KALAQAMA 19
19
SODDOOMU CUBBO
1Lamenti sokkaasine hatte hawarro Soddooma e'u; Looxino Soddoomu Katami waalchira ofolle no. Isino insa afe haa'ransara kai; alba hige gombisame keere haa'ri. 2Qoleno, «Mootoolle'ya ballo! Ane borojjichi'ne minira ka'e; lekkano hayishshineenna'ne galtine, ga'a soodo guttine doogo'ne hadhinannina» yiinsa.
Insano, «Dee'ni, konne gudumaaleholla galleemmo» yitu.
3Isi kayinni lowo geeshsha huuccinonsa daafira, ledosi minisira hadhu; isino dancha sagale worsiisinsa; shiishinokki timano gasiiseennansa ittu.
4Wosinu goxikkinni hee'reenna hakko katami manni, aju akkali gatikkinni baalunku daye Looxi mine gaangeessi. 5Looxino woshshe, «Wona hawarro minikkira dayi manni hiikki? Insa ledo gonxeemmona gobbara fushshinke» yitusi. 6Looxi kayinni insawa nafarira fule, waalcho gobbaanni cufi. 7Insarano, «Manna'ya ballo! Konne busha coye assitinoonte. 8Kune labbaahunni xaade egenninokkiri 2 seenni nooena, insa gobbara fushsheenna'ne, baxxinita assidhe; mini'yara eino wosini aana kayinni mittoreno assitinoontena agurre» yiinsa.
9Insano, «Ka'a higi!» yitusi. Qolteno, «Ati diwole gobbanni dayottoho? Assineemmore ati kulattonke? Giwittoro insa aana assinammora hendoommohunni roore, ate aana busha coye assineemmo» yitusi. Kunni garinni Looxi xiibbe tugge waalcho hiiqqitara ka'u. 10Mine noori lamunku wosini hiixatte Looxi goshooshshe insawa minira eessite waalcho cuffu. 11Hakkunni gedensaanni, gobbaanni noo manna aja akkala baalanka ille ballisseenna waalchu noowa hasse hooggu.
LOOXI SODDOOMA AGURE FULI
12-13Lamunku wosini Looxira, «Konne atera ooso, seennu, balluwu woy wolu fiixi nooheni? Konne katama hunnammoraatina, fiixu noohero rakke fushshi'ri. Kunni manni bunshenni kainohunni raaranno manni raare batidhinota Kaaliiqi macciishshe, Soddooma hunnammora soyinonke» yitusi.
14Looxino fule seennesi huuccidhinore, «Kaaliiqi konne katama hunaraatina, ka'e rakkine kawiinni fulle» yee kulinsa. Insara kayinni haariimanni nooha lawinonsa. 15Duu'mo saaqquta sokkaasine Looxi, «Katamu ba"anno woyite ledo ba"attokki gede kai; ayiddaamakkinna lamenta seennekki haadhe fuli» yite mudditusi. 16Isi kayinni keeshsheenna, Kaaliiqi mararinosi daafira sokkaasine iso, galtesinna lamenta seennesi anga amadde katamu gobbaanni fushshitanno gede assi. 17Haadhe xawo fushshitunsahu gedensaanni mittichu, «Umokki gatisi; badhera higge la'ooti; kunni lagichirano uurritooti; ba"attokki gede ilaalu widira higge xooqi» yiisi.
18Looxino, «Mootoolle'ya ballo! Hatto assitinoonte"e. 19Ane soqqamaancho'ne baxxine lubbo'ya gatisate lowo galata assitinoonnie; ikkollana bao daggannoe yee waajjoommo daafira hakko ilaaliwa xooqe gata didandeemmo. 20Kuneeti kuni katami xooqe fulate mule no; isino shiima katamaati; lubbo'ya gatisi'reemmo gede hakkiira xooqeemmona agurre"e; isi shiima katamaati» yiinsa.
21Mittu sokkaasinchi, «Maahoyye yoottota haa'roommo; konne ati yaatto katama dihuneemmo. 22Rakke hakkiira fulte ha'ri; hakkiichira iillatto geeshsha mittorichono diasseemmo» yiisi. Kunnira, hakko katami su'ma Zooaari#19:22 Zooaari yaa Ibiraawootu afiinni shiimaho yaate. yini.
SODDOOMUNNA GOMOORU BAO
23Looxi Zooaari iillita arrishsho fultu. 24Kaaliiqi Soddoomunna Gomooru aana gordunni giiranna ruqano dirrisi. 25Hatte katamma, hakko lagichira noore baala, katammate heedhannorenna baattote mu'ra baalanka gudi. 26Looxi galteno badhera higge la'e, maxinete sooddicha ikkite gattu.
27Abirihaamino soodo gute kae, Kaaliiqi ledo hasaawi darga mari. 28Soddoomunna Gomoora gobbara noo lagicha woro qole la"anno woyite, hattenne gobba baalantera wiliile dolunnite gede ikkite ka'anna lai. 29Maganu Looxi hee'rannota lagaho noo katamma huni yannara Abirihaami qaagi. Kunnira Looxi hattenne bao mereerinni haa're fushshisi.
MOAABOOTUNNA AMOONOOTU SIRCHI DAYINO GARA
30Looxi Zooaari hee'ra waajjinohura hakkiinni fule, seennisi ledo gaaru aana noo godi giddo hee'ri. 31Mitto barra bayiriiditi maa'nete, «Anninkeno geedhino; sircho sa'neemmo gedeno adhannonkehu labbaahu gobbate aana dinona, 32amo anninkera woyinete xajje hayikkinse, ledosi gonxe isinni sircho sa'nona» yitu. 33Hakko hashshanni anninsara woyinete xajje hayikkise dimbisisi; bayiriiditi e'e annise ledo goxxu; isi kayinni goxxannanna ka'anna diafino.
34Layinki barrano bayiriiditi maa'nete, «Ankarro ani anni'ya ledo goxoomma; techo hashshano woyinete xajje hayikkinseenna, atino e'e ledosi goxi; kunni garinni sircho sa'neemmo» yituse. 35Layinki hashshano anninsara lede woyinete xajje hayikkise dimbisisi; maa'niiditino e'e ledosi goxxu; ise goxxannanna ka'annano diafino. 36Kunni garinni lamenti seenni anninsara Looxira godowi. 37Bayira labbaa beetto iltu; su'mano Moaabi#19:37 Moaabi yaa Ibiraawootu afiinni anni'ya ilinoho yaate. yite fushshitusi; isi techo geeshsha Moaabootu annaati. 38Maa'neno qolte labbaa beetto iltu; su'mano Beeni-Aami#19:38 Beeni-Aami yaa Ibiraawootu afiinni fiixi'ya beetto yaate. yite fushshitusi. Isino techo geeshsha Amoonootu annaati.
Currently Selected:
KALAQAMA 19: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
