YOHAANNISI 17

YESUUSI HUUCCATTO

1Yesuusi konne coye coyi'rihu gedensaanni iima hige lae,

«Anna'ya, yanna iillitino. Beettikki ayirrisannohe gede, atino Beettokki ayirrisi. 2Ayirrisattosihu, oottosirira baalaho hegere heeshsho aate, mannu baalu aana roorre oottosihuraati. 3Hegere heeshshono, ati callu halaalaancho Magano ikkoottotanna soottoha Yesuusa Kiristoosa afate. 4Ati oottoe looso guute baattote aana ayirrisoommohe. 5Anna'ya, kalqe kalaqantara albaanni, atewa nooe ayirrinyinni xaano ayirrisie.

6«Tenne gobbanni doorte oottoe mannira ate ewelumma egensiisoommo. Insa atereeti; insa anera oottoehu ateeti. Insano qaalekki wonshitanno. 7Oottoeri baalu atewiinni dayinoha ikkinota insa xa affino. 8Oottoe qaale oommonsa; insano adhitino. Ani atewiinni dayommota seekkite affino. Ati soottoetano ammantino.

9«Ani insa daafira huucceemmo. Kuri oottoeri atere ikkitinohura insa daafira huucceemmo. Ate tenne gobba daafira dihuucceemmo. 10Anehu baalu ateho; atehuno aneho. Anino insanni ayirreemmo. 11Ani kunni ka'a tenne gobbara dihee'reemmo; insa kayinni, tenne gobbara no. Ani Atewa daammoraati. Qullaawa Anna'ya, kuri oottoeri, atenna ane gede mitto ikkitara oottoehu su'mikki wolqanni keerunni agarinsa. 12Ledonsa noommo yannara, oottoehu su'mikki wolqanni keerunni agaroommonsa. Borreessinoonnihu Qullaawu Qaali wo'manno gede, baote beetto agurranna insa giddonni mittuno bainohu dino.#Far 41:9; Yoh 13:18 lai. 13Xa ani atewa daammoraati; tenne gobbara hee're konne coye coyi'reemmohu, giddonsa ane hagiirri wo'ma ikkanno gedeeti. 14Ani insara qaalekki kuloommonsa; ani tenne gobbaha ikkoommokkihura insano tenne gobbare di"ikkitino; kunnira tini gobba gibbannonsa. 15Ani ate huucci'reemmohu insa bushuwiinni gatisattonsa gedeeti ikkinnina, tenne gobbanni fushshattonsara di"ikkino. 16Ani tenne gobbaha ikkoommokkinte gede, insano tenne gobbare di"ikkitino. 17Halaalikkinni qullaawoota assinsa; ate qaali halaaleho. 18Ati ane tenne gobba soyittoente gede, anino insa tenne gobba soommonsa. 19Insa halaalunni qullaawoota ikkitanno gede, anino insa daafira yee anenee qullaawa assoommo.

20«Ani insa daafira calla ikkikkinni, insa kultino qaalinni ane ammantannori daafirano huucci'reemmohe. 21Huucci'reemmohehu insa baalunku mitto ikkitanno gedeeti. Anna'ya, ati anenni, anino atenni noommonte gede, insano ninkenni heedhanna, tini gobbano soottoeta ammantanno gedeeti. 22Ninke mitto ikkinoommonte gede, insano mitto ikkitara, anera oottoe ayirrinye oommonsa. 23Ani huucci'reemmohehu ani insanni, ati anenni noottonte gede, insano co'onta mitto ikkiteenna, tini gobba soottoetanna insano baxoottonsata affaraati.

24«Anna'ya, tini gobba kalaqantukkinni baxoottoe daafira, kuri ayirrinye'ya la'ara oottoeri ani noommowa ledo'ya heedhara hasi'reemmo. 25Keeraancho Anna'ya! Tini gobba diegentinohe; ani kayinni egennoommohe. Kurino ati soottoeta egentino. 26Ati ane baxootto baxilli insawa hee'raranna anino insawa hee'reemmo. Insano ate egentara assoommo. Egentanno gede assa diagureemmo» yii.

Currently Selected:

YOHAANNISI 17: QulMax

Highlight

Copy