KALAQAMA 32

YAIQOOBI EESAWU LEDO XAADARA QIXXAAWI

1Yaiqoobi ha'ranni hee'reenna doogote Maganu sokkaasine isinni xaaddu. 2Isino insa afiti, «Kuni Maganu qachaati» yee, hakkonne darga Mahinayimi#32:2 Mahinayimi yaa Ibiraawootu afiinni lame qachaati yaate. yii.

3Hakkunni gedensaanni Yaiqoobi Edoomi gobbara Seiiri yinanni baattora hee'rannohuwa rodiisi Eesawuwa alba qole manna soyi. 4Soqqino mannirano, «Mootichi'ya Eesawura: Soqqamaanchikki Yaiqoobi, ‹Ani xaa geeshsha Laabawa keeshshoommo; 5lalo, harre, hooffille saada, meyanna labbaa borojjeno afi'roommo; xa kune haa'rattoe gede, ate mootichi'yawa manna soqqoommo› yiino yitine kullesi» yiinsa.

6Sonkoonni mannino Yaiqoobiwa galagale hige, «Rodiikki Eesawuwa marroommo; isino atenni xaadara daanni no; ledosi 400 manni no» yite kultusi. 7Yaiqoobino lowo geeshsha waajje, ledosi noo manna, ge'reewo, me"e, lalonna gaala baalanka lamewa beehi. 8Togo assinohuno, «Eesawu daye mitto widoonni noore gawajjiha ikkiro wole widoonni noohu gatanno» yee hedeeti.

9Qoleno, «Annuwa'ya Abirihaaminna Yisihaaqi Magano! Huuccatto'ya macciishshie. ‹Danchumma asseemmohena ilamootto gobba ayiddikkiwa higi› yoottoe Kaaliiqa! 10Ani borojjichikki kageeshshi geeshsha maaronna shaqqille leellishattoera hasiisannoeha di"ikkoommo; Yordaanoosi Waa fulummo waro, siqqicho'ya calla anga adhe noommo. Xa kayinni 2 tayishsha ikkoommo. 11Daye anenna meento'ya oosonke ledo gudannonke yee waajjoommona, rodii'ya Eesawu anganni gatisie. 12Atino ‹Halaalinta danchare asseemmohe; sirchokkino batinyunni kainohunni kiirrannikkiha baaru shaafi geeshshiha asseemmo› yoottota qaagi» yee huucci'ri.

13Hakko hashshano hakkiicho gali. Noosihu duuchunku giddonni rodiisi Eesawura afansha fushshi. 14Afanshaho fushshino saadano: 200 me"enna 20 meu gocca, 200 ge'reewonna 20 ge'reewu gocca, 1530 qalaante gaala qalimminsa ledo, 40 lalo 10 woraamma, 20 xala harreetinna 10 wodalaati. 16Saadano gaamo gaamotenni bade soqqamaasinesi anga wore, «Albaanni sa'ine gaamo gaamotewiinni fafissine ganne» yii. 17Albaanni nooha, «Rodii'ya Eesawunni xaadatto yannara, ‹Ati ayeho? Hiikkiira hadhanni nootto? Tini gantanni nootto saadano ayete?› yee xa'mihero, 18‹Tini saada soqqamaanchikki Yaiqoobite; isi tenne saada mootichi'ya Eesawura afansha asse soyino; isino kune badhenkeenni daanni no› yii» yee hajajisi. 19Layinkiha, sayikkihanna saadate hoode noore baalanka, «Eesawunni xaaddinanni woyite hattonni yitine kullesi; 20wolentenni, ‹Kuneeti soqqamaanchikki Yaiqoobi badhenkeenni daanni no› yaa habbinoonte» yii. Togo yiinohuno, «Alba assine massinanni afanshinni araarameemmo; hakkunni gedensaanni isinni xaadeemmo woyite albasi la"a dandeemmo» yee hedinohuraati. 21Kunni garinni afanshasi balaxe soyihu gedensaanni, isi hakko noowa gali.

YAIQOOBI MAGANU LEDO SHARRAMI

22Hakkonne hashshanni Yaiqoobi kae, lamenta meentosi, lamenta irkote meentosi, tonaa mitenta oososi adhe Yaabooqi waa widoonni fuli. 23Insa haa're fushshihu gedensaanni, jajjasi baalankano ledo soyi. 24Yaiqoobi kayinni waa gama kawaanni callisi gati.

Mittu manchino sooda geeshsha ledosi sharramanni gali. 25Hakku manchi Yaiqoobi sharrame qeela hoogita afe, giwooda ganisi; Yaiqoobi sharramanni hee'reenna luqqeetto darginni ka'usi. 26Hakkunni gedensaanni manchu, «Soodaraatina agurie» yiisi.

Yaiqoobino, «Maassi'rittoekkinni diagureemmohe» yiisi. 27Manchuno, «Su'mikki ayeti?» yee xa'misi.

Isino, «Su'mi'ya Yaiqoobiiti» yee kulisi. 28Manchu qole, «Kunni ka'a su'makki Yaiqoobi diyinanni; Maganunna manchu ledo sharrante qeelootto daafira, su'makki ‹Israeeli›#32:28 Israeeli yaa Ibiraawootu afiinni Maganu ledo sharramanno woy Maganu sharramanno yaate. yinanni» yiisi. 29Yaiqoobino, «Ate su'mi ayeti?» yee xa'mi.

Manchuno, «Su'ma'ya mayira hasi'rootto?» yee kae, Yaiqoobi maassi'risi.

30Yaiqoobi, «Magano ille'yanni lae, xaa geeshsha lubbotenni noommo» yee, hakkonne darga su'ma, «Phiinieeli»#32:30 Phiinieeli yaa Ibiraawootu afiinni Maganu alba yaate. yii. 31Phiinieeli sa"anni hee'reennanni arrishsho fultu; isino giwoodu xissinosi daafira dinanni no. 32Yaiqoobira luqqeetto darginni ka'ino daafira, Israeele techo geeshsha luqqeettote maala di"ittanno.

Currently Selected:

KALAQAMA 32: QulMax

Highlight

Copy