Macaafa Saamu'el Isa Lammaffaa 18

Abiishaalom Rukutamee Ajjeefamuu Isaa

1Daawit loltoota isaa wajjin jiran kuma kumaan, dhibba dhibbaan toora galchee angafoota kumaa fi angafoota dhibbaa itti in godhe. 2Daawit mootichi itti aansee loltoota harka sadii keessaa harki tokko geggeessaa Yo'aabiin, harki tokko geggeessaa Abiishaayi obboleessa Yo'aab isa Zeruyaan deesseen, harki tokko immoo geggeessaa Iitaayi nama Gaatiin akka adeemaniif in erge; yommuu loltoota isaa erges,<<Anis ofii kootii dhugumaan isinii wajjin duulaaf nan ba'a!>> isaaniin jedhe. 3Isaan garuu deebisaniifii,<<Nuyi baqannee gara booddeetti yoo deebine iyyuu, nu keessaa harki walakkaan yoo ajjeefame iyyuu, warri nu lolan kana waan guddaatti hin lakkaa'an; ati garuu akka kuma kurnan keenyaatti in ilaalamta; kanaaf ati lolaaf hin ba'in! Mandara keessa teessee nu gargaaruu kee wayya>> jedhan*. 4Kana irratti mootichi,<<Wanta gaarii ta'ee isinitti mul'atu nan godha>> isaaniin jedhe; yommus mootichi karra bukkee in dhaabate, loltoonni immoo dhibba dhibbaan, kuma kumaan lolaaf in ba'an. 5Mootichi yeroo sanatti Yo'aabiin, Abiishaayiin, Iitaayiinis,<<Anaaf jedhaatii Abiishaalom dargaggeessicha irra harka qabaa!>> jedhee in abboome; waa'ee Abiishaalomiif Daawit mootichi angafoota hundumaaf abboommii kennuu isaa loltoonni hundinuu in dhaga'an*.#3 21:17 5 18:12; 14:21; 19:7

6Loltoonni Daawit, Israa'eloota Abiishaalom duukaa jiran loluudhaaf lafa duulaatti in ba'an; lafti isaan itti wal rukutan caakkaa Efreem keessa ture. 7Achitti loltoonni Daawit, loltoota Israa'el rukutanii in mo'an; lolli guyyaa sanaa jabaa waan ta'eef, nama kuma digdamatu dhume. 8Waraanni guutummaa biyyichaa wal ga'e; namoota billaadhaan ajjeefaman irra namoota caakkaa keessatti dhumantu caale.

9Abiishaalomii fi loltoonni Daawit utuu hin beekin walitti in ba'an; Abiishaalom gaangoo isaa yaabbatee in adeema ture; gaangichi qilxuu guddaa damee gobbuu qabu jala utuu darbuu, mataan Abiishaalom mukicha keessatti in qabame; yommus gaangoon inni yaabbatee adeemu darbee in sokke, Abiishaalom garuu lafa hankaakee rarra'ee in hafe. 10Loltoota Daawit keessaa tokko kana argee,<<Kunoo, Abiishaalom muka qilxuutti rarra'ee utuu jiruu ani argeera>> jedhee Yo'aabitti in hime. 11Yo'aab immoo namicha dubbii kana isatti himeen,<<Egaa erga isa argitee, maaliif rukuttee achumatti lafaan isa dha'uu dhiifte>> Silaa ani meetii guroo kudhan isa akka graamii dhibbaa fi kudha shanii miijanuu fi sabbata loltuu siif nan kennan ture>> jedhe. 12Namichi sun garuu deebisee,<<Utuu ati meetii guroo kuma tokko isa akka kiilo graamii kudha tokkoo fi walakkaa miijanu harkatti anaaf kennitee iyyuu, ani ilma mootichaatti harka koo hin buusu! Mootichi utuu nuyi dhageenyuu,<<Abiishaalom dargaggeessichi akka hin miidhamneef anaaf eeggadhaa!>> jedhee si, Abiishaayii fi Iitaayin abboomeera*. 13Ani gowwoomee mootichaaf abboomamuu dhiiseera utuun ta'ee, dubbii kana mootichi dhaga'uun isaa hin hafu waan ta'eef, jireenya koo rakkinatti galchuu koo ti; ati immoo kana anatti in dhiifta turte>> jedhe. 14Kana irratti Yo'aab,<<Ani kanatti yeroo koo sii wajjin balleessuu hin barbaadu>> jedhee, eeboo sadii fudhatee, Abiishaalom muka qilxuutti rarra'ee lubbuun isaa utuu keessa jiruu, onnee isaa in waraane. 15Dargaggoonni kudhan warri mi'a waraanaa Yo'aabiif baatan, Abiishaalomitti marsanii rukutanii isa in ajjeesan. 16Yo'aab lolli akka dhaabatuuf fiinoo in afuufsise; loltoonni isaa kana irratti Israa'eloota duukaa bu'anii ari'uu dhiisanii in deebi'an. 17Warri yeroo sanatti Yo'aab bira jiran reeffa Abiishaalom fuudhanii, caakkaa keessatti boolla guddaa tokkotti darbatanii, dhagaa gurguddaa isa irra in tuulan; Israa'eloonni isa duukaa turan hundinuu immoo gara mana mana isaaniitti in baqatan*.#12 18:5 17 Iya 8:29

18Abiishaalom,<<Maqaan koo kan ittiin dha'amu ilma hin qabu>> jedhee waan yaadeef, utuu jiruu dachaa isa <<Dachaa mootii>> jedhamu keessa utubaa tokko qajeelchee seenaa ofii isaatiitiif in dhaabe; inni utubaa sana maqaa ofii isaatiitti in moggaase; utubichi hamma har'aatti iyyuu<<Utubaa Abiishaalom>> jedhamee in beekama*.#18 14:27; Isa 56:4-5

Daawit Abiishaalomiif Boo'uu Isaa

19Ahimaaz ilmi Zaadoq yommus Yo'aabiin,<<Hadaraa, fiigeetan Waaqayyo dhugaa mootichaa baasee, harka diinota isaa akka isa oolche mootichatti misraachoo hima>> jedhe*.

20Yo'aab immoo deebisee,<<Har'a oduu kan himu si miti; guyyaa biraa garuu in himta; ilmi mootichaa waan du'eef, har'a ati oduu hin himtu!>> ittiin jedhe*. 21Yo'aab yommus nama Kuush tokkoon,<<Dhaqiitii wanta argite mootichatti himi!>> jedhe; namni Kuush sunis Yo'aabiif erga qoomma'ee booddee fiigichaan in sokke.

22Ahimaaz ilmi Zaadoq ammas Yo'aabiin,<<Waanuma fedhe haa ta'u malee, hadaraa anis immoo Kuushicha kana booddeedhaan nan fiiga>> jedhe; Yo'aab immoo,<<Yaa ilma ko, misraachoo himtee kan waa fudhattu'o mitii, maaliif,<<Nan fiiga malee>> jetta?>> jedhee in gaafate. 23Ammas Ahimaaz,<<Waanuma fedhe haa ta'u nan fiiga malee>> ittiin jedhe; kana irratti Yo'aab<<Fiigi kaa!>> jedheen; Ahimaaz karaa dachaa Yordaanos keessa ba'ee, fiigichaan Kuushicha dura in darbe. 24Daawit karra kellaa mandara sanaa isa gara keessaatii fi isa gara alaa gidduu taa'aa utuu jiruu, namichi inni naannoo mandaraa eegaa jiru bantii karra kellaa mandaraa sanatti ol ba'ee yommuu ilaale, kunoo, nama kophaa isaa fiigichaan dhufaa jiru tokko in arge. 25Eegduun sun sagalee isaa ol fuudhee, kana mootichatti in hime; mootichi immoo,<<Inni kophaa isaa dhufe yoo ta'e, misraachoo himu qaba>> jedhe; namichi fiigaa dhufe sunis isaanitti dhi'aachaa in adeeme. 26Kana booddee eegduun sun nama fiigaa dhufaa jiru tokkos immoo yommuu arge, namicha isa karra eegu gad waamee,<<Kunoo, namni kan biraa tokkos kophaa isaa fiigichaan dhufaa jira>> jedhe; ammas mootichi,<<Innis immoo misraachoo himu qaba>> jedhe. 27Eegduun sun,<<Fiigichi namicha isa duraa, fiigicha Ahimaaz ilma Zaadoq anatti fakkaata>> jedhe; mootichi immoo,<<Inni nama gaarii dha! Misraachoo fidee dhufaa jira>> jedhe.#19 15:36; 17:17 20 4:10

28Ahimaaz utuu hin turin sagalee isaa ol fuudhee mootichaan,<<Nagaa isaanii ti!>> jedhee, ulfina mootichaaf hamma lafa ga'utti in qoomma'e; itti dabalees,<<Yaa gooftaa ko, mootii ko, Waaqayyo gooftaan kee warra harka isaanii si irratti ol fudhatanitti karaa cufeera; inni haa galateeffamu!>> jedhe.

29Kana booddee mootichi,<<Abiishaalom dargaggeessichi nagaa dhaa>> Fayyaa dhaa?>> jedhee isa in gaafate; Ahimaaz immoo deebisee,<<Yo'aab yeroo garbicha kee nama Kuush tokko, ana garbicha kees erge, walmaruu namoota baay'ee argeera, garuu maal akka ta'e ani hin beekne>> jedhe*. 30Mootichi yommus,<<As gorii dhaabadhu!>> ittiin jedhe; Ahimaazis achi goree in dhaabate.#29 18:5

31Battaluma sanatti namni Kuush sun dhufee,<<Misraachoo! Yaa gooftaa ko mootichaa! Waaqayyo dhugaa kee baasee, har'a harka warra si irratti ka'an hundumaa si oolcheera!>> jedhe. 32Kana irratti mootichi nama Kuush sanaan,<<Abiishaalom dargaggeessichi nagaa dhaa>> Fayyaa dhaa?>> jedhee in gaafate; namichi Kuush immoo deebiseefii,<<Diinonni kee, warri si gooftaa koo mooticha irratti hamaadhaaf ka'an hundinuu, akkuma dargaggeessichaa haa ta'an!>> jedhe.

33Mootichi kana yommuu dhaga'e raafamee, gara kutaa isa bantii karra kellichaa irra jiruutti ol ba'ee in boo'e; yeroo ol ba'e,<<Yaa ilma ko, Abiishaalom! Yaa ilma ko, yaa ilma ko, Abiishaalom! Ani iddoo kee utuun du'eera ta'ee, anaaf wayya ture! Wayyoo! Yaa Abiishaalom ilma ko, ilma ko!>> jedha ture.

Currently Selected:

Macaafa Saamu'el Isa Lammaffaa 18: MacQul

Highlight

Copy