KALAQAMA 33

YAIQOOBI EESAWU LEDO XAADI

1Yaiqoobi gotti yee la"anno woyite, Eesawu 400 manna hoodete adhe daanna afi. Oososino beehe Liya, Raaheelinna lamenta irkote meentisi anga wori. 2Umo asse lamenta irkote meentosi oosonsa ledo albaanni sayisi; hakkiinni aanche Liyanna oosose sayisi; Raaheelinna Yooseefi kayinni baalunkura gedensaanni hadhanno gede assi. 3Yaiqoobi wo'munkura albaanni hige ha'ri; rodiisi Eesawuwa gamba yiiti, albunni baatto kisanni 7 hige heeshshi gotti yaanni keere ha'risi. 4Eesawu kayinni, isi ledo xaadara dode shiqqi yee, goowisira marmarame sunqisi; lamunku hagiirrunni kainohunni wi'litu. 5Eesawu wirri yee la"anno woyite meentonna ooso afe, «Kuni ledokki noohu aye mannaatiyya?» yii. Yaiqoobino, «Mooticha'ya! Kuri Maganu shaqqillisinni uyinoe oosooti» yee dawari. 6Hakkunni gedensaanni, lamenti irkote meentisi oosonsa ledo daye umo heeshshi yee keere haa'ri. 7Aantete Liyanna oosose daye umo heeshshi yee keere haa'ri; goofimarchoho Yooseefinna Raaheeli daye umo heeshshi yee keere haa'ri.

8Eesawuno, «Alba qolle gannanna doogo xaadummo saada mayinniteyya?» yii.

Yaiqoobino, «Mooticha'ya, hatti saada haa'rattoeha ikkiro yee atera soommohete» yii.

9Eesawuno, «Rodoo'ya! Anera ikkitanno geeshshi saada nooena, atehu ateralla ikkohe» yii.

10Yaiqoobi kayinni, «Dee'nina, halaalinta haa'rattoeha ikkiro eeggatena afansha'ya adhie; baxillekki leellishsheennae, albakki la"a anera Maganu alba la"ate gedeeti. 11Kunnira, eeggatena konne shiqishoommohe afansha adhie; Maganu shaqqillisinni hasiisannoere baala uyinoena» yii. Yaiqoobi duu're huucci'rino daafira, Eesawu afanshasi adhi.

12Eesawuno, «Kai ha'nona; ani albaanni hige ha'reemmona» yii.

13Yaiqoobi kayinni, «Mooticha'ya, ooso jawaattinore ikkitinokkita ati afootto; qansidhanno saadara, wilii'linsaranna siittinsara qoropha hasiissannoe; mitto barra nafa muddine ganniro saada baalanti gooffanno. 14Kunnira, ani suutunni hoodekki dayemmona, mooticha'ya eeggatena ati balaxxe ha'ri; saadatenna oosote wolqa deerrinni qaafanni Seiiri iilleemmohena» yii.

15Eesawuno, «Hatto ikkiro ane manni giddonni shiima manna atewa agure ha'roni?» yii.

Yaiqoobi kayinni, «Atilla haa'rittoe woyite woliri mitturino dihasiisannoe» yii. 16Eesawu hakko barranni Seiiri ha'rara kai. 17Yaiqoobi kayinni, Sukooti hari; hakkiicho umisira mine mi'ne saadateno hoowe hoophi; kunninni kainohunni hakkonne darga Sukooti#33:17 Sukooti yaa Ibiraawootu afiinni haraho woy daaseho yaate. yini.

18Yaiqoobi Mesiphexoomiyunni higi yannara Kana"aani gobba Sekeemi yinanni katama keerunni iilli. Hakkiichira mare katamaho albaanni noo xawira baxxisi'ri. #33:18 baxxisi'ri yaa shiima yanna calla taqante agurre ha'nanni darga seekki'ri yaate. 19Dukkana qasi'ranno uulla Sekeemi anni Hamoori oosowiinni 100 kinchu birrinni hidhi. 20Hakkiichono kakkalote darga seekke, Maganu Israeelete Maganooti yii.

Currently Selected:

KALAQAMA 33: QulMax

Highlight

Copy