KALAQAMA 31

YAIQOOBI LAABA AFIKKINNI FULE HA'RI

1Laabati labballi ooso, «Yaiqoobi anninke jiro gudhe dureessa ikkino» yite hasaabbanna Yaiqoobi macciishshi. 2Laaba alba la"anno woyiteno, bashsho geeshsha ikkinosikkita afi. 3Kaaliiqino Yaiqoobira, «Ledokki hee'reemmona, galagalte annikki gobba fiixikkiwa higi» yiisi.

4Kunnira Yaiqoobi Raaheelinna Liya saada allaa'le noowa daanno gede woshshiishe, 5«Anni'ne bashsho geeshsha ikkinoekkita afoommo; ikkirono anni'ya Magani ane ledo no. 6Ani nooe wolqa duuchantenni anni'nera soqqamoommota affinoonni. 7Anni'ne kayinni daafuri'ya waaga 10 hige soorranni doginoe; Maganu kayinni gawajjaera wore diagurino. 8Daafurikki waagi burroota ikko yiieta, saada burroota qaltinoe; qoleno daafurikki waagi muraamurroota ikko yiieta, saada muraamurroota qaltinoe. 9Maganuno anni'ne saada haa're anera uyinoe.

10«Saada gocca uurritanno yannara, badhe sa'annoti meu gocca muraamurroota burrootanna eleellaamma ikkitinota haaqeete afoommo. 11Maganu sokkaasinchi haaqeete, ‹Yaiqoobi!› yee woshshinoe. Anino, ‹Yee› yoommo. 12‹Me"eho badhe sa'anno gocca burroota, muraamurrootanna eleellaamma ikkitinota lai. Laaba ate aana assino sao afoommo daafira konne coye assoommohu aneeti. 13Qaaggote kincho kaasse, zayite dunte xa'nitto darga Beeteli leellummohe Magani aneeti; xa ka'e tenne gobbanni fulte, ilamootto gobba higi› yiinoe» yiinsa.

14Raaheelinna Liya qole, «Anninke mininni adhineemmori gantori nooni? 15Isi ninke wole gobba manni gede asse kiirinonke. Ninkeno hire itino. 16Kunnira, Maganu anninkewiinni haa're uyinoheti tini jiro baalanti ninketenna oosonkete; atino Maganu yiinohere baala assi» yiisi.

17Yaiqoobino ha'rara kae, oososinna meentosi gaalla gulufisiisi. 18Saada baalantanna, Mesiphexoomiyaho hee're afi'rinore baala adhe annisi Yisihaaqi gobba Kana"aani ha'ri. 19Laaba ge'reewu orda haxi'rara ha're hee'reenna Raaheeli angatenni bonce seekkinoonnita annise maganna moorte adhitu. 20Yaiqoobino, ha'rannota kula hoogasinni Sooriyicha Laaba doginosi. 21Yaiqoobi noosire baalanka adhe ha'ri; Efiraaxisi Waa fule, alba gaaraame Geleaadi gobba widira hige ha'ri.

LAABA YAIQOOBI FAANA GANI

22Yaiqoobi ha'rinota Laabara sayikki barra kulloonnisi. 23Ayiddisi ledo 7 barri doogo geeshsha hordofe, gaaraame Geleaadi gobbara mare iilli. 24Maganu hashsha haaqeete Sooriyichu Laabawa daye, «Yaiqoobira busha coye coyi'rattosikki gede qorophi» yiisi. 25Yaiqoobi gaaraame Geleaadi gobbara dukka'ne hee'reenna Laaba mare iilli; iillihu gedensaanni isino ayiddisi ledo hakkiicho dukka'ni.

26Hakkunni gedensaanni Laaba Yaiqoobira, «Togo mayira assittoe? Aneno mayira dogittoe? Seenne'yano qafandoonni manni gede assite mayira muddite haadhe ha'ritto? 27Kulittoekkinni maaxante ha'ratenni mayira dogittoe? Kuloottoeha ikkoommero, hagiirrunninna faarsotenni, dibbetenninna baganunni geegiissineemmohe. 28Seenne'yanna seenni'ya ooso sunqe keerunni yeemmota mayira hoolittoe? Tinino hambekkiiti. 29Gawajjammo'nera dandeemmo; kayinnilla, ankarro anni'ne Magani, ‹Yaiqoobira busha coye coyi'rattokki gede qorophi› yee kulinoe. 30Annikki mini quqquxihero ha'rattota afoommo; maganna'ya kayinni mayira mooritto?» yee xa'misi.

31Yaiqoobino daware, «Togo assoommohu seennekki anga'yanni wolqatenni adhattoeha laweennae waajjeeti. 32Magannakki adhinohu giddonke hee'riro kayinni reyo; aterichi anewa hee'riro fiixinke albaanni hasidhe adhi» yiisi. Yaiqoobi konne coy'rinohu Raaheeli moortinota afinokkihuraati.

33Laaba Yaiqoobinna Liya dukkani, qoleno lamente irkote meentisi dukkani giddorano e"e hasi; kayinnilla mittoreno diafino. Liya dukkaninni fule, Raaheeli dukkana ei. 34Raaheeli magannasi haadhe gaalu koorira woroonni maaxxe, iimaho ofoltu. Laabano dukkanu giddo baalankawa hasi; kayinnilla mittoreno diafi'rino. 35Iseno annase, «Ka"a hoogoommahu godowu dayinoe daafiraatina, mooticha'ya hanqitootie» yitusi. Isino hasi'rinota ikkinnina magannasi diafi'rino.

36Yaiqoobino hanqe Laaba borooranni, «Ani ma"assummohe? Kageeshshi geeshsha shorrattoere assoommoni? 37Xa uduunne'ya duuchanka findigge hasi'rootto; ateha mitto uduunnichono diafootto. Hanni konne coye yoonkena fiixinkewa massino. 38Lemoo diro wo'ma ate ledo hee'roommo; ge'reewikkinna meikki fushshe dihunino; saadakki giddonni mitto wilii'lichono di"itoommo. 39Moyichu itinoha nafa riqiwoommohe ikkinnina cage haa're diabboommohe; hashshano barrano mooraminoha baala baatisiisoottoe. 40Barri fooggalinna hashshi qiidi qarrisinoe; gaari'yano gamba diyiino. 41Minekki 20 diro hee'roommo; 14 diro lamente seennikki daafira yee, 6 diro saadakki daafira yee daafuroommo; hakkiinnino sa'e daafuri'ya waaga 10 higge soorrootto. 42Anni'ya Yisihaaqi magansi'rannohu Abirihaami Magani ledo'ya hoogoommero, mulla anganni ha'risse hoogoottoe; Maganu ankarro rufinohehu qarra'yanna daafuro'ya laeeti» yiisi.

YAIQOOBINNA LAABA ASSIDHINO SHEEMAATE

43Laaba Yaiqoobira, «Kuni seennino seenne'yaati; qaaqquullinsano qaaqquulle'yaati; saadano saada'yaati; kuni la"attohu baalunku aneho; kayinnilla konne seenne'yanna insa ilino ooso asse hooleemmo gari dino. 44Atenna ane mereero malaate ikkanno gede xa amo sheemaate assi'nona» yiisi.

45Yaiqoobino kincho haa're sooddicha asse uurrisi. 46Qoleno fiixasi, «Kinna gamba asse» yii; insano kinna gamba assite duuntu; tenne duuno mule ofolte sagaleno ittu. 47Laaba kinnate duuno, «Yigarsahaduuta»#31:47 Yigarsahaduuta yaa Sooriyootu afiinni qaaggote duuno woy sooddicha yaate. yii. Yaiqoobi kayinni, «Galiidi»#31:47 Galiidi yaa Ibiraawootu afiinni qaaggote duuno woy sooddicha yaate. yii. 48Laaba, «Tini duuno techo atenna ane mereero malaateho» yii. Kunnira, hakkonne darga, Galiidi yitu. 49Laaba, «Badammeemmo yannara Kaaliiqi anenna ate mereero hee're agaronke» yiino daafira hakkonne darga, «Mitsipha»#31:49 Mitsipha Ibiraawootu afiinni agaranno darga yaate. yini. 50Qoleno Laaba, «Seenne'ya gawajjittonsaro woy insa aana wole seenne adhittoro, ani nafa afa hoogummoro anenna ate mereero Maganu noota habbooti. 51Anenna ate mereero kuneeti tini duunonna kuni sooddichi, 52ani atewa hige bunshete saeemmokki gede, atino bunshete anewa higge sa"attokki gede malaateho. 53Tenne xaaro diingummoro, Abirihaaminna Naakoori Magani yoonke» yii. Yaiqoobino annisi Yisihaaqi magansi'ranno Magani su'minni xaari. 54Ilaalu aanano kakkalo kakkale, fiixasi kakkalote sagale itanno gede woshshi. Insano dagge sagale itte ka'e, hakko ilaalaho galtu. 55Laabano soodo gute kae, seennesinna seennisi ooso sunqe maassi'rinsahu gedensaanni galagale qaesi ha'ri.

Currently Selected:

KALAQAMA 31: QulMax

Highlight

Copy