Macaafa Isaayaas Raajichaa 29
29
Yerusaalemiif Boo'uu Isaa
1Yaa Yerusaalem! Yaa iddoo aarsaa
ishee kan Waaqayyoo!
Yaa mandara Daawit
ishee inni keessa jiraatee,
siif wayyoo!
Cidha kee wagguma waggaatti
ittuma dabali!
2Yaa iddoo aarsaa ishee kan Waaqayyoo,
ani garuu sin rakkisa,
boo'ichii fi gaddi in ta'a;
kana booddees ati
anaaf akka iddoo aarsaa
lafa ibiddi irratti boba'uu in taata;
3ani ofii kootii karaa hundumaa
sitti nan marsa,
riqaa sitti nan naannessa,
kobiis si irratti ol nan kaasa*;
4yommus ati gad in deebita,
lafa itti gad deebite
sanaas in dubbatta;
dubbiin kee awwaara keessaa in dhaga'ama,
sagaleen kees akka sagalee ekeraa
boolla keessaa in ba'a;
akka kan warra lafa keessaa
hasaasaniis in ta'a.#3 His 4:1-3; Luq 19:43
5Hamajaajiin kee warri baay'eenis
akka awwaaraa in ta'u,
loltoonni warra nama sodaachisaniis
akka habaqii in tamsa'u;
kunis kan ta'u
battala liphsuu ijaa ti.
6Waaqayyo gooftaan maccaa bakakkaadhaan,
socho'a lafaatii fi sagalee guddaadhaan,
bubbeedhaa fi kakawweedhaan,
arraba ibiddaa isa nama fixuunis
isin in adaba.
7Loltoonni saba lafa irraa hundinuu
warri Yerusaalem iddoo aarsaa
ishee kan Waaqayyoo lolan,
warri ishee tuqanii ishee rakkisan,
warri iddoo baqaa ishee dhiphisan,
amma ishee irraa in ka'u,
akka abjuu halkaniis in ta'u*;
8akka nama beela'ee abjuudhaan
buddeena nyaatuu,
hirribaa yommuu ka'u immoo
garaan isaa duwwaa ta'uu,
akka nama dheebotee abjuudhaan
bishaan dhuguu,
hirribaa yommuu dammaqu immoo
bishaan dharra'ee gaggabuu,
sabni baay'een warri
saba Yerusaalemitti duulan,
kunoo, akkasuma in ta'u.#5-7 30:27-28; 17:14
Sababii Jaamummaa Isaaniitiif Isaan Ifachuu Isaa
9Mee akkasumatti itti fufaa!
Amma naasuun isinitti dhufa!
Dununfadhaa, jaamaas ta'aa!
Machaa'aa! Garuu daadhii wayniitiin miti.
Gatantaraas! Garuu
dhugaatii cimaadhaan miti.
10Waaqayyo hafuurri hirriba cimaa
akka isinitti dhufu godheera,
ija raajota keessanii cufeera,
mataa dura-butoota keessaniittis haguugeera;
11Mul'anni kun hundinuu isiniif akka macaafa mallattoodhaan cufamee ti; macaafa akkasii nama macaafa dubbisuu beekutti<<Dubbisi!>> jettanii yoo itti kennitan, inni immoo,<<Mallattoodhaan waan cufameef, ani kana danda'ee hin dubbisu>> in jedha; 12Nama macaafa dubbisuu hin beeknetti immoo <<Dubbisi!>> jettanii yoo itti kennitan, inni immoo,<<Ani macaafa dubbisuu hin danda'u>> in jedha.
13Waaqayyo,<<Sabni kun
dubbii afaan isaatiitiin
anatti in dhi'aata,
ulfinas anaaf in kenna,
garaan isaa garuu anattii fagoo dha;
akka abboommii namaatiin barsiifamanitti
ana in sodaatu*
14kanaaf ani saba kana irratti
dabalee dinqii nan godha,
ogummaa ogeessota isaanii nan balleessa;
afchaalummaa afchaalota isaaniis nan dhoksa>>
jedhee dubbateera*.
15Warra akeeka isaanii
Waaqayyo duraa fageessanii
dhoksuu yaalaniif,
warra dhoksaatti waa hojjettaniif wayyoo!
Isaan yaada isaanii keessatti
<<Eenyutu nu arga>>
Eenyutus nu beeka?>>
in jedhu*.
16Isin mataa miilla gootanii,
miilla mataa gootan;
supheen isa suphee dha'u
ta'uu danda'aa ree>>
Wanti harka namaatiin hojjetame tokko
isa isa hojjeteen,
<<Ati ana hin hojjenne>> jechuu danda'aa ree>>
Wanti namni tokko tolche,
isa isa tolcheen,
<<Inni hubachuu hin danda'u>>
jechuu danda'aa ree*?#13 1:15; Mat 15:8-9 14 5:21; Er 8:8-9; 1Qor 1:19-20 15 Far 10:11 16 45:9
Yeroo Gaariin Israa'eliif Akka Dhufu Himuu Isaa
17Yeroo muraasa booddee Liibaanon iddoo dhaabaa
isa muka ija godhatu baasuu in ta'a,
iddoon dhaabaa muka ija godhatuu immoo caakkaa in ta'a*;
18bara sanatti warri duudan,
isa macaafa keessatti caafamee jiru in dhaga'u;
iji warra jaamotaas,
dukkana limixii keessatti illee in arga*;
19ammas warri gadadamoonni,
warri hiyyeessonnis,
Waaqayyo isa qulqulluu
kan Israa'elitti
in gammadu.
20Warri nama cunqursan in badu,
warri ga'iftuun in dhumu!
Warri nama irratti hamaa yaadan hundinuus
lafa irraa in balleeffamu;
21warri dubbii sobaatiin
maqaa namaa balleessan,
warri balbala kellaa duratti
nama dhugaadhaaf falmu dura
kiyyoo kaa'an,
warri sobaan dhugaa ba'anii
firdii nama duraa jal'isiisanis in dhumu*.#17 32:15 18 35:5 21 5:23; Amo 5:10
22Kanaaf Waaqayyo inni Abrahaamin fure,
sanyii Yaaqoobiin,
<<Yaaqoob si'achi hin yeella'u,
qaanna'ees fuula hin badu;
23ijoollonni isaa hojii ani
isaan gidduutti hojjedhe
yommuu argan,
isaan maqaa koo qulqullinatti in eegu,
ana isa qulqulluu kan Yaaqoobiif
ulfina in kennu,
ana Waaqayyo isa kan Israa'el in sodaatu;
24warri yaadni isaanii karaa irraa kaate
deebi'anii in hubatu,
warri gungumtuunis barumsa in fudhatu>> jedhe.
Currently Selected:
Macaafa Isaayaas Raajichaa 29: MacQul
Highlight
Share
Copy
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
