Macaafa Lallabaa 9
9
Dhumni Nama Hundumaa Tokkicha Ta'uu Isaa
1Ani wanta kana hundumaa garaatti qabadheera, qoreeras; namoonni qajeelonnii fi ogeeyyiin hojii isaanii wajjin harka Waaqayyoo keessa jiru; wanti isaan eeggatu jaalala ta'ee fi jibba ta'ee isaa namni beekuu hin danda'u. 2Nama hundumaatti isa qajeelaa fi isa jal'aatti, isa gaarii fi isa gadheetti, isa qullaa'aa fi isa qullaa'aa hin ta'initti, isa gaarii fi isa cubbamaatti, isa kakuudhaan dubbii isaa jabeessuu fi isa kakachuu sodaatutti wanta tokkichatu dhufa*.#2 2:14; Iyo 9:22
3Wanta aduu jalatti hojjetamu hundumaa keessaa inni hamaan isa namoonni hundinuu dhuma tokkicha argatanii dha; kanuma irratti iyyuu garaan ilmaan namootaa hamminaan guutuu dha, bara jiraatan hundumaattis maraatummaan garaa isaanii keessa jira; kana booddee immoo in du'u*. 4Garuu warra jiraatan gidduu kan jiraatu abdii qaba; leenca du'e irra saree jiru wayya.#3 8:11-12
5Warri jiran akka du'an beeku,
warri du'an garuu waan tokko iyyuu hin beekan,
gatii dadhabbii isaaniis deebi'anii hin argatan,
seenaan isaaniis hin yaadatamu;
6jaalalli isaanii fi jibbi isaanii,
hinaaffaan isaaniis egaa badeera;
wanta aduu jalatti hojjetamu hundumaattiis
si'achi qooda tokko illee hin qaban.
7Waaqayyo amma hojii kee faara tolaadhaan waan ilaaluuf,
egaa ati dhaqii buddeena kee gammachuudhaan nyaadhu,
daadhii waynii kees garaa qulqulluudhaan dhugi*!
8Yeroo hundaas uffata adii uffadhu,
mataa kees dhadhaa ejersaa dibadhu!#7 2:24-25
9Bara jireenya kee isa waa'ee hin baafne hundumaa kana keessatti haadha manaa kee ishee jaallattuu wajjin jireenyatti gammadi! Aduu jalatti isa kanatti akka jiraattuuf Waaqayyotu siif kenne; bara jireenya kee isa waa'ee hin baafne hundumaatti wanta ati aduu jalatti itti dadhabdee hojjetteef qoodni kee isa kana*. 10Wanta harki kee hojjechuu beeku hundumaa humna kee guutuudhaan hojjedhu! Iddoo lafa jalaa lafa dhaquuf jirtu sana, hojjechuun, itti yaadanii waa qopheessuun, beekumsi, ogummaanis hin jiru.#9 Fak 5:18-19
11Ammas aduu jalatti waan
tokko nan arge;
innis isa fiiganii
nama dura darbuu dadhaban,
lolanii mo'uu dadhaban,
ogeessa ta'anii buddeena dhaban,
afchaala ta'anii sooromuu dadhaban,
waa hojjechuu utuma beekanii
jajamuu dadhabanii dha;
isaan kana hundumaattis
yeroon tokkichii fi wanti
tokkichi in dhufa.
12Namni yeroo kamitti
maal akka itti dhufu
beeku hin jiru;
akka qurxummoonni kiyyootti galanii qabamanitti,
akka simbirroonni
jigoo jala lixanii qabamanittis,
akkasuma ilmaan namootaa
yeroo hamaa isa dingata
isaan irratti lafa dha'uun in qabamu*.#12 8:8
Ogummaan Akka Waa'ee Baaftu Himuu Isaa
13Ammas ani aduu jalatti wanta ogummaa guddaa anatti fakkaatu tokko nan arge; 14innis, mandarri xinnoon namoonni muraasi keessa jiraatan tokko turte; mootii guddaan tokko dhufee lola itti kaasee ishee marsee, wanta ittiin masaraa ishee yaabanis guddisee naannessee itti in ijaare. 15Namni hiyyeessi achi keessa jiraatu tokko immoo ogummaa isaatiin mandarattii badiisa in oolcha ture, garuu namichi hiyyeessi kun achi akka jiru namni tokko illee hin yaadanne; 16kanaafan,<<Ogummaan jabina irra in caalti>> jedhe; haa ta'u iyyuu malee, namichi kun hiyyeessa waan ta'eef, ogummaan isaa in tuffatame, dubbii isaas namni dhaga'u hin turre*.#16 Fak 24:5
17Isa namni biyya mo'u
gowwoota gidduu dhaabatee iyyu
dhaggeeffachuu mannaa,
dubbii ogeessotaa gabiitti
dhaggeeffachuu wayya;
18ogummaan mi'a waraanaa irra caalti,
garuu namni cubbamaan tokkichi
wanta gaggaarii baay'ee in balleessa.
Currently Selected:
Macaafa Lallabaa 9: MacQul
Highlight
Share
Copy
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
