KALAQAMA 27

YISIHAAQI YAIQOOBI MAASSI'RI

1Yisihaaqi geedheenna ille afa gibbe heedheennasi, bayira beettosi Eesawu, «Beetto'ya!» yee woshshi; isino, «Yee» yii.

2Yisihaaqino, «Kune ani geedhoommo; reemmo barrano diafoommo. 3Kunnira, ugaaxattore worbichonna digaana adhite, dubbo hadhe ugaaxxe maala abbie. 4Reyummokkinni godowi'ya maassi'rannohe gede, coommitino sagale ani baxeemmo gede assite qixxeessite iteemmona abbie» yii.

5Ribiqano Yisihaaqi beettisira Eesawura yaannore macciishshitanni no. Kunnira, Eesawu ugaaxara ha'rita, 6Ribiqa beettisera Yaiqoobira, «Annikki Eesawura yiinore macciishshoomma. 7‹Ugaaxxe maala abbie; reyummokkinni ite Kaaliiqi albaanni maassi'reemmohena baxeemmo gede assite coommitanno sagale qixxeessie› yee coyi'ranna macciishshoomma. 8Xa maahoyyena beetto'ya, yeemmahere assi; 9-10annikki reyikkinni ite maassi'rannohe gede coommitanno sagale baxanno gede asse woreenna haadhe massattona marte saadate giddonni 2 meu goodanna haadhe abbi» yitusi.

11Yaiqoobi kayinni amasi Ribiqara, «Rodii'ya Eesawu biso baancaamoho; ane bisira kayinni mittu dananchino dino; 12miteekke anni'ya biso'ya amammade dogoommota afiro maassi'ra agure rumannoewe!» yiise.

13Amasino, «Beetto'ya! Rumo anera higgoena, yoommata calla macciishshite, hadhe goodanna abbie» yitusi.

14Isino mare abbe amasira uyi; amasino coommitino sagale annisi baxanno gede assite qixxeessitu. 15Ribiqano isewa mine noota bayiru beettiseta Eesawuta holgi uddano abbite, maa'nu beettisera Yaiqoobira uddisiissusi. 16Goodannu goga angasiranna shaqqadu goowisira xaaxxu. 17Wortinota coommitino sagale maalu ledo beettise Yaiqoobira uyitu.

18Yaiqoobino haa're annisiwa mare, «Annaanna!» yee woshshi. Annisino, «Yee beetto'ya; ati hiikkonne beetto'yaati?» yee xa'misi.

19Yaiqoobino annisira, «Ani bayira beettokki Eesawuuti; hajajoottoe gede assoommona, godowikki maassi'rannoe gede gotti yite ofolte, ugaaxe abboommo maala iti» yiisi.

20Yisihaaqino beettosi, «Beetto'ya! Hiitto rakke afi'ritto?» yee xa'mi. Yaiqoobino, «Kaaliiqi Maganikki qineesseennaeeti» yii.

21Yisihaaqino Yaiqoobira, «Beetto'ya hanni ati beetto'ya Eesawu ikkakkinna hoogakki amammade laeemmona anewa shiqqi yii» yiisi. 22Yaiqoobino annisi Yisihaaqiwa shiqqi yii; isino amammade lae, «Qoonqokki Yaiqoobi qoonqooti; anguwa kayinni Eesawu anguwa labbanno» yii. 23Yaiqoobi ikkinotano diafino; anguwasi rodiisi Eesawu anguwa gede baancaame ikkitino daafira maassi'rasira kai. 24Qoleno, «Halaalinta ati beetto'ya Eesawuunti?» yii.

Yaiqoobino, «Ee aneeti» yee dawari.

25Yisihaaqino, «Beetto'ya godowi'ya maassi'rannohe gede ugaaxxe abbootto maala iteemmona shiqqi assi» yiisi. Isino shiqqi asseennasi iti; woyinete xajjeno abbeennasi agi. 26Hakkunni gedensaanni annisi Yisihaaqi, «Beetto'ya! Shiqqi yite sunqie» yiisi. 27Yaiqoobino shiqqi yee sunqisi. Yisihaaqi Yaiqoobi uddano su'niissi're lae,

«Beetti'ya fooli,

Kaaliiqi maassi'rino gati fooli gedeeho.

28Kaaliiqi gordunni qufisanno loja oohe;

baattokkino shaqqishohe;

gidekkinna haaro woyinete xajjekki batisohe.

29Atera daga kumbuultohe;

gosa soqqantohe;

roduuwikki baalunkura roorricha ikki;

amakki oosono kumbuultohe;

runtannoheri rumantinore ikkito;

maassidhannoheri maassantinore ikkito» yii.

EESAWU YISIHAAQI MAASSO HUUCCI'RI

30Yisihaaqi maassi're kaisihu gedensaanni Yaiqoobi fule ha'ri; isi fulanni hee'reennanni, Eesawu ugaaxetewiinni dayi. 31Eesawuno coommitino sagale qixxeesse, annisira haa're abbi; annasino, «Anna'ya ka'e, godowikki maassi'rannoe gede ani beettikki ugaaxe abboommohe maala iti» yiisi.

32Yisihaaqino, «Ati ayeti» yee xa'mi. Isino, «Ani bayira beettokki Eesawuuti» yee dawari.

33Yisihaaqino lowo geeshsha mase huxi'ranni, «Ikkina, wona ayi ugaaxe abbinohalla itummo? Ati daattora mule heedheenna sagale ite maassi're kaoommo; maassono hakkunnita ikkite ka'ino» yiisi.

34Eesawu annisi yiinota macciishshihu gedensaanni, lowo geeshsha raare wi'lanni, «Anna'ya ballo, aneno maassi'rissie» yii.

35Yisihaaqino, «Rodiikki daye ane doge ate maasso adhino» yii.

36Eesawuno, «Isi ane xagaranna tini layinkite; Yaiqoobi yinoonnisihu anfeeti; kunni albaanni bayirroonye'yano adhino; xaano qole maasso'ya adhino. Afummona, anera gatisoottoti mitte maassono dinoni?» yii.

37Yisihaaqi qole Eesawura, «Balaxe iso ate mooticha asse kaoommo; ayiddisi baalunku isira soqqamanno gede assoommo; gidunna woyine batidhannosi gede yoommo; beetto'ya hanni atera ma"assohe?» yii.

38Eesawuno annisira, «Anna'ya ballo! Maassokki mitte callateni? Anna'ya ballo! Aneno maassi'rie» yee qoonqosi naggi asse wi'li.

39Annisi Yisihaaqino daware,

«Kuneeti shaqqado baattowiinni faffe hee'ratto;

gordu qufichono diafi'ratto.

40Bagadaancho ikkatto;

rodiikkirano borojjicho ikkatto;

giwittoro kayinni gadadishshisiwiinni fulatto» yiisi.

41Annisi maassi'rinosi daafira Eesawu Yaiqoobi murci're giwi; wodanisinnino, «Anni'ya muli barra reyanno; hakkunni gedensaanni rodoo'ya Yaiqoobi sheemmo» yee hedi.

42Ribiqa kayinni bayiru beettise Eesawu hedinore affe, maa'ne beettose Yaiqoobi woshshiishshe, «Rodiikki shaahera hedinona, 43xa beetto'ya yeemmahe gede ikki; rakke Kaaraani hee'rannohuwa rodii'ya Laabawa ha'ri; 44rodiikki hanqi qiida geeshsha, shiima yanna isiwa hee'ri. 45Rodiikki hanqi higeenna, assoottosire hawanno yannara hakkiinni soye abbisiiseemmahe; lamenka mayira mitto barra hoogeemma'ne» yitu.

YISIHAAQI YAIQOOBI LAABAWA SOYI

46Ribiqa Yisihaaqira, «Kunni Hitootu seenni ikkitonni heeshsho cee'mishshinoe; Yaiqoobi tenne gobba seenne adhannoha ikkiro lubbotenni ma"assi'rammara hee'reemma» yitu.

Currently Selected:

KALAQAMA 27: QulMax

Highlight

Copy