Macaafa Isaayaas Raajichaa 30
30
Warra Gibxiitti Hirkachuun Akka Isaan Hin Gargaarre Himuu Isaa
1Waaqayyo,
<<Ijoollee ana didanii ka'aniif,
warra akeeka isa
akeeka koo hin ta'in qopheeffataniif,
warra fedha koo duuba
warra kaanii wajjin
tokkummaa dhaabbataniif,
warra cubbuus cubbuu irratti dabalataniif wayyoo*!
2Utuu ana biraa gorsa hin fudhatin,
gara biyya Gibxiitti gad in bu'u,
mootii Gibxiitti kooluu in galu,
gaaddisa Gibxii jalattis in baqatu*;
3mootii Gibxiitti kooluu
waan galtaniif garuu
in qaannoftu,
gaaddisa Gibxii jalatti
waan baqattaniifis in yeellaatu;
4angafoonni keessan
gara Zo'aan mandara Gibxii in dhaqan;
warri isin ergitanis
Haneesin mandara Gibxii in ga'an.
5Sabni sun yeelloo fi qaanii isaanitti fidu malee,
bu'aa hin qaban,
karaa tokko illee isaan gargaaruu
waan hin dandeenyeef,
hundumti isaanii in yeella'u>>
jedhee dubbateera*.#1 1:2 2 2Mot 18:21 5 Er 2:35-36
6Wanti bineensota
biyya gara-mirgaa irratti dubbatame,
warri ergamanis badhaadhummaa isaanii harreetti,
qabeenya isaaniis goba gaalaatti fe'anii,
biyya sodaanii fi rakkinni jiru keessa jooranii,
iddoo leenci dhalaanii fi
leenci kormi jiran
keessa darbanii,
iddoo mar'ataanii fi
bofni balali'u jiran
keessa adeemanii,
saba isaaniif waa'ee hin baafne
bira in dhaqan*;
7gargaarsi warra Gibxii waa'ee hin baasu,
afaan duwwaa dha;
kanaafan ani isaaniin,
<<Isheen jawwee galaanaa isa cal jedhee taa'uu dha>> jedhe*.#6 Kes 8:15 7 His 29:3; Far 89:10
Saba Wanta Gurra Isaatti Tolu Duwwaa Dhaga'uu Barbaadu
8Amma dhaqii fuula isaanii duratti
gabatee irratti caafi!
Macaafa maramu keessattis mallateessi!
Innis guyyaa booddeetiif hamma bara baraatti
dhuga-baatuu in ta'a;
9isaan saba ana didanii ka'anii dha,
warra sobduu,
warra abboommii Waaqayyoo dhaga'uu hin jaallannee dha*;
10isaan warra ilaaltuudhaan,<<Hin ilaalinaa!>>
warra mul'ata arganiinis,
<<Wanta qajeelaa nuuf hin arginaa,
wanta nutti toluu fi
wanta nutti fakkaatu
duwwaa nutti himaa*!
11Karicha isa qajeelaa sana irraa jal'adhaa,
daandii sana irraas goraa!
Waa'ee Waaqayyo isa qulqulluu
kan Israa'el sana
nutti hin himinaa!>> in jedhu.#9 1:4 10 Er 11:21-22; Hos 9:7-8; Amo 2:12; 7:12-13; Mik 2:6-7
12Kanaaf inni qulqulluun
kan Israa'el,
<<Sababii isin
wantan isinitti dubbadhu tuffattanii,
nama cunqursuutti amantanii,
micciiramummaattis hirkattaniif,
13yakki kun akka keenyan dheeraa
isa tatarsa'ee
dingata jigee hunkutaa'u
isin in godha;
14akkasumas akka qodaa suphee
isa caccabee hurraa'uu,
isa qiraaciin ittiin
ibidda fudhatan,
yookiis boolla bishaanii keessaa
bishaan ittiin waraabbatan illee
keessatti hin argamnee in taatu>> jedhe*.#14 Er 19:10-11
15Waaqayyo gooftaan
inni qulqulluun kan Israa'el,
<< <Isin yoo deebitanii fi
yoo gab jettan in fayyitu,
calluma jettanii isa yoo amanattaniif
in jabaattu>> jedhe;
isin garuu diddanii*,
16<<Lakkii! Nuyi fardeeniin
jalaa in fiigna>> jettan;
isin,<<Fardeen ariifatanii fiigan
in yaabbanna>> waan jettaniif,
warri isin ari'anis
akkasuma ariitiidhaan
isin in qaqqabu*;
17isaan keessaa namni tokko
yommuu isinitti ori'u,
isin keessaa namoonni kumni
isa in baqatu;
namoonni shan yommuu
isinitti ori'an immoo,
hundumti keessan in baqattu;
utubaa tulluu gubaa dhaabatuu fi
faajjii gaara irra jiru malee,
isin keessaa namni tokko illee
achitti hin hafu>> jedhe*.#15 7:9; Far 62:1-2 16 31:1,3 17 Kes 32:30; Lew 26:36
Waaqayyo Saba Isaa In Maara
18Waaqayyo garuu amma iyyuu
tola isaa isinitti argisiisuudhaaf
isin eegaa jira;
isiniif oo'uudhaafis ka'eera;
Waaqayyo gooftaan,
Waaqayyo isa firdiin isaa qajeelaa
waan ta'eef,
warri isa eeggatan haa gammadan!
19Ati yaa saba Xiyoon, yaa isa Yerusaalem keessa jiraattuu, si'achi hin boossu; yommuu ati iyyitu, akkuma sagalee kee dhaga'een inni tola isaatiin deebii siif in kenna*; 20Waaqayyo buddeena rakkinaa isiniif in kenna, bishaan dhiphinaas isin in obaasa; haa ta'u iyyuu malee, inni barsiisaa keessan isa deebi'ee isin jalaa hin dhokanne, isa isin ija keessaniin argitanii dha. 21Yommuu isin gara mirgaatti yookiis gara bitaatti adeemuudhaaf jettan, sagaleen tokko isin booddeedhaan isinitti dubbatee,<<Karichi isa kana, isa irra adeemaa!>> utuu isiniin jedhuu gurri keessan in dhaga'a; 22yommus isin waaqayyolii tolfamoo keessan warra meetiin itti uffifamee fi bifa fakkeenyaa isa warqeen itti uffifame in salphiftu; akka moofaa xuraa'ummaas gad isaan darbattanii,<<Ija keenya duraa badaa!>> isaaniin in jettu*.#19 65:24 22 27:9
23Yommus Waaqayyo sanyii isin maasiitti facaaftan irratti bokkaa in roobsa, laftis midhaan sonaan baay'ee in baasa; yeroo sana horiin keessan bakkee bal'aa marga lalisaa keessa isiniif in dheedu; 24qotiyyoonii fi harroonni qotiisa qotanis okaa miyaa'aa isa qorbiidhaa fi battoodhaan oofamee dura buufamee in nyaatu; 25yeroo riqaan masaraa diinaa jigee diinonni sun dhumanitti, tulluu gurguddaa hundumaa irraa, gaara dhedheeraa hundumaa irraas bishaan in burqa, laga keessas in yaa'a*; 26yommuu Waaqayyo caba saba isaatii walitti hidheefii, isa rukutee madeesses walitti fayyisuuf, jiini akka aduu in ifti, aduunis harka torba isa durii irra caalaa in ibsiti, kunis ifa guyyaa torbaa al tokkotti akka waan ibsituu ti.#25 Yoe 3:18
Waaqayyo Warra Asoritti Faraduuf Akka Jiru Dubbachuu Isaa
27Kunoo! Waaqayyo humnaa fi ulfinaan
fagootti in mul'ata,
aariin isaas akka ibidda boba'uu fi
akka aara gobbutti in ba'a,
in dheekkamas,
arrabni isaas akka ibiddaa
nama in fixa;
28hafuurri isaa akka bishaan guutuu
isa morma nama ga'uu ti;
inni gingilchaa badiisaatiin
saba lafa irraa in gingilcha,
luugama karaa irraa isaan kaachisus
afaan isaanii keessa in kaa'a*.
29Isin garuu yeroo sanatti faarfannaa
isa guyyaa ayyaana qulqulluu
galgala faarfatan
sana in faarfattu;
akka isa yeroo sabni ululleedhaan
faarfachaa gara tulluu Waaqayyootti
isa kattaa Israa'el
jedhamee beekametti
ol ba'u sanatti
garaa guutuudhaan in gammaddu*.#28 37:29 29 Kes 16:14; Far 18:2
30Waaqayyo sagaleen isaa inni surra-qabeessi
akka dhaga'amu,
irreen isaa inni rukutuudhaaf jedhus
akka argamu in godha;
inni aarii cimaadhaa fi ibidda
nama fixuun,
bokkaa yandoodhaa fi qilleensa jabaadhaan
cabbiidhaanis isaan in rukuta*;
31Waaqayyo sagalee isaatiin warra Asor in caccabsa,
ulee isaatiinis isaan in rukuta;
32Waaqayyo ulee adaba isaatiin
yeroo isaan rukutu hundumaatti
dibbee fi kiraarri in rukutamu;
inni immoo rukuttaa harka isaatiin
isaan in lola*;
33iddoon itti waa guban dur qophaa'e;
mootiin Asoris achitti in gubama;
iddoon ibiddaa sun
gad fagoodhaa fi bal'aa dha;
qoraan baay'eenii fi
ibiddi guddaan achi jira;
hafuurri Waaqayyo itti baafatus
akka dhagaa boba'uu
ibidda itti in qabsiisa.#30 33:3; Far 29:3-9 32 31:8
Currently Selected:
Macaafa Isaayaas Raajichaa 30: MacQul
Highlight
Share
Copy
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
