusi aanasi daara noore baala afino daafira insawa shiqqi yee, «Aye hasidhinanni?» yiinsa.

5Insano, «Naaziretete Yesuusa hasi'neemmo» yitu.

Isino, «Aneetiwe» yiinsa. Hatte yannara, sayise uyisihu Yihudi ledonsa uurre no. 6Yesuusi, «Aneetiwe» yiinsata, badhe higge gugatte gatantarte ubbu. 7Yesuusi lede, «Aye hasidhinanni?» yee xa'minsa.

Insano, «Naaziretete Yesuusa hasi'neemmo» yitu.

8Isino, «Aneeti yoommo'newe. Ane hasidhinanniha ikkiro, kore hadhona agurrensa!» yii. 9Hatto yiinohuno, «Anna'ya, oottoeri giddonni mitto nafa dihunoommo»#Mat 26:39; Maq 14:36; Luq 22:42 lai. yiino qaali wo'manno gedeeti.

10Simiooni Pheexiroosi suxxe noo bise fushshe qeesootu qari soqqamaancho gane macca tayisi. Macca tai manchi su'mi Malkoosiiti. 11Yesuusi kayinni, «Bisekki kou giddora qoli. Anni'ya uyinoehunni qarru finiinchinni ageemmokkiha lawinohe?» yii.

YESUUSA QEESOOTU ROORRICHIWA SHIQINSHISI

(Mat 26:57-58; Maq 14:53-54; Luq 22:54)

12Hakkunni gedensaanni olantonna olantote hajajaano Ayihudete roorrooti ledo Yesuusa amadde usurtu. 13Umo assite Hannawa massitusi. Qeyaafara ballo ikkinohu Hanna, hakko diro qeesootu roorrichaati. 14Qeyaafa, «Mittu manchi mannu daafira reyiro woyyate» yee Ayihudete roorrootira mala uyino manchooti.#Yoh 11:49-50 lai.

PHEEXIROOSI YESUUSA KAADI

(Mat 26:69-70; Maq 14:66-68; Luq 22:55-57)

15Simiooni Pheexiroosinna mittu wolu rosaanchi Yesuusi faana hadhu. Hakku wolu rosaanchi qeesootu qari egenninosiha ikkino daafira, Yesuusi ledo hoowesi giddora ei. 16Pheexiroosi kayinni hoowete gobbaanni bitimaho uurre no. Qeesootu roorrichi egenninosi rosaanchi bitima agarte noo beettora coyi're, Pheexiroosi hoowete giddoonni eanno gede assi.

17Hoowete bitima agartanno beetto Pheexiroosi, «Ati hakko manchi rosaano ledoha di"ikkootto?» yitusi.

Pheexiroosi qole, «Di"ikkoommo!» yee moromi.

18Hatti yanna qiida ikkitino daafira, soqqamaanonna roorrootu uurrite giira giwaadhanni no. Pheexiroosino insa ledo uurre giira giwaa'ranni no.

QEESOOTU ROORRICHI YESUUSA XA'MINO XA'MO

(Mat 26:59-66; Maq 14:55-64; Luq 22:66-71)

19Hatte yannara qeesootu qari Yesuusa, rosaanosirenna rosiisanno rosire xa'misi.

20Yesuusino, «Ani manna baalaho xawoho coyi'roommo; Ayihude baala gamba yitannowa xaadu minenna Qullaawa Mine wo'ma woyite rosiisoommo; maaxe coyi'roommori mitturino dino. 21Ane mayira xa'mattoeyya? Coyi'rannansa macciishshitinore xa'mi; ani coyi'roommore insa affino» yee qoli.

22Yesuusi hatto yiita, hakko noori giddonni mittu, «Qeesootu roorrichiraati togoo tumo qolattohu?» yee qawaadisi.

23Yesuusi qole, «Sayise coyi'roommori nooro, so'ro'ya mannaho kuli. Coyi'roommo coyi kayinni garahoro, mayira qawaadittoe?» yiisi. 24Hakkunni gedensaanni Hanna Yesuusa usurame noo gedeenni Qeyaafawa soyi.

PHEEXIROOSI YESUUSA LAYINKIMEESHSHO KAADI

(Mat 26:71-75; Maq 14:69-72; Luq 22:58-62)

25Hatte yannara Simiooni Pheexiroosi uurre giira giwaa'ranni hee'reenna, hakko noori wolootu, «Ati Yesuusi rosaano giddoha di"ikkootto?» yite xa'mitusi.

Pheexiroosi daware, «Dee'ni, di"ikkoommo» yee kaadi. 26Pheexiroosi macca gane tayisi manchira fiixa ikkannohu qeesootu qari soqqamaano giddonni mittu, «Kaansoonni haqqe giddo isi ledo noottoha diafoommohe?» yiisi.

27Pheexiroosi xaano kaadi; hakkawoyintenni lukkichu gani.

YESUUSA PHILAAXOOSIWA HAADHE MASSITU

(Mat 27:1-2,11-14; Maq 15:1-5)

28Hakkunni gedensaanni Ayihude Yesuusa Qeyaafa qaenni haadhe gashshaanchu hoowe massitusi. Yannano soodo gutooti. Lagaabbe Agure Sa"ate Ayyaani jila ita hooggannokki gede, gashshaanchu hoowe giddora die'ino. 29Philaaxoosino insawa shiqqi yee, «Kunni manchi aana ku'litinanni coyi maati?» yee xa'minsa.

30Insano, «Kuni manchi busha assa hoogoommero, atera sayinse diuyineemmo» yite qoltu.

31Philaaxoosino, «Seeri'ne garinni, massitine ki'ne umi'ne yoo yiidhe!» yiinsa.

Insano qolte, «Ninkera manna shaate roorre diuyinoonninke» yitu. 32Kuni coyi ikkinohu, Yesuusi ma garinni reyannoro coyi'rino qaali wo'manno gedeeti.

33Philaaxoosi galagale hoowesi giddora e"e Yesuusa woshshe, «Ati Ayihudete mooteeti?» yee xa'misi.

34Yesuusi, «Ati konne coye xa'mattoehu umikki hedonniitinso, anere mannu kulinohe garinniiti?» yii.

35Philaaxoosi qole, «Ani Ayihudichahoni? Ate anera sayisse uyituri gosakkiitinna qeesootu roorrootaati. Ati ma assootto?» yii.

36Yesuusi, «Ane gashshooti tenne gobbaha di"ikkino. Gashshooti'ya tenne gobbaha ikkoommero, olanto'ya gaarante Ayihudete anganni gatissannoe. Gashshooti'ya kayinni tenne gobbaha di"ikkino» yee qoli.

37Philaaxoosino, «Hakka woyiteetiro, ati mootete yaate?» yee xa'misi.

Yesuusino, «Ani moote ikkoommota, atinni diyiitto! Ani ilamoommohunna tenne gobba dayommohu halaale farci'rammoraati. Halaalu widoonni uurrinohu qaale'ya macciishshanno» yee qoli.

38Philaaxoosino, «Halaalu maati?» yee xa'mi. Hattenne giddo hee're Ayihudootunniwa mare, «Kuni manchi assino so'ro ani diafoommo. 39Ikkollana, bashshonni budi'ne garinni Agure Sa"ate Ayyaanira mitto usuranya tireemmo'ne. Kunni daafira, Ayihudete moote tiro'neni?» yiinsa.

40Insa kayinni, «Barbaani ikkinnina iso tirtootinke!» yitanni cancitu. Barbaani kayinni manna mulqi'rannoho.

Currently Selected:

YOHAANNISI 18: QulMax

Highlight

Copy